“Nagkakabahin-bahin ha Yinaknan Kondi Nagkakaurosa ha Gugma”

Kaluwasan. Kagawasan. Katalwasan. Ha sulod hin mga siglo na, an mga tawo naghihiningyap hin katalwasan tikang ha mga kasakitan ngan kabaraka. Paonan-o naton malalamposan an mga problema? Magkakaada pa ba hin kaluwasan? Kon may-ada, paonan-o?

ITO an topiko han tulo ka adlaw nga distrito nga mga kombensyon, nga gin-organisa han mga Saksi ni Jehova, nga nagtikang han Mayo 2006. An tema hito, “Kaluwasan Hirani Na!”

Siyam hini nga kombensyon an tinambongan hin yinukot nga delegado tikang ha magkalain-lain nga nasud. Gindumara ito durante han Hulyo ngan Agosto 2006, ha Prague, an kapital han Czech Republic; ha Bratislava, an kapital han Slovakia; ha Chorzow ngan Poznan, Polandia; a ngan ha lima nga syudad han Alemanya—Dortmund, Frankfurt, Hamburg, Leipzig, ngan Munich. Sobra 313,000 an ngatanan nga tinambong.

Ano nga kahimtang an naobserbahan ha mga kombensyon? Ano an iginreport han media mahitungod ha ira? Ngan katapos hito, ano an inabat han mga tinambong?

Mga Pagpangandam

Ginpamulat gud han mga bisita ngan han lokal nga mga Saksi an mga kombensyon tungod kay maaram hira nga importante gud ito ha espirituwal nga mga okasyon. Daku hinduro nga trabaho an paghikay hin urukyan han mga delegado. Pananglitan, durante han kombensyon ha Chorzow an haros 13,000 nga bisita tikang ha Este nga Europa ginpaukoy han mga Saksi ha Polandia ha ira balay. Tinambong hito nga kombensyon an mga delegado tikang ha Armenia, Belarus, Estonia, Georgia, Kazakhstan, Kyrgyzstan, Latvia, Lithuania, Moldova, Russia, Tajikistan, Turkmenistan, Ukraine, Estados Unidos, ngan Uzbekistan.

Damu nga delegado an maiha na nga nag-inandamon para han ira pagbiyahe. Hi Tatiana, nagtikang pagtirok hin kwarta usa ka tuig pa antes han iya biyahe. Bug-os-panahon nga ebanghelisador hiya ha Kamchatka, usa nga peninsula han Russia ha norte-este han Japan. Kinahanglan hiya magbiyahe hin 10,500 kilometro. Nagbiyahe anay hiya hin 5 ka oras ha eruplano, katapos haros tulo ka adlaw ha tren, ngan ha kataposan 30 ka oras ha bus tipakadto ha Chorzow.

Yinukot an nagboluntaryo antes han kombensyon, basi an mga estadyum ngan an palibot hito magin angayan para ha pagsingba. (Deuteronomio 23:14) Pananglitan, ha Leipzig an estadyum ginlimpyo hin maopay han mga Saksi, ngan nagsaad hira nga buhaton utro ito katapos han kombensyon. Sugad nga resulta, an  daku nga baraydan para ha paglimpyo ginkansela han mga opisyal han estadyum ha kontrata han pagplete.

Mga Imbitasyon

An mga kongregasyon ha bug-os nga kalibotan nangalimbasog gud nga ipahibaro ha publiko an “Kaluwasan Hirani Na!” nga mga Kombensyon. Adton tinambong hinin espesyal nga mga kombensyon malipayon nga nakigbahin hini nga kampanya. Nagpadayon hira pagpasamwak hito tubtob ha katutnga ha gab-i antes han kombensyon. Nagkaada ba ito maopay nga resulta?

An Polako nga Saksi nga hi Bogdan iginkaistorya hin lagas nga lalaki nga naruruyag pagtambong ha kombensyon kondi nasiring nga an iya gutiay nga pensyon diri igo para ha 120 kilometro nga biyahe ngadto ha Chorzow. Nahituman nga magkakaada bakante nga lingkoran ha bus nga ginkontrata han ira kongregasyon. Hi Bogdan nagsiring: “Ginsumatan namon hiya nga makakaupod hiya ha amon nga libre ha pamasahe kon umabot hiya ha lugar diin kami magkikirigta antes lumakat ha alas-5:30 ha aga.” Inuyon hiya hito ngan tinambong ha kombensyon. Ha urhi nagsurat hiya ha amon, nasiring: “Katapos ko tumambong hini nga kombensyon, determinado ako nga magin mas maopay nga tawo.”

Ha Prague, han gab-i na, usa nga tawo nga nag-ukoy ha hotel nga gin-ukyan han mga delegado tikang ha Britanya an nagsumat ha ira nga hito nga adlaw tinambong liwat hiya. Kay ano? Tungod kay katapos niya makakarawat hin mga imbitasyon tikang ha napulo nga magwarali ha mga kalsada han syudad, naaghat hiya nga tumambong! Nadasig hinduro hiya ngan naikag nga mahibaro hin dugang pa.—1 Timoteo 2:3, 4.

Mag-opay nga Espirituwal nga Programa

Ginhisgotan ha programa kon paonan-o aatubangon an magkalain-lain nga problema. Iginsaysay han prangka nga sagdon tikang ha Kasuratan kon paonan-o ini masusulbad o maiilob.

An mga indibiduwal nga nagpuproblema han kalagas, sakit, kamatay han mga hinigugma, o iba nga personal nga problema nakakarawat hin pagdasig tikang ha Biblia nga nakabulig ha ira nga magkaada maopay nga panlantaw ha kinabuhi. (Salmo 72:12-14) An mga mag-asawa ngan kag-anak nakapamati hin sagdon tikang ha Biblia kon paonan-o magmamalipayon ha pag-asawa ngan kon paonan-o malampuson nga mapapadaku an ira mga anak. (Eklesiastes 4:12; Efeso 5:22, 25; Kolosas 3:21) An batan-on nga mga Kristiano—nga nakabuhayhag ha nakakadaot nga pag-ipit han mga kaupod ha eskwelahan kondi nakakakuha hin maaramon nga sagdon tikang ha Pulong han Dios ha balay ngan ha kongregasyon—nakakarawat hin praktikal nga sagdon kon paonan-o aatubangon an mga pag-ipit han ira kasangkayan ngan kon paonan-o ‘mapalagiw ha makimalaw-ay nga mga batan-on.’—2 Timoteo 2:22.

Tinuod nga Bug-os-kalibotan nga Pagminagburugto

An mga Saksi ni Jehova pirme nakarawat hin mag-opay nga giya tikang ha Kasuratan ha ira mga katirok. (2 Timoteo 3:16) Kondi, an nakahimo hini nga mga kombensyon nga naiiba amo an pagin internasyonal hito. Parapriho nga espirituwal nga programa an iginpresenta ha damu nga yinaknan ha ngatanan nga espesyal nga kombensyon. Kada adlaw, nagpapahayag an mga membro han  Nagmamando nga Lawas han mga Saksi ni Jehova, ngan nagin mas makapainteres ito tungod han mga report tikang ha iba nga katunaan. Ini nga mga pahayag ngan report iginhubad basi magpahimulos an magkalain-lain nga grupo han mga tinambong nga iba-iba an yinaknan.

Naikag an mga delegado nga makita an ira kabugtoan tikang ha iba nga katunaan. “Diri problema an pagkaiba-iba han yinaknan,” siring han usa nga delegado. “Nakadugang pa lugod ito han kalipay han okasyon. Magkaiba-iba an kultura han mga bisita, kondi nagkakaurosa hira ngatanan ha uusa nga pagtoo.” Iginpahayag ito han mga tinambong ha kombensyon ha Munich hini nga paagi: “Nagkakabahin-bahin ha yinaknan kondi nagkakaurosa ha gugma.” Anoman an ira lugar nga natawohan ngan yinaknan, inabat han mga tinambong nga totoo nga kasangkayan an ira kaupod—espirituwal nga kabugtoan.—Sakarias 8:23.

Mga Kapahayagan han Pagpasalamat

Nasarihan an disposisyon ngan pagpailob han mga delegado ha Polandia tungod han klima durante han mga kombensyon. Gawas han haros pag-inuran pirme, mahagkot liwat—mga 14 digri Celsius. Usa nga bugto tikang ha Estados Unidos an nagsiring: “Ito an pinakamaraot nga klima ngan pinakamahagkot nga temperatura nga akon naeksperyensyahan ha kombensyon, tungod hito gutiay la an akon nasabtan ha programa. Kondi nabawi ito ngatanan tungod han maopay hinduro nga internasyonal nga kahimtang, han malipayon nga disposisyon, ngan han waray kapariho nga pag-abiabi. Diri ko gud hingangalimtan ini nga kombensyon!”

An usa nga diri gud hingangalimtan han mga delegado nga Polako amo an pagpahibaro han iginpublikar nga Insight on the Scriptures ha ira yinaknan—usa nga makalilipay nga balos han ira pag-ilob han hagkot ngan uran. Naghatag liwat hin daku nga kalipay ha ngatanan nga “Kaluwasan Hirani Na!” nga Kombensyon an bag-o nga publikasyon nga Live With Jehovah’s Day in Mind.

Damu han tinambong an diri mahingangalimot han kombensyon tungod han iba pa nga hinungdan. Hi Kristina, taga-Czechoslovakia nga bugto nga nagboluntaryo pag-upod ha usa ka bus nga delegado tikang ha iba nga nasud, nagsiring: “Han magbuburublag na kami, usa nga bugto nga babaye an hinirani ngan hinangkop ha akon, ngan nagsiring: ‘Inabat ko nga gin-ataman ako hin maopay! Gindad-an mo pa gud kami hin pagkaon ngan tubig ha amon lingkoran. Damu nga salamat han imo pagsakripisyo ngan gugma.’” An iya karuyag sidngon amo an tagana nga paniudto para ha mga dayo nga delegado. “Ito an amon siyahan nga pakaeksperyensya hito nga klase hin trabaho,” siring han usa nga bugto nga lalaki. “Ginkinahanglan hito nga idul-ong namon an paniudto han haros 6,500 ka tawo kada adlaw. Makalilipay kitaon nga damu an boluntaryo nga binulig, upod na an kabataan.”

Usa nga bugto nga babaye nga nagbiyahe tikang ha Ukraine ngadto ha Chorzow basi tumambong an nagsiring: “Nadasig gud kami han gugma, pag-ataman, ngan pagkamahinatagon han amon mga igkasi-tumuroo. Waray mga pulong nga makakapahayag han amon pagpasalamat.” An otso anyos nga hi Annika tikang ha Finland nagsurat ha sanga nga opisina han mga Saksi ni Jehova ha Polandia: “An kombensyon mas makalilipay gud kay han akon ginhuhunahuna. Maopay gud an pagin kaupod han organisasyon ni Jehova, tungod kay nagkakaada ako hin kasangkayan ha bug-os nga kalibotan!”—Salmo 133:1.

Mga Komento han mga Nakaobserba

Antes han kombensyon, may gin-organisa nga pamasyada ha mag-opay nga lugar para ha mga  delegado. Ha mga probinsya han Bavaria, hinapit an mga bisita ha mga Kingdom Hall, diin gin-abiabi hira han mga Saksi didto. Inin kapahayagan han minagburugto nga gugma gindayaw gud han diri-Saksi nga tour guide han usa nga grupo. “Ha bus, han tipabalik na kami ha hotel,” siring han usa nga delegado, “an tour guide nagsiring nga iba gud kami ha iba nga namasyada. Desente an amon pamado, ngan an ngatanan nakooperar ha mga nangunguna ha grupo. Waray pagbuyayaw ngan samok. Nahipausa hiya nga an mga diri magkakilala nagigin mag-opay nga magsarangkay dayon.”

Usa nga bugto nga nagboluntaryo ha News Service Department ha kombensyon ha Prague an nagsiring: “Han Domingo nga aga, binisita ha amon an opisyal nga nagdudumara han mga polis nga igintoka ha kombensyon. Naobserbahan niya nga mamurayawon an palibot ngan nagsiring nga waray na hiya bubuhaton. Gin-unabi liwat niya nga nagpakiana an pipira nga residente hirani ha estadyum mahitungod han programa. Han naunabi niya an mga Saksi ni Jehova, kasagaran nga diri hira makatoo, salit hiya nagsiring ha ira: ‘Kon an mga tawo makatunga la ha maopay nga pamatasan han mga Saksi ni Jehova, diri na gud unta pagkikinahanglanon an polis.’”

Damu Na an Naluwas!

An Pulong han Dios, an Biblia, sugad hin tulay butnga han magkalain-lain nga kultura, nga nagtitirok han mga Kristiano ha kamurayawan ngan pagkaurosa. (Roma 14:19; Efeso 4:22-24; Filipos 4:7) Pinamatud-an ini han “Kaluwasan Hirani Na!” nga espesyal nga mga kombensyon. Naluwas na an mga Saksi ni Jehova tikang ha damu nga kakurian hini nga kalibotan. Haros nawara na ha ira an pipira nga problema han sosiedad sugad han diri-pagkaurosa, kamadarahog, ngan rasismo, ngan ginpapamulat nira an panahon nga mawara na ha bug-os nga kalibotan an sugad nga mga problema.

Adton tinambong hini nga mga kombensyon personal nga nakaeksperyensya han pagkaurosa han mga Saksi tikang ha magkalain-lain nga katunaan ngan kultura. Nakita gud ini labi na ha pagtapos han mga kombensyon. An ngatanan nagpapakpak, naghaharangkopay an bag-o nga magsarangkay, ngan nagpaparetrato. (1 Korinto 1:10; 1 Pedro 2:17) Tungod kay malipayon ngan kombinsido nga hirani na an kaluwasan ha ngatanan nga problema ngan kabaraka, an mga delegado inuli ha ira balay ngan kongregasyon nga mas determinado ha padayon nga pagkapot hin marig-on ha “pulong han kinabuhi” han Dios.—Filipos 2:15, 16.

[Footnote]

[Kahon/Retrato ha pahina 10]

Bainte-Sais nga Yinaknan Kondi Usa La nga Programa

An programa ha ngatanan nga siyam nga kombensyon iginpresenta ha lokal nga yinaknan. Durante han mga kombensyon ha Alemanya, an mga diskurso iginpahayag liwat ha 18 nga iba pa nga yinaknan. Ha Dortmund an mga pahayag iginpresenta ha mga yinaknan nga Arabiko, Farsi, Portuges, Espanyol, ngan Ruso; ha Frankfurt iginpresenta ito ha Ingles, Franses, ngan Serbian/Croatian; ha Hamburg iginpresenta ito ha Danish, Dutch, Swedish, ngan Tamil; ha Leipzig iginpresenta ito ha Inintsik, Polako, ngan Turkish; ngan ha Munich iginpresenta ito ha Griego, Italyano, ngan Aleman nga Sign Language. An mga diskurso ha Prague iginpahayag ha Czech, Ingles, ngan Ruso. Ingles, Hungaryo, Slovak ngan Slovak nga Sign Language an ginamit ha programa ha Bratislava. Ha Chorzow an lengwahe nga ginamit Polako, Ruso, Ukrainiano, ngan Polako nga Sign Language. Ha Poznan, Polako ngan Finnish an ginamit.

Bainte-sais nga yinaknan ngatanan! Oo, an mga tinambong ha kombensyon nagkakabahin-bahin ha yinaknan, kondi nagkakaurosa ha gugma.

[Retrato ha pahina 9]

Nalipay an taga-Croatia nga mga delegado ha Frankfurt ha pakakarawat han “New World Translation” ha ira kalugaringon nga yinaknan