Ginsusubad Mo ba hi Jehova ha Pagmangno ha Iba?

“IBUTANG niyo ha [Dios] an ngatanan niyo nga pangarit, kay hiya nagmamangno ha iyo.” (1 Pedro 5:7) Mahigugmaon gud ito nga imbitasyon! Personal nga gintatagad ni Jehova nga Dios an iya katawohan, ngan makakaabat kita hin pagin talwas ha iya pagmangno.

Sadang naton kultibaron ngan ipakita iton pariho nga mahigugmaon nga pagmangno o pagpaid ha iba. Tungod kay diri kita hingpit, kinahanglan magin alerto kita ha pipira nga pagsulay ha aton pagpakita hin personal nga interes ha iba. Kondi, antes paghisgotan an pipira hito, aton tagdon an pipira nga paagi diin ginmamangnoan ni Jehova an iya katawohan.

Gin-gamit han salmista nga hi David an magbarantay hin karnero ha pag-ilustrar han pagmangno han Dios: “Hi Jehova amo an akon magbarantay; diri magkukulang ha akon. Iya ako ginpapahigda ha mga hilaw nga sabsaban; Iya ako gintutugwayan ha ligid han mga maglinaw nga tubig. Ginpahiuli niya an akon kalag. . . . Bisan ako maglakat ha patag han lambong han kamatayon. Diri ako mahadlok hin bisan ano nga maraot; kay ikaw upod nakon.”—Salmo 23:1-4.

Tungod kay hi David magbarantay hin karnero, maaram hiya kon ano an nahiuupod ha pagmangno ha usa ka panon. Ginpapanalipdan han magbarantay an iya panon tikang ha mabangis nga mga hayop, sugad han leon, lobo, ngan oso. Ginpapangalimbasogan niya nga diri ito magpatlaag, ginpapamiling an nawawara, ginkukugos an nakakapoy, ngan gin-aataman an may sakit ngan piang; ngan adlaw-adlaw nga ginsusuplayan liwat niya ito hin tubig. Kondi diri ini nangangahulogan nga ginkukontrol han magbarantay an ngatanan nga gios han mga karnero. May kagawasan an mga karnero bisan kon ginpapanalipdan ito.

Ha sugad hito nga paagi ginmamangnoan ni Jehova an iya katawohan. Hi apostol Pedro nagsiring: ‘Ginpapanalipdan ka han gahum han Dios.’ Dinhi, an pagin ‘ginpapanalipdan’ literal nga nangangahulogan nga pirme ginbabantayan. (1 Pedro 1:5, NW) Tungod kay hi Jehova tinuod nga nagtatagad ha aton, pirme kita niya ginbabantayan, ngan andam pirme hiya ha pagbulig bisan san-o nga magkinahanglan kita hin bulig. Kondi, ginlarang kita ni Jehova sugad nga may kagawasan ha pagbuot, salit diri hiya nag-iinterbiner ha ngatanan naton nga mga buhat ngan desisyon. Paonan-o naton masusubad hi Jehova hini nga bahin?

Subara an Dios ha Pagmangno ha Imo mga Anak

“An mga kabataan panurundon tumikang kan Jehova.” Tungod hito, sadang panalipdan ngan mangnoan han mga kag-anak an ira mga anak. (Salmo 127:3) Mahimo mag-upod ito ha pag-aghat ha ira mga anak nga ipahayag an ira panhunahuna ngan pagbati ngan katapos tagdon ito kon nakikiistorya ha ira. Kon nangangalimbasog an kag-anak ha pagkontrol han ngatanan nga ginbubuhat han ira anak, ngan bug-os nga ginbabalewaray an ira karuyag, magigin pariho ito hin magbarantay nga nangangalimbasog ha pagkontrol han iya panon pinaagi hin higot ha liog. Waray magbarantay nga mag-aataman han iya panon ha sugad nga paagi; diri liwat hi Jehova sugad hito.

 Hi Mariko a nagsiring: “Ha sulod hin damu ka tuig, ginsisinidngan ko la an akon mga anak, ‘Ini an buhata’ ngan ‘Ayaw ito buhata.’ Para ha akon, ini an akon obligasyon sugad nga kag-anak. Diri ako naghahatag hin kumendasyon, ngan waray liwat ako sinsero nga komunikasyon ha akon mga anak.” Bisan kon an anak ni Mariko maiha nga nagpipinakiistorya ha telepono ha iya kasangkayan, diri niya nakakaistorya hin maiha an iya nanay. “Katapos nasantop ko an kaibahan,” nagpadayon hi Mariko. “Kon nakikiistorya an akon anak ha iya kasangkayan, an iya mga pulong nagpapakita hin empatiya, sugad han ‘Oo, nauyon ako’ o ‘Ako man.’ Nagtikang ako paggamit hin pariho hito basi hibaroan an inaabat han akon anak, ngan waray pag-iha nagtitikahilaba na an amon pag-istorya ngan nagin mas makalilipay.” Nagpapabug-at ini han pagkaimportante han maopay nga komunikasyon, nga kasagaran nga nag-uupod hin pagbinalyoay hin mga ideya, ngan diri uusa la an nagyiyinakan.

Kinahanglan aghaton han mga kag-anak an ira mga anak nga makiistorya, ngan kinahanglan hisabtan han anak kon kay ano nga usa nga proteksyon an pagmangno han kag-anak. An Biblia nagsasagdon ha mga anak nga sundon an ira mga kag-anak; katapos iginsumat hito an rason: “Basi nga may nimo kaopayan, ngan mag-ukoy ka hin hilawig nga kinabuhi dinhi ha tuna.” (Efeso 6:1, 3) An anak nga kombinsido gud nga mapulsanon an pagpasakop diri nakukurian ha pagsunod.

Ha Pagmangno han Panon ni Jehova

An mahigugmaon nga pagtagad ni Jehova nakikita ha Kristiano nga kongregasyon. Sugad nga Ulo han kongregasyon, ginsugo ni Jesu-Kristo an mga tigurang nga mangnoan an iya panon. (Juan 21:15-17) An Griego nga pulong para ha paramangno, may kalabotan ha berbo nga nangangahulogan hin “pagbantay hin maopay.” Ha pagpabug-at kon paonan-o ini bubuhaton, ginsugo ni Pedro an mga tigurang: “Pasabsaba niyo an panon han Dios nga aada ha iyo, pagbantayan niyo, diri nga sugad hin linugos, kondi ha iyo kalugaringon nga kaburut-on, sumala ha kaburut-on han Dios; diri tungod ha mahugaw nga salapi, kondi ha maandaman nga painoino. Diri mga agaron han mga igintubyan ha iyo, kondi nga magin susbaranan kamo ha panon.”—1 Pedro 5:2, 3.

Oo, an buruhaton han tigurang paropariho ha buruhaton han magbarantay hin karnero. Kinahanglan buligan han mga tigurang an mga may sakit ha espirituwal ngan ipahiuyon hira basi makita ha ira pagkinabuhi an magtadong nga suruklan. Ira liwat responsabilidad an pag-organisa han mga buruhaton han kongregasyon, paghimo han kahikayan para ha mga katirok, ngan pagtipig han kahapsay ha kongregasyon.—1 Korinto 14:33.

Kondi, ini nga mga pulong ni Pedro nagpapahamangno ha aton han usa nga peligro—an ‘pagpakaagaron’ han mga tigurang ha kongregasyon. An usa nga pangirilal-an nga an tigurang may-ada hito nga tendensya amo an paghimo hin diri  ginkikinahanglan nga mga surundon. Tungod han duro nga pag-abat han tigurang nga obligasyon niya nga panalipdan an panon, bangin magin sobra hiya. Ha usa nga kongregasyon ha Oriente, naghimo an mga tigurang hin surundon kon paonan-o magkikinumustahay ha Kingdom Hall—sugad han kon hin-o an mag-uuna ha pagyakan—tungod kay naghuhunahuna hira nga an pagsunod hini makakabulig ha kamurayawan han kongregasyon. Bisan kon waray ruhaduha nga maopay an motibo, ira ba ginsusubad hi Jehova ha Iya pagmangno ha iya katawohan? Makatirigamnan nga an panhunahuna ni Pablo nasasabtan ha iya pulong: “Diri nga kami maghahadi ha iyo pagtoo, kondi mga kabulig kami ha iyo kalipayan: kay ha pagtoo magrig-on kamo.” (2 Korinto 1:24) Nasarig hi Jehova ha iya katawohan.

Gawas han diri paghatag hin surundon nga waray ibasar ha Kasuratan, ipinapakita han mapinairon nga mga tigurang an ira tinuod nga pagtagad pinaagi han diri pagbuhayhag hin kompidensyal nga impormasyon. Ira ginhuhunahuna pirme an pahamangno han Dios: “Ayaw igsamwak an gintatago han iba.”—Proberbios 25:9.

Iginpariho ni apostol Pablo an kongregasyon han dinihogan nga mga Kristiano ha lawas han tawo: “Gin-angay-angay han Dios an lawas . . . basi nga waray pagkaaway-away ha lawas; kondi nga an ngatanan nga mga bahin magbinantayay an usa kag usa.” (1 Korinto 12:12, 24-26) An Griego nga pulong para han “magbinantayay an usa kag usa” literal nga nangangahulogan hin ‘sadang mabaraka ha usa kag usa.’ An mga membro han Kristiano nga kongregasyon sadang magin interesado gud ha kada tagsa.—Filipos 2:4.

Paonan-o maipapakita han tinuod nga mga Kristiano nga ‘nababaraka hira ha usa kag usa’? Mahimo nira ipakita an ira pagtagad ha iba ha kongregasyon pinaagi han ira pag-ampo ngan pagbulig ha mga pobre. Nabulig ini ha iba nga maipakita an ira mag-opay nga kalidad. Tagda kon paonan-o nabuligan hi Tadataka han sugad nga mahigugmaon nga pagtagad. Han nabawtismohan han 17 anyos hiya, usa la hiya ha iya pamilya nga nag-aalagad kan Jehova. Hiya nagsiring: “Usa nga pamilya ha amon kongregasyon an agsob mag-imbitar ha akon ha pagkaon ngan ha mga panagtawo ha ira balay. Kon tikadto ako ha eskwelahan, naagi ako ha ira balay haros kada aga basi umupod ha ira ha paghisgot han teksto ha Biblia. Nasasagdonan ako kon paonan-o ko malalamposan an mga problema ha eskwelahan, ngan urosa nga nag-aampo kami mahitungod hito. Tikang hini nga pamilya, nahibaro ako ha pagin mahinatagon.” Gin-aaplikar ni Tadataka an iya hinbaroan ha iya pag-alagad ha usa han mga sanga nga opisina han mga Saksi ni Jehova.

Nagpahamangno hi apostol Pablo mahitungod hin usa nga lit-ag ha aton pagpakita hin interes ha iba. Nag-unabi hiya mahitungod han pipira nga kababayin-an nga nagin “maglibak ngan maglabot, nga magyakan ha mga bagay nga diri angay pagyaknon.” (1 Timoteo 5:13) Bisan kon husto an pagin interesado ha iba, kinahanglan magbantay kita nga diri magin sobra tubtob nga naghihilabot na kita ha ira kinabuhi. An sobra nga interes ha iba mahimo maipahayag ha ‘pagyinakan hin mga bagay nga diri angay pagyaknon,’ sugad ha pagin kritiko.

Sadang hinumdoman naton nga an mga Kristiano mahimo magkaiba-iba ha pag-organisa han ira buruhaton, ha ira karuyag kaunon, ngan ha pagpili hin maopay nga pagpahalibway. An tagsa may-ada kagawasan ha pagdesisyon kon ano an iya bubuhaton tubtob nga diri ito natalapas ha prinsipyo han Biblia. Ginsagdonan ni Pablo an mga Kristiano ha Roma: “Ayaw na kita paghinukmanay ha usa kag usa. . . . Padayunon ta an mga butang nga nakakahimo hin kamurayawan, ngan mga bagay nga nakakarig-on ha usa kag usa.” (Roma 14:13, 19) An aton sinsero nga pagtagad ha usa kag usa ha kongregasyon sadang ipakita, diri pinaagi ha panhilabot han kahikayan han iba, kondi pinaagi han aton pagin andam ha pagbulig. Kon nagmamangno o napaid kita ha usa kag usa hini nga paagi, magtutubo an gugma ngan pagkaurosa ha pamilya ngan ha kongregasyon.

[Footnote]

[Retrato ha pahina 19]

Aghata an imo mga anak nga makiistorya pinaagi hin kumendasyon ngan empatiya