Kon Kay Ano nga Hirani Na Matapos an Ngatanan nga Pag-antos
Kon Kay Ano nga Hirani Na Matapos an Ngatanan nga Pag-antos
“An Bato nga bantilis, an iya buhat hingpit.”—DEUTERONOMIO 32:4.
1, 2. (a) Kay ano nga pinabibilhan mo an paglaom nga mabuhi ha waray kataposan? (b) Ano an nakakapugong ha damu nga tumoo ha Dios nga nagsasaad hin urusahon nga mga butang para ha tidaraon?
NALILIPAY ka ba ha paghanduraw han kinabuhi ha Paraiso? Bangin nahahanduraw mo an imo kalugaringon nga nag-uusisa hinin urusahon nga planeta ngan nahibabaro mahitungod han damu hinduro kalain nga buhi nga mga linarang dida hini. O bangin pinamamalandong mo an katagbaw nga aabaton mo samtang ikaw ngan an iba nagbuburublig ha pag-ataman ha tuna ngan paghimo hito nga bug-os-globo nga parke. O bangin ginhuhunahuna mo an mga kaabtik nga hibabaroan mo ha arte, arkitektura, musika, o iba nga mga buruhaton nga diri mo mahatagan hin panahon tungod kay okupado ka ngan pirme nagdadagmit yana. Anoman an kahimtang, pinabibilhan mo an paglaom nga magkaada han tinatawag han Biblia nga “kinabuhi nga totoo”—an kinabuhi nga gintuyo ni Jehova para ha aton, ha kadayonan.—1 Timoteo 6:19.
2 Makalilipay ngan presyoso nga pribilehiyo an pagsumat ha iba mahitungod hiton basado-ha-Biblia nga paglaom, diri ba? Kondi, damu an nagsasalikway han sugad nga paglaom. Nasiring hira nga imahinasyon la ito, inop la han mga tawo nga masayon tumoo. Bangin makurian pa ngani hira tumoo ha Dios nga nagsasaad hin kinabuhi nga waray kataposan ha Paraiso. Kay ano? Para ha iba, nakakaulang an problema han karaotan. Natoo hira nga kon an Dios naeksister ngan makagarahum-ha-ngatanan ngan mahigugmaon hiya, kay ano nga duro an karaotan ngan pag-antos ha kalibotan? Nasiring hira nga waray Dios nga natugot han karaotan an mahimo umiksister—o kon naeksister hiya, diri hiya makagarahum-ha-ngatanan o diri hiya nagtatagad ha aton. Para ha iba, baga hin makakombinse ini nga klase hin pangatadongan. Pinamamatud-an gud ni Satanas nga maabtik hiya ha pagbuta ha mga hunahuna han mga tawo.—2 Korinto 4:4.
3. Mabubuligan naton an mga tawo nga mabaton an ano nga makuri nga pakiana, ngan kay ano nga may-ada kita talagsahon nga pribilehiyo ha pagbuhat hito?
3 Sugad nga mga Saksi ni Jehova, may-ada kita talagsahon nga pribilehiyo nga buligan an mga tawo nga ginlilimbongan ni Satanas ngan han kinaadman hini nga kalibotan. (1 Korinto 1:20; 3:19) Nasasabtan naton kon kay ano nga damu an diri natoo ha mga saad han Biblia. Diri gud nira kilala hi Jehova. Bangin diri hira maaram han iya ngaran o han kahulogan hito, ngan bangin gutiay la an ira hinbabaroan mahitungod han iya mga kalidad o han iya reputasyon ha pagtuman han iya mga saad, o bangin diri gud hira maaram hito. Binendisyonan kita tungod kay may-ada kita han sugad nga kahibaro. Ha panapanahon, mapulsanon an aton pagrepaso kon paonan-o naton mabubuligan an mga tawo nga “ginpadulman an ira sarabotan” ha pagbiling han baton ha usa han pinakamakuri nga mga pakiana nga iginpapakiana han mga tawo, “Kay ano nga tinutugotan han Dios an karaotan ngan pag-antos?” (Efeso 4:18) Siyahan, aton paghihisgotan kon ano an aton sadang himoon basi magin epektibo an aton pagbaton hito. Katapos, aton paghihisgotan kon paonan-o nakikita an mga kalidad ni Jehova ha paagi han iya pagdumara han karaotan.
Pagbiling han Husto nga Paagi han Pagbaton ha Pakiana
4, 5. Ano an bangin kinahanglan naton buhaton siyahan kon may-ada nagpapakiana kon kay ano nga tinutugotan han Dios an pag-antos? Isaysay.
4 Kon may-ada nagpapakiana kon kay ano nga tinutugotan han Dios an pag-antos, ano an aton baton? Bangin hatagan dayon naton hiya hin detalyado nga esplikasyon, nga gintitikangan ito ha nahitabo ha hardin han Eden. Ha pipira nga kahimtang, bangin angayan ito. Kondi, kinahanglan mag-ikmat. Bangin kinahanglan iandam anay naton an aton kaistorya antes batunon hiya. (Proberbios 25:11; Kolosas 4:6) Aton paghisgotan an tulo nga punto nga makakabulig ha aton nga buligan an usa ka tawo antes naton batunon an pakiana.
5 Siyahan, kon an tawo naguguol gud tungod kay kalyap an karaotan ha kalibotan, bangin hiya mismo o an iya mga hinigugma naaapektohan han karaotan. Salit, bangin maaramon an pagtikang pinaagi han pagpakita hin totoo nga empatiya o pagpaid. Hi apostol Pablo nagsagdon ha mga Kristiano: “Manangis kamo upod ha mga nananangis.” (Roma 12:15) An pagpakita hin empatiya, o pagin “malolooyon,” mahimo magpagios ha aton kaistorya. (1 Pedro 3:8) Kon nasasabtan niya nga gintatagad naton hiya, mas posible nga mamamati hiya ha aton sisidngon.
6, 7. Kay ano nga husto la nga kumendasyonan naton an sinsero nga tawo nga nagpapakiana mahitungod han makuri nga topiko ha Biblia nga nakakaguol ha iya?
6 Ikaduha, mahimo naton kumendasyonan an sinsero nga tawo ha iya pagpakiana mahitungod hito. An iba nasiring nga tungod kay iginbabangon nira an sugad nga mga pakiana, karuyag sidngon nga diri hira natoo o diri natahod ha Dios. Bangin ginsidngan pa ngani hira hito han usa nga klero. Kondi, diri pirme sugad hito an kahimtang. Ha pagkamatuod, an may-pagtoo nga mga tawo ha kadaan nga mga panahon nagbangon hin pariho hito nga mga pakiana. Pananglitan, hi salmista David nagpakiana: “Kay ano nga natindog ka ha hirayo, O Jehova? Kay ano nga natago ka ha mga panahon han kakurian?” (Salmo 10:1) Hi propeta Habakuk nagpakiana liwat: “O Jehova, ngada san-o an akon pagsangpit, ngan ikaw diri mamamati? Ako nagsangpit ha imo mahitungod han pagpungka, ngan ikaw diri magluluwas. Kay ano nga imo ako ginpapakita han karat-an, ngan ginpatan-aw ngada han kalapasan? Kay an kagunawan ngan pagpungka aada ha akon atubangan; ngan may-ada away, ngan an pagkasumpaki binangon.”—Habakuk 1:2, 3.
7 Kalalakin-an hira nga may pagtoo ngan natahod gud ha Dios. Ginsaway ba hira tungod kay nagbangon hira hin sugad nakakaguol nga mga pakiana? Ha kabaliktaran, karuyag ni Jehova nga an ira sinsero nga mga pakiana igrekord ha iya Pulong. Yana, an tawo nga nababaraka tungod han kalyap nga karaotan ha pagkamatuod bangin nagugutom ha espirituwal—naghihingyap hin mga baton nga an Biblia la an makakahatag. Hinumdumi, ginkumendasyonan ni Jesus adton nagugutom ha espirituwal, o “mahunahunaon han ira espirituwal nga panginahanglan.” (Mateo 5:3, NW) Pribilehiyo gud an pagbulig ha sugad nga mga tawo nga hiagian an kalipay nga iginsaad ni Jesus!
8. Ano nga nakakasamok nga mga katutdoan an nagpapagios ha mga tawo nga tumoo nga an Dios an hinungdan han pag-antos, ngan paonan-o naton mabubuligan hira?
8 Ikatulo, bangin kinahanglan buligan naton hiya nga masabtan nga diri an Dios an hinungdan han karaotan nga kalyap gud ha kalibotan. Damu nga tawo an gintututdoan nga an Dios nagmamando hini nga kalibotan nga inuukyan naton, nga hadto pa igintanda na han Dios an ngatanan nga nahitatabo ha aton, ngan may-ada hiya misteryoso, diri-masabtan nga mga hinungdan ha pagpahinabo hin mga kakurian ha katawohan. Sayop ini nga mga katutdoan. Ginpapasiparahan nira an Dios ngan iginhuhulagway hiya sugad nga an hinungdan han karaotan ngan pag-antos ha kalibotan. Salit bangin kinahanglan gamiton naton an Pulong han Dios ha pagtadong han sugad nga mga butang. (2 Timoteo 3:16) Diri hi Jehova an magmarando hinin maraot nga sistema han mga butang; hi Satanas nga Yawa an magmarando. (1 Juan 5:19) Diri igintatanda nga daan ni Jehova kon ano an mahitatabo ha iya intelihente nga mga linarang; tinatagan niya an kada usa hin kagawasan ngan mga higayon ha pagpili butnga han maopay ngan han maraot, han husto ngan han sayop. (Deuteronomio 30:19) Ngan hi Jehova diri gud amo an surok han karaotan; nangangalas hiya han karaotan ngan nagtatagad hadton nag-aantos han kawaray-hustisya.—Job 34:10; Proberbios 6:16-19; 1 Pedro 5:7.
9. Ano an pipira han mga publikasyon nga igintatagana han “matinumanon ngan maaramon nga uripon” basi mabuligan an mga tawo nga makasabot kon kay ano nga tinutugotan ni Jehova nga Dios an pag-antos?
9 Kon maipresenta mo na an sugad nga basihan, bangin maobserbahan mo nga andam na an imo mamarati nga mahibaro kon kay ano nga tinutugotan han Dios nga magpadayon an pag-antos. Basi mabuligan ka hini, “an matinumanon ngan maaramon nga uripon nga klase” nagtatagana hin damu nga mga publikasyon nga makakabulig. (Mateo 24:45-47, NW) Pananglitan, ha “Diosnon nga Pagkamasinugtanon” Distrito nga Kombensyon han 2005/06, iginpagowa an tract nga may ulohan nga An Ngatanan nga Pag-antos Hirani Na Matapos! Kay ano nga diri magin pamilyar ha mga sulod hito? Sugad man, an libro nga Ano Gud ba an Igintututdo han Biblia?, nga aada na yana ha 157 nga yinaknan, may-ada usa nga kapitulo nga naghihisgot hinin importante nga pakiana. Gamita hin maopay inin makakabulig nga mga publikasyon. Matin-aw nga iginsasaysay hito an mga hitabo nga iginrekord ha Kasuratan may kalabotan ha isyu han pagkasoberano ha uniberso nga iginbangon ha Eden ngan kon kay ano nga gindumara ni Jehova ito nga isyu sugad han iya ginbuhat. Hinumdumi liwat nga samtang ginhihisgotan mo ini nga topiko, iginpapahayag mo ha imo mamarati an pinakaimportante nga klase han kahibaro. Ito an kahibaro mahitungod kan Jehova ngan han iya makaruruyag nga mga kalidad.
Isentro an Atensyon ha mga Kalidad ni Jehova
10. Ano an makuri masabtan han damu nga tawo mahitungod han pagtugot han Dios han pag-antos, ngan ano nga kahibaro an mahimo makabulig ha ira?
10 Samtang binubuligan mo an mga tawo nga makasabot kon kay ano nga tinutugotan ni Jehova an mga tawo nga magmando ha ira kalugaringon ilarom han impluwensya ni Satanas, pangalimbasugi nga pabug-atan ha imo kaistorya an makaruruyag nga mga kalidad ni Jehova. Damu an maaram nga an Dios gamhanan; nababatian nira pirme nga tinatawag hiya nga Dios nga Makagarahum-ha-ngatanan. Kondi, bangin makurian hira ha pagsabot kon kay ano nga diri niya ginagamit an iya daku nga gahum nga tapuson dayon an kawaray-hustisya ngan pag-antos. Bangin kulang hira hin pagsabot ha iba nga mga kalidad ni Jehova, sugad han pagkabaraan, hustisya, kinaadman, ngan gugma. Ipinapakita ni Jehova ini nga mga kalidad ha hingpit, timbang nga paagi. Salit an Biblia nasiring: “An iya buhat hingpit.” (Deuteronomio 32:4) Paonan-o mo maipapatin-aw ini nga mga kalidad samtang binabaton mo an mga pakiana nga agsob igpakiana mahitungod hini nga isyu? Aton paghisgotan an pipira nga ehemplo.
11, 12. (a) Kay ano nga diri gud mapapasaylo an sala nira Adan ngan Eva? (b) Kay ano nga diri tutugotan ni Jehova an sala ha kadayonan?
11 Kay ano nga waray na la pasayloa ni Jehova hira Adan ngan Eva? Hini nga kahimtang diri gud mahihimo an pagpasaylo. Sugad nga hingpit nga mga tawo, tinuyo nga ginpili nira Adan ngan Eva nga isalikway an pagkasoberano ni Jehova ngan karawaton lugod an giya ni Satanas. Diri urusahon nga ha anoman nga paagi waray magbasol an mga rebelde. Kondi, kon an mga tawo nagpapakiana kon kay ano nga waray hira pasayloa ni Jehova, bangin ha tinuod naghuhunahuna hira kon kay ano nga waray na la niya igpaubos an iya suruklan ngan tugotan an pag-eksister han sala ngan pagrebelde. An baton duok nga may kalabotan ha usa nga kalidad nga importante gud ha kinaiya mismo ni Jehova—an iya pagkabaraan.—Eksodo 28:36; 39:30.
12 Damu ka beses nga pinabubug-atan han Biblia an pagkabaraan ni Jehova. Kondi, makasurubo nga pipira la nga mga tawo dida hinin maraot nga kalibotan an nasabot hito nga kalidad. Hi Jehova limpyo, putli, ngan waray gud sala. (Isaias 6:3; 59:2) Mahitungod han sala, naghikay hiya hin paagi ha pagtubos hito, pagwara hito, kondi diri niya tutugotan ito ha kadayonan. Kon disidido hi Jehova ha pagtugot han sala ha kadayonan, mawawaray kita paglaom para ha tidaraon. (Proberbios 14:12) Ha itinanda nga panahon ni Jehova, igpapahiuli niya an ngatanan nga linarang ha kahimtang han pagkabaraan. Sigurado ito, kay ito an kaburut-on han Usa nga Baraan.
13, 14. Kay ano nga ginpili ni Jehova nga diri bungkagon an mga rebelde ha Eden?
13 Kay ano nga waray na la bungkaga ni Jehova an mga rebelde ha Eden ngan maglarang utro? Sigurado nga may gahum hiya ha pagbuhat hito; diri na maiha gagamiton niya ito nga gahum ha pagbungkag han ngatanan nga magraot. An iba bangin maghunahuna, ‘Kay ano nga waray niya buhata ito han tulo pa la an nakasala ha uniberso? Diri ba nalikyan unta an pagsarang han sala—ngan han ngatanan nga kakurian nga nakikita naton ha kalibotan?’ Kay ano nga waray pilia ni Jehova nga buhaton ito? An Deuteronomio 32:4 nasiring: “An ngatanan niya nga dalan amo an katadongan.” Duro gud an pagbati ni Jehova hin hustisya. Ha pagkamatuod, “hi Jehova nahigugma hiton katadongan,” o hustisya. (Salmo 37:28) Tungod han iya gugma ha hustisya, waray niya bungkaga an mga rebelde ha Eden. Kay ano?
14 An pagrebelde ni Satanas nagbangon hin isyu may kalabotan ha pagkahusto han pagkasoberano han Dios. An pag-abat ni Jehova hin hustisya nagkinahanglan nga batunon an ayat ni Satanas uyon ha hustisya. An pagbungkag dayon ha mga rebelde, bisan kon takos gud hira hito, diri maghahatag han sugad nga baton. Maghahatag la ito hin dugang nga ebidensya han gihitaasi nga gahum ni Jehova, kondi diri an iya gahum an gin-ayat. Dugang pa, iginpahayag ni Jehova an iya katuyoan kan Adan ngan Eva. Magkakaanak hira ngan pupun-on nira an tuna, kukultibaron ito, ngan magpapasakop ha ira an ngatanan nga linarang ha tuna. (Genesis 1:28) Kon ginbungkag dayon ni Jehova hira Adan ngan Eva, an iya iginpahayag nga katuyoan may kalabotan ha mga tawo magigin kapakyasan. An hustisya ni Jehova diri gud magtutugot hin sugad nga resulta, kay an iya katuyoan pirme natutuman.—Isaias 55:10, 11.
15, 16. Kon an mga tawo nagpipresenta hin mapipilian nga “mga solusyon” ha ayat nga iginbangon ha Eden, paonan-o naton mabubuligan hira?
15 May-ada ba bisan hin-o ha uniberso nga labaw an kinaadman kay ha kan Jehova nga makakasulbad han pagrebelde? An pipira nga tawo bangin magpresenta han ira kalugaringon nga “mga solusyon” ha pagrebelde ha Eden. Kondi, diri ba sugad hin iginpapasabot hito nga makakaghunahuna hira hin mas maopay nga mga paagi ha pagsulbad han isyu? Bangin buhaton nira ito nga may-ada maopay nga motibo, kondi diri hira nasabot mahitungod kan Jehova ngan han iya urusahon nga kinaadman. Han nagsurat hi apostol Pablo ha mga Kristiano ha Roma, ginhisgotan niya hin detalyado an hilarom nga kinaadman han Dios, upod na an sagrado nga “tinago” mahitungod han katuyoan ni Jehova ha paggamit han Mesianiko nga Ginhadian ha paglukat ha matinumanon nga katawohan ngan ha pagbaraan han Iya harangdon nga ngaran. Ano an inabat ni Pablo ha kinaadman han Dios nga naghimo hini nga katuyoan? Gintapos han apostol an iya surat pinaagi hini nga mga pulong: “Ha usa la nga Dios nga makinaadmananon, an himaya ha mga katuigan nga waray kataposan, tungod kan Jesu-Kristo. Amen.”—Roma 11:25; 16:25-27.
16 Nasabtan ni Pablo nga hi Jehova an ‘usa la nga makinaadmananon’—an may gihitaasi nga kinaadman ha uniberso. Hin-o ha diri-hingpit nga mga tawo an makakaghunahuna hin mas maopay nga paagi ha pagsulbad han bisan ano nga problema—labi na an ayat ni Satanas ha pagkahusto han pagkasoberano han Dios? Salit, kinahanglan buligan naton an mga tawo nga magkaada han pariho nga pagtahod naton ha Dios nga “makinaadmananon ha kasingkasing.” (Job 9:4) Kon mas nasasabtan naton an kinaadman ni Jehova, mas bug-os nga masarig kita nga gimaopayi an iya paagi ha pagsulbad han mga butang.—Proberbios 3:5, 6.
Pagkilala ha Pinakaimportante nga Kalidad ni Jehova
17. Paonan-o an labaw nga pagsabot ha gugma ni Jehova makakabulig ha mga naguguol tungod ha pagtugot han Dios ha pag-antos?
17 “An Dios amo an gugma.” (1 Juan 4:8) Pinaagi hiton makatirigamnan nga mga pulong, iginsusumat han Biblia an pinakaimportante nga kalidad ni Jehova, an kalidad nga pinakamakaruruyag ha ngatanan nga iya mga kalidad ngan pinakanakakaliaw para hadton naguguol tungod kay kalyap an karaotan. Ipinapakita ni Jehova an gugma ha tagsa nga bahin han paagi han iya pagsulbad han daku nga kadaot nga resulta han sala ha iya mga linarang. An gugma nagpagios kan Jehova nga hatagan hin paglaom an makasasala nga mga anak nira Adan ngan Eva, ngan magtagana ha ira hin paagi ha pagdaop ha Iya ngan magin duok ha Iya. An gugma nagpagios ha Dios nga magtagana hin lukat nga maghahatag hin paagi basi bug-os nga mapasaylo an mga sala ngan igpahiuli an tawo ha hingpit, waray kataposan nga kinabuhi. (Juan 3:16) Ngan an gugma nagpagios ha iya nga magin mapailubon ha katawohan, ngan ihatag ha gidadamui nga mga tawo an higayon nga isalikway hi Satanas ngan pilion hi Jehova sugad nga ira Soberano.—2 Pedro 3:9.
18. Binendisyonan kita ha pagkaada hin ano nga pagsabot, ngan ano an aton paghihisgotan ha masunod nga artikulo?
18 Han an usa nga pastor nagpahayag ha mga mamarati nga nagkatirok durante han anibersaryo han makabungkag nga pag-atake han mga terorista, hiya nagsiring: “Diri kita maaram kon kay ano nga igintutugot han Dios nga magpadayon an karaotan ngan pag-antos.” Makasurubo gud! Diri ba kita nalilipay nga nasasabtan naton ini nga topiko? (Deuteronomio 29:29) Ngan tungod kay hi Jehova maaramon, matadong, ngan mahigugmaon, maaram kita nga hirani na niya tapuson an ngatanan nga pag-antos. Ha pagkamatuod, nagsasaad hiya nga bubuhaton niya ito. (Pahayag 21:3, 4) Kondi, ano an paglaom han ngatanan nga nagkamatay na ha naglabay nga mga siglo? An paagi ba han pagsulbad ni Jehova han isyu ha Eden nangangahulogan nga waray na hira paglaom? Diri. An gugma nagpagios ha iya nga magtagana liwat para ha ira, pinaagi han pagkabanhaw. Ito an magigin topiko han masunod nga artikulo.
Ano an Imo Baton?
• Ano an masisiring naton ha usa ka tawo nga nagpapakiana kon kay ano nga tinutugotan han Dios an pag-antos?
• Paonan-o nakikita an pagkabaraan ngan hustisya ni Jehova ha paagi han iya pagdumara ha mga rebelde ha Eden?
• Kay ano nga sadang buligan naton an mga tawo nga magkaada labaw nga pagsabot ha gugma ni Jehova?
[Mga Pakiana]
[Retrato ha pahina 21]
Pangalimbasugi nga buligan adton naguguol tungod han pag-antos ha kalibotan
[Mga Retrato ha pahina 23]
An matinumanon nga hira David ngan Habakuk nagpakiana ha Dios hin sinsero nga mga pakiana