An Pagkabanhaw—Totoo ba Ito ha Imo?
An Pagkabanhaw—Totoo ba Ito ha Imo?
“May pagkabanhaw han mga minatay.”—BUHAT 24:15.
1. Kay ano nga an kamatayon baga hin sigurado?
“DINHI hini nga kalibotan waray bisan ano nga sigurado kondi an kamatayon ngan mga buhis.” An iba nasiring nga ito nga komento, nga iginsurat han 1789 han Amerikano nga politiko nga hi Benjamin Franklin, nagpapakita hin pagsabot han aktuwal nga mga kahimtang. Kondi, damu nga diri-tangkod nga tawo an diri nagbabayad hin bug-os han ira mga buhis. Baga hin mas sigurado an kamatayon. Kon waray bulig, waray bisan hin-o ha aton an makakalikay hito ha kamaihaan. Sugad hin naglalanat ito ha aton ngatanan. An Sheol—an komon nga lubnganan han katawohan—sugad hin may-ada diri-matagbaw nga gutom ngan naglalamoy han mga tawo nga hinigugma naton. (Proberbios 27:20) Kondi tagda an usa nga butang nga nakakaliaw hunahunaon.
2, 3. (a) Kay ano nga damu an diri maaram nga may-ada mga tawo nga diri na mamamatay? (b) Ano an aton paghihisgotan hini nga artikulo?
2 An Pulong ni Jehova naghahatag han sigurado nga paglaom han pagkabanhaw, han pagin buhi utro. Diri ito inop la, ngan waray pwersa ha uniberso an makakapugong kan Jehova ha pagtuman hini nga paglaom. Kondi, damu yana an diri maaram nga may-ada mga tawo nga diri na mamamatay. Kay ano? Tungod kay an diri-maihap nga “daku nga panon” maluluwas ha “daku nga kagol-anan,” nga hirani na umabot. (Pahayag 7:9, 10, 14, NW) Padayon nga mabubuhi hira katapos hito, nga naglalaom han kinabuhi nga waray kataposan. Salit, para ha ira, malilikyan an kamatayon. Dugang pa, ‘an kamatayon pagwawad-on.’—1 Korinto 15:26.
3 Kinahanglan abaton naton nga sigurado an pagkabanhaw sugad han inabat ni apostol Pablo, nga nagsiring: “May pagkabanhaw han mga minatay han mga magtadong ngan diri man magtadong.” (Buhat 24:15) Aton paghisgotan an tulo nga pakiana may kalabotan ha pagkabanhaw. Siyahan, kay ano nga sigurado gud ini nga paglaom? Ikaduha, paonan-o ka maliliaw han paglaom han pagkabanhaw? Ikatulo, paonan-o makakaapekto ini nga paglaom ha paagi han imo pagkinabuhi yana?
An Pagkabanhaw—Sigurado Gud
4. Kay ano nga an pagkabanhaw kinahanglanon gud ha katuyoan ni Jehova?
4 Damu an hinungdan kon kay ano nga sigurado gud an pagkabanhaw. Labaw ha ngatanan, kinahanglanon ito ha katuyoan ni Jehova. Hinumdumi nga hi Satanas an nag-aghat ha katawohan nga makasala, nga an diri-malikyan nga resulta hito amo an kamatayon. Salit, hi Jesus nagsiring mahitungod kan Satanas: “Hiya paramatay tikang ha tinikangan.” (Juan 8:44) Kondi hi Jehova nagsaad nga an iya “babaye,” o sugad-asawa nga organisasyon ha langit, magkakaada hin “katulinan” o binhi nga magsasamad han ulo hiton “daan nga halas,” basi bug-os nga bungkagon hi Satanas. (Genesis 3:1-6, 15; Pahayag 12:9, 10; 20:10) Samtang hinay-hinay nga iginpapahayag ni Jehova an iya katuyoan may kalabotan hiton Mesianiko nga Binhi, nagin matin-aw nga labaw pa an bubuhaton han Binhi kay ha pagbungkag la kan Satanas. An Pulong han Dios nasiring: “Tungod hini nga katuyoanan an Anak han Dios iginpahayag, basi ha pagbungkag ha mga buhat han yawa.” (1 Juan 3:8) An kamatayon tungod han sala nga napanunod naton kan Adan amo an nangunguna ha mga buhat ni Satanas nga katuyoan ni Jehova nga pagwad-on, o bungkagon, pinaagi kan Jesu-Kristo. May kalabotan hini, importante gud an halad lukat ni Jesus ngan an pagkabanhaw.—Buhat 2:22-24; Roma 6:23.
5. Kay ano nga an pagkabanhaw maghihimaya han ngaran ni Jehova?
5 Determinado hi Jehova nga himayaon an iya baraan nga ngaran. Ginpakaraot ni Satanas an ngaran han Dios ngan nagpasarang hin mga buwa. Nagbuwa hiya ha pagsiring nga hira Adan ngan Eva ‘diri gud mamamatay’ kon kumaon hira han bunga nga igindidiri han Dios. (Genesis 2:16, 17; 3:4) Tikang hadto, iginpasarang ni Satanas an pariho nga mga buwa, sugad han palso nga katutdoan nga may-ada kalag nga natatalwas ha kamatay han lawas. Kondi, pinaagi han pagkabanhaw, ibubuhayhag ni Jehova an pagkasayop hito ngatanan nga buwa. Iya pamamatud-an hin permanente nga hiya la an nagtitipig ngan nagpapahiuli han kinabuhi.
6, 7. Ano an inaabat ni Jehova mahitungod han pagbanhaw ha mga tawo, ngan kay ano nga makakasiring kita nga ito an iya inaabat?
6 Hi Jehova naghihingyap gud ha pagbuhat han pagkabanhaw. Iginpapatin-aw han Biblia an inaabat ni Jehova may kalabotan hini. Pananglitan, tagda inin giniyahan nga mga pulong han matinumanon nga hi Job: “Kon an usa ka tawo mamatay, mabubuhi ba hiya liwat? Ha ngatanan nga adlaw ha akon pakig-away [“pinirit nga pagserbisyo,” NW] mahulat unta ako, ngada nga an panahon han pagbuhii ha akon umabot. Ikaw magtatawag, ngan ako mabaton ha imo: Ikaw mamamay-ada kahidlaw han buhat han imo mga kamot.” (Job 14:14, 15) Ano an kahulogan hito nga mga pulong?
7 Maaram hi Job nga ha kamatay niya, maghuhulat hiya hin usa ka peryodo han panahon ha pagkaturog ha kamatayon. Iya gintatagad ito nga panahon sugad nga “pinirit nga pagserbisyo,” usa ka peryodo han paghulat tubtob han pagbuhii ha iya. Para ha iya, sigurado nga bubuhian hiya. Nasantop ni Job nga maabot an iya katalwasan. Kay ano? Tungod kay maaram hiya han inaabat ni Jehova. Hi Jehova “mamamay-ada kahidlaw” nga makita utro an iya matinumanon nga surugoon. Oo, naghihingyap gud an Dios nga banhawon an ngatanan nga magtadong nga mga tawo. Tatagan liwat ni Jehova an iba hin higayon nga mabuhi ha waray kataposan ha Paraiso ha tuna. (Lukas 23:43; Juan 5:28, 29) Tungod kay kaburut-on han Dios an pagtuman hito nga katuyoan, hin-o an makakapugong ha iya?
8. Paonan-o ginarantiyahan ni Jehova an aton paglaom ha tidaraon?
8 An aton paglaom para ha tidaraon ginparig-on, o ginarantiyahan han pagkabanhaw ni Jesus. Han hi Pablo nagpahayag ha Atenas, hiya nagsiring: “[An Dios] nagtigaman hin usa nga adlaw, nga iya paghukom han kalibotan han kamatadong tungod hadton tawo nga iya gintungdan, nga nagparig-on ha ngatanan, tungod han pagkabanhaw niya, tikang ha mga minatay.” (Buhat 17:31) An iba han mga mamarati ni Pablo nagyubit han hinbatian nira an mahitungod han pagkabanhaw. Kondi, an pipira ha ira nagin mga tumuroo. Bangin nadani an ira atensyon tungod kay ginagarantiyahan ini nga paglaom. Han ginbanhaw ni Jehova hi Jesus, Iya ginbuhat an pinakaurusahon nga milagro. Iya ginbanhaw an iya Anak tikang ha kamatayon ngadto ha kinabuhi sugad nga gamhanan nga espiritu. (1 Pedro 3:18) An binanhaw nga hi Jesus mas gamhanan pa ngani kay han iya pag-eksister antes hiya magin tawo. Tungod kay diri-mamaratyon ngan ikaduha kan Jehova ha gahum, matutuman na yana ni Jesus an urusahon nga mga toka tikang ha iya Amay. Pinaagi kan Jesus, bubuhaton ni Jehova an ngatanan nga iba nga pagkabanhaw—ngadto ha kinabuhi ha langit o ha kinabuhi dinhi ha tuna. Hi Jesus mismo nagsiring: “Ako amo an pagkabanhaw, ngan an kinabuhi.” (Juan 5:25; 11:25) Pinaagi han pagbanhaw ni Jehova ha iya Anak, ginarantiyahan niya an sugad nga mga paglaom para ha ngatanan nga magtinumanon.
9. Paonan-o pinamamatud-an han rekord han Biblia nga sigurado an pagkabanhaw?
9 An pagkabanhaw ginbuhat ha atubangan han mga nagkikita ngan iginrekord ha Pulong han Dios. An rekord han Biblia may-ada detalyado nga mga pagsaysay mahitungod han walo nga pagbanhaw ha mga tawo dinhi ha tuna. Ini nga mga milagro ginbuhat diri ha tago kondi ha publiko, agsob nga ha atubangan han mga nagkikita. Ginbanhaw ni Jesus hi Lasaro, nga upat ka adlaw na nga patay, ha atubangan han damu nga nagmiminatay—upod na an pamilya, kasangkayan, ngan mga amyaw ni Lasaro. Marig-on gud ini nga ebidensya nga hi Jesus sinugo han Dios salit an relihiyoso nga mga kaaway ni Jesus waray gud magnigar nga nahitabo ito. Lugod, nagsarabot hira ha pagpatay diri la kan Jesus kondi kan Lasaro liwat! (Juan 11:17-44, 53; 12:9-11) Oo, makakasarig kita nga sigurado an pagkabanhaw. An Dios naghatag ha aton hin usa nga rekord han naglabay nga mga pagbanhaw basi maliaw kita ngan maparig-on an aton pagtoo.
Maliaw ha Paglaom han Pagkabanhaw
10. Paonan-o kita maliliaw han mga rekord han Biblia mahitungod han pagkabanhaw?
10 Ginhihingyap mo ba an pagliaw kon namimeligro ka nga mamatay? Maliliaw gud kita han mga asoy han Biblia mahitungod han pagkabanhaw. Ha pagbasa han sugad nga mga asoy, pagpamalandong ngan paghanduraw han mga hitabo, magigin mas totoo ha imo an paglaom han pagkabanhaw. (Roma 15:4) Diri ini mga istorya la. Tinuod nga nahitabo ito ha totoo nga mga tawo pariho ha aton, nga nagkinabuhi ha totoo nga panahon ngan ha totoo nga lugar. Aton isentro hin madaliay an aton atensyon ha usa nga ehemplo—an siyahan nga pagkabanhaw ha rekord han Biblia.
11, 12. (a) Ano nga trahedya an nahitabo ha balo ha Sarepat, ngan ano an iya siyahan nga reaksyon? (b) Ihulagway kon ano nga gahum an iginhatag ni Jehova ha iya propeta nga hi Elias nga buhaton para ha balo.
11 Handurawa an kahimtang. Pipira ka semana na nga bisita hi propeta Elias han balo nga babaye ha Sarepat, ngan naukoy hiya ha kwarto ha atop han balay. Makasurubo gud ito nga panahon. An lugar inabutan hin huraw ngan gutom. Damu an nagkakamatay. Ginamit na ni Jehova hi Elias ha pagbuhat hin milagro nga nag-iha an epekto basi balosan an pagtoo hinin pobre nga balo. Hiya ngan an iya anak nga lalaki hirani na magutom, ultimo na la nga pagkaon an aada ha ira, han tinagan han Dios hi Elias hin gahum ha pagbuhat hin milagro salit an suplay nga harina ngan lana han balo milagroso nga diri nauubos. Kondi, yana, nahitabo ha iya an usa nga trahedya. Tigda nga nagkasakit an bata, ngan waray pag-iha hiya namatay. Masurub-on gud an balo! Makuri gud an pagkinabuhi nga waray an pisikal nga kusog ngan suporta han usa nga bana, ngan yana namatay pa an iya bugtong nga anak. Ha iya kabidoan, ginbasol pa ngani niya hi Elias ngan an iya Dios, hi Jehova! Ano an bubuhaton han propeta?
12 Waray sawaya ni Elias an balo ha iya sayop nga akusasyon. Lugod, hiya nagsiring: “Ihatag ha akon an imo anak.” Katapos dad-on an patay nga bata ngadto ha kwarto ha atop, hi Elias nag-ampo hin pauroutro nga mahibalik an kinabuhi han bata. Ha kataposan, ginios hi Jehova! Handurawa an kalipay nga nakita ha nawong ni Elias samtang nakikita niya nga naginhawa na an bata. Pinukrat an mga mata han bata, ngan nakita dida hito nga mahimsog hiya. Gindara ni Elias an bata ngadto ha iya iroy ngan siniring: “Tan-awa an imo anak nga lalaki buhi.” Diri maihulagway an kalipay han balo. Hiya nagsiring: “Yana maaram na ako nga ikaw tawo han Dios, ngan nga an pulong ni Jehova ha imo baba matuod.” (1 Hadi 17:8-24) An iya pagtoo kan Jehova ngan ha Iya representante mas marig-on pa gud.
13. Kay ano nga an asoy mahitungod han pagbanhaw ni Elias ha anak han balo nga babaye nakakaliaw ha aton yana?
13 An pamalandong ha sugad nga asoy sigurado nga nakakaliaw gud ha imo. Matin-aw gud nga hi Jehova makakapirde han aton kaaway nga kamatayon! Handurawa la an adlaw nga an kalipay hito nga balo maieksperyensyahan na han yinukot nga umurukoy ha tuna ha kabug-osan nga pagkabanhaw han mga patay! An kalipay ha langit magigin daku liwat samtang malipayon nga ginsusugo ni Jehova an iya Anak ha pagbuhat han pagkabanhaw ha bug-os nga kalibotan. (Juan 5:28, 29) Namatayan ka na ba hin usa nga imo hinigugma? Makalilipay gud hibaroan nga hi Jehova makakagbanhaw ngan magbabanhaw han mga patay!
An Imo Paglaom Ngan an Imo Pagkinabuhi Yana
14. Paonan-o makakaapekto ha imo kinabuhi an paglaom han pagkabanhaw?
14 Paonan-o an paglaom han pagkabanhaw makakaapekto ha paagi han imo pagkinabuhi yana mismo? Mapaparig-on ka hini nga paglaom kon naatubang ka hin mga kakurian, problema, pagtimaraot, o peligro. Karuyag ni Satanas nga mahadlok ka hinduro ha kamatayon nga tungod hito magigin disidido ka nga ipakigbalyo an imo integridad ha usa nga waray pulos nga saad hin katalwasan. Hinumdumi nga hi Satanas nagsiring kan Jehova: “An ngatanan nga gintatag-iya han tawo iya ihahatag para ha iya kinabuhi.” (Job 2:4) Hito nga pahayag, kita ngatanan ginpakaraot ni Satanas, upod ka na. Totoo ba nga maundang ka ha pag-alagad ha Dios kon umatubang ka hin peligro? Pinaagi han pagpamalandong ha paglaom han pagkabanhaw, mapaparig-on mo an imo determinasyon nga magpadayon ha pagbuhat han kaburut-on han imo langitnon nga Amay.
15. Paonan-o an mga pulong ni Jesus ha Mateo 10:28 makakaliaw ha aton kon umatubang kita hin peligro?
15 Hi Jesus nagsiring: “Diri kamo mahadlok ha nakakamatay han lawas, kondi diri sadang makamatay han kalag; kondi kahadluki lugod an nakakahimo makahibang han kalag ngan han lawas man ha impyerno [“Gehenna,” NW].” (Mateo 10:28) Diri kita sadang mahadlok kan Satanas o ha iya tawhanon nga mga sakop. Oo, an iba bangin may-ada gahum ha pagdaot, pagpatay pa ngani. Kondi, an girarauti nga ira mahihimo temporaryo la gihapon. Mahimo pagwad-on ni Jehova ngan pagwawad-on gud niya an anoman nga kadaot nga ginbubuhat ha iya matinumanon nga mga surugoon. Babanhawon pa ngani niya hira. Hi Jehova gud la an takos han aton kahadlok, han aton hilarom nga kahipausa ngan pagtahod. Hiya gud la an may-ada gahum ha pagkuha han kinabuhi ngan han ngatanan nga paglaom para ha tidaraon nga kinabuhi, ngan makakabungkag han lawas ngan kalag ha Gehenna. Makalilipay hunahunaon nga diri karuyag ni Jehova nga mahitabo ito ha imo. (2 Pedro 3:9) Tungod han paglaom han pagkabanhaw, kita sugad nga mga surugoon han Dios makakasiguro pirme nga talwas kita. Makakalaom kita hin kinabuhi nga waray kataposan tubtob nga matinumanon kita, ngan waray bisan ano nga mahihimo hi Satanas o an iya mga sakop ha pagpugong hito.—Salmo 118:6; Hebreo 13:6.
16. Paonan-o an aton panhunahuna ha pagkabanhaw nakakaapekto ha aton mga prayoridad?
16 Kon an paglaom han pagkabanhaw totoo ha aton, makakagbag-o ito han aton disposisyon mahitungod han kinabuhi. Nasasantop naton nga ‘kon kita mabuhi, o kon kita mamatay, kanan Ginoo kita.’ (Roma 14:7, 8) Salit, kon naghihimo kita hin mga prayoridad, aton igin-aaplikar an sagdon ni Pablo: “Diri kamo angay umuyon hini nga panahon: Kondi magbalhin kamo tungod ha pagbag-o ha iyo mga hunahuna, basi niyo kasayoran kon ano an maopay ngan karuruyagon ngan hingpit nga kaburut-on han Dios.” (Roma 12:2) Damu nga tawo an nagkakalisang ha pagtagbaw han tagsa nga hingyap, ambisyon, ngan karuyag. Tungod kay para ha ira halipot la an kinabuhi, baga hin haros desperado hira ha pamiling hin kalipay, ngan kon may-ada hira paagi han pagsingba, diri gud ito uyon ha “hingpit nga kaburut-on han Dios.”
17, 18. (a) Paonan-o kinikilala han Pulong ni Jehova an pagkahalipot han kinabuhi han tawo, kondi ano an karuyag han Dios para ha aton? (b) Kay ano nga napapagios kita nga dayawon hi Jehova adlaw-adlaw?
17 Oo, halipot an kinabuhi. “Madali ito umagi, ngan malupad [kita] dayon,” bangin katapos hin mga 70 o 80 ka tuig. (Salmo 90:10) Temporaryo la an mga tawo sugad hin banwa, sugad hin lambong nga nalabay, sugad hin gininhawa. (Salmo 103:15; 144:3, 4) Kondi diri katuyoan han Dios nga magkaada la kita hin pipira ka dekada han pagtubo ngan pagkaada hin kinaadman ngan eksperyensya, kondi ha sunod nga pipira ka dekada magtitikaluya na, magkakasakit, ngan mamamatay. Ginlarang ni Jehova an mga tawo nga may-ada hingyap nga mabuhi ha waray kataposan. “Iya man iginpahamutang an kadayonan ha ira kasingkasing,” siring ha aton han Biblia. (Eklesiastes 3:11) An Dios ba waray-kalooy, naghahatag ha aton han sugad nga hingyap ngan katapos, hihimoon niya nga imposible an pagtuman hito? Diri gud, tungod kay “an Dios amo an gugma.” (1 Juan 4:8) Pinaagi han pagkabanhaw, hihimoon niya nga posible an kinabuhi nga waray kataposan para ha mga tawo nga nagkamatay.
18 Tungod han paglaom han pagkabanhaw, mahimo kita magkaada tidaraon nga may kasigurohan. Diri kita sadang mataranta, ngan mapiritan nga gamiton an aton bug-os nga abilidad yana mismo. Diri naton kinahanglan gamiton “hin labi,” o bug-os inin tikamatay nga kalibotan. (1 Korinto 7:29-31; 1 Juan 2:17) Diri pariho hadton waray totoo nga paglaom, may-ada kita han urusahon nga regalo nga mahibaro nga kon magpapabilin kita nga matinumanon kan Jehova nga Dios, madadayaw naton hiya ha kadayonan ngan mapapahimulosan an kinabuhi ha waray kataposan. Salit, adlaw-adlaw nga dayawon gud naton hi Jehova, nga naghihimo han paglaom han pagkabanhaw nga sigurado!
Ano an Imo Baton?
• Ano an sadang naton abaton mahitungod han pagkabanhaw?
• Ano an mga hinungdan nga sigurado an paglaom han pagkabanhaw?
• Paonan-o ka maliliaw han paglaom han pagkabanhaw?
• Paonan-o an paglaom han pagkabanhaw makakaapekto ha aton paagi han pagkinabuhi?
[Mga Pakiana]
[Retrato ha pahina 28]
Maaram hi Job nga ginhihingyap gud ni Jehova nga banhawon an mga magtadong
[Retrato ha pahina 29]
‘Tan-awa, an imo anak buhi’