Tuguti an Pulong han Dios nga Maggiya han Imo mga Pitad

“An imo pulong lawag ha akon mga tiil, ngan sugâ ha akon agian.”—SALMO 119:105.

1, 2. Kay ano nga damu nga tawo an napapakyas ha pakaagi hin totoo nga kamurayawan ngan kalipay?

 MAY nahinunumdoman ka ba nga higayon nga ginpakianhan mo an usa nga tawo kon hain an dalan tipakadto ha imo destinasyon? Bangin hirani ka na didto kondi diri ka sigurado han pipira nga ultimo nga mga lilikoan. O bangin iginbuburong ka na gud ngan kinahanglan mag-iba hin dalan. Hain man hito an kahimtang, diri ba maaramon an pagsunod ha giya han usa nga maaram hito nga lugar? An sugad nga tawo makakabulig ha imo nga makadangat ha imo destinasyon.

² Ha sulod hin yinukot ka tuig na, an katawohan ha kabug-osan nangangalimbasog ha paggiya han ira kinabuhi nga waray bulig han Dios. Kondi, kon an diri-hingpit nga mga tawo maglulugaring la ha pagbuhat hito, bug-os nga igbuburong hira, siring pa. Diri gud nira hiaagian an dalan ngadto ha totoo nga kamurayawan ngan kalipay. Kay ano nga diri hira nakakadangat hito nga destinasyon? Sobra 2,500 ka tuig na an naglabay, hi propeta Jeremias nagtagna: “Diri aada ha tawo nga naglalakat an pagmando han iya mga pitad.” (Jeremias 10:23) Bisan hin-o nga nangangalimbasog paggiya han iya pitad nga diri kinakarawat an husto nga bulig sigurado nga mapapakyas. Oo, an katawohan nagkikinahanglan hin giya!

3. Kay ano nga hi Jehova nga Dios gud la an makakaghatag hin giya ha katawohan, ngan ano an iya iginsasaad?

³ Hi Jehova nga Dios gud la an makakaghatag han sugad nga giya. Kay ano? Tungod kay mas nasasabtan gud niya kay ha bisan hin-o an pagkahimo han mga tawo. Ngan maaram gud hiya kon paonan-o an katawohan nahisimang ngan iginburong. Maaram liwat hiya kon ano an ginkikinahanglan basi mahibalik hira ha husto nga dalan. Dugang pa, sugad nga Maglalarang, hi Jehova maaram pirme kon ano an gimaopayi para ha aton. (Isaias 48:17) Salit, bug-os nga makakasarig kita ha iya saad nga nahisurat ha Salmo 32:8: “Paglaladngan ko ikaw ngan igsusulsog ko ikaw han dalan nga imo kakadtoan: sasagdonan ko ikaw ngan ha bawbaw nimo ibubutang ko an akon mata.” Makakasiguro gud kita nga hi Jehova nagtatagana han gimaopayi nga giya. Kondi paonan-o gud ba hiya naggigiya ha aton?

4, 5. Ha ano nga paagi makakaggiya ha aton an mga pulong han Dios?

⁴ An usa nga salmista nagsiring ha iya pag-ampo kan Jehova: “An imo pulong lawag ha akon mga tiil, ngan sugâ ha akon agian.” (Salmo 119:105) An mga pulong ngan mga pahinumdom han Dios mababasa ha Biblia, ngan makakabulig ito ha aton nga malamposan an mga ulang nga bangin atubangon naton ha aton dalan. Oo, kon binabasa naton an Biblia ngan tinutugotan ito nga maggiya ha aton, nakakaeksperyensya kita mismo han iginsasaysay ha Isaias 30:21: “An imo mga talinga makakabati han usa nga pulong ha imo luyo, nga nasiring: Amo ini an dalan, maglakat kamo dida hini.”

⁵ Kondi, tigamni nga an Salmo 119:105 nag-uunabi hin duha nga magkakaw-ing nga nahihimo han Pulong han Dios. Siyahan, lawag o lampara ito ha aton mga tiil. Kon naatubang kita hin mga problema ha adlaw-adlaw, an mga prinsipyo han Biblia sadang maggiya han aton mga pitad basi makahimo kita hin maaramon nga mga desisyon ngan malikyan an mga lit-ag hini nga kalibotan. Ikaduha, an mga pahinumdom han Dios naglalamrag ha aton agian, binubuligan kita ha paghimo hin mga desisyon uyon ha aton paglaom nga mabuhi ha waray kataposan ha iginsaad han Dios nga Paraiso. Kon nalalamragan hin maopay an dalan ha unhan, masasabtan naton an magigin mga resulta han usa nga buhat—maopay man o maraot. (Roma 14:21; 1 Timoteo 6:9; Pahayag  22:12) Aton kitaon hin mas detalyado kon paonan-o an mga pulong han Dios ha Biblia mahimo magin lampara ha aton mga tiil ngan sugâ ha aton agian.

“Lawag ha Akon mga Tiil”

6. Ha ano nga mga kahimtang mahimo magin lampara ha aton mga tiil an mga pulong han Dios?

⁶ Kada adlaw naghihimo kita hin mga desisyon. An iba nga mga desisyon baga hin gudtiay la, kondi usahay bangin umatubang kita ha sitwasyon nga nagsasari han aton moralidad, pagkatangkod, ngan pagin neutral. Basi magin malampuson ha pag-atubang ha sugad nga mga pagsari, kinahanglan ‘an aton mga balatian magkababatid ha pagkilala han maopay ngan maraot.’ (Hebreo 5:14) Pinaagi han pagkaada husto nga kahibaro ha Pulong han Dios ngan pagsabot ha mga prinsipyo hito, aton ginbabansay an aton konsensya basi makahimo kita hin mga desisyon nga nagpapalipay kan Jehova.—Proberbios 3:21.

7. Ihulagway an usa nga sitwasyon diin an usa nga Kristiano bangin madani ha pakig-upod ha diri-tumuroo nga mga katrabaho.

⁷ Tagda an usa nga ehemplo. Usa ka ba nga adulto nga sinsero nga nangangalimbasog nga mapalipay an kasingkasing ni Jehova? (Proberbios 27:11) Kon amo, takos ka kumendasyonan. Kondi handurawa hin madaliay nga an pipira nga katrabaho nagtatanyag ha imo hin tiket basi makaupod ka nira ha pagkita hin usa nga uyag. Nalilipay hira nga kaupod ka nira ha trabaho ngan karuyag nira makigbarkada ha imo katapos han trabaho. Bangin naabat ka gud nga diri hira magraot nga mga tawo. Bangin may-ada pa ngani hira mag-opay nga mga prinsipyo. Ano an imo bubuhaton? May-ada ba peligro ha pagkarawat han ira imbitasyon? Paonan-o ka mabubuligan han Pulong han Dios ha paghimo hin husto nga desisyon may kalabotan hini?

8. Ano nga mga prinsipyo ha Kasuratan an nabulig ha aton nga mangatadongan may kalabotan ha mga kaupod?

⁸ Tagda an pipira nga prinsipyo ha Kasuratan. An siyahan nga bangin mahunahuna amo an 1 Korinto 15:33, nga nasiring: “An magraot nga mga kaupod nakakadunot ha mga mag-opay nga batasan.” An pagsunod ba hini nga prinsipyo nagkikinahanglan nga bug-os nga likyan mo an mga diri-tumuroo? Diri an baton han Kasuratan hito nga pakiana. Kay kon hunahunaon, ipinakita ni apostol Pablo mismo an mahigugmaon nga pagtagad ha “ngatanan nga mga tawo,” upod na an mga diri-tumuroo. (1 Korinto 9:22) An kahulogan mismo han Kristianidad nagkikinahanglan nga ipakita naton an pagtagad ha iba—upod na adton diri naton karelihiyon. (Roma 10:13-15) Ha pagkamatuod, paonan-o naton masusunod an sagdon nga “magbuhat kita han maopay ha ngatanan nga mga tawo” kon nabulag kita ha mga tawo nga bangin nagkikinahanglan han aton bulig?—Galasia 6:10.

9. Ano nga sagdon han Biblia an nabulig ha aton nga magin timbang ha aton relasyon ha aton mga katrabaho?

⁹ Kondi, matin-aw an kaibahan butnga han pagin makisangkayon ha usa nga katrabaho ngan han pagin iya duok nga kaupod. Dinhi nahiuupod an usa pa nga prinsipyo ha Kasuratan. Hi apostol Pablo nagpahamangno ha mga Kristiano: “Diri kamo magpas-an han yugo upod han mga diri magtinoohon.” (2 Korinto 6:14) Ano an kahulogan hini nga mga pulong? Ha iba nga hubad  han Biblia iginhubad ini sugad nga “ayaw pakig-upod,” “ayaw pagsari ha pagtrabaho nga magkaupod sugad nga magkapariho,” o “undang na ha diri-angayan nga pakigrelasyon.” San-o nagigin diri-angayan an relasyon ha usa nga katrabaho? An Pulong han Dios, an Biblia, makakaggiya han imo pitad hini nga sitwasyon.

10. (a) Ha ano nga paagi ginpili ni Jesus an iya mga kaupod? (b) Ano nga mga pakiana an makakabulig ha usa ha paghimo hin maaramon nga mga desisyon mahitungod han mga kaupod?

¹⁰ Tagda an susbaranan ni Jesus, nga tikang ha panahon nga ginlarang an mga tawo, nahigugma na hiya ha ira. (Proberbios 8:31) Han nakanhi pa hiya ha tuna, duok nga nakig-upod hiya ha iya mga sumurunod. (Juan 13:1) “Nahigugma” pa ngani hiya ha usa ka tawo nga sayop an paagi han pagsingba. (Markos 10:17-22) Kondi ipinakita liwat ni Jesus an matin-aw nga mga tubtoban may kalabotan han iya pagpili hin duok nga mga kaupod. Waray hiya magin duok ha mga tawo nga diri totoo nga interesado ha pagbuhat han kaburut-on han iya Amay. Ha usa nga okasyon, hi Jesus nagsiring: “Kamo amo an akon mga kasangkayan, kon iyo buhaton an akon iginsusugo ha iyo.” (Juan 15:14) Oo, bangin makisangkayon ka ha usa nga katrabaho. Kondi pakianhi an imo kalugaringon: ‘Interesado ba hiya ha pagbuhat han mga sugo ni Jesus? Naruruyag ba hiya mahibaro mahitungod kan Jehova, an usa nga igintutdo ha aton ni Jesus nga sadang pagsingbahon? An iya ba mga suruklan ha moral pariho han akon sugad nga Kristiano?’ (Mateo 4:10) Samtang nakikiistorya ka ha imo mga katrabaho ngan marig-on nga igin-aaplikar an mga suruklan han Biblia, magigin matin-aw ha imo an mga baton hini nga mga pakiana.

11. Paghatag hin mga sitwasyon diin an mga pulong han Dios sadang maggiya han aton mga pitad.

¹¹ Damu an iba pa nga sitwasyon diin an mga pulong han Dios maipapariho ha lampara ha aton tiil. Pananglitan, an usa nga waray-trabaho nga Kristiano bangin tanyagan hin trabaho nga ginkikinahanglan gud niya. Kondi, an eskedyol nakakaubos han panahon ngan kusog, ngan kon kakarawaton niya an trabaho, diri hiya makakatambong ha iba nga Kristiano nga katirok ngan diri na makikigbahin ha iba nga mga buruhaton may kalabotan ha totoo nga pagsingba. (Salmo 37:25) An usa pa nga Kristiano bangin masulay hinduro ha pagkita hin kaliawan nga matin-aw nga nasupak ha mga prinsipyo han Biblia. (Efeso 4:17-19) Ngan an usa pa bangin madagmit mahipakdol ha mga kaluyahan han mga igkasi-tumuroo. (Kolosas 3:13) Hini nga ngatanan nga sitwasyon, sadang tugotan naton an Pulong han Dios  nga magin lampara ha aton tiil. Oo, pinaagi han pagsunod ha mga prinsipyo han Biblia, malalamposan naton an anoman nga problema ha kinabuhi. An Pulong han Dios “may kapulsanan man ha pagtututdoan, ha pagbadlong, ha pagsaway, ha panutdoan nga ha katadongan.”—2 Timoteo 3:16.

“Sugâ ha Akon Agian”

12. Ha ano nga paagi sugâ ha aton agian an mga pulong han Dios?

¹² An Salmo 119:105 nasiring liwat nga an mga pulong han Dios mahimo liwat magin sugâ ha aton agian, naglalamrag ha dalan ha unhan. Waray kita ha kasisidman mahitungod han tidaraon, kay iginsasaysay han Biblia an kahulogan han makuri nga mga kahimtang ha kalibotan ngan kon ano an magigin resulta hito. Oo, nasasabtan naton nga nagkikinabuhi na kita ha “kataposan nga mga adlaw” hinin maraot nga sistema han mga butang. (2 Timoteo 3:1-5) An paghibaro han mahitatabo ha tidaraon sadang makaapekto gud ha aton paagi han pagkinabuhi yana. Hi apostol Pedro nagsurat: “Busa nga hinbaroan niyo nga ini nga mga butang pagtutunawon, mga magtionan-o an iyo mga ginawian nga mga tawo ha ngatanan nga putli nga pangabuhi ngan pagtahod ha Dios, nga naghuhulat ngan nagtitinguha gud kamo han pag-abot han adlaw han Dios, nga hito nga adlaw an mga langit nga aada ha kalayo ngan an ngatanan nga mga kasangkapan matutunaw tungod han paso nga nakakasunog?”—2 Pedro 3:11, 12.

13. Paonan-o an pagkaapurado han aton mga panahon sadang makaapekto ha aton panhunahuna ngan paagi han pagkinabuhi?

¹³ An aton panhunahuna ngan paagi han pagkinabuhi sadang magpakita han aton marig-on nga pagtoo nga “an kalibotan nawawara, ngan an iya kairiphon: kondi an nagbubuhat ha kaburut-on han Dios nagpapadayon ha gihapon.” (1 Juan 2:17) An pag-aplikar ha mga giya han Biblia mabulig ha aton ha paghimo hin maaramon nga mga desisyon may kalabotan ha aton mga tumong para ha tidaraon. Pananglitan, hi Jesus nagsiring: “Pamilnga niyo siyahan an ginhadian han Dios, ngan an iya katadongan; ngan ngatanan ini nga mga butang mahidudugang ha iyo.” (Mateo 6:33) Takos kumendasyonan an damu nga batan-on nga nagpapakita hin pagtoo ha mga pulong ni Jesus pinaagi han pagsulod ha bug-os-panahon nga ministeryo! An iba—upod na an bug-os nga mga pamilya—nagboluntaryo ha pagbalhin ha mga lugar nga nagkikinahanglan gud hin mga parasamwak han Ginhadian.

14. Paonan-o ginpahaluag han usa nga pamilya an ira ministeryo?

¹⁴ Tagda an Kristiano nga mag-asawa ngan an ira anak nga lalaki ngan babaye nga binalhin tikang ha Estados Unidos ngadto ha Dominican  Republic basi mag-alagad ha kongregasyon ha usa nga bungto nga 50,000 an populasyon. An kongregasyon ginkukompwesto hin mga 130 nga magwarali han Ginhadian. Kondi, han Abril 12, 2006, mga 1,300 an tinambong ha Memoryal han kamatayon ni Kristo! An “kapatagan” hito nga lugar “magbusag na” hinduro para ha pag-ani salit katapos hin lima la ka bulan, ini nga pamilya nagdudumara na hin 30 nga pag-aram ha Biblia. (Juan 4:35) An amay nagsasaysay: “Ha kongregasyon may-ada 30 nga kabugtoan nga binalhin nganhi basi bumulig. Mga 20 an tikang ha Estados Unidos, ngan an iba tikang ha Bahamas, Canada, Espanya, Italya, ngan New Zealand. Inabot hira nga naruruyag gud makigbahin ha ministeryo ngan nakakadasig gud ha kabugtoan hini nga lugar.”

15. Ano nga mga bendisyon an naieksperyensyahan mo tungod kay inuuna mo ha imo kinabuhi an mga interes han Ginhadian?

¹⁵ Syempre, damu an diri makakahimo pagbalhin ha iba nga nasud basi mag-alagad kon diin may-ada mas daku nga panginahanglan. Kondi adton makakahimo—o makakagbag-o han ira mga kahimtang basi makahimo hito—sigurado nga makakaeksperyensya hin damu nga bendisyon pinaagi han pakiangbit hini nga bahin han ministeryo. Ngan diin ka man nag-aalagad, pahimulusi gud an kalipay nga maieksperyensyahan mo kon nag-aalagad ka kan Jehova ha bug-os mo nga kusog. Kon unahon mo ha imo kinabuhi an mga interes han Ginhadian, hi Jehova nagsasaad nga “buboan [ka] han bendisyon nga mawaray igo nga surudlan ha pagkarawat hini.”—Malakias 3:10.

Pahimulusi an Giya ni Jehova

16. Paonan-o kita magpapahimulos kon aton tutugotan an mga pulong han Dios nga maggiya ha aton?

¹⁶ Sugad han hinbaroan na naton, an mga pulong ni Jehova naggigiya ha aton ha duha nga magkakaw-ing nga paagi. Lampara ito ha aton mga tiil, nabulig ha aton nga magpadayon ha husto nga dalan ngan naggigiya ha aton kon kinahanglan naton maghimo hin mga desisyon. Ngan sugâ ito ha aton agian, nabulig ha aton nga makita hin matin-aw an aada ha unhan. Ngan tungod hito, nabubuligan kita nga sundon an sagdon ni Pedro: “Rig-unon niyo an iyo mga hunahuna, magligdong kamo ngan maglaom hin hingpit han grasya nga pagdadad-on nganhi ha iyo kon magpahayag na hi Jesu-Kristo.”—1 Pedro 1:13.

17. Paonan-o an pag-aram ha Biblia mabulig ha aton nga sundon an giya han Dios?

¹⁷ Waray ruhaduha nga hi Jehova nagtatagana hin giya. An pakiana, Susundon mo ba ito? Basi masabtan an giya nga igintatagana ni Jehova, magin determinado nga basahon an usa nga bahin han Biblia kada adlaw. Pamalandonga an imo binabasa, pangalimbasugi nga masabtan an kaburut-on ni Jehova ha mga butang, ngan paghunahuna hin magkalain-lain nga paagi nga maiaaplikar mo ha imo kinabuhi an imo nabasa. (1 Timoteo 4:15) Katapos, gamita an imo abilidad ha pangatadongan kon naghihimo ka hin personal nga mga desisyon.

18. Kon nagpapagiya kita ha Pulong han Dios, ano nga mga bendisyon an makakarawat naton?

¹⁸ An mga prinsipyo ha Pulong han Dios maglalamrag ha aton ngan maghahatag ha aton han giya nga ginkikinahanglan naton kon naghihimo kita hin mga desisyon mahitungod han husto nga dalan nga susundon, kon magpapagiya kita hito. Makakasarig kita nga pinaagi han iginrekord nga mga pulong ni Jehova magigin “makinaadmananon an usa nga numnom.” (Salmo 19:7) Kon nagpapagiya kita ha Biblia, nagkakaada kita limpyo nga konsensya ngan katagbaw tungod kay napapalipay naton hi Jehova. (1 Timoteo 1:18, 19) Kon tugotan naton an mga pulong han Dios nga maggiya han aton mga pitad kada adlaw, ihahatag ni Jehova ha aton an gidadakui nga bendisyon, an kinabuhi nga waray kataposan.—Juan 17:3.

Nahinunumdoman Mo Ba?

• Kay ano nga importante nga tugotan naton hi Jehova nga Dios nga maggiya han aton mga pitad?

• Ha ano nga paagi an mga pulong han Dios mahimo magin lampara ha aton tiil?

• Paonan-o an mga pulong han Dios mahimo magin sugâ ha aton agian?

• Ha ano nga paagi an pag-aram ha Biblia mabulig ha aton nga sundon an giya han Dios?

[Mga Pakiana]

[Retrato ha pahina 15]

San-o nagigin diri-maaramon an pakig-upod ha diri-tumuroo?

[Retrato ha pahina 16]

An duok nga mga kaupod ni Jesus amo adton nagbubuhat han kaburut-on ni Jehova

[Mga Retrato ha pahina 17]

Ipinapakita ba han paagi han aton pagkinabuhi nga inuuna naton an mga interes han Ginhadian?