An Gahum han Dila

AN DILA han giraffe naabot hin 45 sentimetro an kahilaba, ngan malaksi ngan makusog gud ito ha pagkutos hin mga dahon ha mga sanga han kahoy. An dila han asul nga balyena sugad kabug-at han usa nga elepante. Handurawa an kusog nga ginkikinahanglan basi la makiwa ito!

Kon itanding hito, an dila han tawo baga hin minos gud ha kadaku, kabug-at, ngan kakusog. Kondi, mas gamhanan gud ito. “An kamatayon ngan an kinabuhi aada ha gahum han dila,” siring han Biblia mahitungod hinin gutiay nga bahin han lawas han tawo. (Proberbios 18:21) Oo, pira ka beses na nga hinbabatian naton nga ginagamit an makamaratay nga gahum han dila han tawo ha paghimo hin mga buwa ngan sayop nga mga asoy nga nagriresulta hin kadaot, kamatayon pa ngani, ha waray sala nga mga biktima?

Ha sugad man nga paagi, an maiha na nga mga pagkasangkay nadadaot han nakakasakit nga mga pulong. An mga pagbati napapasubo gud han mapintas nga mga pulong. “Ngada san-o an iyo pag-urit han akon kalag, ngan pagkunot ha akon pinaagi han mga pulong?” nagsinggit hi Job nga ginpakaraot gud han iya mga sangkay. (Job 19:2) Iginhulagway hin matin-aw ni disipulo Jakobo an makabungkag nga gahum han dila nga diri-ginpupugngan: “An dila usa nga gutiay nga bahin ngan nakakapaghambog ha mga dagku nga mga bagay. Kitaa, kon diri haluag nga kagugub-an an nadagkot han gutiay nga kalayo. Ngan an dila usa nga kalayo.”—Jakobo 3:5, 6.

Ha luyo nga bahin, an gahum han dila mahimo liwat magin naghahatag-kinabuhi. An mapinairon ngan nakakaliaw nga mga pulong nakakatalwas ha iba tikang ha depresyon ngan pag-unay. An maopay nga sagdon, kon ginsusunod, nakakaluwas ha damu nga nag-aabuso hin droga ngan ha mabangis nga mga kriminal tikang ha temprano nga kamatayon. Oo, an bunga han dila han usa nga matadong “amo an kahoy ha kinabuhi,” ngan “an pulong nga maopay nga pagkayakan sugad-sugad han mga mansanas nga bulawan ha hinukot nga salapi.”—Proberbios 15:4; 25:11.

Kondi, an gimaopayi nga paggamit han dila amo an ha pagdayaw kan Jehova nga Dios, pagpahayag han maopay nga sumat han Ginhadian han Dios, ngan pagtutdo ha iba han presyoso nga mga kamatuoran han Biblia. Kay ano? Hi Jesus nagsiring: “Ini amo an kinabuhi nga waray kataposan, nga hira kumilala ha imo, nga amo la an matuod nga Dios, ngan hi Jesu-Kristo nga imo ginpakanhi.”—Juan 17:3; Mateo 24:14; 28:19, 20.