Mga Batan-on—Pangalimbasog Gud ha Pagkab-ot hin mga Tumong nga Nagpapasidungog ha Dios

“Bansaya an imo kalugaringon nga an imo tumong amo an diosnon nga debosyon.”—1 Timoteo 4:7, NW.

1, 2. (a) Kay ano nga ginkumendasyonan ni Pablo hi Timoteo? (b) Paonan-o an mga batan-on yana ‘nagbabansay ha ira kalugaringon nga an ira tumong amo an diosnon nga debosyon’?

 “WARAY ko iba nga tawo nga may sugad ha iya nga hunahuna nga nagmamangno gud hin totoo ha iyo kahimtangan. . . . Sugad ha usa nga bata nga nag-aalagad ha amay, sugad man hiya nag-aalagad upod ha akon ha pagpasarang han maopay nga sumat.” (Filipos 2:20, 22) Iginlakip ni apostol Pablo inin mahigugmaon nga kumendasyon ha iya surat ha siyahan-siglo nga mga Kristiano ha Filipos. Hin-o an iya gin-uunabi? Hi Timoteo, an batan-on nga kaupod niya ha pagbiyahe. Handurawa an kalipay ni Timoteo hini nga pamatuod han gugma ngan pagsarig ni Pablo!

² Tikang pa hadto, an mahadlukon-ha-Dios nga mga batan-on sugad kan Timoteo presyoso gud nga bendisyon ha katawohan ni Jehova. (Salmo 110:3) Yana, an organisasyon han Dios may-ada damu nga batan-on nga nag-aalagad sugad nga mga payunir, misyonero, boluntaryo ha konstruksyon, ngan mga Bethelite. Darayawon gud liwat adton madasigon nga nakikigbahin ha mga buruhaton ha kongregasyon samtang nagmamangno hira han iba nga mga responsabilidad. An sugad nga mga batan-on naabat hin totoo nga katagbaw tungod kay nangangalimbasog hira nga makab-ot an mga tumong nga nagpapasidungog ha aton langitnon nga Amay, hi Jehova. Ira gud ‘ginbabansay an ira kalugaringon nga an ira tumong amo an diosnon nga debosyon.’—1 Timoteo 4:7, 8, NW.

3. Ano nga mga pakiana an paghihisgotan hini nga artikulo?

³ Sugad nga batan-on, nangangalimbasog ka ba ha pagkab-ot hin espisipiko nga espirituwal nga mga tumong? Diin ka makakaagi hin bulig ngan pagdasig ha pagbuhat hito? Paonan-o mo maaatohan an mga pag-ipit hinin materyalistiko nga kalibotan? Ano nga mga bendisyon an malalaoman mo nga makarawat kon nangangalimbasog ka ha pagkab-ot hin mga tumong nga nagpapasidungog ha Dios? Kitaon naton an mga baton hini nga mga pakiana pinaagi han paghisgot han kinabuhi ngan buruhaton ni Timoteo.

An Kinabuhi ni Timoteo

4. Isaysay hin halipot an kinabuhi ni Timoteo sugad nga Kristiano.

⁴ Hi Timoteo nagdaku ha Listra, usa ka gutiay nga bungto ha Romano nga probinsya han Galasia. Posible nga hinbaroan niya an mahitungod han Kristianidad han tinedyer pa la hiya han nagsangyaw hi Pablo ha Listra han mga 47 K.P. Hi Timoteo madagmit nga nagkaada maopay gud nga reputasyon ha Kristiano nga kabugtoan ha iya kongregasyon. Han binalik hi Pablo ha Listra paglabay hin duha ka tuig ngan hinbaroan niya an pag-uswag ni Timoteo, ginpili niya hiya sugad nga kaupod ha pagmisyonero. (Buhat 14:5-20; 16:1-3) Samtang naghahamtong hi Timoteo, igintapod ha iya an mas dagku nga mga responsabilidad, upod na an importante nga mga misyon ha pagparig-on ha kabugtoan. Han nagsurat hi Pablo kan Timoteo tikang ha prisohan ha Roma han mga 65 K.P., nag-aalagad hi Timoteo sugad nga Kristiano nga tigurang ha Efeso.

5. Sumala ha 2 Timoteo 3:14, 15, ano an duha nga butang nga nakabulig kan Timoteo nga magdesisyon ha pagkab-ot hin espirituwal nga mga tumong?

⁵ Matin-aw nga ginpili ni Timoteo an pagkab-ot  hin espirituwal nga mga tumong. Kondi ano an nagpagios ha iya nga buhaton ito? Ha ikaduha nga surat ni Pablo kan Timoteo, gin-unabi niya an duha nga butang. “Pagrig-on ha mga bagay nga imo gintuton-an, ngan iginpatapod ha imo, kay hinbaroan mo kon hin-o nga mga tawo an imo ginton-an hini; ngan tikang ha imo kabata hinbaroan mo an mga baraan nga mga surat.” (2 Timoteo 3:14, 15) Siyahan, aton usisahon an impluwensya han iba nga mga Kristiano nga nakabulig kan Timoteo ha iya mga desisyon.

Pahimulusi an Mag-opay nga Impluwensya

6. Ano nga pagbansay an nakarawat ni Timoteo, ngan paonan-o hiya ginios?

⁶ Nagdaku hi Timoteo ha panimalay nga magkaiba an relihiyon. An iya amay usa nga Griego, ngan an iya iroy nga hi Eunice ngan an iya apoy nga hi Loida mga Judio. (Buhat 16:1) Tikang ha pagkabata ni Timoteo, gintutdoan hiya nira Eunice ngan Loida han mga kamatuoran tikang ha Hebreo nga Kasuratan. Han nakombirte hira ha Kristianidad, sigurado nga binulig hira ha pagkombinse ha iya nga tumoo ha Kristiano nga mga katutdoan. Matin-aw, bug-os nga ginpahimulosan ni Timoteo inin maopay gud nga pagbansay. Hi Pablo nagsiring: “Nahinunumdoman ko an waray ruhaduha nga pagtoo nga aada ha imo; nga siyahan nag-ukoy ha imo apoy nga babaye nga hi Loida, ngan ha imo iroy nga hi Eunice; ngan, sayod ako, nga aada man ini ha imo.”—2 Timoteo 1:5.

7. Ano nga bendisyon an napapahimulosan han damu nga batan-on, ngan ano an kapulsanan hini ha ira?

⁷ Yana, damu nga batan-on an nagpapahimulos ha pagkaada mahadlukon-ha-Dios nga mga kag-anak ngan mga apoy nga, pariho kan Loida ngan kan Eunice, kinikilala nira an pagkaimportante han espirituwal nga mga tumong. Hi Samira, pananglitan, nahinunumdom pa han mag-iha nga mga pakiistorya niya ha iya mga kag-anak han tinedyer pa hiya. “Gintutdoan ako nira Nanay ngan Tatay nga subaron an panhunahuna ni Jehova ha mga butang ngan magin prayoridad an pagsangyaw,” siring niya. “Gindadasig nira ako pirme nga mag-alagad hin bug-os-panahon.” Ginsunod ni Samira an mga pagdasig han iya mga kag-anak ngan yana nagpapahimulos hiya han pribilehiyo ha pag-alagad sugad nga membro han pamilya han Bethel ha iya nasud. Kon gindadasig ka han imo mga kag-anak nga isentro an imo atensyon ha espirituwal nga mga tumong, pamalandonga hin maopay an ira sagdon. Karuyag gud nira nga magmalipayon an imo kinabuhi.—Proberbios 1:5.

8. Paonan-o nagpahimulos hi Timoteo tungod han pakig-upod ha makaparig-on nga mga igkasi-Kristiano?

⁸ Importante liwat nga makig-upod ka ha makaparig-on nga mga igkasi-Kristiano. Hi Timoteo nakilala gud han mga tigurang ha iya kongregasyon ngan hadton ha Ikonio, mga 30 kilometro tikang ha ira bungto. (Buhat 16:1, 2) Nagin duok nga sangkay hiya ni Pablo, usa nga aktibo gud nga tawo. (Filipos 3:14) Ipinapakita han mga surat ni Pablo nga malipayon nga kinakarawat ni Timoteo an sagdon ngan madagmit nga ginsusubad niya an mga susbaranan ha pagtoo. (1 Korinto 4:17; 1 Timoteo 4:6, 12-16) Hi Pablo nagsurat: “Nagsugot ka ha akon tutdo, gawi, tinutuyo, pagtoo, pag-antos, gugma, pagpailob.” (2 Timoteo 3:10) Oo,  ginsunod gud ni Timoteo an susbaranan ni Pablo. Ha sugad man nga paagi, kon magin duok ka ha kabugtoan ha kongregasyon nga marig-on ha espirituwal, mabubuligan ka ha pagkaada hin mag-opay nga espirituwal nga mga tumong.—2 Timoteo 2:20-22.

Pag-admi “an Baraan nga mga Surat”

9. Gawas pa han pagpili hin husto nga mga kaupod, ano an kinahanglan mo buhaton basi ‘mabansay mo an imo kalugaringon nga an imo tumong amo an diosnon nga debosyon’?

⁹ An pagkab-ot ba hin espirituwal nga mga tumong resulta la han pagpili hin husto nga mga kaupod? Diri. Pariho kan Timoteo, kinahanglan usisahon mo hin maopay an “baraan nga mga surat.” Bangin diri masayon ha imo an pag-aram, kondi hinumdumi nga hi Timoteo kinahanglan ‘magbansay ha iya kalugaringon nga an iya tumong amo an diosnon nga debosyon.’ An mga atleta agsob nga nagbabansay hinduro ha sulod hin damu ka bulan basi makab-ot an ira tumong. Ha sugad man nga paagi, an pagkab-ot hin espirituwal nga mga tumong nagkikinahanglan hin pagsakripisyo ngan seryoso nga pangalimbasog. (1 Timoteo 4:7, 8, 10) ‘Kondi paonan-o an pag-aram ha Biblia makakabulig ha akon nga makab-ot an akon mga tumong?’ bangin magpakiana ka. Aton paghisgotan an tulo nga paagi.

10, 11. Kay ano nga an Kasuratan magpapagios ha imo ha pagkab-ot hin espirituwal nga mga tumong? Paghatag hin usa nga ehemplo.

¹⁰ Siyahan, ipapasilsil ha imo han Kasuratan an husto nga hinungdan ha paggios. Iginpapahayag hito an makaruruyag nga personalidad han aton langitnon nga Amay, an iya gihitaasi nga buhat han gugma para ha aton, ngan an waray kataposan nga mga bendisyon nga igin-aandam niya para ha iya matinumanon nga mga surugoon. (Amos 3:7; Juan 3:16; Roma 15:4) Samtang nagdudugang an imo kahibaro mahitungod kan Jehova, magtutubo man an imo gugma ha iya ngan an imo hingyap nga igdedikar ha iya an imo kinabuhi.

¹¹ Damu nga batan-on nga Kristiano an nasiring nga ginkikinahanglan gud an regular nga personal nga pag-aram ha Biblia basi mabuligan hira nga magin seryoso ha kamatuoran. Hi Adele, pananglitan, nagdaku ha Kristiano nga panimalay kondi waray pa gud magkaada hin espirituwal nga mga tumong. “Igin-uupod ako han akon mga kag-anak ha Kingdom Hall,” siring niya, “kondi waray ako personal nga pag-aram ngan diri namamati ha mga katirok.” Katapos mabawtismohan an iya magurang nga babaye, mas nagin seryoso na hi Adele ha kamatuoran. “Gintikangan ko an pagbasa han bug-os nga Biblia. Nagbabasa ako hin gutiay ngan katapos nagsusurat hin komento mahitungod han akon pa la nabasa. May-ada pa ako yana han ngatanan ko nga nota. Natapos ko basahon an Biblia ha sulod hin usa ka tuig.” Sugad nga resulta, napagios hi Adele nga igdedikar an iya kinabuhi kan Jehova. Bisan kon may-ada hiya grabe nga problema ha pisikal, yana usa na hiya nga payunir, o bug-os-panahon nga ebanghelisador.

12, 13. (a) Ano nga mga pagbag-o an mahihimo han usa nga batan-on pinaagi han bulig han pag-aram ha Biblia, ngan paonan-o? (b) Paghatag hin mga ehemplo han praktikal nga kinaadman nga aada ha Pulong han Dios.

¹² Ikaduha, an Biblia mabulig ha imo ha paghimo hin ginkikinahanglan nga mga pagbag-o ha imo personalidad. Hi Pablo nagsiring kan Timoteo nga “an ngatanan nga mga baraan nga surat nga ginpakaaghat han Dios may kapulsanan man ha pagtututdoan, ha pagbadlong, ha pagsaway, ha panutdoan  nga ha katadongan: basi nga an tawo han Dios mahingpit, ngan maandam tungod ha ngatanan nga maopay nga buhat.” (2 Timoteo 3:16, 17) Pinaagi han regular nga pamalandong ha mga butang nga may kalabotan ha Pulong han Dios ngan pinaagi han pag-aplikar han mga prinsipyo han Biblia, tutugotan mo an espiritu han Dios nga magputli han imo personalidad. Mabulig ito ha imo nga magpatubo hin mag-opay nga mga kalidad, sugad han pagpaubos, pagkamapinadayunon, pagkamaduruto, ngan putli nga gugma ha mga igkasi-Kristiano. (Salmo 77:12; 1 Timoteo 4:15) Hi Timoteo may-ada hini nga mga kalidad, ngan tungod hito nakabulig gud hiya kan Pablo ngan ha mga kongregasyon nga iya ginserbihan.—Filipos 2:20-22.

¹³ Ikatulo, an Pulong han Dios sugad hin usa nga bodega han praktikal nga kinaadman. (Salmo 1:1-3; 19:7; 2 Timoteo 2:7; 3:15) Mabulig ito ha imo nga magin maaramon ha pagpili han imo mga sangkay, pilion an maopay nga kaliawan, ngan atubangon an damu pa nga makuri nga mga desisyon. (Genesis 34:1, 2; Salmo 119:37; 1 Korinto 7:36) Importante an paghimo hin maaramon nga mga desisyon yana basi makab-ot mo an imo espirituwal nga mga tumong.

“Pakig-away hin Maopay nga Pakig-away”

14. Kay ano nga diri gud masayon an pagkab-ot hin espirituwal nga mga tumong?

¹⁴ An paghatag hin prayoridad ha mga tumong nga nagpapasidungog kan Jehova amo an pinakamaaramon nga mahihimo mo, kondi diri gud ito masayon. Pananglitan, kon kinahanglan magpili ka hin karera, bangin umatubang ka hin daku nga pag-ipit tikang ha imo mga paryente, mga kaedad, ngan ha sinsero nga mga magturutdo nga natoo nga an hitaas nga edukasyon ngan daku-an-sweldo nga karera amo an yawi ha totoo nga kalamposan ngan kalipay. (Roma 12:2) Pariho kan Timoteo, kinahanglan mo ‘makig-away hin maopay nga pakig-away ha pagtoo’ basi ‘madakop an kinabuhi nga waray kataposan’ nga karuyag ihatag ha imo ni Jehova.—1 Timoteo 6:12; 2 Timoteo 3:12.

15. Ano nga pagkontra an posible nga gin-atubang ni Timoteo?

¹⁵ Kon an diri-tumuroo nga mga kapamilya diri nauyon ha imo mga desisyon, an pagsari mahimo magin mas makuri pa gud. Posible nga kinahanglan malamposan ni Timoteo an sugad nga pagkontra. Sumala ha usa nga libro, an pamilya ni Timoteo posible nga “kaapi han edukado ngan riko nga grupo ha ira komunidad.” Bangin ginlalaoman han iya amay nga magkaada hiya hitaas nga edukasyon ngan igpapadayon niya an negosyo han pamilya. a Mahahanduraw mo an reaksyon han amay ni Timoteo han hinbaroan niya nga ginpili ni Timoteo an mga peligro ngan kawaray kasigurohan ha pinansyal han pagmisyonero upod ni Pablo!

16. Paonan-o nalamposan han usa nga batan-on an pagkontra han iya kag-anak?

¹⁶ An batan-on nga mga Kristiano yana naatubang hin pariho nga mga problema. Hi Matthew, nga nag-aalagad ha usa nga sanga nga opisina han mga Saksi ni Jehova, nasiring: “Han nagtikang ako magpayunir, nasubo gud hi Tatay. Inabat niya nga ‘ginkaragan’ ko an akon edukasyon pinaagi han pagtrabaho sugad nga dyanitor basi makasuporta ha akon pagpayunir. Gintamay niya ako, ginpapahinumdom ako nga daku gud unta an akon sweldo kon bug-os-panahon nga magtatrabaho ako.” Paonan-o nalamposan ni Matthew ito nga pagkontra? “Ginsunod ko gud an akon eskedyol ha pagbasa han Biblia ngan pirme nag-aampo, labi na ha mga takna nga masayon la magpaso an akon ulo.” Ginbalosan an determinasyon ni Matthew. Paglabay han panahon, nag-opay an iya relasyon ha iya amay. Nagin mas duok liwat hi Matthew kan Jehova. “Nakita ko nga hi Jehova nagtatagana, nagdadasig, ngan nagpapanalipod ha akon tikang ha diri-maaramon nga mga desisyon,” siring ni Matthew. “Diri ko maieksperyensyahan ini nga mga butang kon waray ako mangalimbasog ha pagkab-ot hin espirituwal nga mga tumong.”

Padayon nga Isentro an Atensyon ha Espirituwal nga mga Tumong

17. Paonan-o bangin sayop nga ulangan han iba adton nagpaplano sumulod ha bug-os-panahon nga pag-alagad? (Mateo 16:22)

¹⁷ An diri-tinuyo nga ulang ha imo pagkab-ot hin espirituwal nga mga tumong bangin magtikang pa ngani ha mga igkasi-tumuroo. ‘Kay ano nga magpapayunir ka pa?’ bangin magpakiana an iba. ‘Puydi ka magkinabuhi hin normal ngan  makakagsangyaw ka pa gihapon. Mas maopay kon magkaada ka trabaho nga daku an sweldo ngan sigurado an imo pinansyal nga kalamposan.’ Bangin baga hin praktikal ini nga sagdon, kondi kon susundon mo ito, mababansay mo gud ba an imo kalugaringon nga an imo tumong amo an diosnon nga debosyon?

18, 19. (a) Paonan-o ka makakagpadayon ha pagsentro han imo atensyon ha espirituwal nga mga tumong? (b) Isaysay kon ano nga mga sakripisyo an ginhihimo mo para ha Ginhadian sugad nga batan-on.

¹⁸ An iba nga mga Kristiano ha panahon ni Timoteo matin-aw nga may-ada pariho nga panhunahuna. (1 Timoteo 6:17) Basi mabuligan hi Timoteo nga padayon nga isentro an iya atensyon ha espirituwal nga mga tumong, gindasig hiya ni Pablo, nga nasiring: “Waray sundalo nga nag-aalagad nga nagsasamok ha iya kalugaringon ha mga pagpatigayon hini nga kinabuhi; basi ha paglipay hadton kinarawat ha iya ha pagkasundalo.” (2 Timoteo 2:4) An sundalo nga aada ha aktibo nga buruhaton diri puydi maulang han mga tinguha han mga sibilyan. An iya kinabuhi ngan an kinabuhi han iba nadepende ha iya pagin andam pirme ha pagtuman han mga sugo han iya kumander. Sugad nga sundalo ni Kristo, kinahanglan usa la liwat an imo hunahunaon, ngan ayaw samoka an imo kalugaringon ha diri-kinahanglanon nga pagtinguha hin materyal nga mga butang nga makakapugong ha imo ha bug-os nga pagtuman han imo nagluluwas-kinabuhi nga ministeryo.—Mateo 6:24; 1 Timoteo 4:16; 2 Timoteo 4:2, 5.

¹⁹ Imbes nga magin tumong an mahimyang nga kinabuhi, patuboa an nagsasakripisyo-ha-kalugaringon nga disposisyon. “Magin andam ha pagsalikway han mga kahimyang ha kinabuhi, sugad nga kaapi han kasundalohan ni Kristo Jesus.” (2 Timoteo 2:3, The English Bible in Basic English) Han nakikig-upod hi Timoteo kan Pablo, hinbaroan niya an sekreto han pagin kontento bisan ha pinakamakuri nga mga kahimtang. (Filipos 4:11, 12; 1 Timoteo 6:6-8) Mahihimo mo liwat ito. Disidido ka ba ha pagsakripisyo para ha Ginhadian?

Mga Bendisyon Yana Ngan ha Tidaraon

20, 21. (a) Ihulagway an pipira han mga bendisyon nga resulta han pangalimbasog ha pagkab-ot hin espirituwal nga mga tumong. (b) Determinado ka nga buhaton an ano?

²⁰ Mga 15 ka tuig nga nagbuhat hi Timoteo sugad nga duok nga kaupod ni Pablo. Nakita mismo ni Timoteo an kaorganisa han bag-o nga mga kongregasyon samtang an maopay nga sumat nagsasarang haros ha bug-os nga norte han Mediteranyo. An iya kinabuhi mas makalilipay ngan makapatagbaw kay han magigin kahimtang niya unta kon ginpili niya an “normal” nga pagkinabuhi. Kon mangangalimbasog ka ha pagkab-ot hin espirituwal nga mga tumong, makakarawat mo liwat an presyoso gud nga espirituwal nga mga bendisyon. Magigin duok ka kan Jehova ngan hihigugmaon ngan tatahuron ka han imo mga igkasi-Kristiano. Imbes han kasakit ngan kapakyasan nga resulta han pangalimbasog ha pagkaada materyal nga bahandi, maieksperyensyahan mo an totoo nga kalipay nga resulta han diri-hakugnon nga paghatag. Ngan labaw ha ngatanan, imo ‘madadakop an kinabuhi nga totoo’—kinabuhi nga waray kataposan ha paraiso nga tuna.—1 Timoteo 6:9, 10, 17-19; Buhat 20:35.

²¹ Salit, mahigugmaon nga gindadasig ka namon nga tikangan na dayon an pagbansay ha imo kalugaringon nga an imo tumong amo an diosnon nga debosyon, kon waray mo pa buhata ito. Magin duok ka ha kabugtoan ha kongregasyon nga makakabulig ha imo nga makab-ot an espirituwal nga mga tumong, ngan pangaro hin giya tikang ha ira. Himoa nga prayoridad an regular nga personal nga pag-aram ha Pulong han Dios. Magin determinado nga atohan an materyalistiko nga espiritu hini nga kalibotan. Ngan hinumdumi pirme nga an Dios “nga nahatag ha aton hin kahuraan ha ngatanan ha pagkalipay” nagsasaad ha imo nga mahimo ka magkaada hin hura nga mga bendisyon yana ngan ha tidaraon kon pipilion mo an mga tumong nga nagpapasidungog ha Iya.—1 Timoteo 6:17.

[Footnote]

Nahinunumdoman Mo Ba?

• Diin makakabiling an mga batan-on hin bulig ha pagkab-ot hin espirituwal nga mga tumong?

• Kay ano nga importante gud an maopay nga pag-aram ha Biblia?

• Paonan-o maaatohan han mga batan-on an materyalistiko nga impluwensya hini nga kalibotan?

• Ano nga mga bendisyon an resulta han pangalimbasog ha pagkab-ot hin espirituwal nga mga tumong?

[Mga Pakiana]

[Retrato ha pahina 24]

Hi Timoteo nangalimbasog ha pagkab-ot hin mag-opay nga mga tumong

[Mga Retrato ha pahina 25]

Ano nga maopay nga mga impluwensya an nakabulig kan Timoteo?

[Mga Retrato ha pahina 26]

Nangangalimbasog ka ba ha pagkab-ot hin espirituwal nga mga tumong?