An Pagpamiling han Katagbaw ha Espirituwal

HA KAN Jesus bantogan nga Sermon ha Bukid, hiya nagsiring: “Malipayon adton mahunahunaon han ira espirituwal nga panginahanglan.” (Mateo 5:3, NW) Bangin nauyon ka hito. Nasantop han mga tawo ha bisan diin nga an pagtagbaw han espirituwal nga panginahanglan an makakahatag ha ira hin kalipay. Kondi, ano an kahulogan han pulong nga “espirituwalidad”?

An usa nga diksyonaryo naghahatag hin kahulogan ha espirituwalidad sugad nga “kaaram ha mga panginahanglan ha o pagin duok ha mga prinsipyo han relihiyon” ngan “an kalidad o kahimtang ha pagin espirituwal.” Salit, an mga termino sugad han “espirituwalidad,” ngan “pagin espirituwal” gintatagad nga magkapariho an kahulogan. Karuyag sidngon, an usa nga nagpapabili gud ha espirituwal nga mga butang o mahunahunaon ha relihiyon ginsisiring nga espirituwal nga tawo.

Kon sugad, paonan-o makakab-ot an tinuod nga katagbaw ha espirituwal? Bisan kon haros kada relihiyon nag-aangkon nga maaram han paagi kon paonan-o matatagbaw han tawo an panginahanglan ha espirituwal, an mga giya nga iginhahatag haros sugad kadamu han relihiyon mismo. Pananglitan, usa nga Protestante an nag-aangkon nga naluwas hiya ha ira seremonya. An usa nga Katoliko naghihingyap nga magin duok ha Dios pinaagi ha pagkomunyon. An usa nga Budhista namimiling hin kahayag pinaagi ha pagpamalandong. Usa nga Hindu an nangangalimbasog nga magkaada kagawasan tikang ha sikolo han mga pagkatawo-utro pinaagi ha pagpakuri ha kalugaringon. Ini ba ngatanan naghahatag hin tinuod nga katagbaw ha espirituwal?

Para ha damu, diri an baton hito nga pakiana. Nasiring hira nga mahimo an usa magin espirituwal nga tawo basta natoo hiya ha dios o bathala, bisan kon diri hiya membro hin relihiyon. Para ha iba, an espirituwalidad nagpapasabot diri ha pagin api ha relihiyon, kondi ha hingyap hin kamurayawan ha hunahuna ngan hin kahulogan ha kinabuhi. Salit, marig-on hira nga nasiring nga adton namimiling hin katagbaw ha espirituwal diri nagkikinahanglan hin relihiyon. Lugod, kinahanglan la nira ito pamilngon ha ira kalugaringon nga pagbati. Pariho hito an iginsurat han usa nga parasurat, hiya nagsiring: “An aton la kalugaringon an makakahatag hin tinuod nga katagbaw ha aton espirituwalidad. Ito an imo paagi han paghigugma, pagkarawat ngan pagtagad ha kalibotan ngan ha mga tawo ha imo palibot. Diri ito mabibilngan pinaagi ha pag-api ha relihiyon o pagtoo ha partikular nga mga katutdoan hin relihiyon.

Matin-aw nga iba-iba an ideya han mga tawo mahitungod ha espirituwalidad. Yinukot nga libro an nag-aangkon nga nagpapakita ito han mga paagi kon paonan-o matatagbaw an espirituwal nga mga panginahanglan, pero agsob nga an mga magbarasa diri natatagbaw ngan nawuwurok la gihapon. Kondi, may-ada usa nga libro nga nagsusulod gud hin masasarigan nga giya mahitungod ha espirituwal nga mga butang. Ito an libro nga nagpapakita han ebidensya nga giniyahan ito han Dios. (2 Timoteo 3:16) Aton kitaon kon ano an ginsisiring hito nga libro, an Biblia, mahitungod han kahulogan han espirituwalidad ngan han bili hito.

 [Ginkuhaan han mga Retrato ha pahina 2]

KOBRE: Background: © Mark Hamblin/age fotostock