An Pagtoo han Usa nga Iroy Naglampos ha Epekto han Trahedya

“Kon mababasa niyo ini nga surat, karuyag sidngon, waray maglampos an operasyon ha akon ngan diri na niyo ako kaupod.”

INI an siyahan nga mga pulong ha surat ni Carmen nga usa nga Saksi ni Jehova, ha iya tulo nga anak nga babaye nga nag-iedad hin 25, 19, ngan 16. Waray maglampos an operasyon, ngan makasurubo nga namatay hiya.

Masakit gud an pagbaya hin tulo nga anak ha sugad kamakasurubo nga kahimtang. Kondi, an marig-on nga pagtoo ni Carmen kan Jehova ngan ha iya mga saad matin-aw nga naglampos ha epekto han trahedya tungod kay naghatag ito ha iya hin kamurayawan ha hunahuna nga nakikita ha iya makapabantad nga surat. Tigamni an iya ginsiring ha iya mga anak.

“Siyahan ha ngatanan, karuyag ko isumat ha iyo nga hinigugma ko gud kamo. . . . Buotan kamo hinduro, ngan nalilipay gud ako ha iyo.

“Karuyag ko unta kamo makaupod tubtob ha pag-abot han iginsaad han Dios nga bag-o nga kalibotan . . . , kondi tungod kay imposible ito, ginhangyo ko Hiya nga buligan kamo basi magin matinumanon sugad la han iyo ipinapakita na. Damu na nga problema an aton gin-atubang, ngan waray gud kita pasibay-i ni Jehova. . . . Salit padayon kamo ha pagsarig ha giya nga iya igintatagana pinaagi han iya organisasyon ngan ha pagsuporta ha kongregasyon ngan ha mga tigurang. Pagsangyaw kamo pirme tubtob ha iyo mahihimo, ngan higugmaa an ngatanan nga kabugtoan.

“Temporaryo la ini nga aton pagbulag. . . . Pasayloa niyo ako ha ngatanan nga sayop nga akon nahimo ngan ha ngatanan nga panahon nga waray ko kamo maintindihi o waray ko maisumat an akon daku nga gugma ha iyo. . . . Maaram ako nga an tagsa ha iyo may-ada personal nga panginahanglan. Mas maaram hi Jehova hito kay ha iyo, ngan magtatagana hiya han ngatanan nga iyo ginkikinahanglan ngan magbabalos ha iyo tungod han ngatanan nga iyo gin-iilob.

“Ayaw kalimti an iyo tumong—an bag-o nga kalibotan. Padayon nga pangalimbasog ha pagkab-ot hito. Bendisyonan ngan parig-unon unta kamo ni Jehova basi magin matinumanon kamo tubtob ha kataposan. . . . Ayaw kasubo, presyoso ko nga mga anak. Hinigugma ko kamo!”

An trahedya mahimo umabot ha bisan kan kanay, ha bisan ano nga panahon. Hi Hadi Salomon nagsurat: “An panahon ngan an higayon [“diri linalaoman nga panhitabo,” NW] nahananabo ha ira ngatanan.” (Eklesiastes 9:11) Kondi, adton marig-on nga natoo ha Dios mahimo magkaada pariho nga pagsarig kan apostol Pablo nga nagsiring: “Kay nakasabot gud ako, nga bisan an kamatayon, bisan an kinabuhi, . . . bisan ano pa nga binuhat diri sadang makabulag ha aton tikang ha gugma han Dios, nga aada kan Kristo Jesus nga aton Ginoo.”—Roma 8:38, 39; Hebreo 6:10.