Saulo Iginkita han Iya Kasangkayan Ngan mga Kaaway Hadto

SIGURADO nga ginkukulba hi Saulo, nga ha urhi ginkilala sugad nga an apostol nga hi Pablo, han pagbalik niya ha Jerusalem ha siyahan nga higayon tikang nga nagin Kristiano hiya. a Tulo ka tuig na an naglabay tikang han binaya hiya ha syudad nga naghahangos ha iya pagpanarhog ngan pagpamatay han mga disipulo ni Jesus. Ginsugo hiya ha pag-aresto han bisan hin-o nga Kristiano nga makita niya ha Damasko.—Buhat 9:1, 2; Galasia 1:18.

Han nagin Kristiano hi Saulo, maisugon nga iginpasamwak niya an iya pagtoo ha pagkabanhaw han Mesias. Sugad nga resulta, karuyag hiya patayon han mga Judio ha Damasko. (Buhat 9:19-25) Makakalaom gud ba hiya hin mapaso nga pag-abiabi tikang ha iya Judio nga kasangkayan ha Jerusalem? Diri ito importante kan Saulo, tungod kay mas importante ha iya nga mabilngan an mga sumurunod ni Kristo ha Jerusalem. Diri ito magigin masayon.

“Han iya pag-abot ha Jerusalem, hiya naghunahuna pagtig-ob ha mga tinon-an; ngan an ngatanan nagkahadlok ha iya, nga waray panonoo nga hiya  tinon-an.” (Buhat 9:26) Natural la ito tungod kay an urhi nga ira pagkilala ha iya, usa hiya nga waray kalooy nga persigidor. An iya pag-angkon nga Kristiano hiya posible nga hunahunaon nga taktika la basi makasulod ha kongregasyon. Salit, ginlikyan hiya han mga Kristiano ha Jerusalem.

Kondi, usa ha ira an binulig kan Saulo. An Biblia nasiring nga igin-upod ni Bernabe an persigidor hadto ngadto “ha mga apostol,” nga matin-aw nga hira Pedro (Kepas) ngan Jakobo, an kabugtoan han Ginoo, ngan ginpahibaro hira han iya pagkakombirte ngan han iya pagsangyaw ha Damasko. (Buhat 9:27; Galasia 1:18, 19) Waray rekord kon kay ano nga sinarig hi Bernabe kan Saulo. Magkilala na ba hira, nga nakaaghat kan Bernabe nga usisahon gud hi Saulo ngan garantiyahan an iya sinseridad? May kilala ba hi Bernabe nga mga Kristiano ha Damasko ngan maaram ba hira han pagbag-o ni Saulo? Anoman an kahimtang, nawara an pagruhaduha ni Bernabe kan Saulo. Sugad nga resulta, tinugot hi apostol Pedro nga lumungon ha iya hi Saulo ha sulod hin 15 ka adlaw.

Kinse ka Adlaw Kaupod ni Pedro

Direkta nga nakakarawat hi Saulo hin sugo tikang kan Jesus nga waray na manginahanglan hin awtorisasyon tikang ha bisan hin-o nga tawo, sugad han iya iginpatin-aw ha mga taga-Galasia. (Galasia 1:11, 12) Kondi waray ruhaduha nga nasantop ni Saulo an importansya han pagin pamilyar gud ha ministeryo ni Jesus. An iya pag-ukoy  kaupod kan Pedro sigurado nga nakahatag hin daku nga higayon basi hibaroan ito. (Lukas 24:12; 1 Korinto 15:3-8) Posible nga damu unta an igpapakiana ni Saulo kanda Pedro ngan Jakobo, ngan posible nga may-ada hira ipapakiana ha iya mahitungod han iya bisyon ngan han sugo ha iya.

Paonan-o Hiya Napanalipdan Tikang ha Iya Kasangkayan Hadto?

Gintawag hi Esteban nga an siyahan nga Kristiano nga martir. An mga iginkalantugi niya hadto amo adton “ginngangaranan nga sinagoga han mga Libertinos, ngan han mga taga-Sirene, ngan han mga taga-Aleksandria, ngan adton han mga taga-Silisia, ngan han taga-Asia.” Yana hi Saulo “nakipaglantugi kontra ha mga Judio nga Gresyahanon,” ngan maisugon nga nagsasangyaw ha ira. Ano an ira reaksyon? Karuyag nira patayon hiya.—Buhat 6:9; 9:28, 29.

Natural la nga maghingyap hi Saulo ha pagsaysay han daku nga pagbag-o ha iya kinabuhi ngan mangalimbasog ha pagtutdo ha iya kasangkayan hadto mahitungod han Mesias. Kondi, ini nga mga Judio nasina ha iya tungod kay para ha ira, usa hiya nga traydor.

Nahunahuna ba ni Saulo an daku nga peligro nga iya inatubang? Nabasa naton nga samtang nag-aampo hiya ha templo, sugad hin nawarayan hiya sarabotan ngan sugad hin nakita niya hi Jesus, nga nasiring: “Magdagmit ka, ngan gowa ha kadagmitan tikang ha Jerusalem; kay diri hira makarawat han imo pagtestigo ha nahitutungod ha akon.” Hi Saulo binaton: “Ginoo, hira ngahaw maaram, nga akon pinamilanggo ngan pinanlatob ha tagsa nga sinagoga adton mga nagtotoo ha imo. Ngan han pagkaragi han dugo ni Esteban, nga imo testigo, ako man nagtatambong ngan inuyon.”—Buhat 22:17-20.

Ginhunahuna han iba an baton ni Saulo sugad nga maaram hiya han peligro. Kondi para ha pipira sugad hin hiya nasiring: ‘Persigidor ako pariho ha ira, ngan maaram hira hito. Sigurado nga siseryosuhon nira an akon pagkakombirte. Bangin mabuligan ko hira nga makasabot han kamatuoran.’ Bisan pa hito, maaram hi Jesus nga diri kakarawaton hito nga mga Judio an asoy han usa nga “apostata.” Iya ginsidngan hi Saulo: “Lakat, kay susugoon ko ikaw hin hirayo ngadto ha mga Hentil.”—Buhat 22:21, 22.

Han mahibaro an iya mga igkasi-Kristiano han peligro, ira ginpadagmit hi Saulo ngadto ha pantalan han Cesarea para ha 500 kilometro nga pagbiyahe tipakadto ha Tarso, an iya natawohan nga syudad. (Buhat 9:30) Mga pipira pa ka tuig an linabay antes bumalik hi Saulo ha Jerusalem.

Iton madagmit nga pagbaya bangin nakapanalipod ha Kristiano nga kongregasyon tungod kay an presensya hinin persigidor hadto posible makaaghat hin kasamok. Han bumaya hi Saulo, an “singbahan namurayaw ha bug-os nga Judea, ngan Galilea, ngan Samaria, ngan ginparig-on; ha paggawi tungod ha kahadlok ha Ginoo, ngan ha kalipay ha espiritu santo, nagdamu hira.”—Buhat 9:31.

Mga Leksyon ha Pagin Maikmat

Sugad ha siyahan nga siglo, may-ada mga sitwasyon yana diin ginkikinahanglan an pagin maikmat. Waray kita rason nga magin sobra ka matahapon ha mga diri kilala naton. Kondi, usahay may magraot nga nangangalimbasog ha pag-abuso ha katawohan ni Jehova, tungod hin personal nga bentaha o ha pagdaot han kongregasyon. Salit kinahanglan magin maikmat kita basi diri mabiktima han panlimbong han mga impostor.—Proberbios 3:27; 2 Timoteo 3:13.

An reaksyon ni Saulo ha pagsangyaw ha Jerusalem nag-iilustrar hin usa pa nga paagi diin maipapakita han mga Kristiano an pagin maikmat. An pagsangyaw ha pipira nga lugar ngan indibiduwal, upod na ha kasangkayan hadto, mahimo magin peligroso—ha pisikal, espirituwal, o bisan ha moral. Ginkikinahanglan an pagin maikmat, pananglitan ha pagpili hin oras ngan lugar.—Proberbios 22:3; Mateo 10:16.

Makakasiguro kita nga an maopay nga sumat han Ginhadian han Dios maisasangyaw antes matapos inin maraot nga sistema. Maopay gud an ehemplo nga iginpakita ni Saulo may kalabotan hini, “nagwali, ha waray kahadlok, ha ngaran han Ginoo” bisan ha kasangkayan ngan mga kaaway hadto!—Buhat 9:29.

[Footnote]

[Retrato ha pahina 16]

Han umabot hi Saulo ha Jerusalem, maisugon nga nagsangyaw hiya ha mga Judio nga nagyayakan hin Griego