An Edukasyon ha Biblia Nagpaparig-on han Pagtoo

“PRESYOSO gud nga pribilehiyo an paggamit han naglabay nga lima ka bulan ha pagtagad han panhunahuna han aton Maglalarang ngan pag-aram basi hisabtan an mga butang uyon han iya pagsabot!” siring han usa nga representante han ika-122 nga klase han Watchtower Bible School of Gilead han Marso 10, 2007, an adlaw han ira gradwasyon. Usa ito nga adlaw nga diri hingangalimtan han 56 nga membro han klase, nga nagtikang na pagmisyonero ha 26 nga nasud diin hira igintoka.

Katapos abiabihon an 6,205 nga tinambong, hi Theodore Jaracz, membro han Nagmamando nga Lawas, siniring: “Sigurado kami nga mapaparig-on kamo ha espirituwal ngan ha iyo pagtoo sugad nga resulta han pagtambong hini nga gradwasyon.” Sunod-sunod nga iginpakilala niya an upat nga mamumulong nga maghahatag ha mga estudyante hin napapanahon nga basado ha Biblia nga pagdasig ngan sagdon basi mabuligan hira nga maglampos ha ira toka sugad nga misyonero.

Mga Pagdasig Basi Maparig-on an Pagtoo han Iba

Hi Leon Weaver, membro han Komite han Sanga ha Estados Unidos, nagpahayag ha tema nga “Padayon nga Buhata an Maopay.” Iya ginpahinumdoman an mga estudyante nga 13 ka tuig an aberids han klase ha bug-os panahon nga pag-alagad, nga igin-aaghat an edukasyon ha Biblia nga nagpaparig-on han pagtoo. Hiya nagsiring: “Maopay ito nga buruhaton tungod kay nagluluwas ito han mga kinabuhi, ngan labaw ha ngatanan, tungod kay nagpapasidungog ito ha aton Amay ha langit, hi Jehova.” Katapos iya gindasig an mga estudyante nga magpadayon ha ‘pagpugas ha espiritu’ ngan diri “manluya ha pagbuhat han maopay.”—Galasia 6:8, 9.

Hi David Splane, membro han Nagmamando nga Lawas, naghatag hin praktikal nga pahinumdom samtang iya ginhihisgotan an ulohan nga “Pangalimbasog ha Pagtikang ha Gimaopayi nga Paagi.” Iya gindasig an bag-o nga mga misyonero nga magtikang ha maopay nga paagi ha ira teritoryo pinaagi ha pagbuhat han masunod: “Pagpabilin nga positibo. Ayaw dayon paghimo hin konklusyon. Magin makisangkayon. Ayaw pagin kritiko. Magin mapainubsanon, ngan tahora an kabugtoan ha iyo teritoryo.” Katapos hiya nagdugang: “Ha iyo paglusad ha eruplano, pangalimbasog ha pagtikang ha gimaopayi nga paagi pinaagi ha pagpitad han imo gimaopayi nga tiil, ngan hinaot bendisyonan ni Jehova iton mag-opay nga mga tiil samtang gindadara hito an ‘mag-opay nga sumat han kaopayan’ ngadto ha mga tawo.”—Isaias 52:7.

 “Usa nga Sigurado nga Panurundon” an ulohan han pahayag han usa nga instruktor ha Gilead nga hi Lawrence Bowen. Iya ginpahinumdom an mga estudyante nga an kaestablisar han Eskwelahan han Gilead durante han Girra ha Kalibotan II iginbasar ha bug-os nga pagsarig ha katumanan han matagnaon nga Pulong ni Jehova. (Hebreo 11:1; Pahayag 17:8) Tikang hito nga panahon, nakahigayon an mga estudyante nga maparig-on an ira pagtoo pinaagi hito. An marig-on nga pagtoo nag-aaghat ha mga naggradwar nga magpadayon ngan madasigon nga magpasamwak han kamatuoran.

Hi Mark Noumair, usa pa nga instruktor ha Gilead, naghisgot mahitungod han makapainteres nga ulohan nga “Kon Nakikita Ko Kamo, May-ada Ako Nahinunumdoman.” Iya ginhisgotan an ehemplo ni propeta Eliseo, nga nagpakita hin pagtoo ngan kadasig ha iya  toka. Iginbasar ni Bugto Noumair an iya pahayag ha 1 Hadi 19:21, hiya nagsiring: “Andam hi Eliseo ha pagpahiuyon ha kahimtang, ha diri pag-una han iya karuyag, ngan ha pagpasamwak han katuyoan ni Jehova.” Iya ginkumendasyonan an mga naggradwar ha pagpakita hin pariho nga disposisyon ngan gindasig hira nga magpadayon ha pagbuhat hito ha ira bag-o nga teritoryo.

An Pagtoo Nagriresulta hin Kagawasan ha Pagyakan

Samtang ginpaparig-on han magigin mga misyonero an ira pagtoo durante han klase, ira ginpahimulosan an mga kataposan han semana ha pagsangyaw han maopay nga sumat ha iba. Nagresulta ini hin mag-opay nga eksperyensya nga iginsumat ngan iginpasundayag ha bahin nga gindumara ni Wallace Liverance, usa pa nga instruktor han Gilead. An iya bahin nga an tema “May-ada Kita Pagtoo Salit Nagyayakan Kita,” nagpapahinumdom han ginsiring ni apostol Pablo ha 2 Korinto 4:13.

Katapos hini, hira Daniel Barnes ngan Charles Woody, mga membro han pamilya han Bethel, nag-interbyu hin mga misyonero yana ngan nagin misyonero hadto. Ginpabug-atan hini an pag-ataman ngan bendisyon ni Jehova ha magtinumanon nga nag-aalagad ha iya. (Proberbios 10:22; 1 Pedro 5:7) Usa nga misyonero an nagsiring: “Naeksperyensyahan gud namon nga mag-asawa an pag-ataman ni Jehova pinaagi han edukasyon nga amon nakarawat ha Gilead. Ginparig-on gud hito an amon pagtoo. Importante an pagtoo tungod kay an ngatanan nga surugoon han Dios, upod na an mga misyonero, may-ada mga pagsari, problema, ngan kabaraka.”

Padayon nga Iaghat an Edukasyon ha Biblia nga Nagpaparig-on han Pagtoo

Sugad nga angayan nga pagtapos han programa, hi Samuel Herd, membro han Nagmamando nga Lawas, nagpahayag ha ulohan nga “Padayon nga Parig-ona an Iyo Kabugtoan.” Ano an katuyoan han edukasyon nga nakarawat han mga estudyante? “An katuyoan hito amo an pagtutdo ha iyo kon paonan-o gagamiton an iyo dila ha pagdayaw kan Jehova, ha pagtutdo ha mga tawo han kamatuoran mahitungod ha iya ha iyo bag-o nga toka, ngan ha pagpinarig-onay ha usa kag usa ha pagtoo,” nagsiring hi Bugto Herd. Kondi, ginpahinumdoman niya an mga estudyante nga an dila mahimo liwat magin diri makapadasig. (Proberbios 18:21; Jakobo 3:8-10) Iya gindasig an mga estudyante nga subaron an ehemplo ni Jesus ha ira paggamit han ira dila. Ha usa nga okasyon, katapos mamati kan Jesus, an iya mga disipulo binaton: “Waray ba magpaso an aton mga kasingkasing . . . han pagbuklari niya ha aton [han] Santos nga Surat?” (Lukas 24:32) Hi Bugto Herd nagsiring: “Kon makaparig-on an iyo mga pulong, mababantad an kasingkasing han kabugtoan ha iyo teritoryo.”

Katapos, iginhatag ha mga naggradwar an ira diploma ngan ginbasa an surat han klase nga nagpapahayag han ira apresasyon. Ito nasiring: “Amon inaabat nga responsabilidad gud namon nga gamiton an amon hinbaroan ha matinumanon nga pagbuhat han amon toka sugad nga misyonero. Samtang andam na kami ha pagkadto ha kasidsiran han tuna, nag-aampo kami nga an amon pangalimbasog magriresulta hin pagdayaw ha aton Gihitaasi nga Instruktor, hi Jehova nga Dios.” Ipinakita han mga mamarati an ira pag-uyon pinaagi han kinasingkasing nga pagpakpak. Oo, an gradwasyon nagparig-on gud han pagtoo han ngatanan nga tinambong.

[Blurb ha pahina 17]

“Kon makaparig-on an iyo mga pulong, mababantad an kasingkasing han kabugtoan ha iyo teritoryo”

[Kahon ha pahina 15]

ESTADISTIKA HAN KLASE

Kadamu han nasud nga ginrepresentaran: 9

Kadamu han nasud nga gintokahan: 26

Kadamu han estudyante: 56

Aberids nga edad: 33.4

Aberids nga mga tuig ha kamatuoran: 16.8

Aberids nga mga tuig ha bug-os-panahon nga ministeryo: 13

[Retrato ha pahina 16]

Ika-122 nga Naggradwar nga Klase han Watchtower Bible School of Gilead

Ha lista ha ubos, an mga rumbay may numero tikang ha unahan tipaluyo, ngan an mga ngaran iginlista tikang ha wala tipatoo ha kada rumbay.

(1) Howitt, R.; Smith, P.; Martinez, A.; Pozzobon, S.; Kitamura, Y.; Laud, C. (2) Fiedler, I.; Beasley, K.; Matkovich, C.; Bell, D.; Lippincott, W. (3) Sites, W.; Andersen, A.; Toevs, L.; Fusano, G.; Rodríguez, C.; Yoo, J. (4) Sobomehin, M.; Thomas, L.; Gasson, S.; Dauba, V.; Bertaud, A.; Winn, C.; Dobrowolski, M. (5) Yoo, J.; Dauba, J.; Mixer, H.; Newton, M.; Rodríguez, F.; Mixer, N. (6) Laud, M.; Lippincott, K.; Martinez, R.; Haub, A.; Schamp, R.; Pozzobon, L.; Toevs, S. (7) Howitt, S.; Kitamura, U.; Newton, D.; Haub, J.; Sites, J.; Thomas, D. (8) Sobomehin, L.; Matkovich, J.; Fusano, B.; Winn, J.; Schamp, J.; Andersen, D.; Dobrowolski, J. (9) Fiedler, P.; Bell, E.; Beasley, B.; Smith, B.; Bertaud, P.; Gasson, M.