Mga Edaran Na—Bendisyon ha mga Batan-on
Mga Edaran Na—Bendisyon ha mga Batan-on
“Bisan kon ako matigurang ngan ubanon na an akon ulo, O Dios, ayaw ako bayai, tubtob nga ako makapagpahayag ha imo kusog ngadto han sapit nga katulinan, ngan han imo gahum ngadto ha tagsa nga tikanhi pa.”—SALMO 71:18.
1, 2. Ano an sadang masantop han edaran na nga mga surugoon han Dios, ngan ano an paghihisgotan naton yana?
USA nga Kristiano nga tigurang ha Weste nga Aprika an binisita ha lagas na nga dinihogan nga bugto ngan nagpakiana ha iya, “Kumusta ka na?” An bugto binaton, nga nangangalimbasog pag-aksyon, “Nakakadalagan ako, nakakalukso, ngan nakakapiktaw.” Hiya nagdugang, “Kondi, diri ako nakakalupad.” Nasabtan han tigurang an iya karuyag sidngon. ‘Nalilipay ako ha pagbuhat han akon mahihimo, kondi diri ko ginbubuhat an diri ko mahihimo.’ An tigurang nga binisita 80 anyos na yana, ngan malipayon nga nahinunumdoman niya an kinaiya han bugto ha pagpatawa ngan an iya pagkamaunungon.
2 An diosnon nga mga kalidad nga ipinapakita han usa nga edaran na mahimo magkaada nagpapadayon nga impresyon ha iba. Syempre, an pagtikalagas mismo diri awtomatiko nga nagriresulta hin kinaadman ngan sugad-Kristo nga mga kalidad. (Eklesiastes 4:13) An Biblia nasiring: “An ubanon nga ulo amo an pudongpudong han himaya; [kon] ini hiaagian dida ha dalan han pagkamatadong.” (Proberbios 16:31) Kon edaran ka na, nasasantop mo ba nga an imo mga pulong ngan mga buhat mahimo magkaada maopay nga epekto ha iba? Tagda an pipira nga mga susbaranan ha Biblia nga nagpapakita kon paonan-o an mga edaran totoo nga bendisyon ha mga mas batan-on.
Pagtoo nga May-ada Nagpapadayon nga mga Epekto
3. Paonan-o an pagkamatinumanon ni Noe nakakaapekto ha ngatanan nga buhi yana?
3 An pagtoo ngan karig-on ni Noe nagresulta hin mga kapulsanan nga inaabat tubtob yana. Hi Noe hirani na mag-600 an edad han iya ginhimo an arka, gintirok an mga hayop, ngan ginsangyawan an mga tawo. (Genesis 7:6; 2 Pedro 2:5) Tungod han diosnon nga kahadlok ni Noe, naluwas hiya ngan an iya pamilya ha daku nga Baha ngan nagin kaapoy-apoyan hiya han ngatanan nga tawo nga buhi ha tuna yana. Oo, nabuhi hi Noe ha panahon nga mas hilawig pa an kinabuhi han mga tawo. Kondi, bisan han lagas na gud hi Noe, nagpabilin hiya nga matinumanon, ngan nagresulta ito hin makatirigamnan nga mga bendisyon. Paonan-o?
4. Paonan-o an karig-on ni Noe napapahimulosan han mga surugoon han Dios yana?
4 Hi Noe hirani na mag-800 an edad han nagtikang hi Nimrod ha pagtukod han Torre han Babel ha pagtalapas ha sugo ni Jehova nga ‘pun-on an tuna.’ (Genesis 9:1; 11:1-9) Kondi, hi Noe waray makigbahin ha pagrebelde ni Nimrod. Salit, posible gud nga waray mabag-o an iya yinaknan han ginsamok an yinaknan han mga rebelde. An pagtoo ngan karig-on ni Noe, nga nakita diri la han lagas na hiya kondi ha ngatanan nga adlaw han iya hilawig nga kinabuhi, takos gud subaron han mga surugoon han Dios ha ngatanan nga pangidaron.—Hebreo 11:7.
Impluwensya ha Pamilya
5, 6. (a) Han 75 anyos hi Abraham, ano an iginsugo ni Jehova ha iya? (b) Ano an ginbuhat ni Abraham ha sugo han Dios?
5 An impluwensya han mga edaran ha pagtoo han ira mga kapamilya makikita ha kinabuhi han mga patriarka katapos ni Noe. Hi Abraham mga 75 anyos na han an Dios nagsiring ha iya: “Gawas ha imo tuna, ngan ha imo mga kaurupdan, ngan ha balay han imo amay, ngan mapakadto ka ha tuna nga akon ha imo ipakikita. Ngan hihimoon ko ikaw nga daku nga nasud, ngan bibendisyonan ko ikaw.”—Genesis 12:1, 2.
6 Handurawa nga ginsidngan ka nga bumaya ha imo balay, kasangkayan, ha nasud nga imo natawohan, ngan ha kasigurohan han imo mga paryente basi kumadto ha tuna nga diri mo hinbabaroan. Ito gud an iginsugo kan Abraham. Hiya “linakat, sugad han kan Jehova iginyakan ha iya,” ngan ha nahibibilin pa nga katuigan han iya kinabuhi, nag-ukoy hiya ha mga tolda sugad nga langyaw ngan temporaryo nga umurukoy ha tuna han Kanaan. (Genesis 12:4; Hebreo 11:8, 9) Bisan kon hi Jehova nagsiring nga hi Abraham magigin “daku nga nasud,” namatay hiya maiha na antes pa magdamu an iya katulinan. Hi Sara, an iya asawa, nagkaanak ha iya hin usa la nga lalaki, hi Isaak, katapos la nga hi Abraham temporaryo nga inukoy hin 25 ka tuig ha tuna nga iginsaad. (Genesis 21:2, 5) Kondi, hi Abraham waray manluya ngan waray bumalik ha syudad nga iya gintikangan. Pagkamaopay nga susbaranan han pagtoo ngan pagpailob!
7. Ano an epekto han pagpailob ni Abraham ha iya anak nga hi Isaak, ngan ano an resulta ha katawohan?
7 An pagpailob ni Abraham nagkaada daku nga epekto ha iya anak nga hi Isaak, nga nagpabilin nga langyawanon nga umurukoy ha tuna han Kanaan ha iya bug-os nga kinabuhi—180 ka tuig. An pagpailob ni Isaak iginbasar ha pagtoo ha saad han Dios, pagtoo nga iginpasilsil ha iya han iya lagas na nga mga kag-anak ngan ha urhi ginparig-on han mga pulong mismo ni Jehova ha iya. (Genesis 26:2-5) An karig-on ni Isaak nagin importante nga bahin ha katumanan han saad ni Jehova nga an usa nga binhi para ha pagbendisyon ha ngatanan nga katawohan maabot pinaagi han pamilya ni Abraham. Paglabay hin ginatos ka tuig, hi Jesu-Kristo, an nangunguna nga bahin hito nga binhi, naghatag han higayon para han ngatanan nga natoo ha iya nga magpahiuli ha Dios ngan magpahimulos hin kinabuhi nga waray kataposan.—Galasia 3:16; Juan 3:16.
8. Paonan-o ipinakita ni Jakob an marig-on nga pagtoo, ngan ano an epekto hito?
8 Katapos, binuligan ni Isaak an iya anak nga hi Jakob nga magkaada hin marig-on nga pagtoo nga nakabulig ha iya tubtob ha iya kalagas. Hi Jakob 97 anyos na han nakigdulong hiya ha usa nga anghel ha bug-os nga gab-i basi makarawat an bendisyon. (Genesis 32:24-28) Antes mamatay hi Jakob ha edad nga 147, gin-gamit niya an iya bug-os nga kusog ha pagbendisyon ha kada usa han iya 12 nga anak. (Genesis 47:28) Natuman an matagnaon nga mga pulong nga iya iginyakan, nga nakarekord na yana ha Genesis 49:1-28, ngan natutuman pa ito.
9. Ano an masisiring mahitungod han impluwensya han hamtong ha espirituwal nga mga edaran ngada ha ira pamilya?
9 Matin-aw, an edaran na nga maunungon nga mga surugoon han Dios mahimo magkaada maopay nga impluwensya ha ira mga kapamilya. An Kasuratanhon nga instruksyon nga inupdan hin maaramon nga sagdon ngan susbaranan han pagpailob makakabulig gud ha usa nga batan-on nga magtubo nga may-ada marig-on nga pagtoo. (Proberbios 22:6) Diri gud sadang minuson han mga edaran an maopay hin duro nga impluwensya nga maihahatag nira ha ira pamilya.
Impluwensya ha mga Igkasi-Magsiringba
10. Ano an kan Jose “sugo mahitungod han iya mga tul-an,” ngan ano an epekto hito?
10 An mga edaran na mahimo liwat magin maopay nga impluwensya ha mga igkasi-tumuroo. Han lagas na an anak ni Jakob nga hi Jose, nagbuhat hiya hin simple nga buhat han pagtoo nga nagkaada daku hin duro nga epekto ha minilyon nga totoo nga magsiringba nga nabuhi katapos niya. An iya edad 110 han hiya “naghatag hin sugo mahitungod han iya mga tul-an,” nga kon an mga Israelita bumaya na ha Ehipto, kinahanglan dad-on nira an iya mga tul-an. (Hebreo 11:22; Genesis 50:25) Ito nga sugo nakahatag ha Israel hin dugang nga hinungdan ha paglaom durante han damu ka tuig han makuri nga pagkauripon nga ira naeksperyensyahan han namatay hi Jose, ngan nagpasarig ito ha ira nga an ira kaluwasan sigurado nga maabot.
11. Ano nga impluwensya an posible gud nga naihatag kan Josue han lagas nga hi Moises?
11 An usa hadton nadasig han kapahayagan han pagtoo ni Jose amo hi Moises. Han 80 anyos hi Moises, nakapribilehiyo hiya ha pagdara han mga tul-an ni Jose tikang ha tuna han Ehipto. (Eksodo 13:19) Hito nga panahon, nakilala niya hi Josue, nga mas batan-on gud ha iya. Ha sumunod nga 40 ka tuig, hi Josue nagin kabulig ni Moises. (Numeros 11:28) Gin-updan niya hi Moises ha pagsagka ha Bukid Sinai ngan gintapo hi Moises han linusad hiya tikang ha bukid dara an mga papan han Pagpamatuod. (Eksodo 24:12-18; 32:15-17) Sigurado nga damu gud nga hamtong nga sagdon ngan hura nga kinaadman an naihatag kan Josue han lagas nga hi Moises!
12. Paonan-o nagin maopay nga impluwensya hi Josue ha nasud han Israel samtang buhi hiya?
12 Katapos, gindasig ni Josue an nasud han Israel samtang buhi hiya. An Hukom 2:7 nagsusumat ha aton: “An katawohan nag-alagad kan Jehova ha ngatanan nga adlaw ni Josue, ngan ha ngatanan nga adlaw han katigurangan nga mga buhi pa ha pagkamatay ni Josue, nga nakakita han ngatanan nga dagku nga buhat ni Jehova nga iya ginbuhat para kan Israel.” Kondi, han namatay hi Josue ngan an iba nga katigurangan, nagtikang an 300-ka-tuig nga peryodo han pagkamaruhaduhaon butnga han totoo ngan palso nga pagsingba, nga nagpadayon tubtob ha panahon ni propeta Samuel.
Hi Samuel “Nagbuhat hin Katadongan”
13. Ano an ginhimo ni Samuel ha ‘pagbuhat hin katadongan’?
13 An Biblia waray iginsusumat kon ano an edad ni Samuel han namatay hiya, kondi an mga hitabo ha libro han Siyahan nga Samuel nagkukobre hin mga 102 ka tuig, ngan hinkit-an ni Samuel an kadam-an hito. Ha Hebreo 11:32, 33, aton mababasa nga an magtadong nga mga hukom ngan mga propeta “nagbuhat hin katadongan.” Oo, naimpluwensyahan ni Samuel an iba han iya mga kadungan-dungan nga likyan o bayaan an sayop nga mga buhat. (1 Samuel 7:2-4) Ha ano nga paagi? Maunungon hiya kan Jehova ha bug-os niya nga kinabuhi. (1 Samuel 12:2-5) Waray hiya mahadlok ha paghatag hin prangka nga sagdon bisan ha hadi. (1 Samuel 15:16-29) Dugang pa, han “lagas na ngan ubanon” hi Samuel, nagin maopay nga susbaranan hiya ha pag-ampo para ha iba. Hiya nagpahayag nga “ipahirayo . . . nga [hiya] makasala kan Jehova ha paghunong hin pag-ampo” para ha iya mga igkasi-Israelita.—1 Samuel 12:2, 23.
14, 15. May kalabotan ha pag-ampo, paonan-o masusubad hi Samuel han mga edaran na yana?
14 Ini ngatanan nagpapatin-aw han usa nga importante nga paagi diin mahimo magin maopay nga impluwensya an mga lagas ha ira mga igkasi-surugoon ni Jehova. Bisan pa han mga limitasyon tungod han kahimtang ha kahimsog o iba pa, adton mga lagas na mahimo mag-ampo para ha iba. Nasasantop ba niyo nga mga edaran na nga nagigin mapulsanon gud ha kongregasyon an iyo mga pag-ampo? Tungod han iyo pagtoo ha iginbubo nga dugo ni Kristo, may-ada kamo maopay nga relasyon kan Jehova, ngan tungod han iyo rekord han pagpailob, naproybahan na gud an iyo pagtoo. (Jakobo 1:3; 1 Pedro 1:7) Ayaw gud hingalimti: “An pagbuhat ha pag-ampo han matadong nga tawo may daku nga kapulsanan.”—Jakobo 5:16.
15 Ginkikinahanglan an iyo mga pag-ampo ha pagsuporta han mga buruhaton para ha Ginhadian ni Jehova. An iba han aton kabugtoan mga priso tungod han ira Kristiano nga neutralidad. An iba nag-aantos hin natural nga mga kalamidad, mga girra, ngan girra sibil. An iba pa, dida mismo ha aton mga kongregasyon, naatubang hin mga pagsulay o pagkontra. (Mateo 10:35, 36) Adton nangunguna ha pagsangyaw nga buruhaton ngan ha pagmangno ha mga kongregasyon nagkikinahanglan liwat han iyo regular nga mga pag-ampo para ha ira. (Efeso 6:18, 19; Kolosas 4:2, 3) Maopay gud nga iyo unabihon an iyo mga igkasi-tumuroo ha iyo mga pag-ampo, sugad han ginbuhat ni Epapras!—Kolosas 4:12.
Pagtutdo ha Henerasyon nga Maabot
16, 17. Ano an igintagna ha Salmo 71:18, ngan paonan-o ini natutuman?
16 An pakig-upod ha magtinumanon nga mga membro han “gutiay nga panon,” adton gintawag ngadto ha langit, nagtatagana hin importante nga pagbansay ha ‘iba nga mga karnero,’ nga may-ada paglaom nga mabuhi ha waray kataposan ha tuna. (Lukas 12:32; Juan 10:16) Igintagna ini ha Salmo 71:18, nga mababasa: “Bisan kon ako matigurang ngan ubanon na an akon ulo, O Dios, ayaw ako bayai, tubtob nga ako makapagpahayag ha imo kusog ngadto han sapit nga katulinan, ngan han imo gahum ngadto ha tagsa nga tikanhi pa.” An mga dinihogan han espiritu naruruyag gud ha pagbansay ha ira kaupod nga iba nga mga karnero para ha dugang nga mga responsabilidad antes hira kumadto ha langit basi paghimayaon upod ni Jesu-Kristo.
17 An prinsipyo han ginsisiring ha Salmo 71:18 mahitungod han pagtutdo “ha tagsa nga tikanhi pa” mahimo liwat iaplikar ha iba nga mga karnero, nga nakarawat hin instruksyon tikang ha mga dinihogan han Dios. An mga edaran na gintaporan ni Jehova han pribilehiyo ha pag-asoy mahitungod ha iya ngada hadton nakarawat yana han totoo nga pagsingba. (Joel 1:2, 3) Inaabat han iba nga mga karnero nga binendisyonan hira tungod han ira hinbaroan tikang ha mga dinihogan ngan napapagios hira nga ipaangbit an ira Kasuratanhon nga edukasyon ha iba pa nga naghihingyap nga mag-alagad kan Jehova.—Pahayag 7:9, 10.
18, 19. (a) Ano nga presyoso nga impormasyon an maisusumat han damu nga edaran na nga mga surugoon ni Jehova? (b) Ha ano sadang sumarig an edaran na nga mga Kristiano?
18 An edaran na nga mga surugoon ni Jehova, mga dinihogan ngan iba nga mga karnero, mga buhi nga kaw-ing ha importante nga mga hitabo ha kasaysayan. An pipira nga buhi pa yana presente ha siyahan nga mga pagpasalida han “Photo-Drama of Creation.” Personal nga kilala han iba an kabugtoan nga nangunguna nga ginpriso han 1918. An iba nakigbahin ha mga pagbrodkast ha estasyon han radyo han Watchtower, an WBBR. Damu an makakasumat mahitungod han panahon han an legal nga mga kaso may kalabotan ha relihiyoso nga kagawasan han mga Saksi ni Jehova gindepensahan ha gihitaasi nga mga hukmanan. An iba pa nagpabilin nga marig-on para ha totoo nga pagsingba samtang nagkikinabuhi ilarom han pagmando han mga diktador. Oo, an mga edaran makakagsaysay kon paonan-o an pagsabot ha kamatuoran hinay-hinay nga iginpahayag. An Biblia nagdadasig ha aton nga magpahimulos tikang ha ira damu nga eksperyensya.—Deuteronomio 32:7.
19 An edaran na nga mga Kristiano ginsasagda nga magin maopay nga mga susbaranan ha mga mas batan-on. (Tito 2:2-4) Bangin diri mo nakikita yana an epekto ha iba han imo pagpailob, mga pag-ampo, ngan sagdon. Hira Noe, Abraham, Jose, Moises, ngan an iba pa waray gud mahibaro han bug-os nga epekto han ira pagkamatinumanon ha sunod nga mga henerasyon. Kondi, an rekord han pagtoo ngan integridad nga iginpasa nira ha aton may-ada daku nga resulta; sugad man an imo susbaranan.
20. Ano nga mga bendisyon an maieksperyensyahan hadton nagtitipig han ira paglaom nga marig-on tubtob ha kataposan?
20 Maluwas ka man ha “daku nga kagol-anan” o banhawon ka tikang ha mga patay, makalilipay gud an pakaeksperyensya han “kinabuhi nga totoo”! (Mateo 24:21; 1 Timoteo 6:19) Handurawa an panahon durante han Usa ka Yukot ka Tuig nga Pagmando ni Kristo kon pagwad-on na ni Jehova an mga resulta han kalagas. Imbes nga maeksperyensyahan an diri-mapugngan nga pagtikaluya han aton mga lawas, magmamata kita kada adlaw nga padayon nga nagtitikaopay an aton lawas—mas makusog, mas matin-aw an pagkita, mas maopay an pagpamati, mas mahusay an hitsura! (Job 33:25; Isaias 35:5, 6) Adton bibendisyonan hin kinabuhi ha bag-o nga kalibotan han Dios magigin batan-on ha kadayonan kon itanding ha waray kataposan nga tidaraon nga maieksperyensyahan. (Isaias 65:22) Salit, hinaot tipigan naton ngatanan an aton paglaom nga marig-on tubtob ha kataposan ngan padayon nga mag-alagad kan Jehova ha bug-os nga kalag. Makakasarig kita nga tutumanon ni Jehova an ngatanan nga iya iginsaad ngan an iya bubuhaton malabaw pa gud ha bisan ano nga ginlalaoman naton.—Salmo 37:4; 145:16.
Ano an Imo Baton?
• Paonan-o an karig-on han lagas na nga hi Noe nagresulta hin mga bendisyon ha ngatanan nga katawohan?
• Ano an nagin epekto han pagtoo han mga patriarka ha ira mga katulinan?
• Paonan-o an kalagas nira Jose, Moises, Josue, ngan Samuel nagparig-on ha ira mga igkasi-magsiringba?
• Ano nga panurundon an maihahatag han mga edaran na?
[Mga Pakiana]
[Retrato ha pahina 26]
An pagpailob ni Abraham nagkaada daku hin duro nga epekto kan Isaak
[Retrato ha pahina 28]
An hamtong nga sagdon ni Moises nakadasig kan Josue
[Retrato ha pahina 29]
Daku nga kapulsanan an mahihimo han imo mga pag-ampo para ha iba
[Retrato ha pahina 30]
An mga batan-on nagpapahimulos ha pagpamati ha matinumanon nga mga edaran na