Mga Pakiana Tikang ha mga Magbarasa

May-ada ba mga tiil an halas nga nakiistorya kan Eva?

Sugad han nakarekord ha Genesis 3:14, ginyaknan ni Jehova nga Dios an halas nga naglimbong kan Eva ha hardin han Eden. An Dios nagsiring: “Kay ikaw nagbuhat hini, maghikaraot ka gud labaw pa ha mga baka, ngan labaw pa ha tagsa ka mananap ha kapatagan; ngan ha imo tiyan ikaw mag-uusoy, ngan tapotapo an imo makakaon ha ngatanan nga adlaw han imo kinabuhi.” Waray espisipiko nga ginsisiring an Biblia nga an hayop nga gin-gamit ha pagsulay kan Eva may-ada mga tiil hadto kondi ha urhi nawara ito. Bisan kon an mga pulong ha Genesis 3:14 mahimo mag-aghat ha pipira nga maghunahuna hin sugad, diri naton sadang hunahunaon nga antes hini may-ada tiil an mga halas. Kay ano?

Siyahan tungod kay an puntirya gud han paghukom ni Jehova amo hi Satanas—an diri nakikita nga espiritu nga naggamit hiton minos nga hayop ha sayop nga paagi. Ginhuhulagway han Biblia hi Satanas sugad nga an ‘amay han buwa’ ngan “an daan nga halas.” Inin duha nga paghulagway matin-aw nga nagtutudlok ha paggamit ni Satanas hin nakikita nga hayop, usa nga halas, sugad nga iya tagapagyakan ha pag-aghat kan Eva nga talapason an sugo han Dios.—Juan 8:44; Pahayag 20:2.

Ginlarang han Dios an mga halas, ngan matin-aw nga ginpanngaranan ito ni Adan antes han panlimbong ni Satanas. An waray pagsabot nga halas nga nakiistorya kan Eva diri amo an angay basulon. Diri ito maaram nga hi Satanas an nagmamaniobra han mga panhitabo, ngan diri ito nakakasabot han paghukom nga ginpadapat han Dios ha mga matinalapason.

Kondi, kay ano nga naghisgot an Dios mahitungod han panhimaraot ha pisikal nga kahimtang han halas? An kinaiya han halas ha natural nga kahimtang hito, nga nagkakamang ngan nawalwal an dila nga sugad hin nagdidila han tapotapo, angayan gud nga nagsisimbolo han ginpaubos nga kahimtang ni Satanas. May-ada hiya hadto hitaas hinduro nga katungdanan sugad nga anghel han Dios, kondi yana nahingada hiya ha ubos nga kahimtang nga tinatawag han Biblia nga Tartaro.—2 Pedro 2:4.

Dugang pa, sugad nga an literal nga halas mahimo makatukob ha tikod hin tawo, hi Satanas ha iya ginpaubos nga kahimtang ‘magtutultog han tikod’ han binhi han Dios. (Genesis 3:15) An siyahan nga bahin hito nga binhi amo hi Jesu-Kristo, nga temporaryo nga nag-antos ha mga ginbuhat han mga sumurunod ni Satanas. Kondi an simboliko nga ulo han halas, ha kaurhian, permanente nga dudugmukon ni Kristo ngan han iya mga kaupod nga binanhaw nga dinihogan nga mga Kristiano. (Roma 16:20) Hito nga paagi, an pagsirot han Dios ha nakikita nga halas husto nga naghuhulagway han panhimaraot ngan pangataposan nga pagpoo ha diri nakikita nga “daan nga halas,” hi Satanas nga Yawa.