Duha nga “Milagro” ha Usa nga Kombensyon ha Georgia

USA nga diri mahingangalimtan nga okasyon, nga natigamnan hin duha nga “milagro,” an nahitabo ha Georgia han 2006. Ha sulod hin tulo ka adlaw, tikang han Hulyo 7 tubtob 9, an “Deliverance at Hand!” nga Distrito nga Kombensyon han mga Saksi ni Jehova gindumara ha unom nga lugar ha bug-os nga nasud. Sugad hin pyesta ito han espirituwal nga mga butang nga napahimulsan han sobra 17,000 nga tinambong.

Han Enero 2006, nagtikang an pagpinamiling hin angayan nga lugar ha syudad han Tbilisi, an kapital han Georgia, diin nakaeskedyol an kombensyon nga pagkakatirokan han yinukot nga tawo. An iba nga lugar nga pagdudumarahan hin kombensyon igin-hookup ha mga telepono.

Hinay-hinay nga nagkaada kagawasan ha pagsingba ha Georgia durante han naglabay nga mga tuig. Tungod hito, bisan han kalyap nga pagkontra hadto, determinado la gihapon an mga Saksi ha pagpamiling hin lugar para ha kombensyon ha kapital nga syudad, ngan nasarig nga makakabiling hira. Makisangkayon ngan maabiabihon an mga taga-Georgia. Kondi, may-ada ginpapasulabi nga relihiyon an iba nga opisyal. Mawawara ba nira ito nga pagpasulabi ngan tutugotan an mga Saksi nga makaplete hin pasilidad?

Ginkita han mga membro han Komite han Kombensyon an magkalain-lain nga estadyum ngan dagku nga uruyagan. Nagsaad an mga manidyer ha pagpagamit han ira pasilidad kondi han iginsumat han kabugtoan an petsa, nagdumiri na hira. Tungod hito, nahipausa an komite han tumugot an administrasyon han Tbilisi Philharmonic nga papletehan an ira pasilidad ha mga Saksi ni Jehova. Nahimumutang ito ha sentro han syudad, diin ginhihimo an kadam-an han sikat nga konsyerto.

Tungod kay nalipay an komite nga sugad hin naglampos an ira pangalimbasog, nagtikang  hira pag-organisa han kombensyon ha Tbilisi, sugad man ha mga bungto ngan syudad ha iba-iba nga dapit han nasud, nga nag-uupod han Tsnori, Kutaisi, Zugdidi, Kaspi, ngan Gori. Basi magin durungan an programa, damu an ginbuhat ha pag-hookup ha telepono hini ngatanan nga lugar. Andam na an ngatanan. Kondi, usa ka semana antes han kombensyon, tigda la nga ginkansela han administrasyon han Tbilisi Philharmonic an kontrata. Waray hira maghatag hin esplikasyon kon kay ano.

An Siyahan nga “Milagro”

Ano an mahihimo han kabugtoan hinin apot na hinduro nga petsa? Waray na hira iba nga nahunahuna nga solusyon kondi an lugar han Marneuli, usa nga kaumhan nga 40 kilometros ha gawas han Tbilisi. Damu nga kombensyon an gindumara na didto ha lote han usa nga pamilya nga Saksi ni Jehova. Ito nga lugar haluag nga hardin hadto. Ha naglabay nga napulo ka tuig, ito la an nagagamit han mga kongregasyon ha Tbilisi para ha ira mga kombensyon. Kondi, dida liwat naeksperyensyahan han mga Saksi ni Jehova an pag-atake han magdarahog nga katawohan.

Usa hini nga insidente an nahitabo han Septyembre 16, 2000. Nagbutang hin mga barikada an mga pulis han Marneuli basi diri makaabot an mga Saksi ha lugar han kombensyon. Katapos, inabot an bus nga puno hin magdarahog nga tawo nga ginpangunahan ni Vasili Mkalavishvili, usa nga ministro hadto han Ortodokso. Ira ginpaundang an mga awto ngan bus nga tipakadto ha kombensyon, gindanas tipagawas ha awto an pipira nga delegado, ngan waray kalooy nga ginkastigo hira, samtang ginpangawatan an iba nga pasahero, upod an ira mga Biblia ngan literatura.

An lugar han kombensyon gindumog liwat hin haros 60 nga tawo. Mga 40 nga Saksi an nadaot tungod hito. Usa nga bugto an ginbuno ha dughan. Ginwara-wara han pipira nga magsamok nga tawo an ira pistola ngan ginpabuto ito tipaigbaw. Gintutukan han usa ha ira an tag-iya han lugar ngan pwersado nga gin-aro an iya kwarta ngan alahas. Ginransak nira an iya balay, nga nakadto ha usa nga kasuok-suokan nga dapit han uma, ngan ginpangawat an iya birilhon nga butang. Katapos, ginsunog nira an mga literatura ngan an mga lingkoran nga ginhimo para ha kombensyon. Usa ngan tunga ka tonilada nga literatura an ginpan-guba. Imbes nga paundangon an krimen, inapi lugod an mga pulis ha pagsamok ha mga Saksi. a

 Kinahanglan sulbaron han Komite han Kombensyon diri la an tarhog han kamadarahog kondi kon paonan-o liwat maigo an 5,000 nga tawo ha lugar nga para ha 2,500 la. Paonan-o masusulbad ini ha sugad ka halipot nga panahon? Baga hin milagro han an mga tag-iya han duha nga kasapit nga lote dumaop ha kabugtoan ngan nagtanyag ha pagpaplete han ira hardin.

Makuri nga trabaho an paghimo han mga hardin nga angayan nga lugar para han kombensyon, ngan mas ginpakuri pa gud ito tungod han kahimtang han panahon tungod kay nag-inuran han bug-os nga semana antes han kombensyon. An hardin nga ginpletehan may-ada tanom nga patatas, ngan kinahanglan ito bukaron. Siyahan, ginbukad han mga boluntaryo an mga patatas bisan kon nag-iinuran. Katapos, ginkuha nira an mga alad ngan naghimo hin mga balayan basi masirongan han mga matambong. Naghimo hira hin dugang nga lingkoran, ngan nag-instalar hin dugang nga sound system. Nagtrabaho an mga boluntaryo ha adlaw ngan gab-i, an iba ngani waray kumaturog.

“Ano daw la kon mag-inuran durante han kombensyon?” nahunahuna han ngatanan. “Malulubong ba an mga mamarati ha lapok?” Pumalit hira hin dagami basi tabonan an malapok nga tuna. Ha kataposan, sumirak na! Durante han tulo ka adlaw han kombensyon, maopay an panahon ngan masirak.

Han inabot an mga delegado, nakita nira an maopay nga palibot. An murayaw nga kahimtang han uma baga hin abanse nga paghulagway han bag-o nga kalibotan. Komportable nga nakalingkod an mga delegado nga napapalibotan hin mga kahoy nga igera ngan iba nga namumunga hin prutas, ngan hin uma hin mais ngan kamatis. An entablado gin-adornohan hin mga balagon han ubas. Ha panapanahon durante han programa, nakakabati hira hin tugaok hin mga sunoy ngan putak hin mga ugang samtang nagtitirok han ira mga bonay. May-ada pa iba nga aringasa nga ordinaryo la ha kaumhan, kondi para ha mga mamarati, makaruruyag la ito nga tunog. Imbes nga madisturbo, haros diri nira ito hibatian tungod kay atentibo hira ha makaruruyag gud nga programa nga basado ha Biblia. Kondi, may-ada iba pa nga panhitabo hini nga kombensyon nga diri gud mahingangalimtan.

An Ikaduha nga “Milagro”

Han pag-ikatarapos han sesyon ha Biernes nga aga, nahipausa an mga delegado han iginpahibaro ni Geoffrey Jackson, membro han Nagmamando nga Lawas, an pagpagowa han bug-os nga New World Translation of the Holy  Scriptures ha Georgia nga yinaknan. b Nanuro an luha han damu tungod kay nabantad gud hira. Usa nga membro han pamilya an malipayon nga nagsiring: “Diri namon mapugngan an amon pagpinahayag han amon pagpasalamat hini nga milagro—milagro ni Jehova. Daku gud adto nga trabaho ha sugad kahalipot nga panahon!”

Usa nga bugto ha bungto han Tsalendjikha nga nakapamati han programa pinaagi ha telepono an nagsiring: “Diri ko maipahayag an akon kalipay han nakarawat namon an bug-os nga Biblia. Nagpapasalamat ako ha iyo tungod hinin espesyal nga tulo ka adlaw nga kombensyon. Diri gud ito mahingangalimtan.” Usa nga membro hin pamilya ha usa nga kongregasyon ha weste nga Georgia, ha giutan han Dagat nga Itom, an nagsiring: “Tubtob kanina, usa la an Biblia han amon pamilya, kondi yana tag-urusa na kami nga upat han New World Translation. Personal nga makakag-aram na yana han Biblia an kada usa ha amon.”

Kondi, may-ada mga nagin problema nga diri hinbabaroan han mga tinambong. Pananglitan, bisan kon an bug-os nga New World Translation temprano nga gin-imprinta ngan ginpadara ha Georgia para ha kombensyon, nagdumiri an mga opisyal han Department of Customs nga makasulod ito ha Georgia. An kabugtoan nag-apela ha ombudsman. Nakuha han ombudsman an permiso ha pagpagowa han mga Biblia antes gud la han distrito nga kombensyon. Ginpakadto pa ngani niya ha kombensyon an iya assistant basi kumuha hin mga kopya han bag-o nga Biblia para ha ira opisina.

Mapaso nga Pag-abiabi—Estilo han Taga-Georgia

An distrito nga kombensyon ha Marneuli makatirigamnan nga okasyon para ha mga Saksi ni Jehova ha Georgia tungod ha usa pa nga rason. Hi Bugto Jackson, membro han Nagmamando nga Lawas han mga Saksi ni Jehova, presente hito nga programa. Malipayon hinduro an ngatanan, tungod hito karuyag nira nga personal nga abiabihon hiya ha ira nahiaraan nga mapaso nga pag-abiabi. Kinahanglan tumindong hiya ngan makig-istorya ha kabugtoan ha sulod hin damu ka oras, kondi nalipay hiya ha pagbuhat hito.

Ha pagtapos han usa nga kombensyon han 1903, usa nga bugto an nagsiring: “Diri ko igbabalyo an kapulsanan nga akon nakarawat tikang hini nga kombensyon hin usa ka yukot nga dolyar, bisan kon pobre la ako.” Paglabay hin sobra usa ka siglo, ito gud an inabat han mga Saksi nga tinambong han makatirigamnan nga mga kombensyon ha katpaso han 2006 ha nasud han Georgia.

[Mga footnote]

[Kahon ha pahina 19]

“An Usa nga Gutiayay” Umuswag

An mga pulong ha Isaias 60:22 natuman ha Georgia: “An usa nga gutiayay mahihimo nga usa ka yukot, ngan an usa nga gutiay usa nga nasud nga makusog: ako, hi Jehova, mag-iikag hini ha iya panahon.” Diri pa mabeinte ka tuig nga an kadamu han magwarali han Ginhadian ha Georgia waray pa mag-100, kondi yana 16,000 na. Inin magdasigon nga ministro han Pulong han Dios nagdudumara hin haros 8,000 nga pag-aram ha Biblia kada semana—maopay gud ito nga posibilidad para hin dugang nga pag-uswag ha Georgia.

[Diagram/Mga mapa ha pahina 16]

(Para ha aktuwal nga format, kitaa an publikasyon)

RUSSIAN FEDERATION

GEORGIA

⇨ Zugdidi

⇨ Kutaisi

Marneuli ⇨ Gori

⇨ Kaspi

⇨ Tsnori

TBILISI

TURKEY

ARMENIA

AZERBAIJAN

[Ginkuhaan han Retrato]

Globo: Ha pagtugot han NASA/Visible Earth imagery

[Retrato ha pahina 16]

Estatwa ha Tbilisi

[Mga Retrato ha pahina 17]

An kombensyon ha Marneuli igin-hookup ha mga telepono ha lima nga lugar han kombensyon

[Mga Retrato ha pahina 18]

An mga delegado nalipay ha paggowa han bug-os nga “New World Translation” ha Georgia nga yinaknan