Pakabiling hin Paglaom ha Usa nga Kalibotan nga Puno hin Duro nga Kasakitan

“AN ORDINARYO nga mga tawo mas daku an maopay nga mahihimo ha publiko ngan ha pagsulbad han komon nga mga problema kay ha kakan-o pa man ha kasaysayan han tawo.” Ito an iginpahayag ni Bill Clinton, an presidente han E.U. hadto, durante hin komperensya ha Ottawa, Canada, han Marso 2006. Hiya nagtapos nga nagkaada na maopay nga kaburut-on ha bug-os nga kalibotan tikang han tsunami han 2004, ngan positibo nga nagsiring nga an kalibotan yana aada na ha “panahon nga an katawohan ha kalibotan nadepende na ha usa kag usa kay ha kakan-o pa man.”

Makakalaom ba kita nga an natural nga mga kalamidad magpapagios ha katawohan ha bisan diin nga mangalimbasog para ha mas maopay nga tidaraon? An pagdepende ba han katawohan ha usa kag usa masasarigan nga basihan ha paglaom hin tidaraon nga may totoo nga kamurayawan ngan nagpapadayon nga kasigurohan?

Surok han Totoo nga Paglaom

An hilawig nga kasaysayan han pangalimbasog han tawo ha sobra unom ka milenyo na nagpapakita  nga pauroutro nga ginpapakyas han tawo an usa kag usa. Salit, an giniyahan nga Kasuratan husto nga nagsasagdon: “Ayaw niyo ibutang an iyo pagsarig ha mga prinsipe, bisan ngani dida ha anak han tawo, ha kan kanay waray pagbulig.” (Salmo 146:3) An paglaom ha mga organisasyon han kalibotan, materyal nga mga butang, ngan mga ambisyon hito magriresulta la hin kapakyasan. Kay ano? Tungod kay an “kalibotan nawawara, ngan an iya kairiphon.”—1 Juan 2:17.

Kondi, ha bug-os nga siglo, an Dios an diri napapakyas nga paglaom han mga magtinumanon. Gintatawag hiya han Biblia nga ‘paglaom han [kadaan] nga Israel’ ngan an “paglaom han [kanan Israel] mga amay,” ngan nagsusulod ito hin damu nga kapahayagan hin paglaom, pagsarig, ngan kompyansa ha iya. (Jeremias 14:8; 17:13; 50:7) Ha pagkamatuod, an Biblia nag-aaghat ha aton nga maglaom o ‘maghulat kan Jehova.’—Salmo 27:14.

An Proberbios 3:5, 6 nagsasagda: “Sarig kan Jehova ha bug-os mo nga kasingkasing, ngan ayaw sandig dida ha imo kalugaringon nga pagsabot. Ha ngatanan mo nga dalan kilalaha hiya, ngan hiya magtututdo han imo mga agianan.” May-ada ka han ngatanan nga hinungdan nga sumarig gud hito nga saad kay hi Jehova nga Dios diri nagbabag-o, masasarigan, ngan pirme nagtutuman han iya ginsisiring. (Malakias 3:6; Jakobo 1:17) Karuyag niya an gimaopayi para ha imo, ngan kon pirme mo bubuhaton an ginsisiring han iya Pulong, an Biblia, maggigiya ito ha imo para ha imo kalamposan durante hinin makaharadlok nga panahon.—Isaias 48:17, 18.

An tawo nga bug-os kasingkasing nga nagsusunod ha giya han Dios makakasarig hini nga saad: “Diri ka mahadlok, kay ako upod ha imo; ayaw kahulop, kay ako an imo Dios; ako magpaparig-on ha imo; oo, ako mabulig ha imo; oo akon ka aagang-agangon pinaagi han too nga kamot han akon pagkamatadong.” (Isaias 41:10) An sinsero nga pag-ampo pati an pagpamalandong hini nga pasarig nakakaliaw gud ha ngatanan nga totoo nga nahigugma kan Jehova, kay nabulig ito ha ira nga malamposan an mga kakurian ngan kabaraka.

Tagda hi Andrea, usa han mga Saksi ni Jehova nga may duha nga anak. Hiya nagsiring: “Pinaagi la han pag-ampo ngan pagpamalandong ha mga saad ni Jehova nagkakaada ako kusog ha pagbangon kon naabot an panahon han kawaray kasigurohan. Kon ginhuhunahuna ko hi Jehova sugad nga diri nagbabag-o, mas masayon para ha akon nga makapabilin nga marig-on.”

Parig-ona an Imo Paglaom kan Jehova

Ha pagpabug-at han importansya han paglaom kan Jehova, an usa nga salmista nagsiring: “Daku an kamurayawan hadton mga nahigugma han imo balaud, ngan waray ha ira higayon ha hipakdol.” (Salmo 119:165) An sinsero nga pag-aram han Pulong han Dios daku an maibubulig ha pagpuno han imo hunahuna ngan kasingkasing hin mag-opay ngan makaparig-on ha espirituwal nga mga butang ‘nga matuod, harangdon, matadong, putli, makaruruyag, dungganon, may-ada kusog, ngan may-ada pagdayeg.’ Kon mangalimbasog ka gud ha pagpamati, paghibaro, pagkarawat, ngan pagbuhat han sugad nga mga butang, “an Dios han kamurayaw maupod ha iyo.”—Filipos 4:8, 9.

Hi John nga damu na hinduro an personal nga eksperyensya, nagsiring: “Basi magbag-o an akon pag-abat mahitungod ha tidaraon, importante an paghibaro nga kinahanglan ko an daku nga pagbag-o ha akon personalidad ngan panhunahuna antes ako makalaom ha pagkaada relasyon ha hingpit, diri nakikita nga Dios. An paagi la basi magkakaada ako han sugad nga relasyon amo an pagin espirituwal nga tawo. Nag-uupod ito hin pagbag-o ngadto ha pagin nakasentro ha Dios, ngan pangalimbasog ha pagkaada han panhunahuna han Dios pinaagi ha pagbasa han iya giniyahan nga Pulong ngan pagpamalandong hito.”

Kon karawaton mo an makarepresko, naghahatag hin kinabuhi nga tubig han kamatuoran nga aada ha giniyahan nga Kasuratan, maiaaplikar mo an epektibo ngan nasarihan na nga pamaagi ha pag-ato han damu hinduro nga karaotan nga ipinapakita han media kada adlaw. An pag-aplikar han ginsisiring han Biblia makakaparig-on liwat han bugkos han imo pamilya ngan makakaiban hin kabaraka. Dugang pa, an Dios nagsasaad nga andam hiya ha ‘pagpakita han iya kusog para ha ira nga an kasingkasing hingpit ha iya.’ (2 Kronikas 16:9) Susulbaron niya an mga butang ha paagi nga waray ka na gud kahahadlokan.

Hi Phinehas, nga nakatalwas ha girra ngan mga pamatay hin damu nga tawo, nasiring: “Nahibaro ako nga itapod an akon kinabuhi kan Jehova. An pagsunod ha mga prinsipyo han Biblia nakabulig  ha akon nga malikyan an damu nga problema.” Kon nasarig ka gud kan Jehova, mabubuligan ka niya nga malamposan an baga hin diri nasusulbad nga mga problema. (Salmo 18:29) An gutiay nga bata nga duok ha iya mga kag-anak bug-os nga nasarig ha ira ngan may kompyansa ha ira pag-ataman bisan kon masakit hiya o nababaraka. Aabaton mo an pariho kon mangalimbasog ka ngan karawaton an imbitasyon nga maglaom kan Jehova.—Salmo 37:34.

Sigurado nga Pundasyon han Paglaom

Hi Jesus nagsiring ha iya mga sumurunod: “Mag-ampo kamo sugad hini nga paagi: Amay namon, nga aada ka ha langit, gindadayaw an imo ngaran. Kumanhi an imo ginhadian. Matuman an imo pagburut-an, sugad ha langit, amo man ha tuna.” (Mateo 6:9, 10) Iton langitnon nga Ginhadian—an gobyerno ha pagdumara ni Jesu-Kristo—amo an paagi han Dios ha pagpahayag han Iya pagkasoberano ha tuna.—Salmo 2:7-12; Daniel 7:13, 14.

An damu nga hinungdan han kahadlok nga nakakaapekto ha ngatanan nga bahin han kinabuhi yana, usa nga matin-aw nga pangirilal-an nga ginkikinahanglan an panhilabot han Dios. Makalilipay nga hirani na ito mahitabo! Hi Jesu-Kristo, nga ginpalingkod na yana han Dios ha trono sugad nga Mesianiko nga Hadi, gintagan han awtoridad ha pagbindikar han pagkasoberano ni Jehova ngan pagbaraan han Iya ngaran. (Mateo 28:18) Diri na mag-iiha nga tatagdon han pagmando han Ginhadian an tuna basi pagwad-on an ngatanan nga hinungdan han kahadlok ngan kabaraka. An Isaias 9:6 nag-uunabi han mga kwalipikasyon nga nagpapakita nga hi Jesus takos gud nga Magmarando ngan makakagwara han aton kahadlok. Pananglitan, gintawag hiya nga ‘Amay ha Kadayonan,’ “Magsaragdon,” ngan “Prinsipe ha Pagdait.”

Tagda an may gugma nga mga pulong nga ‘Amay ha Kadayonan.’ Ha pagin sugad hito, hi Jesus may-ada gahum ngan awtoridad—pati hingyap—ha paghatag ha masinugtanon nga mga tawo han paglaom nga mabuhi ha kadayonan pinaagi han bili han iya halad lukat. Nangangahulogan ini nga ha kataposan magigin talwas hira ha sala ngan pagkadiri-hingpit nga ira napanunod ha siyahan nga makasasala nga tawo, hi Adan. (Mateo 20:28; Roma 5:12; 6:23) Gagamiton liwat niya an awtoridad nga hatag han Dios ha iya ha pagbanhaw han damu nga patay.—Juan 11:25, 26.

Han nakanhi pa ha tuna hi Jesus, pinamatud-an niya nga hiya “Magsaragdon.” Tungod han iya kahibaro ha Pulong han Dios ngan han iya diri matupngan nga pagsabot ha kahimtang han tawo, maaram hiya ha pagsulbad han ira adlaw-adlaw nga mga problema. Tikang han mahitrono hiya ha langit, hi Kristo nagpadayon ha pagin “Magsaragdon,” nag-aalagad sugad nga nangunguna nga persona nga nagpapahinabo nga magin posible an pakigkomunikar ni Jehova ha katawohan. An sagdon ni Jesus, nga nakarekord ha Biblia, pirme maaramon ngan waray sayop. An paghibaro ngan pagtoo hini magdadara ha imo ha kinabuhi nga may kasigurohan ngan waray kahadlok.

Ginpakilala liwat han Isaias 9:6 hi Jesus sugad nga an “Prinsipe ha Pagdait.” Tungod kay may-ada hi Kristo hito nga gahum, diri maiha nga gagamiton niya ito ha pagwara han ngatanan nga pagkadiri-parapriho—ha politika, ha sosiedad, ngan ha ekonomiya. Paonan-o? Pinaagi ha pagdara han katawohan ilarom ha mamurayawon nga pagmando han Mesianiko nga Ginhadian.—Daniel 2:44.

Ilarom han pagmando han Ginhadian, magpapabilin an kamurayawan ha bug-os nga tuna. Kay ano nga makakasiguro ka hini? Ipinapakita han Isaias 11:9 an hinungdan, aton mababasa: “Diri hira [an mga sakop han Ginhadian] magdadaot o diri maggugunaw ha bug-os ko nga bukid nga baraan; kay an tuna mapupuno han hibaro ni Jehova, sugad nga an katubigan nagpupuno han dagat.” Ha kataposan, an ngatanan nga tawo ha tuna magkakaada husto nga kahibaro mahitungod ha Dios ngan magigin masinugtanon ha iya. Nalilipay ka ba hito? Kon oo, ayaw paglangan ha pagkuha han presyoso nga ‘kahibaro ni Jehova.’

Makakapahimulos ka han makaparig-on han pagtoo ngan naghahatag hin kinabuhi nga kahibaro mahitungod ha Dios pinaagi ha pag-usisa han igintututdo gud han Biblia mahitungod han mga panhitabo ha aton panahon ngan han maopay nga tidaraon nga iginsaad hito. Salit gin-aaghat ka namon nga pahimulosan an libre nga pag-aram han Biblia nga igintatanyag han mga Saksi ni Jehova ha iyo lugar. Usa ini nga paagi nga makakaiban han imo kahadlok ngan makakabulig ha imo nga makabiling hin paglaom ha kalibotan nga puno hin kasakitan.

 [Kahon/Mga Retrato ha pahina 7]

Kon Kay Ano nga an Gobyerno han Ginhadian Nakakahatag hin Paglaom

Hi Jesu-Kristo, sugad nga Hadi han Ginhadian han Dios, gintagan han abilidad ngan katungod ha pagpadapat hin gahum ha bug-os nga uniberso. (Mateo 28:18) Iya ibabalik an hingpit nga ekolohiya han tuna. Pagwawad-on liwat niya an sakit ngan pisikal nga mga problema. An gamhanan nga mga ginhimo ni Jesus ha tuna abanse nga pagpakita han mas maopay nga mga bendisyon nga tiarabot ilarom han iya pagmando sugad nga hingpit ngan masasarigan nga Hadi. Ano nga mga kalidad hinin Mesianiko nga Hadi nga nakalista ha ubos an naruruyagan mo gud?

▪ Masayon madaop.—Markos 10:13-16.

▪ Makatadunganon ngan waray dinadapigan.—Markos 10:35-45.

▪ Masasarigan ngan diri makikalugaringon.—Mateo 4:5-7; Lukas 6:19.

▪ Matadong ngan may hustisya.—Isaias 11:3-5; Juan 5:30; 8:16.

▪ Mahunahunaon, matinagaron, ngan mapainubsanon.—Juan 13:3-15.

[Retrato ha pahina 4]

Pinaagi han pagbasa han Biblia ngan pagpamalandong maisisilsil ha aton an paglaom kan Jehova