Mga Batan-on—Nakakaapekto Kamo ha Kasingkasing han Iyo mga Kag-anak

“WARAY ko na kalipay nga labaw hini, ha pamati nga an akon mga anak nanggagawi ha kamatuoran,” ini an iginsurat han lagas na nga hi apostol Juan. (3 Juan 4) Bisan kon an mga anak nga gin-uunabi hini nga bersikulo nagtutudlok ha Kristiano nga mga disipulo, hisasabtan dayon han mahadlukon ha Dios nga kag-anak an mga pagbati nga iginpahayag ni Juan. Sugad la nga an mga kag-anak may-ada daku nga epekto ha kinabuhi han ira mga anak, an mga anak liwat makakaapekto hinduro ha kinabuhi han ira mga kag-anak.

Hi Hadi Salomon han Israel maaram nga an mga anak nakakaapekto gud ha ira mga kag-anak. Hiya nagsurat: “An makinaadmananon nga anak nakakalipay han amay, kondi an anak nga lurong nakakabug-at han iya iroy.” (Proberbios 10:1) Salit, an ngatanan nga anak—bisan an mga edaran na—sadang maghunahuna nga an ira mga paggios nakakaapekto gud ha ira mga kag-anak. Kay ano nga angayan buhaton ini?

Hunahunaa la an pag-ataman ha imo han imo mahadlukon ha Dios nga mga kag-anak ha pagpadaku ha imo! An ira mga kabaraka ngan pag-ampo para ha imo, nagtikang maiha na antes ka matawo. Han katawo mo na, nalipay hira ha duok nga pakig-upod ha imo ngan posible gud nga nagpasalamat ha Dios para han maopay hinduro, kondi seryoso nga pribelihiyo ngan responsabilidad sugad nga kag-anak. Mag-aataman na hira hin minasus-an ngan sugad nga mga alagad ni Jehova, seryoso nga ginkarawat nira ini.

Tungod kay totoo nga Kristiano an imo mga kag-anak, namiling hira ha Biblia ngan ha mga literatura nga basado ha Biblia hin matataporan nga giya, ngan nangaro hira hin sagdon ha mga nagpadaku na hin mga anak. Padayon liwat nga ira igin-aampo ha Dios an ira kabaraka. (Hukom 13:8) Samtang nagtitikadaku ka, maaram hira han imo mag-opay nga kalidad, ngan han imo liwat mga kaluyahan. (Job 1:5) Han tinedyer ka na, binangon an bag-o nga mga problema. Usahay bangin nagin rebelyoso ka, ngan an imo mga kag-anak dugang nga nag-inampo, nagsaliksik ngan nagpinamalandong kon paonan-o ka mabubuligan nga magpadayon ha pag-alagad ha imo langitnon nga Amay, hi Jehova.

Diri gud mawawara an gugma han imo mga kag-anak ha imo. Padayon nga nababaraka hira ha kaopayan han imo panlawas, panhunahuna, pagbati, ngan espirituwal bisan kon adulto ka na. Kondi, ha ngatanan nga panahon, an imo kag-anak maaram nga kinahanglan ka magdesisyon  para ha imo kalugaringon, ngan waray kasigurohan kon ano an imo magigin kinabuhi. Ha kataposan, ikaw an magdidesisyon kon ano an imo hihimoon ha imo kinabuhi.

Kon ‘labaw nga malilipay’ an mga kag-anak ha pakabati nga an ira mga anak “nanggagawi ha kamatuoran,” diri ba makatadunganon nga makasurubo hinduro ito para ha ira kon an kabaliktaran an mahitabo? Oo, an mga anak nga sarawayon nakakapasubo ha ira mga kag-anak. Hi Salomon nagsiring: “An anak nga lurong amo an kasub-anan ha iya amay, ngan kapaitan ha iya nga nagpakatawo ha iya.” (Proberbios 17:25) Nasusubo gud an mga kag-anak kon an ira anak nabaya ha pagsingba ha matuod nga Dios!

Matin-aw, may-ada kamo daku nga impluwensya ha sulod ngan gawas han iyo pamilya. An iyo panggawi nakakaapekto gud ha kasingkasing han iyo mga kag-anak. Kon igsalikway niyo an Dios ngan an Iya mga prinsipyo, masusubo an iyo mga kag-anak. Kondi, kon magpapabilin kamo nga matinumanon ngan masinugtanon kan Jehova, malilipay hira. Magin determinado gud kamo nga lipayon an kasingkasing han iyo mga kag-anak! Waray na mas birilhon pa nga regalo nga iyo maihahatag ha mga nagpadaku, nagmamangno, ngan nahigugma ha iyo.