Kay Ano nga Tumambong ha mga Katirok?

TIGDA nga ginbayaan hi Christine han iya bana—paglabay hin 20 ka tuig nga pag-asawa. Nag-usahan na la hiya ha pagpadaku han iya pito nga anak nga nag-iedad hin 7 tubtob 18. “Yana kinahanglan ko himoon an ngatanan nga importante nga mga desisyon nga nag-uusahan,” siring niya. “Nabug-atan ako han responsabilidad ngan naghihingyap hin suporta ngan giya.” Diin niya nabilngan an ginkikinahanglan nga bulig?

“An Kristiano nga mga katirok nakaluwas ha akon ngan ha akon pamilya,” siring ni Christine. “Ha mga katirok, nakarawat namon an bulig tikang ha amon kasangkayan ngan giya tikang ha Pulong han Dios. An regular nga pagtambong ha mga katirok nakabulig ha amon ha ngatanan nga importante nga bahin han amon kinabuhi sugad nga pamilya.”

Durante hinin “magpakalilisang nga mga panahon,” kita ngatanan nakakaeksperyensya hin magkalain-lain nga problema. (2 Timoteo 3:1) Pariho kan Christine, mahimo mo hunahunaon an mga katirok han mga Saksi ni Jehova sugad nga importante nga bahin han imo pagsingba kan Jehova. Posible gud nga an lima nga katirok ha kongregasyon nga nakaeskedyol kada semana nag-aaghat han imo gugma ha Dios, nagpaparig-on han imo paglaom para ha tidaraon, ngan nagtatagana ha imo hin Kasuratanhon nga giya kon paonan-o malalamposan an mga problema.

Kondi, may-ada mga tawo nga nakukurian ha pagtambong pirme ha mga katirok. Kapoy na hinduro hira katapos han mga buruhaton han bug-os nga adlaw, ngan an paghunahuna ha pagliwan hin desente nga bado ngan pagbiyahe ngadto ha katirok baga hin sobra na. Para ha iba, an eskedyol han ira trabaho pirme nakakaulang ha ira pagtambong. Kon tumambong hira ha ngatanan nga katirok, maiibanan an ira sweldo o mamimilegro hira nga paiwason ha trabaho. Bangin diri natambong an pipira tungod kay inaabat nira nga an iba nga kaliawan mas makakarepresko ha ira kay ha pakig-upod ha kongregasyon.

Salit, ano an importante nga mga hinungdan an nag-aaghat ha imo ha pagtambong ha Kristiano nga mga katirok? Ano an imo mahihimo basi magin makarepresko ini nga mga okasyon para ha imo? Basi mabuligan kita nga mabaton ini nga mga pakiana, usisahon naton an imbitasyon ni Jesus nga nakarekord ha Mateo 11:28-30. Hiya nagsiring: “Kadi ngatanan kamo ha akon, nga nagbubuhat ngan binubug-atan, ngan akon kamo tatagan hin pagpahuway. Pas-ana niyo an akon yugo, ngan magtoon kamo ha akon, kay ako maaghop ngan mapainubsanon ha kasingkasing, ngan kamo makakaagi hin pagpahuway ha iyo mga kalag. Kay  an akon yugo masayon, ngan an akon pinas-an magaan.”

‘Kadi ha Akon’

Hi Jesus nagsiring: ‘Kadi ha akon.’ An usa nga paagi ha pagkarawat hito nga imbitasyon amo an pagtambong pirme ha mga katirok. Damu an hinungdan ha pagtambong, kay ha usa nga okasyon hi Jesus nagsiring: “Kon diin pagtitiripon an duha o tulo ha akon ngaran, aadto ako ha butnga nira.”—Mateo 18:20.

Ha siyahan nga siglo, personal nga gin-imbitar ni Jesus an magkalain-lain nga tawo nga sumunod ha iya. Hito nga paagi, iya gintagan hira hin higayon nga magin duok ha iya. Ginkarawat dayon ito han pipira. (Mateo 4:18-22) Gintugotan han iba an mga butang sugad han materyal nga makaulang ha pagkarawat hito nga imbitasyon. (Markos 10:21, 22; Lukas 9:57-62) Ha mga sumunod ha iya, hi Jesus nagpasarig: “Kamo waray magpili ha akon, kondi ako an nagpili ha iyo.”—Juan 15:16.

Han namatay ngan nabanhaw hi Kristo, diri na hiya kaupod han iya mga disipulo ha pisikal nga paagi. Kondi kaupod pa gihapon nira hiya ha paagi nga iya ginigiyahan an ira buruhaton ngan gin-oobserbahan an ira reaksyon ha iya sagdon. Pananglitan, mga 70 ka tuig katapos hiya banhawon, iya ginsagdonan ngan gindasig an pito nga kongregasyon ha Asia Minor. Ipinapakita han iya mga pulong an daku nga kahibaro ha mag-opay nga kalidad ngan kaluyahan han mga membro hito nga mga kongregasyon.—Pahayag 2:1–3:22.

Interesado pa gihapon hi Jesus ha tagsa han iya disipulo. Hiya nagsasaad: “Kitaa, ako upod ha iyo ha ngatanan nga mga adlaw tubtob ha kataposan han kalibotan.” (Mateo 28:20) Nagkikinabuhi na kita yana ha panahon han kataposan, salit kinahanglan kita gumios uyon ha imbitasyon ni Jesus nga sumunod ha iya. Ha pipira nga sukol, an pagbuhat hito nagkikinahanglan nga regular kita nga tumambong ha mga katirok. Karuyag ni Jesus nga mamati kita ha iya ngan magin ‘tinutdoan tungod ha iya’ pinaagi han basado-ha-Biblia nga mga pag-aram ngan pahayag nga regular nga bahin han mga katirok. (Efeso 4:20, 21) Kinakarawat mo ba an imbitasyon ni Jesus: ‘Kadi ha akon’?

Kamo nga “Nagbubuhat Ngan Binubug-atan”

An usa nga importante nga hinungdan ha pagtambong ha mga katirok amo an pagkarawat hin pagdasig. (Hebreo 10:24, 25) Damu ha aton an sigurado nga “nagbubuhat ngan binubug-atan” ha magkalain-lain nga paagi. Bangin nabubug-atan ka tungod hin personal nga mga problema, sugad han mga problema ha kahimsog. Ha mga katirok, malilipay ka tungod han pagdinasigay ha usa kag usa. (Roma 1:11, 12) Pananglitan, makakabati ka hin makaparig-on nga mga komento, mapapahinumdoman han imo basado ha Biblia nga paglaom, ngan makakaobserba han pagtoo han iba nga may-ada mga problema. Ini ngatanan makakabulig ha imo nga maatubang ngan matipigan an imo pagtagad ha mga problema ha timbang nga paagi.

Tagda an ginsiring han Kristiano nga babaye nga nalilimitahan han maiha na nga sakit. “An akon sakit nag-oobligar ha akon nga magpaospital,” siring niya. “An pagtambong ha mga katirok katapos pag-inukoy ha ospital baga hin makuriay, kondi ito an angay ko kadtoan. An gugma han kabugtoan nagbabalik han akon kalipay, ngan an katutdoan ngan giya ni Jehova ngan ni Jesus naghahatag hin katuyoan ha akon kinabuhi.”

“An Akon Yugo Masayon, Ngan an Akon Pinas-an Magaan”

Tigamni nga ha mga teksto nga aton gin-aanalisar, hi Jesus nagsiring: “Magtoon kamo ha akon.” Pinaagi ha paghibaro ha iya, nagigin mga sumurunod kita niya, ngan ginpapas-an naton an iya yugo kon kita nagpapahinungod ha Dios ngan nagpapabawtismo. (Mateo 28:19, 20) An regular nga pakigbahin ha mga katirok importante basi makapabilin kita nga iya sumurunod. Kay ano? Tungod kay ha Kristiano nga mga katirok nga natututdoan kita mahitungod kan Jesus, han iya katutdoan, ngan han iya pamaagi.

Ano nga pinas-an an karuyag ni Jesus nga aton dad-on? Ito nga pinas-an amo gihapon an iya gindadara—an pribilehiyo ha pagbuhat han kaburut-on han Dios. (Juan 4:34; 15:8) Ginkikinahanglan an pangalimbasog ha pagsunod han mga sugo ha Dios, kondi ini nga pinas-an diri mabug-at hinduro. Bangin magigin mabug-at ito  kon mangangalimbasog kita ha pagpas-an hito ha aton la kalugaringon nga kusog. Kondi, kon mag-aampo kita para ha espiritu han Dios ngan magpahimulos han espirituwal nga pagkaon ha mga katirok, makakarawat naton an hatag han Dios nga “kapin kaopay nga gahum.” (2 Korinto 4:7) Pinaagi ha pag-andam para ha mga katirok ngan pakigbahin hito, nagigin mas marig-on an aton gugma kan Jehova. Dugang pa, kon napapagios kita han gugma, an mga sugo han Dios “diri magbug-at.”—1 Juan 5:3.

An katawohan ha kabug-osan, naatubang hin mga problema sugad han panginabuhi, kahimsog, ngan personal nga mga kakurian. Kondi, basi malamposan ito, diri kita nasarig ha kinaadman la han tawo. An mga katirok nabulig ha aton nga ‘diri mangarit,’ tungod kay hi Jehova nagtatagana han aton mga panginahanglan ngan nabulig ha aton ha pag-atubang han mga problema. (Mateo 6:25-33) Oo, an Kristiano nga mga katirok kapahayagan han gugma han Dios ha aton.

“Ako Maaghop Ngan Mapainubsanon ha Kasingkasing”

Kustomre ni Jesus nga bisitahon an sinagoga, diin ginhihisgotan an Pulong han Dios. Ha usa hito nga okasyon, ginkuha ni Jesus an linukot nga basahon ni Isaias ngan ginbasa: “An espiritu han Ginoo aadi ha akon; kay iya ako ginhirogan ha pagwali han mag-opay nga mga sumat ha mga makalolooy; hiya nagsugo ha akon pagpasabot hin kaluwasan ha mga bihag; ngan pagpakita ha mga buta; ha pagpagawas ha kaluwasan hadton may mga lapsok; pagpahibaro han makaruruyag nga tuig han Ginoo.” (Lukas 4:16, 18, 19) Daku gud nga kalipay han hibatian nga gin-aaplikar ni Jesus ito nga mga pulong pinaagi ha pagsiring: “Niyan nga adlaw natuman ini nga surat ha iyo mga talinga.”—Lukas 4:21.

Ginpapangunahan pa gihapon ni Jesus, an malumo nga ‘punoan nga magbarantay,’ an pag-ataman han iya mga sumurunod. (1 Pedro 5:1-4) Ilarom han iya paggiya, “an matinumanon ngan maaramon nga uripon” nagtoka hin kalalakin-an sugad nga mga magbarantay ha mga kongregasyon han mga Saksi ni Jehova ha bug-os nga kalibotan. (Mateo 24:45-47, NW; Tito 1:5-9) Ini nga kalalakin-an “nagmamangno han kongregasyon han Dios” ha malumo nga paagi ngan nagpapakita hin susbaranan pinaagi ha pagtambong pirme ha mga katirok. Maipapakita mo an imo apresasyon para hini nga “hatag ha mga tawo” pinaagi ha pagtambong ha mga katirok, diin madadasig mo an iba pinaagi han imo presensya ngan pakigbahin.—Buhat 15:30-33; 20:28, NW; Efeso 4:8, 11, 12.

“Kamo Makakaagi hin Pagpahuway ha Iyo mga Kalag”

Kon natambong ha Kristiano nga mga katirok, paonan-o mo masisiguro nga ini nga mga katirok makaparepresko gud? An usa nga paagi amo an pag-aplikar han sagdon ni Jesus: “Pagmatngon kamo ha iyo pamati.” (Lukas 8:18) An mga tawo nga naruruyag gud mahibaro namamati hin maopay kan Jesus. Ginhangyo nira hiya nga isaysay an iya mga ilustrasyon, ngan sugad nga resulta nagkaada hira hilarom nga pagsabot.—Mateo 13:10-16.

Masusubad mo an sugad nga mga nagugutom ha espirituwal pinaagi ha pagpamati hin maopay ha mga pahayag ha aton mga katirok. (Mateo 5:3, 6) Basi mabuligan ka nga matipigan nga nakasentro an imo hunahuna, pangalimbasugi nga imo masundan an mga punto ngan mga argumento han mamumulong. Pakianhi an imo kalugaringon: ‘Paonan-o ko maiaaplikar ini nga impormasyon ha akon kinabuhi? Ha ano nga paagi magagamit ko ini basi mabuligan an iba? Paonan-o ko maiilustrar ini nga punto?’ Dugang pa, pamilnga an mga teksto nga gin-gamit han mamumulong ha pagsuporta han iya importante nga mga punto. Kon mas namamati ka, nagigin mas makarepresko an mga katirok.

Katapos han katirok, ipakiistorya an mga punto ha iba. Isentro an imo hunahuna ha mga punto ngan ha kon paonan-o ito maiaaplikar. An makapadasig nga mga pag-uruistorya nakakahimo han mga katirok nga makaparepresko hinduro.

Sigurado nga may-ada kita mag-opay nga hinungdan ha pagtambong ha katirok. Katapos repasuhon an mga kapulsanan nga ginhisgotan pa la, kay ano nga diri pakianhan an imo kalugaringon, ‘Kinakarawat ko ba an imbitasyon ni Jesus: ‘Kadi ha akon’?’

[Mga Retrato ha pahina 11]

An iba ba nga mga buruhaton nakakaulang ha imo pagtambong ha mga katirok?