Karaotan—Diri Na Ba Ito Napupugngan?

Usa nga mausisahon nga bata an may-ada ginpurot ha usa nga lugar—usa nga dapit nga may nakalubong nga mga bomba—an nabuta ngan nabaldado ha iya bug-os nga kinabuhi. Gin-abandona han usa nga iroy an iya katatawo pa la nga minasus-an, igintago ito ha butnga han mga basura ha ligid han kalsada. Usa nga ginpaiwas ha trabaho an binalik ha iya gintrabahoan, ginpamusil an ngatanan nga iya hinkit-an, ngan nag-unay. Usa nga respetado nga tuminungnong an nanlugos hin kabataan nga waray mahihimo ha pagdepensa ha ira kalugaringon.

MAKASURUBO nga an mga report han sugad nga magraot nga buhat komon na hinduro ha aton panahon. Mas makasurubo pa gud nga ini nga mga report natatabonan han mga sumat mahitungod han pamatay han diri katribo ngan terorismo. “Kon tatagdon an karaotan nga naobserbahan hini nga siglo, ini an siglo ni Satanas,” siring han usa nga editoryal nga iginpublikar han 1995. “Waray panahon ha naglabay nga an katawohan nagpakita hin daku nga abilidad ngan hingyap ha pagpatay hin minilyon nga tawo tungod han rasa, relihiyon, o kahimtang ha sosiedad.”

Ha pariho nga panahon, ginhuhugawan han katawohan an hangin ngan tuna, gin-uubos an natural nga mga bahandi hito, ngan haros poohon na an diri maihap nga klase hin hayop. Malalamposan ba han mga tawo ini ngatanan nga karaotan ngan mahihimo ba nira an tuna nga mas maopay, mas talwas nga lugar? O an pagbuhat ba hito pariho la ha pagpugong han agos han tubig pinaagi hin silhig? Usa nga propesor nga damu na hinduro an naisurat mahitungod han karaotan, nagsiring: “Karuyag ko gud maghimo hin daku nga pagbag-o ha kalibotan, ha pagpauswag hito. Kondi matin-aw nga diri nagbabag-o an kalibotan.” Bangin ito liwat an imo inaabat.

An paagi han pag-eksister han kalibotan maipapariho ha barko nga nagbibiyahe tipakadto ha kadagatan nga nagigin mas mabalud ngan peligroso kada adlaw. Bisan kon waray naruruyag nga kumadto didto, diri naglalampos an ngatanan nga pangalimbasog nga maiba an direksyon. An barko diri mapugngan nga nagdirodiretso tipakadto ha makamaratay nga ginbabagyo nga kadagatan.

Ha pipira nga sukol, an pagkadiri-hingpit han tawo an hinungdan hinin padayon nga nagtitikaraot nga kahimtang. (Roma 3:23) Bisan pa hito, an duro nga karaotan, an pagkakalyap hito, ngan an pagpadayon hito baga hin sobra kadaku kay han mabubuhat han tawo la. Posible ba nga an katawohan gin-iimpluwensyahan hin diri nakikita kondi gamhanan ngan maraot nga pwersa? Kon oo, ano ito, ngan paonan-o naton mapapanalipdan an aton kalugaringon? Babatunon ini nga mga pakiana han masunod nga artikulo.

[Ginkuhaan han Retrato ha pahina 3]

© Heldur Netocny/Panos Pictures