Pagturi—Pangirilal-an Ba Ini han Pagkalalaki?

HA DAMU nga bahin han tuna, gintuturi an mga minasus-an nga kalalakin-an tungod kay ginhuhunahuna ito nga importante ha kahimsog. Kondi ha iba nga bahin han kalibotan, kustomre nga diri-gintuturi an kalalakin-an. Ha iba, sugad han mga Judio ngan Muslim, an pagturi diri la importante para ha kahimsog; may-ada ito relihiyoso nga kahulogan.

Kondi ha iba nga nasud, ginhihimo an rituwal ha pagturi kon an bata mag-aadulto na. Kasagaran nga nag-uupod ini ha pagpaeskwela ha iya ha espesyal nga eskwelahan nga nagtututdo han mga tradisyon han komunidad, diin gintuturi hiya ngan ginbubulag ha komunidad ha sulod hin pipira ka semana tubtob nga mag-opay an iya samad. Durante hini nga panahon, kinahanglan sundon han bata an espisipiko nga mga rituwal ngan gintututdoan nga magin lalaki. Ginkikinahanglan ba ini nga klase han pagturi basi pamatud-an nga an bata adulto na? Aton tagdon kon ano an ginsisiring han Biblia mahitungod ha panhunahuna han Dios hini nga butang.—Proberbios 3:5, 6.

An Panhunahuna han Dios ha Pagturi

An iba nga tawo han kadaan nga panahon, sugad han mga Ehiptohanon, nagbubuhat hin pagturi, nga amo an pag-utod han kayopapis ha ikinatawo han lalaki. Kondi, diri ito an kultura nga gindak-an ni Abraham. Ha pagkamatuod, ha kadak-an nga bahin han iya kinabuhi, waray hiya maturi. Kondi, bisan pa kon diri hiya turi, napamatud-an niya nga maisugon hiya. Upod an gutiay nga grupo han kalalakin-an, iya ginlanat ngan ginpirde an kasundalohan han upat nga hadi nga nagbihag han iya umangkon nga hi Lot. (Genesis 14:8-16) Paglabay hin mga 14 ka tuig, ginsugo han Dios hi Abraham nga magpaturi ngan turion an iya bug-os nga panimalay. Kay ano nga iginsugo ito ha iya han Dios?

Sigurado nga diri ito pangirilal-an nga adulto na hi Abraham. Aw, 99 anyos na hiya! (Genesis 17:1, 26, 27) Ginhatag han Dios an hinungdan han iya sugo ha pagsiring: “Kamo pagsisirkumsisyonan han unod han iyo kayopapis; ngan ito mahimo nga tigaman ha kauyonan ha akon ngan ha iyo.” (Genesis 17:11) Ito nga kauyonan kan Abraham nag-upod han saad han Dios nga pinaagi ha iya, hura nga bibendisyonan an “ngatanan nga mga panimalay ha tuna” ha kaurhian. (Genesis 12:2, 3) Salit, ha paniplatan han Dios, an pagturi waray kalabotan ha pagkaadulto. Ginbuhat ito sugad nga pangirilal-an nga an usa kaupod ha mga Israelita nga tulin ni Abraham, nga nakapribilehiyo nga ‘tubyanan han pulong han Dios.’—Roma 3:1, 2.

Inabot an panahon, ginpamatud-an han nasud han Israel nga diri-takos ito hito nga pribelihiyo tungod kay ginsalikway hito an tinuod nga Binhi ni Abraham, hi Jesu-Kristo. Salit, ginsalikway hira han Dios, ngan nawara an bili han ira pagin tinuri ha Iya paniplatan. Kondi, igin-insister han iba nga Kristiano ha siyahan nga siglo K.P. nga igin-oobligar pa gihapon han Dios an pagturi. (Buhat 11:2, 3; 15:5) Tungod hini, ginsugo ni apostol Pablo hi Tito nga ‘pag-opayon an kulang nga mga bagay’ ha magkalain-lain nga kongregasyon. Ginsuratan ni Pablo hi Tito mahitungod han usa nga depekto: “Damu nga mga tawo an diri matinumanon, magyakan hin waray pulos, ngan maglimbong, labi na gud an mga taga-sirkumsisyon, nga an ira mga baba kinahanglan panarupon; kay nagpapakasamok ha  mga bug-os nga mga panimalay, nga nanunutdo han mga diri kaangayan, tungod ha kaipa han salapi.”—Tito 1:5, 10, 11.

Aplikado pa gihapon an sagdon ni Pablo. Sigurado nga supak ha Kasuratan nga aghaton han usa nga totoo nga Kristiano an iba nga ipaturi an ira anak. Imbes nga magin “malabot ha mga butang han iba,” iginsasarig han mga Kristiano an sugad nga personal nga mga desisyon ha mga kag-anak. (1 Pedro 4:15) Dugang pa, gin-giyahan hi Pablo ha pagsurat mahitungod ha pagturi sumala ha Mosaiko nga Balaud: “Gintawag ba an iba nga nasirkumsisyonan? Diri hiya magin diri-sinirkumsisyon; gintawag ba an iba nga diri-sinirkumsisyon? Diri hiya magin sinirkumsisyonan. An sirkumsisyon waray hin ano man; ngan an diri-sinirkumsisyon waray hin ano man; kondi an pagtuman ha mga sugo han Dios. An tagsa-tagsa magpadayon hadton pagkatinawag nga igintawag ha iya.”—1 Korinto 7:18-20.

Ano an Kahimtang ha “Mga Eskwelahan ha Pagturi”?

Ano man kon magdesisyon an Kristiano nga mga kag-anak nga ipaturi an ira mga anak nga kalalakin-an? Uyon ba ha Biblia kon paeskwelahon nira an ira mga anak ha tinatawag nga mga eskwelahan ha pagturi nga ginhulagway kanina? Labaw pa ha pagturi la an nahiuupod ha pag-eskwela ha sugad nga mga eskwelahan. Ha sulod hin pipira ka semana, an naeskwela duok nga makikig-upod ha kalalakin-an ngan mga magturutdo nga diri magsiringba ni Jehova. Damu han igintututdo hini nga mga eskwelahan an supak ha hitaas nga suruklan han Biblia ha moral. An Biblia nagpahamangno: “An magraot nga mga kaupod nakakadunot ha mga mag-opay nga batasan.”—1 Korinto 15:33.

May-ada liwat nag-uuswag nga peligro ha pisikal an pag-eskwela dida hini nga mga eskwelahan. Han 2003 an South African Medical Journal nagpahamangno: “Nakita na liwat an magpakangingirhat nga mga resulta han pagturi yana nga tuig, ngan may mga report mahitungod han mga namatay ngan nadaot ha pisikal nga iginpapasamwak ha bug-os nga kalibotan han ngatanan nga nangunguna nga parasumat. . . . Ha laktod, damu han tinatawag nga ‘mga eskwelahan ha pagturi’ yana an diri tinuod ngan makamaratay.”

Dugang pa ha posible nga kadaot ha pisikal han batan-on, aada liwat an mas daku nga peligro ha espirituwal. An mga katutdoan ngan binuhatan ha mga eskwelahan ha pagturi may kalabotan gud ha espiritismo ngan pagsingba ha mga patay nga kaapoy-apoyan. Pananglitan, imbes nga karawaton nga an waray paghirot nga mga paraopera ngan mahugaw nga kahimtang an hinungdan han kadaot, damu an natoo nga an pagbaranga o kasina han patay na nga mga kaapoy-apoyan an hinungdan hini nga mga trahedya. May kalabotan ha buwa nga relihiyon, an Biblia nagsusugo: “Diri kamo magpas-an han yugo upod han mga diri magtinoohon; kay oonan-on ba an pagkatampo han katadongan ngan han diri katadongan? O oonan-on ba an pagkaangbit han kalamrag ngan han kangitngit? . . . Busa gumowa ngan bumulag kamo tikang ha ira, siring han Ginoo, ngan diri kamo dumuot hin mahugaw nga bagay; ngan kakarawaton ko kamo.” (2 Korinto 6:14-17) Tungod hini nga sagdon, diri gud maaramon nga paeskwelahon han Kristiano nga mga kag-anak an ira mga anak ha sugad nga eskwelahan.

Ano an Nakakahimo ha Usa nga Kristiano nga Tinuod nga Lalaki?

Tinuri man o diri an usa nga Kristiano, diri ito pangirilal-an han iya pagkalalaki. An importante para ha totoo nga mga Kristiano amo an pagin makaruruyag ha paniplatan han Dios, diri pagin ‘maanyag ha unod.’—Galasia 6:12.

Kondi, basi magin makalilipay ha Dios, an usa nga Kristiano kinahanglan ‘magpasirkumsisyon ha kasingkasing.’ (Deuteronomio 10:16; 30:6; Mateo 5:8) Nahihimo ito, diri pinaagi ha pagsamad, kondi pinaagi ha pagsalikway han sayop nga mga hilig ngan mapahitas-on nga panhunahuna, sugad han pagtoo nga an pagin tinuri ha unod nakakahimo ha usa nga labaw ha iba. Pinaagi ha pag-ilob hin mga pagsari ngan pagpabilin nga ‘marig-on ha pagtoo,’ mapapamatud-an han Kristiano nga tinuod hiya nga lalaki tinuri man hiya o diri.—1 Korinto 16:13; Jakobo 1:12.