Ginpapabilhan ni Jehova an Imo Pagkamasinugtanon

“Anak ko, pagmakinaadmananon, ngan himoa an akon kasingkasing nga malipayon.”—PROBERBIOS 27:11.

1. Ano nga espiritu an kalyap ha kalibotan yana?

 AN ESPIRITU han pagkaindependente ngan pagkadiri-masinugtanon kalyap ha kalibotan yana. Iginsaysay ni apostol Pablo an hinungdan hini ha iya surat ha mga Kristiano ha Efeso: “Hadto nga panahon nanggawi kamo sugad han kahimtangan dinhi ha kalibotan, sugad ha prinsipe han mga kagamhanan han hangin, han espiritu nga niyan nagbubuhat dida ha mga anak han diri-masinugtanon.” (Efeso 2:1, 2) Oo, hi Satanas nga Yawa, an “prinsipe han mga kagamhanan han hangin,” masisiring nga nagpapasarang han espiritu han pagkadiri-masinugtanon ha bug-os nga kalibotan. Ginbubuhat niya ito ha siyahan nga siglo, ngan mas naniniguro pa gud hiya ha pagbuhat hito tikang han iginlabog hiya nganhi ha tuna ha panahon han Girra ha Kalibotan I.—Pahayag 12:9.

2, 3. Ano an mga hinungdan kon kay ano nga kinahanglan sugton naton hi Jehova?

² Kondi, sugad nga mga Kristiano, maaram kita nga hi Jehova nga Dios takos han aton kinasingkasing nga pagsugot tungod kay hiya an aton Maglalarang, an Paratagana han aton mga kinahanglanon ha kinabuhi, an mahigugmaon nga Soberano, ngan an aton Manluluwas. (Salmo 148:5, 6; Buhat 4:24; Kolosas 1:13; Pahayag 4:11) An mga Israelita ha panahon ni Moises maaram nga hi Jehova an ira Humaratag-Kinabuhi ngan an ira Manluluwas. Salit, hi Moises nagsiring ha ira: “Bantayan niyo ha pagbuhat sugad han iginsugo ni Jehova nga Dios ha iyo.” (Deuteronomio 5:32) Oo, takos hi Jehova han ira pagsugot. Kondi, madagmit hira nga nagin diri-masinugtanon ha ira Soberano.

³ Mationan-o kaimportante an aton pagsugot ha Maglalarang han uniberso? An Dios nagsugo hadto kan propeta Samuel nga sidngan hi Hadi Saul: “An pagsugot maoroopay kay han paghalad.” (1 Samuel 15:22, 23) Kay ano?

Kon Paonan-o an Pagsugot “Maoroopay kay han Paghalad”

4. Ha ano nga paagi may-ada kita maihahatag kan Jehova?

⁴ Tungod kay hi Jehova an Maglalarang, iya na an ngatanan nga materyal nga gintatag-iya naton. Kon sugad, may-ada ba bisan ano nga maihahatag naton ha iya? Oo, maihahatag naton ha iya an usa nga butang nga presyoso hinduro. Ano ito? Hibabaroan naton an baton tikang ha masunod nga sagdon: “Anak ko, pagmakinaadmananon, ngan himoa an akon kasingkasing nga malipayon, nga ako makabaton ha iya nga nagsasaway ha akon.” (Proberbios 27:11) Maihahatag naton ha Dios an aton pagkamasinugtanon. Bisan kon magkalain-lain an aton mga kahimtang ngan eksperyensya,  pinaagi han pagin masinugtanon, mababaton han kada usa ha aton an maraot nga akusasyon ni Satanas nga Yawa nga an mga tawo diri magpapabilin nga maunungon ha Dios kon umatubang hira ha mga pagsari. Daku gud ito nga kadungganan!

5. Ha ano nga paagi naaapektohan an Maglalarang kon diri kita nasugot ha iya? Iilustrar.

⁵ Interesado an Dios ha mga desisyon nga aton ginhihimo. Apektado hiya kon diri kita nasugot ha iya. Ha ano nga paagi? Nasusubo hiya kon nakikita niya nga an usa nagawi ha sugad diri-maaramon nga paagi. (Salmo 78:40, 41) Ha pag-ilustrar: Ano an aabaton han mapinairon nga doktor kon diri ginsusunod han iya pasyente nga may diabetes an iya instruksyon may kalabotan ha pagkaon nga makakaopay ha iya kondi padayon nga nakaon hin mga pagkaon nga maraot para ha iya? Ha pariho nga paagi, makakasiguro kita nga nasusubo hi Jehova kon an mga tawo diri nasugot ha iya, kay maaram hiya han mga resulta han pagbalewaray han iya mga instruksyon para ha kinabuhi.

6. Ano an mabulig ha aton nga magin masinugtanon ha Dios?

⁶ Sugad nga indibiduwal, ano an mabulig ha aton nga magin masinugtanon? Angayan la nga an kada usa ha aton mangaro ha Dios hin “masinugtanon nga kasingkasing,” sugad han ginbuhat ni Hadi Salomon. Nangaro niya hin sugad nga kasingkasing basi hiya ‘makatultol han maopay ngan han maraot’ basi makahukom ha iya mga igkasi-Israelita. (1 Hadi 3:9; NW) Kinahanglan magkaada kita hin “masinugtanon nga kasingkasing” basi masabtan naton an maopay ngan an maraot ha kalibotan diin kalyap an espiritu han pagkadiri-masinugtanon. Igintatagana han Dios ha aton an iya Pulong, an mga bulig ha pag-aram ha Biblia, an Kristiano nga mga katirok, ngan an mahigugmaon nga mga tigurang ha kongregasyon basi magkaada kita hin “masinugtanon nga kasingkasing.” Ginagamit ba naton hin maopay an sugad mahigugmaon nga mga tagana?

7. Kay ano nga mas pinabubug-atan ni Jehova an pagsugot kay ha mga halad?

⁷ May kalabotan hini, hinumdumi nga han naglabay, iginpahayag ni Jehova ha iya katawohan ha kadaan nga panahon nga an pagsugot mas importante pa gud kay ha mga halad nga hayop. (Proberbios 21:3, 27; Hosea 6:6; Mateo 12:7) Kay ano nga sugad, nga hi Jehova man an nagsugo ha iya katawohan nga maghalad hito? Bueno, ano an motibo han usa nga naghahalad? Ginbubuhat ba niya ito basi lipayon an Dios? O ginsusunod la niya an usa nga rituwal? Kon karuyag gud han usa nga magsiringba nga lipayon an Dios, mangangalimbasog hiya nga sundon an ngatanan nga sugo han Dios. Diri ginkikinahanglan han Dios an mga halad nga hayop, kondi an aton pagsugot amo an usa nga birilhon nga butang nga maihahatag naton ha iya.

Usa nga Nagpapahamangno nga Ehemplo

8. Kay ano nga iginsalikway han Dios hi Saul sugad nga hadi?

⁸ Ginpapabug-atan han rekord han Biblia mahitungod kan Hadi Saul an pagkaimportante han pagsugot. Ha tinikangan han pagmando ni Saul, mapainubsanon hiya ngan awdanon, ‘gutiay ha iya kalugaringon nga mga mata.’ Kondi, inabot an panahon nga an pagpahitaas ngan sayop nga pangatadongan nagtikang makaimpluwensya ha iya mga desisyon. (1 Samuel 10:21, 22; 15:17) Ha usa nga higayon, kinahanglan makiggirra hi Saul ha mga Pilisteohanon. Ginsidngan hiya ni Samuel nga hulaton hiya nga umabot basi maghalad kan Jehova ngan maghatag hin dugang nga instruksyon. Kondi, hi Samuel waray dayon umabot sugad han ginlalaoman ha iya, ngan an katawohan nagtikang magburublag. Tungod hito, “iginhalad [ni Saul] an halad nga sinunog.” Waray ini makalipay kan Jehova. Han ha kataposan inabot hi Samuel, nangatadongan an hadi kon kay ano nga waray hiya sumugot pinaagi ha pagsiring nga tungod kay naatrasado hi Samuel, ‘napiritan hiya’ paghalad han halad nga sinunog basi makarawat an pag-uyon ni Jehova. Para kan Hadi Saul, mas importante an paghalad kay ha pagsugot ha iginsugo ha iya nga hulaton hi Samuel nga amo an maghalad. Hi Samuel nagsiring ha iya: “Nagbuhat ka hin linurong; waray ka pagbantay han sugo ni Jehova nga imo Dios, nga iya iginsugo ha imo.” Tungod kay hi Saul diri masinugtanon kan Jehova, iginsalikway Niya hiya sugad nga hadi.—1 Samuel 10:8; 13:5-13.

9. Paonan-o nabatasan ni Saul an diri pagsugot ha Dios?

⁹ Nahibaro ba hi Saul hin leksyon tikang hini  nga eksperyensya? Waray! Ha urhi, ginsugo hiya ni Jehova nga poohon an nasud han Amalek, nga nag-atake hadto ha Israel nga waray hinungdan. Diri ngani sadang tipigan nga buhi ni Saul an ira inataman nga mga hayop. Nagsugot hiya pinaagi han ‘paghampak ha mga Amalekanhon tikang ha Havila ngadto ha Sur.’ Han inabot hi Samuel ha pakigkita ha iya, malipayon hinduro hiya ha kadaogan ngan nagsiring: “Mabulahan ka ni Jehova; akon binuhat an sugo ni Jehova.” Kondi, hi Saul ngan an iya katawohan waray sumugot ha matin-aw nga mga instruksyon nga iginhatag ha ira, tungod kay gintipigan nira nga buhi hi Hadi Agag ngan “an gimaopayi han kakarnerohan, ngan han mga lalaki nga kabakahan; ngan han magtambok nga mga nati, . . . ngan an kanatihan nga karnero, ngan an ngatanan han mag-opay.” Ginpakamatadong ni Hadi Saul an iya pagkadiri-masinugtanon pinaagi ha pagsiring: “Isinalin han katawohan an gimaopayi han mga karnero ngan han kabakahan nga mga lalaki, ha paghalad ngadto kan Jehova nga imo Dios.”—1 Samuel 15:1-15.

10. Ano nga leksyon an waray hibaroi ni Saul?

¹⁰ Dida hito, hi Samuel nagsiring kan Saul: “Ikinalilipay ba ni Jehova hin sugad ka daku an mga halad nga sinunog ngan an mga halad, kay ha pagsugot han tingog ni Jehova? Kitaa, an pagsugot maoroopay kay han paghalad, ngan an pamati han iya mga pulong kay han tambok han kakarnerohan nga lalaki.” (1 Samuel 15:22) Tungod kay itinanda na ni Jehova nga kinahanglan bungkagon ito nga mga hayop, diri niya kakarawaton ito sugad nga mga halad.

Magin Masinugtanon ha Ngatanan nga Butang

11, 12. (a) Ano an inaabat ni Jehova ha aton mga pangalimbasog nga lipayon hiya ha aton pagsingba? (b) Ha ano nga paagi bangin limbongan han usa an iya kalugaringon ngan hunahunaon nga ginbubuhat niya an kaburut-on ni Jehova nga ha pagkamatuod diri hiya nagigin masinugtanon?

¹¹ Nalilipay gud hi Jehova nga makita nga an iya maunungon nga mga surugoon nagpapabilin nga marig-on bisan pa han pagtimaraot, nagpapasamwak han Ginhadian bisan pa han kawaray-interes han kadam-an han mga tawo, ngan natambong ha Kristiano nga mga katirok bisan kon nakukurian hira ha panginabuhi! An aton pagkamasinugtanon dida hiton importante nga mga bahin han aton espirituwal nga kinabuhi nagpapalipay han iya kasingkasing! Presyoso gud kan Jehova an aton mga pangalimbasog ha pagsingba ha iya kon ginbubuhat naton ito tungod han gugma. Bangin igbalewaray la han mga tawo an aton maduruto nga mga pangalimbasog, kondi pinabibilhan han Dios an aton kinasingkasing nga mga sakripisyo ngan gindudumdom ito.—Mateo 6:4.

¹² Kondi, basi bug-os nga mapalipay an aton Dios, kinahanglan magin masinugtanon kita ha ngatanan nga bahin han aton kinabuhi. Kinahanglan diri gud naton limbongan an aton kalugaringon ngan hunahunaon nga mahimo naton talapason an mga ginkikinahanglan han Dios kon nagsisingba kita ha iya ha iba nga mga bahin  han kinabuhi. Pananglitan, bangin limbongan han usa an iya kalugaringon ngan hunahunaon nga kon ipakita la niya nga ginbubuhat niya an pipira nga bahin han pagsingba, malilikyan na niya an sirot ha pagbuhat hin imoralidad o iba nga seryoso nga sala. Sayop gud ito!—Galasia 6:7, 8.

13. Paonan-o mahimo masarihan an aton pagkamasinugtanon kan Jehova kon diri kita nakikita han iba?

¹³ Salit, mahimo naton pakianhan an aton kalugaringon, ‘Ginsusugot ko ba hi Jehova ha akon adlaw-adlaw nga mga buruhaton, bisan ha pribado nga mga butang?’ Hi Jesus nagsiring: “Adton masinugtanon ha gutiay, masinugtanon man ha damu; ngan adton diri matadong ha gigugutiayi; diri man matadong ha daku.” (Lukas 16:10) Kita ba ‘naglalakat ha hingpit nga kasingkasing’ bisan ‘ha sakob han aton balay,’ diin diri kita nakikita han iba? (Salmo 101:2) Oo, samtang aada kita ha aton balay, mahimo masarihan an aton integridad. Ha damu nga nasud diin komon na nga garamiton ha balay an mga kompyuter, masayon gud la kitaon an maglaw-ay nga retrato. Pipira pa la ka tuig an naglabay, diri makikita han usa an sugad nga mga retrato kon diri hiya kumadto ha mga lugar nga nagpapakita hin imoral nga kaliawan. Masinugtanon ba nga tatagdon naton an mga pulong ni Jesus: “An ngatanan nga nasiplat ha babaye ha pagkaipa ha iya makakapanlibog na ha iya dida ha iya kasingkasing”? Oo, magdudumiri ba kita bisan ha pagkita ha imoral nga mga retrato? (Mateo 5:28; Job 31:1, 9, 10; Salmo 119:37; Proberbios 6:24, 25; Efeso 5:3-5) Kumusta man an madarahog nga mga programa ha TV? Nauyon ba kita ha aton Dios, nga an iya kalag ‘nangangalas ha nahigugma ha paglugos [“kamadarahog,” NW]’? (Salmo 11:5) O kumusta man an sobra nga pag-inom hin irinmon nga de-alkohol kon nag-uusahan la kita? Ginkukondenar han Biblia an paghubog, kondi nagpapahamangno liwat ito ha mga Kristiano nga diri magin “uripon ha alaksiw.”—Tito 2:3; Lukas 21:34, 35; 1 Timoteo 3:3.

14. Ano an pipira nga paagi nga maipapakita naton an aton pagkamasinugtanon ha Dios may kalabotan ha kwarta?

¹⁴ Usa pa nga bahin diin kinahanglan magin alerto kita amo an may kalabotan ha kwarta. Pananglitan, maapi ba kita ha negosyo nga nagsasaad hin madagmit nga pagriko ngan haros panlimbong na? Nasusulay ba kita ha paghimo hin ilegal nga mga paagi basi malikyan an pagbayad hin mga buhis? O ginsusugot ba lugod naton hin maopay an sugo nga “ihatag . . . ha ngatanan an igo; an ha buhis, buhis”?—Roma 13:7.

Pagkamasinugtanon Tungod han Gugma

15. Kay ano nga ginsusugot mo an mga sugo ni Jehova?

¹⁵ An pagkamasinugtanon ha mga prinsipyo han Dios nagriresulta hin mga bendisyon. Pananglitan, kon naglilikay kita ha paggamit hin tabako, nagkikinabuhi nga limpyo ha moral, ngan natahod ha pagkasagrado han dugo, mahimo naton malikyan an iba nga mga sakit. Dugang pa, kon nagkikinabuhi kita uyon ha kamatuoran han Biblia ha iba nga mga bahin han kinabuhi, mahimo kita magpahimulos ha pinansyal, ha aton relasyon ha iba, o ha sulod han panimalay. (Isaias 48:17) An sugad hito nga nakikita nga mga kapulsanan angayan la tagdon nga mga bendisyon nga nagpapamatuod han pagkapraktikal han mga balaud han Dios. Kondi, an nangunguna nga hinungdan han aton pagsugot kan Jehova amo an aton gugma ha iya. Diri kita nag-aalagad ha Dios para ha kalugaringon la nga kapulsanan. (Job 1:9-11; 2:4, 5) Iginhatag han Dios ha aton an kagawasan ha pagpili nga sugton kon hin-o an karuyag naton sugton. Ginpipili naton nga sugton hi Jehova tungod kay karuyag naton nga lipayon hiya ngan tungod kay nangangalimbasog kita nga buhaton an husto.—Roma 6:16, 17; 1 Juan 5:3.

16, 17. (a) Paonan-o ipinakita ni Jesus an pagsugot ha Dios tungod han iya kinasingkasing nga gugma? (b) Paonan-o naton masusubad hi Jesus?

¹⁶ Hi Jesus an hingpit nga susbaranan han pagsugot kan Jehova tungod han iya kinasingkasing nga gugma ha Iya. (Juan 8:28, 29) Han nakanhi ha tuna hi Jesus, “nahibaro [hiya] ha pagkamasinugtanon tungod ha mga bagay nga iya gin-antos.” (Hebreo 5:8, 9) Paonan-o? Iya ‘ginpaubos an iya ngahaw ngan nagmasinugtanon tubtob ha kamatayon,’ oo, kamatayon ha pasakitan nga kahoy. (Filipos 2:7, 8) Bisan kon masinugtanon na hi Jesus didto ha langit, nasarihan pa gud an iya pagkamasinugtanon dinhi ha tuna. Makakasiguro kita nga ha ngatanan nga paagi, hi Jesus kwalipikado gud ha pag-alagad  sugad nga Hitaas nga Saserdote para ha iya espirituwal nga kabugtoan ngan pati na ha iba nga magtinoohon nga katawohan.—Hebreo 4:15; 1 Juan 2:1, 2.

¹⁷ Kumusta man kita? Masusubad naton hi Jesus kon hihimoon naton nga prayoridad an pagsugot ha kaburut-on han Dios. (1 Pedro 2:21) Kita mismo matatagbaw kon an aton gugma kan Jehova nagpapagios ha aton nga buhaton an iya iginsusugo, bisan ha mga panahon nga gin-iipit o ginsusulay kita nga talapason ito. (Roma 7:18-20) Nahiuupod hini an aton pagin disidido ha pagsugot ha mga instruksyon han mga nangunguna ha totoo nga pagsingba, bisan kon diri hira hingpit. (Hebreo 13:17) Presyoso gud kan Jehova an aton pagkamasinugtanon ha iya mga sugo ha aton pribado nga kinabuhi.

18, 19. Ano an resulta han aton kinasingkasing nga pagsugot ha Dios?

¹⁸ Yana, an aton pagsugot kan Jehova mahimo magkinahanglan nga umilob kita hin pagtimaraot basi matipigan an aton integridad. (Buhat 5:29) Sugad man, an aton pagsugot ha sugo ni Jehova nga magsangyaw ngan magtutdo nagkikinahanglan nga magpailob kita tubtob ha kataposan hini nga sistema han mga butang. (Mateo 24:13, 14; 28:19, 20) Kinahanglan magpailob kita basi padayon nga makatambong ha mga katirok upod han aton kabugtoan, bisan kon bangin inaabat naton an kabug-at han mga pag-ipit hini nga kalibotan. Maaram gud an aton mahigugmaon nga Dios han aton mga pangalimbasog nga magin masinugtanon ha sugad nga mga butang. Kondi, basi bug-os nga magin masinugtanon, kinahanglan atohan naton an aton makasasala nga tawhanon nga kinaiya ngan isalikway an karaotan samtang ginkukultibar an gugma ha kaopayan.—Roma 12:9.

¹⁹ Kon nag-aalagad kita kan Jehova tungod kay nahigugma kita ha iya ngan maapresyaron an aton kasingkasing, “hiya magbabalos [ha aton] ngatanan nga nagbibiling ha iya.” (Hebreo 11:6) An angayan nga mga halad kinahanglanon ngan makaruruyag, kondi an bug-os nga pagsugot tungod han gugma kan Jehova an nagpapalipay gud ha iya.—Proberbios 3:1, 2.

Ano an Imo Baton?

• Kay ano nga makakasiring kita nga may-ada kita maihahatag kan Jehova?

• Ano an mga sayop ni Saul?

• Paonan-o mo maipapakita nga natoo ka nga an pagsugot mas maopay kay han paghalad?

• Ano an nagpapagios ha imo nga sugton hi Jehova?

[Mga Pakiana]

[Retrato ha pahina 26]

Ano an aabaton han mapinairon nga doktor ha usa nga pasyente nga nagbabalewaray han iya mga rekomendasyon?

[Retrato ha pahina 28]

Kay ano nga napasubo ni Hadi Saul hi Jehova?

[Retrato ha pahina 30]

Ginsusugot mo ba an mga sugo han Dios kon nag-uusahan ka ha imo balay?