Parig-ona an Kongregasyon

“An mga singbahan [“kongregasyon,” NW] namurayaw . . . , ngan ginparig-on.”—BUHAT 9:31.

1. Ano an mahimo igpakiana mahitungod han “kongregasyon” han Dios?

 HA ADLAW han Pentekostes 33 K.P., kinarawat ni Jehova an usa nga grupo han mga disipulo ni Kristo sugad nga bag-o nga nasud, ‘an Israel han Dios.’ (Galasia 6:16) Inin dinihogan-han-espiritu nga mga Kristiano nagin “an singbahan [“kongregasyon,” NW] han Dios” liwat sugad han pagtawag han Biblia. (1 Korinto 11:22) Kondi, ano an nahiuupod hito? Paonan-o oorganisahon an “kongregasyon” han Dios? Paonan-o ito magios dinhi ha tuna, diin man naukoy an mga membro hito? Ngan paonan-o maaapektohan an aton kinabuhi ngan kalipay?

2, 3. Paonan-o ipinakita ni Jesus nga magigin organisado an kongregasyon?

² Sugad han gin-unabi na ha nahiuna nga artikulo, igintagna ni Jesus an pag-eksister hini nga kongregasyon han dinihogan nga mga sumurunod, ngan iya ginsidngan hi apostol Pedro: “Ha bawbaw hini nga bato [Jesu-Kristo] akon pagtitindugon an akon singbahan, ngan an mga ganghaan han impyerno diri makakadaog hito.” (Mateo 16:18) Dugang pa, samtang kaupod pa ni Jesus an mga apostol, iginsaysay niya an magigin paggios ngan kahikayan ha sulod han hirani na maestablisar nga kongregasyon.

³ Hi Jesus nagtutdo pinaagi han pulong ngan buhat nga may-ada mga membro han kongregasyon nga mangunguna. Bubuhaton nira ito pinaagi han pagserbi ha iba ha ira grupo. Hi Kristo nagsiring: “Maaram kamo nga an mga pinangilala nga mga gobernador ha mga Hentil, nagpakaginoo ha ira; ngan an ira mga kadagkuan nagamit hin kagamhanan ha ira. Kondi diri ini amo ha iyo; kondi kon hin-o an karuyag nga magin daku ha iyo, mahimo an iyo paramangno. Ngan kon hin-o an karuyag nga magin una ha iyo mahimo nga surugoon han ngatanan.” (Markos 10:42-44) Matin-aw, an kongregasyon han Dios diri kay mga indibiduwal nga nagsasarang ngan nahibubulag ha usa kag usa. Lugod, magigin organisado ito, nga an tagsa nga membro nagbubuhat ngan nakikigkomunikar ha usa kag usa.

4, 5. Kay ano nga masisiring naton nga an kongregasyon magkikinahanglan hin espirituwal nga instruksyon?

⁴ Ipinakita ni Jesus, nga magigin Ulo hiton nga “kongregasyon” han Dios, nga an iya mga apostol ngan an iba pa nga nahibaro tikang ha iya magkakaada espisipiko nga mga responsabilidad ngada ha iba pa nga membro han kongregasyon. Ano an ira bubuhaton? Usa nga importante nga toka amo an paghatag hin espirituwal nga instruksyon ha mga membro han kongregasyon. Hinumdumi nga an binanhaw nga hi Jesus, ha atubangan han pipira han iba nga mga apostol, nagsiring kan Pedro: “Simon, nga anak ni Jonas, nahigugma ka ba ha akon kapin pa ha ira hini? Hi Pedro binaton: “Oo, Ginoo, ikaw maaram, nga ako nahigugugma ha imo.” Hi Jesus siniring ha iya: “Tubungi an akon mga nati nga karnero. . . . Pasabsaba an akon mga karnero. . . . Pasabsaba an akon mga karnero.” (Juan 21:15-17) Importante gud ito nga toka!

⁵ Masasabtan naton tikang ha mga pulong ni Jesus nga adton gintitirok ngada ha kongregasyon iginpapariho ha mga karnero ha toril. Ini nga mga karnero—Kristiano nga kalalakin-an, kababayin-an, ngan kabataan—kinahanglan pakaunon ha espirituwal ngan bantayan ha husto nga paagi. Dugang pa, tungod kay ginsugo ni Jesus an ngatanan nga iya sumurunod nga tutdoan an iba ngan manhimo hin mga disipulo, bisan hin-o nga mga bag-ohan nga magigin iya mga karnero kinahanglan bansayon kon paonan-o bubuhaton ito nga sugo tikang ha Dios.—Mateo 28:19, 20.

6. Ano nga mga kahikayan an ginhimo ha bag-o la nga naorganisa nga “kongregasyon” han Dios?

⁶ Han naestablisar an kongregasyon han Dios,  adton mga membro hito regular nga nagkakatirok basi matutdoan ngan magdinasigay: “Nagdayon gihapon hira han igintututdo han mga apostol, ngan han paghiangbitay, ngan han pagpinitpinit han tinapay, ngan han mga pag-ampo.” (Buhat 2:42:46, 47) Usa pa nga makatirigamnan nga detalye ha makasaysayan nga rekord amo nga may-ada kwalipikado nga kalalakin-an nga igintoka basi bumulig ha pagmangno ha pipira nga praktikal nga mga butang. Waray hira pilia tungod han ira damu ka tuig nga pag-eskwela o teknikal nga mga kaabtik. Ini nga kalalakin-an “puno han espiritu ngan kinaadman.” An usa amo hi Esteban, ngan an asoy nagpapabug-at han iya pagin “tawo nga puno han pagtoo, ngan han espiritu santo.” Usa nga resulta han ira pagin organisado ha mga kongregasyon amo nga “an pulong han Dios tinubo; ngan an kadamu han mga tinon-an nagdugang gud ha Jerusalem.”—Buhat 6:1-7.

Kalalakin-an nga Ginagamit han Dios

7, 8. (a) An mga apostol ngan katigurangan ha Jerusalem nag-alagad sugad nga ano ha siyahan nga mga Kristiano? (b) Ano an resulta han iginhatag an instruksyon pinaagi han mga kongregasyon?

⁷ Natural la nga nanguna an mga apostol ha kahikayan han siyahan nga kongregasyon, kondi diri la hira an nanguna. Ha usa ka panahon, hi Pablo ngan an iya mga kaupod binalik ha Antiokia ha Sirya. An Buhat 14:27 nasiring: “Han ira pagduong, ngan han pagtiroka han mga singbahan, ira ipinanumat an ngatanan nga mga bagay, nga kanan Dios ginbuhat ha ira.” Samtang nakada pa hira hiton lokal nga kongregasyon, binangon an pakiana kon an Hentil ba nga mga tumuroo kinahanglan magpasirkumsisyon. Basi masulbad ito, ginpakadto hira Pablo ngan Bernabe ha “Jerusalem ngadto ha mga apostol ngan ha mga ansiano,” nga matin-aw nga nag-alagad sugad nga nagmamando nga lawas.—Buhat 15:1-3.

⁸ An Kristiano nga tigurang nga hi Jakobo, nga bugto ni Jesus ha iroy kondi diri apostol, amo an nanguna han “an mga apostol ngan mga ansiano nagtitirok tungod ha pag-usisa hini nga bagay.” (Buhat 15:6) Katapos han maopay nga paghisgot ngan pinaagi han bulig han baraan nga espiritu, nakahimo hira hin desisyon uyon ha Kasuratan. Ira iginpadara an desisyon pinaagi han surat ngadto ha lokal nga mga kongregasyon. (Buhat 15:22-32) Adton nakakarawat hini nga impormasyon inuyon ngan igin-aplikar ito. Ano an resulta? An kabugtoan naparig-on ngan nadasig. An Biblia  nagsusumat: “Busa, an mga singbahan nagmarig-on ha pagtoo, ngan nagtitikadamu ha adlaw-adlaw.”—Buhat 16:5.

9. Ano nga mga responsabilidad han kwalipikado nga Kristiano nga kalalakin-an an iginsasaysay han Biblia?

⁹ Kondi paonan-o magios an lokal nga mga kongregasyon adlaw-adlaw? Tagda, pananglitan, an mga kongregasyon ha isla han Kreta. Bisan kon damu han mga naukoy didto an may-ada maraot nga reputasyon, an iba nagbag-o ngan nagin totoo nga mga Kristiano. (Tito 1:10-12; 2:2, 3) Naukoy hira ha magkalain-lain nga syudad, ngan hirayo an ngatanan tikang ha nagmamando nga lawas ha Jerusalem. Kondi, diri ito daku nga problema, tungod kay an espirituwal nga “mga ansiano” ginpili ha tagsa nga lokal nga mga kongregasyon ha Kreta, sugad han ginbuhat ha iba nga lugar. Natuman han sugad nga kalalakin-an an mga kwalipikasyon nga mababasa naton ha Biblia. Ginpili hira sugad nga mga tigurang, o mga paramangno, nga makakahimo “paglaygay han putli nga pagturon-an, ngan pagsagdon ha mga maglaris.” (Tito 1:5-9; 1 Timoteo 3:1-7) An iba nga espirituwal nga kalalakin-an kwalipikado ha pagbulig ha mga kongregasyon sugad nga mga ministeryal nga surugoon, o mga diakono.—1 Timoteo 3:8-10, 12, 13.

10. Sumala ha Mateo 18:15-17, paonan-o sadang sulbaron an seryoso nga mga problema?

¹⁰ Ipinapakita ni Jesus nga maeksister an sugad nga kahikayan. Hinumdumi an asoy ha Mateo 18:15-17, diin nagsiring hiya nga usahay bangin bumangon an mga problema butnga han duha nga surugoon han Dios, kon an usa nakakasala kontra ha iba. An nabuhatan hin sala mahimo dumaop ha nakasala ngan “ipahayag ha iya an iya sala” nga hira la nga duha. Kon diri masulbad hito nga pitad an problema, mahimo tawagon an usa o duha nga maaram ha nahitabo basi makabulig. Ano man kon waray la gihapon masulbad an problema? Hi Jesus nagsiring: “Kon diri hiya mamati ha ira, igsumat man ha singbahan; ngan kon diri mamati ha singbahan, iihap mo hiya nga Hentil ngan parasukot hin buhis.” Hi Jesus nagsiring nga an mga Judio amo pa gihapon an “kongregasyon” han Dios, salit an iya mga pulong naaplikar ha ira ha tinikangan. a Kondi, kon maestablisar na an Kristiano nga kongregasyon, iaaplikar dida hito an instruksyon ni Jesus. Usa pa ini nga ebidensya nga an katawohan han Dios magkakaada organisado nga kongregasyon para ha pagparig-on ngan paggiya ha tagsa nga Kristiano.

11. Ano an bahin han mga tigurang ha pagsulbad han mga problema?

¹¹ Angayan la nga an katigurangan, o mga paramangno, an magrirepresentar ha lokal nga kongregasyon ha pagpanginano o pagsulbad han mga problema o ha pagdumara han mga kaso han pakasala. Uyon ito ha mga kwalipikasyon han mga tigurang nga gin-unabi ha Tito 1:9. Oo, an lokal nga mga tigurang diri-hingpit nga kalalakin-an, sugad la kan Tito, nga ginsugo ni Pablo ha mga kongregasyon basi ‘opayon an kulang nga mga bagay.’ (Tito 1:4, 5) Yana, antes pilion an iginrekomenda sugad nga mga tigurang, kinahanglan napamatud-an na nira an ira pagtoo ngan debosyon ha igo nga peryodo han panahon. Hito nga paagi an iba ha kongregasyon may-ada hinungdan nga sumarig ha giya ngan pagpanguna nga iginhahatag pinaagi hini nga kahikayan.

12. Ano an responsabilidad han mga tigurang ha kongregasyon?

¹² Ha mga tigurang ha kongregasyon ha Efeso, hi Pablo nagsiring: “Magtagam kamo ngahaw, ngan ha ngatanan nga kapanon, nga igintungod ha iyo han espiritu santo nga kamo amo an mga magmarangno, basi papanabsabon niyo an singbahan han Dios, nga pinalit han . . . kalugaringon nga dugo [han iya Anak].” (Buhat 20:28) An mga paramangno han kongregasyon yana ginpipili liwat ‘ha pagpasabsab ha singbahan han Dios.’ Kinahanglan mahigugmaon nga buhaton nira ito, nga diri nagigin mga agaron han panon. (1 Pedro 5:2, 3) An mga paramangno sadang mangalimbasog ha pagparig-on ngan pagbulig ha ‘ngatanan nga panon.’

 Magpabilin nga Duok ha Kongregasyon

13. Usahay, ano an bangin mahitabo ha kongregasyon, ngan kay ano?

¹³ An mga tigurang ngan an ngatanan nga iba pa ha kongregasyon mga diri-hingpit, salit ha panapanahon, nahitatabo an mga diri-pagsinabtanay o mga problema, sugad la ha siyahan nga siglo han presente pa an pipira han mga apostol. (Filipos 4:2, 3) An usa nga paramangno o an iba nga tawo bangin may-ada maisiring nga nakakainsulto, diri-buotan, o diri bug-os nga totoo. O bangin maghunahuna kita nga may nahitatabo nga diri-Kasuratanhon, kondi baga hin diri ito gintatadong han lokal nga mga tigurang, bisan kon maaram hira hito. Syempre, bangin ginpapanginano na an problema uyon ha Kasuratan ngan basado ha mga impormasyon nga diri naton hinbabaroan. Kondi bisan kon an kahimtang diri-Kasuratanhon, tagda ini: Ha usa ka panahon, nahitabo an seryoso nga sayop ha kongregasyon ha Korinto, usa nga kongregasyon nga hinigugma ni Jehova. Inabot an panahon nga iya ginsiguro nga mapanginano an problema, ha husto ngan marig-on nga paagi. (1 Korinto 5:1, 5, 9-11) Bangin magpakiana kita ha aton kalugaringon: ‘Kon naukoy ako ha Korinto hadto nga panahon, ano daw la an akon magigin reaksyon?’

14, 15. Kay ano nga an iba inundang ha pagsunod kan Jesus, ngan ano nga leksyon an igintututdo hito ha aton?

¹⁴ Tagda an usa pa nga posibilidad nga mahimo mahitabo ha kongregasyon. Pananglitan an usa ka tawo nakukurian ha pagsabot ngan pagkarawat han usa nga Kasuratanhon nga katutdoan. Bangin nagsaliksik na hiya ha Biblia ngan ha mga publikasyon nga igintatagana pinaagi han kongregasyon ngan nangaro hin bulig ha hamtong nga mga igkasi-Kristiano, ha mga tigurang pa ngani. Pero nakukurian la gihapon hiya ha pagsabot o pagkarawat han punto. Ano an mahimo niya buhaton? May-ada nahitabo nga sugad hito mga usa ka tuig antes mamatay hi Jesus. Siring niya nga hiya “an tinapay han kinabuhi” ngan basi mabuhi ha waray kataposan an usa ka tawo kinahanglan “kumaon han unod han Anak han tawo, ngan uminom han iya dugo.” Nakalisang ito ha pipira han iya mga disipulo. Imbes nga mangaro hin esplikasyon o mapailubon nga maghulat nga tatadungon ni Jehova an mga butang ha igo nga panahon, damu nga disipulo an “waray na pagkalakat upod [kan Jesus].” (Juan 6:35, 41-66) Kon nakadto kita didto, ano daw la an aton bubuhaton?

¹⁵ Ha moderno nga mga panahon, an iba inundang na ha pakig-upod ha lokal nga kongregasyon, naghuhunahuna nga maglulugaring na la hira ha pag-alagad ha Dios. Bangin nasiring hira nga tungod  ito kay naglain an ira buot, naghuhunahuna hira nga may-ada sayop nga diri gintatadong, o diri nira kinakarawat an usa nga katutdoan. Makatadunganon ba an ira ginbubuhat? Bisan kon totoo nga an tagsa nga Kristiano sadang magkaada personal nga relasyon ha Dios, diri kita makakagnigar nga ginagamit niya an bug-os-kalibotan nga kongregasyon, sugad han iya ginbuhat ha panahon han mga apostol. Dugang pa, ginamit ngan ginbendisyonan ni Jehova an lokal nga mga kongregasyon ha siyahan nga siglo, ngan nagtagana hiya hin kwalipikado nga mga tigurang ngan mga ministeryal nga surugoon para ha kaopayan han mga kongregasyon. Ito liwat an kahimtang yana.

16. Kon nasusulay an usa ha pagbaya ha kongregasyon, ano an sadang niya hunahunaon?

¹⁶ Kon inaabat han usa nga Kristiano nga makakasarig hiya ha iya la kalugaringon nga relasyon ha Dios, iginsasalikway niya an kahikayan nga igintagana han Dios—an bug-os-kalibotan nga kongregasyon ngan an lokal nga mga kongregasyon han katawohan han Dios. Bangin magsingba hiya nga naglulugaring o makig-upod ha pipira la nga igkasi-Kristiano, kondi hain na an kahikayan ha pagkaada hin mga tigurang ngan mga ministeryal nga surugoon ha kongregasyon? Makatirigamnan nga han nagsurat hi Pablo ha kongregasyon ha Kolosas ngan nagsugo nga basahon liwat ito nga surat ha Laodisea, iya gin-unabi an pagin ‘nakagamot ngan natukdaw kan Kristo.’ Adton nagpapabilin ha mga kongregasyon, diri adton nabulag, an magpapahimulos hini.—Kolosas 2:6, 7; 4:16.

Harigi Ngan Turumbanan han Kamatuoran

17. Ano an ipinapakita han 1 Timoteo 3:15 mahitungod han kongregasyon?

¹⁷ Ha siyahan nga surat ni apostol Pablo ha Kristiano nga tigurang nga hi Timoteo, iginsaysay niya an mga kwalipikasyon han mga tigurang ngan mga ministeryal nga surugoon ha lokal nga mga kongregasyon. Katapos gud hito, gin-unabi ni Pablo “an singbahan han buhi nga Dios,” nasiring nga ini “an harigi ngan turumbanan han kamatuoran.” (1 Timoteo 3:15) An bug-os nga kongregasyon han dinihogan nga mga Kristiano napamatud-an gud sugad nga harigi ha siyahan nga siglo. Ngan sigurado nga an nangunguna nga kahikayan para ha pagkarawat han tagsa nga Kristiano han sugad nga kamatuoran amo an pinaagi han lokal nga kongregasyon. Dida hito mababatian nira an kamatuoran nga igintututdo ngan dinidepensahan, ngan dida hito mapaparig-on hira.

18. Kay ano nga importante an mga katirok han kongregasyon?

¹⁸ Ha sugad man nga paagi, an bug-os-kalibotan nga Kristiano nga kongregasyon amo an balay han Dios, “an harigi ngan turumbanan han kamatuoran.” An aton regular nga pagtambong ngan pagkomento ha mga katirok ha aton lokal nga kongregasyon amo an nangunguna nga paagi nga madadasig kita, mapaparig-on ha aton relasyon ha Dios, ngan magin andam ha pagbuhat han iya kaburut-on. Han nagsurat hi Pablo ha kongregasyon ha Korinto, iginsentro niya an iya mensahe ha kon ano an ginsisiring ha sugad nga mga katirok. Nagsurat hiya nga hingyap niya nga an ginsiring ha ira mga katirok magin matin-aw ngan nasasabtan basi ‘maparig-on’ adton natambong. (1 Korinto 14:12, 17-19) Kita yana mapaparig-on kon kinikilala naton nga hi Jehova nga Dios an naghahatag hin awtoridad ha kahikayan ha pagkaada lokal nga mga kongregasyon ngan binubuligan niya ito.

19. Kay ano nga inaabat mo nga may utang nga kaburut-on ka ha iyo kongregasyon?

¹⁹ Oo, kon hingyap naton nga maparig-on sugad nga mga Kristiano, sadang kita magpabilin ha sulod han kongregasyon. Maiha na nga napamatud-an nga usa ito nga panalipod kontra ha palso nga mga katutdoan, ngan ginagamit ito han Dios basi an maopay nga sumat han iya Mesianiko nga Ginhadian maipahayag ha bug-os nga kalibotan. Oo, daku an ginhihimo han Dios pinaagi han Kristiano nga kongregasyon.—Efeso 3:9, 10.

[Footnote]

Nahinunumdoman Mo Ba?

• Kay ano nga sadang laoman naton nga gagamiton han Dios an mga kongregasyon dinhi ha tuna?

• Bisan kon diri-hingpit an mga tigurang, ano an ira ginbubuhat para ha kongregasyon?

• Paonan-o ka napaparig-on han lokal nga kongregasyon?

[Mga Pakiana]

[Retrato ha pahina 26]

An mga apostol ngan an katigurangan nga kalalakin-an ha Jerusalem nag-alagad sugad nga nagmamando nga lawas

[Retrato ha pahina 28]

An mga tigurang ngan mga ministeryal nga surugoon nakarawat hin instruksyon basi matuman nira an ira mga responsabilidad ha kongregasyon