Mga Pakiana Tikang ha mga Magbarasa

Gin-gagarantiyahan ba kita han Proberbios 22:6 nga kon an Kristiano nga kabataan husto nga nabansay, diri hira mabaya ha dalan ni Jehova?

Ini nga bersikulo mababasa: “Pahiaraa an bata ha dalan nga iya paglalaktan, ngan bisan ha iya katigurang diri hiya mabaya hito.” Sugad la nga an pagbawog han sanga nakakaimpluwensya han porma han puno, an kabataan nga husto nga ginbansay mas may tendensya nga magpadayon ha pag-alagad kan Jehova ha ira pagdaku. Sugad han hinbabaroan han ngatanan nga kag-anak, an sugad nga pagbansay nagkikinahanglan hin daku nga panahon ngan pangalimbasog. Basi magin sumurunod ni Kristo an mga anak, an mga kag-anak kinahanglan magtutdo hin maopay, magsaway, mag-aghat, ngan magdisiplina ha ira ngan magpakita hin susbaranan. Kinahanglan padayon nga buhaton nira ini ha mahigugmaon nga paagi ha sulod hin damu ka tuig.

Kondi, nangangahulogan ba ini nga kon an anak bumaya ha pag-alagad kan Jehova, pakyas an ginhimo nga pagbansay han kag-anak? Ha pipira nga kahimtang, bangin kulang an pangalimbasog han mga kag-anak ha pagpadaku han ira mga anak ha disiplina ngan panhunahuna-nga-giya ni Jehova. (Efeso 6:4) Ha luyo nga bahin, diri garantiya an teksto nga kon bansayon hin maopay an mga anak, magigin matinumanon hira ha Dios. Diri mamomolde han mga kag-anak an ira mga anak ha ngatanan nga ira karuyag. An kabataan, pariho ha mga adulto, may-ada kagawasan ha pagbuot ngan ha kaurhian hira la an mahimo makagdesisyon han ira karuyag nga paagi han pagkinabuhi. (Deuteronomio 30:15, 16, 19) Bisan pa han sinsero gud nga pangalimbasog han mga kag-anak, an iba nga anak nagin diri-matinumanon, sugad la kan Salomon nga nagsurat hini nga bersikulo nga aton ginhihisgotan. Bisan hi Jehova nagkaada mga anak nga waray magmatinumanon.

Salit, ini nga teksto diri nagpapasabot nga ha ngatanan nga kahimtang an usa nga anak ‘diri mabaya hito’ kondi ha kabug-osan, ini an posible magin resulta. Makapadasig gud ini ha mga kag-anak! Madadasig hira ha paghibaro nga an ira sinsero nga pangalimbasog ha pagbansay han ira mga anak ha dalan ni Jehova magriresulta hin maopay. Tungod kay importante an bahin han mga kag-anak ngan daku an ira impluwensya, gindadasig hira nga seryosohon an ira responsabilidad.—Deuteronomio 6:6, 7.

Bisan kon an mga anak umundang ha pag-alagad kan Jehova, an mga kag-anak nga mauyatom ha pagbansay ha ira mga anak makakalaom nga makakapamurubuot hin maopay an ira mga anak. Gamhanan an kamatuoran ha Biblia, ngan diri masayon hingalimtan an pagbansay han mga kag-anak.—Salmo 19:7.