Kadaogan ha “European Court of Human Rights”

HAN Enero 11, 2007, iginpahayag han European Court of Human Rights ha Strasbourg, Fransia, an ginkauruyonan nga desisyon pabor ha mga Saksi ni Jehova ha Russia ha ira kaso kontra ha Russian Federation. Ginsuportahan han desisyon an kagawasan han relihiyon para ha mga Saksi ni Jehova ngan han ira katungod ha waray dinadapigan nga pagbista. Aton tagdon kon ano an hinungdan hito nga kaso.

Bungol an kadam-an nga membro han usa nga kongregasyon han mga Saksi ni Jehova ha syudad han Chelyabinsk, Russia. An ira katirokan usa nga pasilidad nga ira ginpletehan ha usa nga bokasyonal nga eskwelahan. Han Domingo, Abril 16, 2000, ginpaundang han tsirman, o Komisyoner, han Human Rights Commission han rehiyon sugad man han duha nga opisyal han polisya ngan usa nga detektib an ira katirok. Ginpaundang an katirok tungod han pagpasulabi, labi na ha bahin han Komisyoner, ngan han palso ngan hinimo-himo nga mga akusasyon ha pagdumara hin mga katirok nga supak ha balaud. Han Mayo 1, 2000, waray na hira papleteha ha awditoryum.

Nagpasa hin reklamo an mga Saksi ni Jehova ha Chelyabinsk, kondi waray nahitabo. An Konstitusyon han Russia ngan an Convention for the Protection of Human Rights and Fundamental Freedoms naggagarantiya hin kagawasan han relihiyon ngan han pagtarotarampo. Salit, iginpasa an reklamo sibil ha usa nga korte han distrito ngan ginsundan hin pag-apela ha usa nga korte han rehiyon. Antes pa hito, han Hulyo 30, 1999, nagdesisyon an korte suprema ha iba nga kaso nga “uyon ha Balaud han Russia may kalabotan ha kagawasan han konsensya ngan relihiyoso nga mga pagtarotarampo, an mga pulong nga ‘waray ulang’ nangangahulogan nga diri na kinahanglan an permiso tikang ha, o pagtugot antes pa han, sekular nga mga awtoridad ha pagdumara hin relihiyoso nga mga seremonya ha mga lokasyon nga igintagana [para hito nga katuyoan].” (Ira an mga braket.) Bisan pa hini, ginbalewaray han mga korte han distrito ngan rehiyon an mga reklamo.

Han Disyembre 17, 2001, gindara an kaso ha European Court of Human Rights. Ginbista ito han Septyembre 9, 2004. An masunod nga mga bahin tikang ha ultimo nga desisyon han Korte:

“Nakita han Korte nga may-ada paghilabot ha katungod han mga aplikante ha kagawasan han relihiyon tungod kay, han 16 han Abril 2000, ginpaundang han mga opisyal han Estado an ira relihiyoso nga katirok antes han nakaeskedyol nga oras han pagtapos hito.”

“Matin-aw nga waray legal nga basihan an pagpaundang han relihiyoso nga okasyon nga gindumara ha lokasyon nga legal nga ginpletehan para hito nga katuyoan.”

“Nakita [han Korte] an diri nagbabag-o nga balaud han Korte Suprema han Russia nga an relihiyoso nga mga pagtarotarampo diri nagkikinahanglan hin bisan ano nga awtorisasyon tikang ha, o pagpahibaro ha, mga awtoridad.”

“Tungod hito, may-ada pagtalapas han Artikulo 9 [kagawasan han relihiyon] an Convention ha pagpaundang han Komisyoner ngan han iya mga kaupod han relihiyoso nga katirok han mga nagreklamo nga nahitabo han 16 han Abril 2000.”

“Nakita han Korte nga an lokal nga mga korte napakyas ha ira obligasyon . . . ha pagpamatuod nga an mga partido gintagan hin makatadunganon ngan waray dinadapigan nga pagbista. Nagkaada . . . pagtalapas han Artikulo 6 [katungod ha pagkaada waray dinadapigan nga pagbista] han Convention.”

Mapasalamaton an mga Saksi ni Jehova ha Dios ha paghatag ha ira hin kadaogan ha European Court of Human Rights. (Salmo 98:1) Mationan-o kadaku an magigin epekto han desisyon han Korte? Hi Joseph K. Grieboski, an presidente han Institute on Religion and Public Policy, nasiring: “Usa na liwat ini nga importante gud nga desisyon nga nakakaapekto ha kagawasan han relihiyon ha bug-os nga Europa, tungod kay an desisyon makakaapekto ha relihiyoso nga mga katungod han ngatanan nga estado nga ilarom han pagdumara han European Court of Human Rights.”