Mga Pakiana Tikang ha mga Magbarasa

San-o matatapos an pagtawag ha mga Kristiano para ha langitnon nga paglaom?

An Biblia waray maghatag hin espisipiko nga baton hito nga pakiana. Kondi maaram kita nga an pagdihog ha mga disipulo ni Jesus nga may paglaom nga makakarawat han ira langitnon nga panurundon nagtikang han 33 K.P. (Buhat 2:1-4) Maaram liwat kita nga han namatay na an mga apostol, an totoo nga dinihogan nga Kristiano, an “mga trigo,” ‘nagtubo dungan’ ha palso nga mga Kristiano, an “mga lakatan.” (Mateo 13:24-30) Katapos, tikang han ikatarapos han dekada han 1800, dayag nga nagin aktibo utro an dinihogan nga mga Kristiano. Han 1919, nagtikang an pag-ani han “aranihon ha tuna,” pati na an pagtirok han ultimo nga mga dinihogan.—Pahayag 14:15, 16.

Tikang han ikatarapos han dekada han 1800 tubtob 1931, an nangunguna nga katuyoan han pagsangyaw amo an pagtirok han nabibilin pa nga membro han lawas ni Kristo. Han 1931, ginkarawat han mga Estudyante han Biblia an ngaran nga mga Saksi ni Jehova nga basado ha Biblia. An Nobyembre 15, 1933 nga The Watchtower, nagsiring nga inin naiiba nga ngaran amo an “denaryo” nga gin-unabi ha parabola ni Jesus nga nakarekord ha Mateo 20:1-16. Ginhunahuna nga an 12 ka oras nga ginhisgotan ha parabola amo an 12 ka tuig tikang han 1919 tubtob 1931. Ha sulo hin damu ka tuig katapos hito, gintoohan nga an pagtawag para ha langitnon nga Ginhadian natapos han 1931 ngan adton ginpili basi magin mga igkasi-manurunod ni Kristo han 1930 ngan 1931 amo an “urhi” nga gintawag. (Mateo 20:6-8) Kondi, han 1966 iginpresenta an nabag-o nga pagsabot hito nga parabola, ngan nagin matin-aw nga waray ito kalabotan ha pagtapos han pagtawag ha mga dinihogan.

Han 1935, an “daku nga panon” ha Pahayag 7:9-15, (NW) hinsabtan nga ginkukompwesto han “iba nga mga karnero.” Hira an mga Kristiano nga may tunan-on nga paglaom nga pagtitirukon durante han “kataposan nga mga adlaw” ngan maluluwas ha Armagedon sugad nga grupo. (Juan 10:16; 2 Timoteo 3:1; Pahayag 21:3, 4) Katapos hito nga tuig, an nagin siyahan nga katuyoan han paghimo hin disipulo amo an pagtirok han daku nga panon. Tungod hito, labi na katapos han 1966, gintoohan nga natapos an langitnon nga pagtawag han 1935. Baga hin napamatud-an ini han an haros ngatanan nga nabawtismohan katapos han 1935 inabat nga tunan-on  an ira paglaom. Tikang hito nga panahon, an bisan hin-o nga gintatawag para ha langitnon nga paglaom gintotoohan nga mga kasaliwan han dinihogan nga mga Kristiano nga napamatud-an nga waray magin matinumanon.

Waray ruhaduha nga kon an usa nga dinihogan bumaya ha kamatuoran ngan diri magbasol, natawag hi Jehova hin kasaliwan ha iya. (Roma 11:17-22) Kondi, posible gud nga diri damu an totoo nga dinihogan nga nagin diri matinumanon. Ha luyo nga bahin, samtang nalabay an panahon, an pipira nga Kristiano nga nabawtismohan katapos han 1935 nakakarawat hin pamatuod han baraan nga espiritu nga may-ada hira langitnon nga paglaom. (Roma 8:16, 17) Salit, baga hin diri kita makakasiguro kon san-o gud matatapos an pagtawag ha mga Kristiano para ha langitnon nga paglaom.

Paonan-o sadang tagdon an tawo nga nakakasiguro nga dinihogan na hiya yana ngan nagtitikang na pakigbahin han mga emblema ha Memoryal? Diri hiya sadang hukman. May kalabotan hito, hira la ni Jehova an maaram. (Roma 14:12) Kondi, an totoo nga mga dinihogan diri nagkikinahanglan hin espesyal nga atensyon. Diri hira naghuhunahuna nga tungod han ira pagin dinihogan may-ada hira talagsahon nga “hilarom nga pagsabot,” nga labaw ha pipira nga eksperyensyado nga membro han daku nga panon. Diri hira naghuhunahuna nga may-ada gud hira labaw nga baraan nga espiritu kay ha ira kaupod nga iba nga mga karnero; diri liwat hira naglalaom hin espesyal nga pagtagad o naghuhunahuna nga tungod ha ira pakigbahin ha mga emblema nagigin labaw hira kay ha pinili nga mga tigurang ha kongregasyon. Mapainubsanon nga nahinunumdoman nira nga an pipira han dinihogan nga kalalakin-an ha siyahan nga siglo waray magin kwalipikado ha pag-alagad sugad nga tigurang o ministeryal. (1 Timoteo 3:1-10, 12, 13; Tito 1:5-9; Jakobo 3:1) An pipira nga dinihogan hadto maluya pa ngani ha espirituwal. (1 Tesalonika 5:14) Samtang an kabugtoan nga kababayin-an, bisan kon dinihogan, waray magtutdo ha kongregasyon.—1 Timoteo 2:11, 12.

Salit, an dinihogan nga mga Kristiano ngan an iba nga karnero nangangalimbasog nga magpabilin nga marig-on ha espirituwal, nagkukultibar han mga bunga han espiritu ngan nag-aaghat hin kamurayawan ha kongregasyon. An ngatanan nga Kristiano, dinihogan man o iba nga karnero, maduruto ha pagsangyaw ngan paghimo hin mga disipulo ilarom han paggiya han Nagmamando nga Lawas. Nalilipay ha pagbuhat hini an mga dinihogan tubtob nga kaburut-on ni Jehova nga magpabilin hira dinhi ha tuna sugad nga iya mga surugoon.