Hilarom Ngan Nagpapadayon nga Kasakit

HININ bag-o la, usa nga parasaliksik an karuyag mahibaro kon paonan-o an paglabay han panahon nakakaapekto han inaabat han mga nasusubo ha kamatay han usa nga hinigugma. Nagpadara hiya hin mga questionnaire ha walo nga kag-anak nga namatayan hin mga anak mga tuig na an naglabay. Waray bumaton an ngatanan. Usa nga amay, hi Vladimir, nga namatayan hin anak lima ka tuig na an naglabay, nagsiring nga kinukurian pa gihapon hiya ha pag-istorya mahitungod han iya anak. a

An sugad nga nagpapadayon nga kasubo komon ha mga namatayan nga kag-anak. Napulo ka tuig na an naglabay, nalumos an 18 anyos nga anak ni William. Hiya nagsurat: “Inaabat ko pa gihapon an kasakit, ngan diri ito mawawara samtang buhi pa ako.” Lima ka tuig tikang mamatay an anak ni Lucy tungod hin diri linalaoman nga sakit, hiya nagsurat: “Han siyahan nga pipira ka adlaw, nahuhunahuna ko pirme nga diri ito tinuod. Inabat ko nga baga hin ginngangarat ako salit nakakamata dayon ako. Paglabay hin pipira ka panahon, nasantop ko nga tinuod ito, nga diri na hiya mauli. Namatay an akon anak lima na ka tuig an naglabay, kondi usahay, kon nag-uusahan ako, natuok pa gihapon ako.”

Kay ano nga an nagtataguminatay nga mga kag-anak sugad kanda Vladimir, William, ngan Lucy, naabat hin hilarom ngan nagpapadayon nga kasakit? Aton tagdon an pipira nga hinungdan.

Kay Ano nga Makasurubo Gud Ito?

Kon may natatawo nga bata ha pamilya, naieksperyensyahan han mga kag-anak an waray kapariho nga kalipay. Bisan la an pagkapot ha ira minasus-an, pagkinita ha iya kon nakaturog hiya, o pagkita han iya hiyom, naghahatag ha ira hin duro nga kalipay ngan katagbaw. Ginpapaura han mahigugmaon nga kag-anak an ira anak. Ira ginbabansay hira nga gumawi hin husto ngan magin matinalahuron. (1 Tesalonika 2:7, 11) Samtang nag-uuswag an mga anak tungod hini nga mga pangalimbasog, nalilipay an mga kag-anak ngan nagtitikang magkaada hin dagku nga hingyap para ha ira.

An mapinairon nga mga kag-anak nagtatrabaho gud para ira mga anak. Bangin pirme hira maggahin hin kwarta o materyal nga mga butang basi mabuligan an ira mga anak ha pagtikang han ira kalugaringon nga pamilya ha tidaraon. (2 Korinto 12:14) An ira paggahin hin daku nga emosyon, panahon, kusog, ngan kwarta nagpapatin-aw ha usa nga punto—an mga kag-anak nagpapadaku ha ira mga anak basi mabuhi, diri mamatay. Kon namamatay an anak, diri kompleto an pagpadaku ha iya, ngan diri natutuman an mga hingyap han mga kag-anak para ha iya. Nauutod an mapaso nga gugma ngan pagbati han mga kag-anak para ha ira anak tungod han baga hin diri-nakukuha  nga ulang, an kamatayon. An lugar ha ira kasingkasing nga makausa gin-okuparan han ira anak bakante na yana. Salit naabat an mga kag-anak hin duro nga kasubo nga diri masayon mawara.

Ginpapamatud-an han Biblia nga an nagtataguminatay nga kag-anak nakakaeksperyensya hin duro ngan nagpapadayon nga kasakit. Ha pagsaysay han Biblia han nahitabo han nakabati an patriarka nga hi Jakob nga ginpatay an iya anak nga hi Jose, ito nasiring: “Ginriknit ni Jakob an iya panapton, ngan nagsul-ot hin sako ha iya mga taludtod, ngan nagminatay tungod han iya anak ha kadam-an nga adlaw. Ngan an ngatanan nga mga anak nga kalalakin-an niya ngan an ngatanan nga mga anak nga kababayin-an nanmuhat ha paglipay ha iya; kondi waray hiya alagad nga hiya paglipayon; ngan hiya siniring: Kay ako malusad ha Sheol [o, an lubnganan] nga nagmiminatay ha akon anak.” Paglabay hin mga tuig, nagtataguminatay pa gihapon hi Jakob, kay kahuna niya patay na an iya anak. (Genesis 37:34, 35; 42:36-38) An usa pa nga ehemplo ha Biblia amo an mahitungod ha matinumanon nga hi Noemi nga nakaeksperyensya hin kamatyi hin duha nga anak. Tungod han iya duro nga kasubo, karuyag niya liwanan an iya ngaran nga Noemi, nangangahulogan hin “Akon Nalilipayan,” ha Mara, nangangahulogan hin “Kapait.”—Rut 1:3-5, 20, 21.

Kondi, an Biblia diri la naghihisgot han pagtaguminatay nga naieksperyensyahan han mga kag-anak. Ipinapakita liwat hito kon ha ano nga paagi naghahatag hi Jehova hin kusog ha mga nagtataguminatay. Ha masunod nga artikulo, aton paghihisgotan an pipira nga paagi nga ginagamit han Dios ha pagtagana hin pagliaw ha mga nagtataguminatay.

[Footnote]