Mabungahon ha Espirituwal Durante han Kalagas
Mabungahon ha Espirituwal Durante han Kalagas
“Gintanom hira dida ha balay ni Jehova; . . . mamumunga la gihapon hira bisan ha ira pagkatigurang.”—SALMO 92:13, 14.
1, 2. (a) Paonan-o agsob nga iginhuhulagway an kalagas? (b) Ano an iginsasaad han Kasuratan may kalabotan ha mga epekto han sala nga napanunod kan Adan?
KALAGAS—ano an nahuhunahuna mo hito nga pulong? Kuros na nga panit? Pagtikabungol? Magluya na nga mga tuhod? O usa pa nga bahin han “magraot nga mga adlaw” nga detalyado nga iginhuhulagway ha Eklesiastes 12:1-7? Kon amo, importante nga hinumdoman naton nga iginhuhulagway han mga pulong ha Eklesiastes kapitulo 12 an pagtikalagas ngan an mga epekto hito, diri sugad nga orihinal nga katuyoan han Maglalarang nga hi Jehova nga Dios, kondi sugad nga resulta han sala nga napanunod kan Adan ngada ha lawas han tawo.—Roma 5:12.
2 An pagtikalagas mismo diri usa nga maldisyon, tungod kay an padayon nga pag-eksister nagkikinahanglan hin paglabay han katuigan. Ha pagkamatuod, an pagtubo ngan kahamtong hiringyapon gud nga mga kinaiya han ngatanan nga buhi nga butang. An kadaot nga resulta han unom ka yukot ka tuig nga sala ngan pagkadiri-hingpit nga nakikita naton ha kalibotan hirani na pagwad-on, ngan an ngatanan nga masinugtanon nga tawo magpapahimulos han kinabuhi nga gintuyo para ha ira, nga waray kasakit tungod han kalagas ngan kamatayon. (Genesis 1:28; Pahayag 21:4, 5) Hiton nga panahon, “an umurukoy diri masiring: Ako masakit.” (Isaias 33:24) An mga lagas mabalik ha mga adlaw han ira “pagkabatan-on,” ngan an ira unod “malalabi hin kapuraw kay han kanan bata.” (Job 33:25) Kondi, yana, kinahanglan ilubon han ngatanan an makasasala nga kahimtang nga napanunod nira kan Adan. Bisan pa hito, an mga surugoon ni Jehova binibendisyonan ha espesyal nga mga paagi samtang nagtitikalagas hira.
3. Ha ano nga mga paagi an mga Kristiano ‘mamumunga la gihapon bisan ha ira pagkatigurang’?
3 An Pulong han Dios nagpapasarig ha aton nga adton ‘gintanom dida ha balay ni Jehova mamumunga la gihapon bisan ha ira pagkatigurang.’ (Salmo 92:13, 14) Ha simboliko nga mga pulong, iginsasaysay han salmista an importante nga kamatuoran nga an matinumanon nga mga surugoon han Dios makakagpadayon ha pagtubo, pag-uswag, ngan pamunga ha espirituwal, bisan kon nagtitikaluya na hira ha pisikal. Damu nga ehemplo ha Biblia ngan ha moderno nga panahon an nagpapamatuod hini.
“Waray Bumulag ha Templo”
4. Paonan-o ipinakita han lagas nga propetisa nga hi Ana an iya debosyon ha Dios, ngan paonan-o hiya ginbalosan?
4 Tagda an propetisa nga hi Ana. Ha edad nga 84, hiya “waray bumulag ha templo, ngan nag-alagad ha Dios ha mga pagpuasa ngan pag-inampo ha gab-i ngan ha adlaw.” Tungod kay an iya amay diri-Lebihanon “ha katulinan ni Aser,” diri mahihimo nga literal nga umukoy hi Ana ha templo. Handurawa la an iya pangalimbasog nga magin presente ha templo adlaw-adlaw tikang ha paghalad ha aga tubtob ha paghalad ha gab-i! Kondi, tungod han debosyon ni Ana, hura nga ginbalosan hiya. Nakapribilehiyo hiya nga magin presente han gindara nira Jose ngan Maria ha templo an minasus-an nga hi Jesus basi ipresenta kan Jehova sugad han iginsugo ha Balaud. Han nakita ni Ana hi Jesus, hiya “nagdayaw ha Ginoo, nga nakighimangraw ha nahitungod ha iya ha ngatanan nga naghihinulat han pagtubos han Jerusalem.”—Lukas 2:22-24, 36-38; Numeros 18:6, 7.
5, 6. Ha ano nga mga paagi ipinapakita yana han damu nga lagas an disposisyon nga pariho han kan Ana?
5 Damu nga lagas nga kaupod naton yana an pariho kan Ana ha ira regular nga pagtambong ha mga katirok, ha ira sinsero nga pangamuyo para ha pag-uswag han totoo nga pagsingba, ngan ha ira duro nga hingyap nga isangyaw an maopay nga sumat. Usa nga bugto nga lalaki nga sobra 80 na an edad ngan regular nga natambong ha Kristiano nga mga katirok upod an iya asawa an nagsiring: “Nabatasan na namon an pagtambong ha mga katirok. Diri namon karuyag nga kumadto ha iba nga lugar. Kon hain an katawohan han Dios, karuyag namon nga aada liwat kami, tungod kay dida kami komportable.” Makapadasig gud ito nga susbaranan para ha ngatanan!—Hebreo 10:24, 25.
6 “Kon may-ada bisan ano nga may kalabotan ha totoo nga pagsingba ngan mahimo ako magin bahin hito, karuyag ko buhaton ito.” Ito an prinsipyo ni Jean, nga Kristiano nga balo nga sobra 80 na an edad. Siring pa niya, “Syempre, may-ada mga takna nga masurub-on ako, kondi kay ano nga sadang masubo an ngatanan nga kaupod ko kon nasusubo ako?” Makikita ha iya mga mata an kalipay samtang iginsasaysay niya an iya pagbisita ha iba nga katunaan para ha makaparig-on ha espirituwal nga mga okasyon. Ha bag-o la nga biyahe, ginsumatan niya an iya mga kaupod, “Diri ko na karuyag makakita hin mga kastilyo; karuyag ko makigbahin ha ministeryo ha kanataran!” Bisan kon hi Jean diri maaram han lokal nga yinaknan, naaghat niya an mga tawo nga magin interesado ha mensahe han Biblia. Dugang pa, ha pipira ka tuig, nag-alagad hiya ha kongregasyon nga nagkikinahanglan hin bulig, bisan kon nagkinahanglan ini hin pag-aram hin bag-o nga yinaknan ngan pagbiyahe hin usa ka oras kada bwelta ngadto ha mga katirok.
Tipigi nga Aktibo an Hunahuna
7. Durante han kalagas ni Moises, paonan-o niya iginpahayag an iya hingyap nga mag-uswag ha iya relasyon ha Dios?
7 An pagkaada eksperyensya ha kinabuhi amo an resulta han paglabay han panahon. (Job 12:12) Ha luyo nga bahin, an pag-uswag ha espirituwal diri awtomatiko nga resulta han edad. Salit, imbes nga dumepende la ha kahibaro nga nakarawat ha naglabay, an maunungon nga mga surugoon han Dios nangangalimbasog nga ‘dugangan an hibaro’ samtang nalabay an katuigan. (Proberbios 9:9) Han ginsugo ni Jehova hi Moises, 80 anyos na hiya. (Eksodo 7:7) Ha iya panahon, an pagkinabuhi tubtob hito nga pangidaron matin-aw nga gintatagad nga talagsahon, kay hiya nagsurat: “An mga adlaw han amon mga tuig kapitoan ka tuig, ngan kon pinaagi han kapin nga kusog kawaloan ka tuig.” (Salmo 90:10) Ha gihapon, waray gud umabat hi Moises nga lagas na hiya hinduro para ha paghibaro. Katapos hin mga dekada han pag-alagad ha Dios, pagkaada damu nga pribilehiyo, ngan pagtuman hin mabug-at nga mga responsabilidad, hi Moises nakimalooy kan Jehova: “Ipakita ha akon an imo mga dalan, nga ako makakilala ha imo.” (Eksodo 33:13) Ginhihingyap pirme ni Moises nga mag-uswag hiya ha iya relasyon kan Jehova.
8. Paonan-o gintipigan ni Daniel nga aktibo an iya hunahuna bisan han sobra 90 anyos na hiya, ngan ano an mga resulta?
8 Hi propeta Daniel, nga posible nga sobra 90 anyos na, nag-uusisa ngan namamalandong pa gihapon ha baraan nga mga sinurat. An iya nasabtan pinaagi han iya pag-aram ha “mga basahon”—posible nga upod na an Lebitiko, Isaias, Jeremias, Hosea, ngan Amos—nagpagios ha iya nga bilngon hi Jehova pinaagi han sinsero nga pag-ampo. (Daniel 9:1, 2) Ito nga pag-ampo ginbaton pinaagi han impormasyon tikang ha Dios mahitungod han pag-abot han Mesias ngan han tidaraon han putli nga pagsingba.—Daniel 9:20-27.
9, 10. Ano an ginbubuhat han iba basi matipigan nga aktibo an ira hunahuna?
9 Pariho kan Moises ngan kan Daniel, mahimo kita mangalimbasog nga tipigan nga aktibo an aton hunahuna pinaagi han pagsentro han aton atensyon ha espirituwal nga mga butang tubtob nga mahihimo pa naton ito. Damu an nagbubuhat gud hito. Hi Worth, usa nga Kristiano nga tigurang nga sobra 80 anyos na, nangangalimbasog nga pag-adman pirme an pinakabag-o nga espirituwal nga pagkaon nga iginhahatag han “matinumanon ngan maaramon nga uripon.” (Mateo 24:45, NW) Hiya nasiring, “Hinigugma ko gud an kamatuoran, ngan nalilipay hinduro ako nga makita nga nagtitikalamrag an kahayag han kamatuoran.” (Proberbios 4:18) Hi Fred liwat, nga sobra 60 ka tuig na ha bug-os-panahon nga ministeryo, naabat nga makapadasig gud ha espirituwal an pagtikang hin mga iristorya mahitungod han Biblia ha iya mga igkasi-tumuroo. “Kinahanglan tipigan ko nga buhi an Biblia ha akon hunahuna,” siring niya. “Kon mahihimo mo nga buhi an Biblia—himoon ito nga makahuluganon—ngan kon maipapahiuyon mo ha ‘surubdan han putli nga mga pulong’ an imo hinbabaroan, niyan an imo makakarawat diri kay impormasyon la nga waray kalabotan ha usa kag usa. Makikita mo kon paonan-o an tagsa nga impormasyon sugad hin presyoso nga bato nga nagraranggat ha husto nga lugar hito.”—2 Timoteo 1:13.
10 An pagin lagas na diri awtomatiko nga nangangahulogan nga an usa diri na mahibabaro hin bag-o ngan makuri nga mga ideya. An mga tawo nga mga 60 na, 70, ngan 80 pa ngani nahibabaro pa ha pagbasa ngan pagsurat o nahibabaro hin bag-o nga mga yinaknan. An iba han mga Saksi ni Jehova nagbubuhat hito nga an katuyoan amo an pagpaangbit han maopay nga sumat ha mga tawo nga magkalain-lain an nasyonalidad. (Markos 13:10) Hi Harry ngan an iya asawa haros 70 na an edad han nagdesisyon hira nga bumulig ha Portuges nga kanataran. “Karawaton naton nga nagigin mas makuri an bisan ano nga buruhaton ha kinabuhi kon lagas ka na,” siring ni Harry. Bisan pa hito, tungod ha pangalimbasog ngan pagin mapinadayunon, nakagdumara hira hin mga pag-aram ha Biblia ha Portuges nga yinaknan. Damu ka tuig na liwat yana nga nagpapahayag hi Harry ha mga distrito nga kombensyon hinin iya bag-o nga yinaknan.
11. Kay ano nga angay paghisgotan an mga nahimo han matinumanon nga mga lagas?
11 Syempre, diri ngatanan may-ada kahimsog o aada ha kahimtang ha pagkarawat hin sugad nga mga ayat. Kon sugad, kay ano nga angay paghisgotan an mga nahimo han iba nga mga edaran na? Syempre diri karuyag sidngon nga iginrirekomenda na nga an ngatanan sadang mangalimbasog nga madangat an pariho nga mga butang. Lugod, uyon ito ha prinsipyo han iginsurat ni apostol Pablo ha Hebreohanon nga mga Kristiano mahitungod han matinumanon nga mga tigurang ha kongregasyon: “Pamurubuuton niyo an kataposan han ira mga panggawi, magsubad kamo ha ira pagtoo.” (Hebreo 13:7) Kon pinamamalandong naton an sugad nga mga susbaranan han kadasig, madadasig kita ha pagsubad han marig-on nga pagtoo nga nagpapagios hini nga mga lagas ha ira pag-alagad ha Dios. Hi Harry, nga 87 anyos na yana, nagsaysay kon ano an nagpapagios ha iya: “Karuyag ko gamiton hin maaramon an akon nahibibilin pa nga katuigan ngan buhaton an bug-os ko nga mahihimo ha pag-alagad kan Jehova.” Hi Fred, nga gin-unabi kanina, tagbaw gud ha pagbuhat han iya toka ha Bethel. Siring niya, “Kinahanglan hibaroan mo kon paonan-o ka makakag-alagad hin gimaopayi kan Jehova ngan igpadayon ito.”
Maunungon Bisan Pa han Nagbabag-o nga mga Kahimtang
12, 13. Paonan-o ipinakita ni Barsilyay an diosnon nga debosyon bisan pa han iya nabag-o nga mga kahimtang?
12 Bangin makuri karawaton ngan atubangon an mga pagbag-o ha lawas. Kondi, posible nga ipakita an diosnon nga debosyon bisan pa han sugad nga mga pagbag-o. Hi Barsilyay nga Galaadnon usa nga maopay nga susbaranan hini. Ha edad nga 80, ipinakita niya an diri ordinaryo nga pagkamaabiabihon kan David ngan ha iya kasundalohan. Nagtagana hiya ha ira hin pagkaon ngan urukyan durante han pagrebelde ni Absalon. Ha pagbalik ni David ha Jerusalem, inupdan ni Barsilyay an iya grupo ngadto ha Salog Jordan. Gintanyagan ni David hi Barsilyay nga magin usa han iya mga kabulig ha palasyo. Ano an baton ni Barsilyay? “Ako yana nga adlaw kawaloan na ka tuig an panuigon . . . Makakahimo ba an imo surugoon pagtilaw kon ano [an] akon kakaunon o kon ano [an] akon iinmon? Makakahimo pa ba ako pagbati han tingog han magkantahon nga kalalakin-an ngan han magkantahon nga kababayin-an? . . . Kitaa, an imo surugoon nga hi Kimaam; paupda hiya han akon ginoo an hadi; ngan buhata ha iya han sugad han maopay ha imo.”—2 Samuel 17:27-29; 19:31-40.
13 Bisan pa han nabag-o nga mga kahimtang ni Barsilyay, ginbuhat niya an iya mahihimo ha pagsuporta ha hadi nga pinili ni Jehova. Bisan kon kinilala niya nga an iya panrasa ngan pagpamati diri na sugad hadto, waray hiya maaringit. Lugod, pinaagi han diri-hakugnon nga pagrekomenda nga hi Kimaam an kumarawat han mga kaopayan nga igintanyag, iginpakita ni Barsilyay kon ano gud an iya personalidad. Pariho kan Barsilyay, damu nga lagas yana an nagpapakita hin espiritu han pagkadiri-hakugnon ngan pagkamahinatagon. Ginbubuhat nira an ira mahihimo ha pagsuporta han totoo nga pagsingba, tungod kay maaram hira nga “ha sugad nga mga halad an Dios nalilipay.” Bendisyon gud ha aton nga may-ada kita maunungon nga kabugtoan!—Hebreo 13:16.
14. Paonan-o an kalagas ni David nakadugang hin kahulogan ha mga pulong nga iginrekord ha Salmo 37:23-25?
14 Bisan kon damu ka beses nga nabag-o an mga kahimtang ni David ha paglabay han katuigan, nagpabilin hiya nga kombinsido nga an pagtagad ni Jehova ha iya maunungon nga mga surugoon diri gud nagbabag-o. Ha ikatarapos han kinabuhi ni David, ginkomposo niya an kanta nga kilala yana sugad nga Salmo 37. Handurawa la an pamalandong ni David, samtang nagtutokar hiya han arpa ngan nagkakanta hini nga mga pulong: “An mga linaktan han tawo ginpatukoran ni Jehova; ngan nalilipay hiya dida hiton iya agian. Bisan hiya matumba, diri hiya mahihirukapa kaopay; kay hi Jehova nakapot ha iya kamot. Nagin bata ako, ngan yana lagas na ako; kondi waray pa ako makakita nga an mga magtadong pagpasibay-an, bisan ngani waray pa an iya mga katulinan pagpakilimos hin tinapay.” (Salmo 37:23-25) Ginsiguro ni Jehova nga mahiupod an pag-unabi han edad ni David dinhi hinin giniyahan nga salmo. Pagkahilarom han pagbati nga nahidugang hini ngada hiton kinasingkasing nga mga pulong!
15. Paonan-o ipinakita ni apostol Juan an maopay nga susbaranan han pagkamatinumanon bisan pa han nabag-o nga mga kahimtang ngan kalagas?
15 Hi apostol Juan usa pa nga maopay nga susbaranan han pagkamatinumanon bisan pa han nabag-o nga mga kahimtang ngan kalagas. Katapos mag-alagad ha Dios hin haros 70 ka tuig, gindistyero hi Juan ha isla han Patmos “tungod ha pulong han Dios ngan pagpamatuod ni Jesus.” (Pahayag 1:9) Kondi, an iya buruhaton diri pa tapos. Ha pagkamatuod, an ngatanan nga iginsurat ni Juan ha Biblia, iginsurat niya ha kataposan nga mga tuig han iya kinabuhi. Samtang nakadto hiya ha Patmos, iginhatag ha iya an urusahon nga bisyon han Pahayag, nga may paghirot nga iya iginsurat. (Pahayag 1:1, 2) Ginhuhunahuna nga ginpagawas hiya tikang ha pagkadistyero durante han pagmando han Romano nga emperador nga hi Nerva. Katapos hito, han mga 98 K.P., han mga 90 o 100 an edad ni Juan, iginsurat niya an Ebanghelyo ngan an tulo nga surat nga may-ada han iya ngaran.
Diri Nagbabag-o nga Rekord han Pagpailob
16. Paonan-o maipapakita an debosyon kan Jehova hadton nadaot na an ira abilidad ha pakigkomunikar?
16 Damu an klase ngan magkalain-lain an sukol han mga limitasyon. Pananglitan, nadaot pa ngani an abilidad han iba ha pakigkomunikar. Kondi, pinabibilhan pa gihapon nira an makalilipay nga mga handumanan han gugma ngan diri-takos nga pagkabuotan han Dios. Bisan kon limitado na an ira masisiring pinaagi han ira baba, ha ira kasingkasing nasiring hira kan Jehova: “O nahigugma gud ako ha imo balaud! Amo ito an akon pamalandong ha bug-os nga adlaw.” (Salmo 119:97) Kilala ni Jehova adton ‘naghuhunahuna ngada ha iya ngaran,’ ngan inaapresyar niya nga naiiba gud hira ha kadam-an han katawohan, nga diri nagtatagad ha iya mga paagi. (Malakias 3:16; Salmo 10:4) Nakakaliaw gud hibaroan nga nalilipay hi Jehova ha pinamamalandong han aton kasingkasing!—1 Kronikas 28:9; Salmo 19:14.
17. Ano an naiiba gud nga nakab-ot han mag-iha na nga mga surugoon ni Jehova?
17 Diri liwat sadang igbalewaray nga adton matinumanon nga nag-aalagad kan Jehova ha sulod hin mga dekada na may-ada nakab-ot nga naiiba gud ngan diri makakab-ot ha iba nga paagi—an diri nagbabag-o nga rekord han pagpailob. Hi Jesus nagsiring: “Ha iyo kamailob matitipigan an iyo mga kalag.” (Lukas 21:19) Importante an pagpailob basi makarawat an kinabuhi nga waray kataposan. Kamo nga ‘naghihimo han kaburut-on han Dios’ ngan nagpapamatuod han iyo pagkamaunungon pinaagi han iyo pagkinabuhi makakalaom nga ‘makakarawat niyo an saad.’—Hebreo 10:36.
18. (a) Ano an nakakalipay kan Jehova may kalabotan ha mga lagas? Ano an aton paghihisgotan ha masunod nga artikulo?
18 Pinabibilhan gud ni Jehova an imo bug-os-kalag nga pag-alagad, daku man o gutiay an imo nahihimo. Anoman an nahitatabo ha ‘pagkatawo ha gowa’ samtang nalalagas an usa, ‘an pagkatawo ha sulod’ mahimo mabag-o ha adlaw-adlaw. (2 Korinto 4:16) Sigurado nga pinabibilhan ni Jehova an imo nahimo ha naglabay, kondi matin-aw gud nga inaapresyar liwat niya an imo ginbubuhat yana mismo para ha iya ngaran. (Hebreo 6:10) Ha masunod nga artikulo, aton paghihisgotan an nagpapadayon nga mga epekto han sugad nga pagkamatinumanon.
Ano an Imo Baton?
• Ano nga maopay nga susbaranan an ipinakita ni Ana para ha Kristiano nga mga lagas yana?
• Kay ano nga an kalagas diri awtomatiko nga nagigin hinungdan nga magin limitado na an mahihimo han usa?
• Paonan-o makakagpadayon an mga lagas ha pagpakita hin diosnon nga debosyon?
• Ano an pagtagad ni Jehova ha pag-alagad ha iya han mga lagas?
[Mga Pakiana]
[Retrato ha pahina 23]
Nasabtan han lagas na nga hi Daniel ha “mga basahon” an kahilawig han pagkadistyero han Juda
[Retrato ha pahina 25]
Damu nga mga lagas an mag-opay nga mga susbaranan ha ira regular nga pagtambong ha mga katirok, madasigon nga pagsangyaw, ngan pagin disidido nga mahibaro