Nabuhayhag an Gintikangan han Karaotan!

HA SIYAHAN nga siglo, damu nga Judio an naghuhulat ha pag-abot han iginsaad nga Mesias. (Juan 6:14) Han kinanhi hi Jesus ha tuna, naghatag hiya hin pagliaw ngan kahayag. Nagtambal hiya han magsakit, nagpakaon han mga nagugutom, nagkontrol han kahimtang han panahon, ngan nagbanhaw pa ngani han mga patay. (Mateo 8:26; 14:14-21; 15:30, 31; Markos 5:38-43) Iya liwat iginpahayag an mga pulong ni Jehova ngan iginpresenta an posibilidad han saad han kinabuhi nga waray kataposan. (Juan 3:34) Pinaagi han iya ginyakan ngan ginbuhat, ipinakita gud ni Jesus nga hiya an Mesias, an usa nga maghahatag hin kagawasan ha katawohan tikang ha sala ngan ha ngatanan nga magraot nga resulta hito.

Makatadunganon la nga an Judio nga mga lider han relihiyon unta an siyahan nga mag-abiabi kan Jesus, mamamati ha iya, ngan malipayon nga makarawat han iya giya. Kondi, waray nira ito buhata. Lugod, nangalas hira ha iya, nagpersigir ha iya, ngan nagsarabot pag-iparatay ha iya!—Markos 14:1; 15:1-3, 10-15.

Husto la nga ginkondenar ni Jesus ito nga magraot nga mga tawo. (Mateo 23:33-35) Kondi, kinilala niya nga may-ada iba nga responsable ha karaotan nga aada ha ira kasingkasing. Iya hira ginsidngan: “Kamo tinikang ha iyo amay nga yawa, ngan an mga kaipa han iyo amay buot niyo buhaton. Hiya [parapamatay] tikang ha tinikangan; ngan diri hiya nagpapadayon ha kamatuoran, kay waray kamatuoran ha iya. Kon hiya nagyayakan han buwa, hiya nagyayakan ha iya kalugaringon, kay hiya buwaon, ngan amay hiya han buwa.” (Juan 8:44) Bisan kon ginkilala ni Jesus nga makakagbuhat an tawo hin maraot, iya ginhisgotan an gintikangan gud han karaotan—hi Satanas nga Yawa.

Pinaagi ha pagsiring nga hi Satanas waray ‘magpadayon ha kamatuoran,’ iginpakita ni Jesus nga ini nga espiritu matinumanon anay hadto ha Dios kondi waray magpadayon ha pagin sugad. Kay ano nga nagrebelde hi Satanas kan Jehova? Tungod kay iya gintipigan ha iya hunahuna nga importante hiya, ginhingyap niya an pagsingba nga para gud la ha Dios. a—Mateo 4:8, 9.

Nabuhayhag an pagrebelde ni Satanas ha hardin han Eden han iya ginlimbongan hi Eva ha pagkaon han igindidiri nga bunga. Pinaagi ha pagyakan han siyahan nga buwa ngan ha pagpakaraot kan Jehova, ginhimo ni Satanas an iya kalugaringon nga ‘amay han buwa.’ Dugang pa, pinaagi ha pag-aghat kanda Adan ngan Eva nga magtalapas, iya ginpahinabo nga mandoan hira han sala, nga ha kataposan nagresulta han ira kamatayon ngan ha kamatayon han tiarabot pa nga henerasyon. Salit, ginhimo liwat ni Satanas an iya kalugaringon nga “parapamatay”—oo, an pinakamaraot nga parapamatay ha bug-os nga kasaysayan!—Genesis 3:1-6; Roma 5:12.

An maraot nga impluwensya ni Satanas nakaabot pa ngani ha lugar han mga espiritu, diin iya naaghat an iba nga anghel nga umupod ha iya ha pagrebelde. (2 Pedro 2:4) Pariho kan Satanas, inin magraot nga espiritu nagkaada sayop nga interes ha mga tawo. Kondi, ha ira bahin, ito an sayop nga seksuwal nga hingyap nga may nakakadaot nga mga resulta.

 An Tuna Napuno hin Karaotan

An Biblia nagsusumat ha aton: “Pagtikang pagdamu han tawo . . . ngan natawo ha ira in mga anak nga babaye, nga ha pagtan-aw han mga anak nga lalaki han Dios nga an mga anak nga babaye han tawo mga maghusay, ira ginkuha hira nga mga asawa ha ngatanan nga ira ginpili.” (Genesis 6:1, 2) Hin-o ito nga “mga anak nga lalaki han Dios”? Mga espiritu hira, diri mga tawo. (Job 1:6; 2:1) Paonan-o kita nahibaro? An usa nga hinungdan amo nga an pag-asawa han mga tawo nag-eksister na hin 1,500 ka tuig ngan nagin ordinaryo na la ito. Salit, pinaagi ha paghatag hin atensyon ha pakighilawas han “mga anak nga lalaki han Dios” nga nagpakatawo ngan nangasawa hin “mga anak nga babaye han tawo,” matin-aw nga an asoy naghihisgot hin panhitabo nga waray kapariho ngan diri normal.

Napamatud-an nga diri normal ini nga pag-asawa pinaagi han klase han ira nagin mga anak nga tinatawag nga Nepilim, nga naiiba ngan nagin mga higante. Madarahog ngan maraugdaog liwat hira. Ha pagkamatuod, an “Nepilim” nangangahulogan hin “mga Magpurukan,” o “adton nagpupukan ha iba.” Ini nga magbangis nga mga tawo iginhuhulagway sugad nga ‘an mga kusganon ha daan nga panahon, an mga tawo nga bantogan.’—Genesis 6:4.

An Nepilim ngan an ira mga amay nagin maraot hinduro ha waray kapariho nga paagi. “An tuna nagmalaw-ay ha atubangan han Dios, ngan . . . napuno hin panraugdaog,” siring han Genesis 6:11. Oo, ginsubad han katawohan an madarahog, magraot nga paagi han ira bag-o nga mga kaupod.

Paonan-o an Nepilim ngan an ira mga amay nagkaada sugad karaot nga impluwensya ha mga tawo? Pinaagi ha pagdani han makasasala nga hilig ngan hingyap han tawo. Ano an resulta hito? “An ngatanan nga unod nagpakalaw-ay han iya dalan ha bawbaw han tuna.” Ha kaurhian, ginpoo ni Jehova ito nga kalibotan pinaagi hin Delubyo, ginluwas la an matadong nga hi Noe ngan an iya pamilya. (Genesis 6:5, 12-22) Kondi, an nagpakatawo nga mga anghel binalik ha lugar han mga espiritu nga naalohan. Sugad nga mga demonyo, padayon nga ginkontra nira an Dios ngan an iya matadong nga pamilya han maunungon nga mga anghel. Matin-aw nga tikang hito nga panahon, gindid-an na han Dios inin magraot nga espiritu nga magpakatawo. (Judas 6) Kondi bisan pa hito, nagpabilin hira nga gamhanan nga pwersa ha mga kahikayan han tawo.

Bug-os nga Nabuhayhag an Maraot nga Usa!

Ipinapakita han 1 Juan 5:19 an maraot hinduro nga impluwensya ni Satanas, nga nasiring: “An bug-os nga kalibotan kanan kayawan-on.” Ginmamaniobra han Yawa an katawohan tipakadto ha kasamok han nagtitikaduro nga kasakitan. Ha pagkamatuod, mas determinado hiya yana kay ha kakan-o pa man ha pagbuhat hin karaotan. Kay ano? Tungod kay hiya ngan an mga demonyo ginpaiwas ha langit katapos maestablisar an Ginhadian han Dios han 1914. May kalabotan hini nga pagpaiwas, an Biblia nagtagna: “Kairo han tuna . . . , kay an yawa linusad ha iyo, nga may daku nga kasina, kay hinbaroan niya nga halipot na la nga oras iton iya pag-ukoy.” (Pahayag 12:7-12) Kon sugad, paonan-o ginagamit ni Satanas an iya impluwensya ha mga tawo yana?

Siyahan, pinaagi ha pag-aghat hin disposisyon nga nagkukontrol ha paagi han paghunahuna ngan paggios han tawo. Salit, gintawag han Efeso 2:2 an Yawa nga “prinsipe han mga kagamhanan han hangin, han espiritu [o, nangunguna nga disposisyon] nga niyan nagbubuhat dida ha mga  anak han diri-masinugtanon.” Imbes nga iaghat an kahadlok ha Dios ngan pagkamaopay, inin yawan-on nga “hangin” nagbubunga hin pagrebelde ha Dios ngan ha iya mga suruklan. Hito nga paagi, hi Satanas ngan an iya mga demonyo nag-aaghat ngan nagdudugang han karaotan nga ginbubuhat han mga tawo.

“Bantayi an Imo Kasingkasing”

Usa nga pangirilal-an hini nga “hangin” amo an nakakadaot nga pornograpiya, nga nag-aaghat hin sayop nga mga hingyap ha sekso ngan naghihimo han nakakadaot nga batasan nga makaruruyag. (1 Tesalonika 4:3-5) An panlugos, sadismo, gang rape, bestialidad, ngan seksuwal nga pag-abuso ha kabataan kaupod han pipira nga ipinapakita han pornograpiya sugad nga nakakaliaw. Bisan an diri maraot hinduro nga klase hin pornograpiya, nakakagiyan gud ngan nakakadaot ha mga nagkikita o nagbabasa, ngan nagpapahiara ito ha ira ha patago nga pagkinita hin mga hubo o mga nakikighilawas. b Bisyo ito nga nakakadaot han relasyon han usa ha iba ngan ha Dios. An pornograpiya nagpapakita han maraot nga panhunahuna han mga demonyo nga nagpatikang hito—mga rebelde nga an sayop nga mga hingyap ha sekso nagtikang antes pa han Baha ha kalibotan ha panahon ni Noe.

An maaramon nga hi Salomon may maopay nga hinungdan ha pagsagda: “Bantayi an imo kasingkasing ha bug-os nga kamaduruto; kay natikang dida an mga burabod han kinabuhi.” (Proberbios 4:23) Ha praktikal nga pagkayakan, an pagpanalipod han imo kasingkasing ha lit-ag han pornograpiya mahimo mangahulogan ha pagbalhin han mga estasyon han TV o pagparong han kompyuter kon malaw-ay na an iginpapakita, ngan importante nga gumios dayon ngan magin determinado! Hunahunaa an imo kalugaringon sugad nga sundalo nga nangangalimbasog ha paglikay ha hinganiban nga nakapuntirya ha imo kasingkasing. Ginpupuntirya ni Satanas an imo simboliko nga kasingkasing—an gintitikangan han imo motibo ngan hingyap—ngan nangangalimbasog hiya ha pagdaot hito.

Kinahanglan panalipdan mo liwat an imo kasingkasing nga higugmaon an kamadarahog, tungod kay maaram an Yawa nga an bisan hin-o nga nahigugugma ha kamadarahog kinangangalasan gud ni Jehova. (Salmo 11:5) Diri kinahanglan ni Satanas nga magin mabangis ka basi magin kaaway han Dios; kinahanglan la niya patuboon ha imo an gugma ha kamadarahog. Diri nahituman la nga an kamadarahog, nga agsob nga may-ada mga tema nga kanan kulto, nagsasarang ha media ha bisan diin. Patay na ngan waray na an mga Nepilim, kondi an ira kinaiya ngan panggawi kalyap pa hinduro! Ipinapakita ba han imo pagpili hin kaliawan nga iginsasalikway mo an pamaagi ni Satanas?—2 Korinto 2:11.

 Kon Paonan-o Maaatohan an Maraot nga Impluwensya ni Satanas

An gahum han karaotan bangin makuri hinduro atohan. Ipinapakita han Biblia nga adton nangangalimbasog ha paglipay ha Dios may-ada “pakig-away . . . kontra ha mga espirituhanon nga kasundalohan han kamaraotan,” dugang pa han ira pakig-away ha ira diri-hingpit nga unod. Basi magdaog ha away ngan makarawat an pag-uyon han Dios, kinahanglan pahimulosan naton an damu nga tagana tikang ha Dios.—Efeso 6:12; Roma 7:21-25.

Ini nga mga tagana nag-uupod han baraan nga espiritu han Dios, an pinakagamhanan nga pwersa ha uniberso. Hi apostol Pablo nagsurat ha siyahan-siglo nga mga Kristiano: “Aton kinarawat, diri an espiritu han kalibotan, kondi an espiritu nga tikang ha Dios.” (1 Korinto 2:12) Adton gin-giyahan han espiritu han Dios nahibabaro ha pagkultibar hin gugma ha hinigugma han Dios ngan hin kangalas ha iya kinangangalasan. (Amos 5:15) Paonan-o makakakarawat han usa an baraan nga espiritu? Siyahan pinaagi han pag-ampo, pag-aram han Biblia—an Biblia mismo produkto han baraan nga espiritu—ngan maopay nga asosasyon ha mga totoo nga nahigugma ha Dios.—Lukas 11:13; 2 Timoteo 3:16; Hebreo 10:24, 25.

Pinaagi ha pagpahimulos hini nga mga tagana han Dios, nagtitikang ka magsul-ot han “bug-os nga hinganiban han Dios,” an amo la nga sigurado nga panalipod kontra “ha mga limbong han yawa.” (Efeso 6:11-18) Mas importante an paggamit hin bug-os hini nga mga tagana yana kay ha kakan-o pa man. Kay ano?

Hirani Na Matapos an Karaotan!

“Kon an mga magraot tumurok sugad han banwa, ngan kon an ngatanan nga mga magburuhat han karat-an bumurak; ito hira paglalaglagon tubtob ha waray kataposan,” siring han salmista. (Salmo 92:7) Oo, pariho han panahon ni Noe, an pagsarang han karaotan yana ebidensya nga hirani na an paghukom han Dios, diri la ha magraot nga katawohan kondi kontra liwat kan Satanas ngan han iya mga demonyo, nga iglalabog ha kahiladman han kawaray-mahihimo nga magriresulta ha ira ultimo nga kabungkagan. (2 Timoteo 3:1-5; Pahayag 20:1-3, 7-10) Hin-o an magpapadapat hito nga paghukom? Waray iba kondi hi Jesu-Kristo, nga mahitungod ha iya aton mababasa: “Tungod hini nga katuyoanan an Anak han Dios iginpahayag, basi ha pagbungkag ha mga buhat han yawa.”—1 Juan 3:8.

Naghihingyap ka ba nga mawara na an karaotan? Kon oo, maliliaw ka ha mga saad han Biblia. Waray iba nga libro an nagsusumat mahitungod han gintikangan han karaotan, hi Satanas, ngan waray iba nga libro an nagpapakita kon paonan-o hiya ngan an ngatanan niya nga magraot nga buhat mawawara. Gin-aaghat ka namon nga kumuha hin husto nga kahibaro mahitungod han Biblia basi mapanalipdan mo an imo kalugaringon ha maraot nga mga impluwensya ni Satanas yana ngan makasiguro han paglaom nga mabuhi ha kalibotan nga waray karaotan.—Salmo 37:9, 10.

[Mga footnote]

[Kahon/Retrato ha pahina 6]

Mga Susmatanon nga May Gutiay nga Kamatuoran

An mga istorya mahitungod han mga tawo nga sugad dios, mga higante, ngan usa nga nakadaot nga baha mabibilngan ha kadaan nga mga susmatanon ha bug-os nga kalibotan. Pananglitan, an Akkadiano nga Epiko ni Gilgamesh nag-uunabi hin baha, usa nga barko, ngan mga nakatalwas hito. Hi Gilgamesh mismo ginhulagway nga makihihilawason, madarahog nga nagpapaka-dios, o katunga dios, katunga tawo. An susmatanon han Aztec nag-iistorya mahitungod han kadaan nga kalibotan nga gin-ukyan hin mga higante ngan han daku nga baha. An susmatanon han mga taga-Scandinavia naghuhulagway hin mga higante ngan hin maaramon nga tawo nga hi Bergelmir nga naghimo hin daku nga barko ngan nagluwas han iya kalugaringon ngan han iya asawa. An sugad nga mga susmatanon nagpapamatuod han ginsisiring han Biblia nga an ngatanan nga tawo tikang ha mga nakatalwas han baha nga nagbungkag han kadaan nga maraot nga kalibotan.

[Retrato]

Papan nga ginsuratan han Epiko ni Gilgamesh

[Ginkuhaan han Retrato]

The University Museum, University of Pennsylvania (neg. # 22065)

[Retrato ha pahina 5]

An kinaiya han mga Nepilim nakikita ha mga tawo yana

[Retrato ha pahina 7]

Napaparig-on kita han husto nga kahibaro kontra ha maraot nga mga impluwensya