Ikaw ba “Manggaranon ha Dios”?
Ikaw ba “Manggaranon ha Dios”?
“Amo ini an nagtitirok hin manggad ha iya kalugaringon, ngan diri manggaranon ha Dios.”—LUKAS 12:21.
1, 2. (a) Ano nga mga pagsakripisyo an disidido buhaton han mga tawo? (b) Ano nga kakurian ngan peligro an kinahanglan atubangon han mga Kristiano?
HA NAGLABAY nga mga panahon, an mga tawo ha damu nga nasud nagguol ngan maduruto nga nagtrabaho gud tungod kay determinado hira magin riko. Pananglitan, an nauso nga pamiling hin bulawan han ika-19 ka siglo ha Australia, Aprika del Sur, Canada, ngan Estados Unidos nakadani ha mga tawo tikang ha higrayo nga lugar nga disidido bumaya ha ira balay ngan mga hinigugma basi mamiling hin bahandi ha diri-pamilyar ngan usahay madarahog nga katunaan. Oo, damu an disidido umatubang hin duro nga mga peligro ngan hin daku nga pagsakripisyo basi magkaada han mga bahandi nga ira ginhihingyap.
2 Bisan kon damu yana an diri literal nga namimiling hin bahandi, maduruto nga nanginginabuhi gud hira. An pagbuhat hito yana nga panahon mahimo magin makapoy, maguol, ngan makuri gud. Masayon la nga magin okupado tungod ha pagkaon, bado, ngan urukyan salit napapasibay-an na o hinngangalimtan pa ngani an mas importante nga mga butang. (Roma 14:17) Hi Jesus naghatag hin ilustrasyon, o parabola, nga naghuhulagway hin husto hini nga tendensya han tawo. Mababasa ito ha Lukas 12:16-21.
3. Isaysay hin halipot an ilustrasyon ni Jesus ha Lukas 12:16-21.
3 Ini nga ilustrasyon ni Jesus iginhatag hito mismo nga okasyon han nagpahayag hiya mahitungod han panginahanglan nga maglikay ha kaipa, nga aton gin-adman ha siyahan nga artikulo. Katapos niya magpahamangno mahitungod han kaipa, nag-istorya hiya mahitungod hin manggaranon nga tawo nga waray makontento ha iya mga bodega nga puno hin manggad kondi nagguba hito ngan nagtukod hin mas dagku basi butangan hin mas damu nga manggad. Han ginhunahuna niya nga andam na hiya magrelaks ngan magpahayahay, ginsidngan hiya han Dios nga mamamatay na hiya ngan an ngatanan nga manggad nga iya gintirok mahingangadto ha iba. Katapos, igindugang ni Jesus inin pangataposan nga mga pulong: “Amo ini an nagtitirok hin manggad ha iya kalugaringon, ngan diri manggaranon ha Dios.” (Lukas 12:21) Ano nga leksyon an mahibabaroan naton tikang hini nga parabola? Paonan-o naton maiaaplikar ito ha aton kinabuhi?
Usa nga Tawo nga May-ada Problema
4. Ano nga klase hin tawo an iginhulagway ha parabola ni Jesus?
4 An ilustrasyon ni Jesus pamilyar ha damu nga katunaan. Matitigamnan naton nga gintikangan niya an istorya pinaagi la ha pagsiring: “An uma han usa nga tawo nga manggaranon, kinuha [namunga] hin damu.” Hi Jesus waray magsiring nga an tawo nagin riko ha malimbong o maraot nga paagi. Ha iba nga pagkayakan, waray hiya ihulagway sugad nga maraot nga tawo. Ha pagkamatuod, uyon ha ginsiring ni Jesus, angay hunahunaon an tawo nga nagtrabaho hin maduruto. Masasabtan naton nga nagplano ngan nagtirok hiya para ha tidaraon, bangin nahuhunahuna an kaopayan han iya pamilya. Salit, ha sekular nga punto de bista, mahimo hiya magrepresentar ha maduruto nga tawo nga nagbuhat hin seryoso han iya mga obligasyon.
5. Ano an problema han tawo ha parabola ni Jesus?
5 Dugang pa, gintawag ni Jesus an tawo ha parabola nga manggaranon, nangangahulogan nga may-ada na hiya damu nga materyal nga butang. Kondi, sugad han iginsaysay ni Jesus, may-ada hiya problema. An produkto han iya tuna mas damu kay ha ginlalaoman, sobra gud han iya ginkikinahanglan o matitipigan. Ano an sadang niya buhaton?
6. Ano nga pagpili an inaatubang han damu nga surugoon han Dios yana?
6 Damu han surugoon ni Jehova yana an naatubang ha mga kahimtang nga pariho gud hiton manggaranon nga tawo. An totoo nga mga Kristiano nangangalimbasog nga magin tangkod, maduruto, ngan mag-opay nga trabahador. (Kolosas 3:22, 23) Empleyado man hira o may-ada kalugaringon nga negosyo, agsob nga malampuson hira, nalalabwan pa ngani an iba. Kon gintatanyagan hira hin promosyon o bag-o nga mga oportunidad ha negosyo, kinahanglan hira magdesisyon. Sadang ba nira karawaton an promosyon basi magkaada dugang nga kwarta? Sugad man, damu nga batan-on nga Saksi an nangunguna ha eskwelahan. Sugad nga resulta, bangin tanyagan hira hin mga premyo o scholarship para ha dugang nga edukasyon ha bantogan nga mga institusyon. Sadang ba nira sundon an ginbubuhat han kadam-an ngan karawaton an igintatanyag?
7. Ha parabola ni Jesus, paonan-o ginsulbad han tawo an iya problema?
7 Ha ilustrasyon ni Jesus, ano an ginbuhat han manggaranon han an iya tuna nagin mabungahon gud nga waray na hiya mabutangan han iya mga produkto? Nagdesisyon hiya nga gubaon an iya mga bodega ngan maghimo hin mas dagku basi butangan han ngatanan nga sobra nga inani ngan mga manggad. Ito nga plano baga hin naghatag ha iya hin kasigurohan ngan katagbaw salit naghunahuna hiya: “Ako masiring ha akon kalag: Kalag, may damu ka nga manggad, nga gintirok ha kadam-an nga mga tuig: pahuway, kaon, inom, ngan paglipay.”—Lukas 12:19.
Kay Ano nga “Kulang-kulang”?
8. Ano nga importante nga butang an hinngalimtan han tawo ha parabola ni Jesus?
8 Kondi, sugad han iginsaysay ni Jesus, an plano han manggaranon nagresulta la hin diri tinuod nga kasigurohan. Bisan kon baga hin praktikal ito, waray ito han importante gud nga butang—an kaburut-on han Dios. Iya la ginhunahuna an iya kalugaringon, kon paonan-o hiya magigin mahimyang ngan makakakaon, makakainom, ngan maglilipay. Naghunahuna hiya nga tungod kay may-ada hiya ‘damu nga manggad,’ mabubuhi liwat hiya hin ‘damu ka tuig.’ Kondi makasurubo para ha iya tungod kay waray ito mahitabo. Sugad la han ginsiring na ni Jesus, “an kinabuhi han usa nga tawo diri ha kahuraan han mga butang, nga iya ginkakaptan.” (Lukas 12:15) Hiton mismo nga gab-i, an ngatanan nga iya ginpangalimbasogan tigda nga natapos, kay an Dios nagsiring ha iya: “Kulang-kulang, yana nga gab-i an imo kalag aaroon ha imo, ngan an mga butang nga imo gin-andam, maka kan kanay man hira?”—Lukas 12:20.
9. Kay ano nga an tawo ha parabola gintawag nga kulang-kulang?
9 Paghihisgotan naton yana an importante gud nga punto ha ilustrasyon ni Jesus. Gintawag han Dios ito nga tawo nga kulang-kulang. An Exegetical Dictionary of the New Testament nagsasaysay nga an Griego nga mga pulong nga ginamit dinhi “nangangahulogan pirme hin kakulang hin pagsabot.” Nasiring ito nga ipinapakita hini nga parabola nga ginamit han Dios ito nga pulong basi ibuhayhag “an kawaray pulos han mga plano han manggaranon.” Ginagamit ito diri para ha usa nga kulang hin kahibaro, kondi ha “usa nga diri kinikilala an pagsarig ha Dios.” An paghulagway ni Jesus ha manggaranon nga tawo nagpapahinumdom han iya ginsiring ha urhi ha mga Kristiano ha siyahan-siglo nga kongregasyon ha Laodisea, Asia Minor: “Nasiring ka, nga ako manggaranon, ngan damu an akon bahandi, ngan waray ko na kinahanglan hin bisan ano; ngan diri ka maaram nga ikaw an mahangol ngan makalolooy ngan kablasanon, ngan buta ngan hubo.”—Pahayag 3:17.
10. Kay ano nga an pagtag-iya hin ‘damu nga manggad’ diri garantiya basi mabuhi hin ‘damu ka tuig’?
10 Sadang pamalandungon naton an leksyon hini. Mahimo ba kita magin pariho ha tawo ha parabola—nagtatrabaho hin maduruto basi magkaada kita hin ‘damu nga manggad’ kondi diri nagbubuhat han kinahanglanon basi makarawat an paglaom nga mabuhi hin ‘damu ka tuig’? (Juan 3:16; 17:3) An Biblia nasiring: “An bahandi diri ginpupulsan ha adlaw han kapungot,” ngan “an nasarig ha iya bahandi mahuhulog.” (Proberbios 11:4, 28) Salit, igindugang ni Jesus ini nga ultimo nga sagdon ha parabola: “Amo ini an [nahitatabo ha] nagtitirok hin manggad ha iya kalugaringon, ngan diri manggaranon ha Dios.”—Lukas 12:21.
11. Kay ano nga waray pulos an pagsentro han paglaom ngan kasigurohan ha materyal nga mga panag-iya?
11 Han hi Jesus nagsiring nga ‘amo ito an nahitatabo,’ iya iginpapatin-aw nga an nahitabo ha manggaranon ha ilustrasyon mahitatabo liwat ha mga nagsisentro han ira kinabuhi—han ira paglaom ngan kasigurohan—ha materyal nga mga panag-iya gud la. An sayop diri gud ha ‘pagtirok hin manggad para ha kalugaringon’ kondi ha kapakyas nga magin “manggaranon ha Dios.” An disipulo nga hi Jakobo nagpahamangno liwat han hiya nagsurat: “Kadi yana, kamo nga nasiring: Niyan o buwas makadto kita hini nga bungto, ngan maukoy kita didto hin usa ka tuig, ngan magpapatigayon, ngan magana kita: Diri kamo maaram kon ano an mahinabo buwas.” Ano an sadang nira buhaton? “Kinahanglan [hira] sumiring: Kon buot han Ginoo, nga duha kita mabuhi, ngan pagbuhaton ta ini o adto.” (Jakobo 4:13-15) Mationan-o man kariko o kadamu an gintatag-iya han usa nga tawo, an ngatanan mawawaray kapulsanan kon diri hiya manggaranon ha paniplatan han Dios. Ano kon sugad, an kahulogan han pagin manggaranon ha paniplatan han Dios?
Pagin Manggaranon ha Paniplatan han Dios
12. An pagbuhat hin ano an makakahimo ha aton nga manggaranon ha paniplatan han Dios?
12 Ha ginsiring ni Jesus, an pagin manggaranon ha paniplatan han Dios kabaliktaran ha pagtirok hin materyal nga mga bahandi para ha kalugaringon. Hito nga paagi, iginpapasabot ni Jesus nga an aton prayoridad ha kinabuhi diri an pagtirok hin materyal nga mga bahandi o pagkalipay ha pagpahimulos han aton gintatag-iya. Lugod, sadang gamiton naton ito ha paagi nga magpapauswag, o magpaparig-on han aton relasyon kan Jehova. Kon buhaton naton ito sigurado nga magigin manggaranon kita ha paniplatan han Dios. Kay ano? Tungod kay nagigin posible an pagkaada damu nga bendisyon tikang ha iya. An Biblia nagsusumat ha aton: ‘An bendisyon ni Jehova, ini nakakahimo nga bahandianon; ngan waray hiya idudugang nga kasubo hini.’—Proberbios 10:22.
13. Paonan-o an bendisyon ni Jehova “nakakahimo nga bahandianon”?
13 Kon ginbibendisyonan ni Jehova an iya katawohan, iya iginhahatag pirme an gimaopayi. (Jakobo 1:17) Pananglitan, han iya gintagan an mga Israelita hin lugar nga urukyan, usa ito nga “tuna nga nag-aagay hin gatas ngan hin dugos.” Bisan kon an tuna han Ehipto iginhulagway liwat hin sugad hito, an tuna nga iginhatag ni Jehova ha mga Israelita naiiba ha usa nga importante nga paagi. Ito an “tuna nga ginmamangnoan ni Jehova nga imo Dios,” siring ni Moises ha mga Israelita. Ha iba nga pagkayakan, mag-uuswag hira tungod kay hi Jehova magmamangno ha ira. Tubtob nga magpadayon hira nga matinumanon kan Jehova, hura nga bibendisyonan hira ngan magpapahimulos hin mas maopay nga pagkinabuhi kay ha ngatanan nga nasud nga nakapalibot ha ira. Oo, an bendisyon ni Jehova an “nakakahimo nga bahandianon”!—Numeros 16:13; Deuteronomio 4:5-8; 11:8-15.
14. Ano an napapahimulosan hadton manggaranon ha Dios?
14 An mga pulong nga “manggaranon ha Dios” iginhubad liwat nga “manggaranon ha paniplatan han Dios” (Today’s English Version) o “manggaranon ha mga mata han Dios.” (The New Testament in Modern English, ni J. B. Phillips) Adton manggaranon ha materyal kasagaran nga nababaraka kon ano hira ha pagkita han iba. Agsob nga nakikita ini ha ira paagi han pagkinabuhi. Karuyag nira nga dayawon hira han mga tawo pinaagi han tinatawag han Biblia nga “paghambog han kinabuhi.” (1 Juan 2:16) Ha kabaliktaran, adton manggaranon ha paniplatan han Dios nagpapahimulos han hura nga pag-uyon, bulig, ngan diri-takos nga pagkabuotan han Dios ngan may-ada duok nga relasyon ha iya. An pagin aada ha sugad kapresyoso nga kahimtang sigurado nga naghahatag ha ira hin kalipay ngan kasigurohan, labaw pa kay ha maihahatag han bisan ano nga materyal nga mga bahandi. (Isaias 40:11) An pakiana nga nagpapabilin amo ini, Ano an kinahanglan buhaton naton basi magin manggaranon ha mga mata han Dios?
Manggaranon ha mga Mata han Dios
15. Ano an kinahanglan buhaton naton basi magin manggaranon ha mga mata han Dios?
15 Ha ilustrasyon ni Jesus, an tawo nagplano ngan nagtrabaho hin maduruto basi la magin manggaranon hiya, ngan gintawag hiya nga kulang-kulang. Salit, basi magin manggaranon ha paniplatan han Dios, kinahanglan magmaduruto kita ngan bug-os nga makigbahin ha mga buruhaton nga birilhon ngan mapulsanon gud ha mga mata han Dios. Usa hini amo an iginsugo ni Jesus: “Busa, lakat kamo, ngan manhimo kamo hin mga tinon-an ha ngatanan nga mga nasud.” (Mateo 28:19) An aton paggamit han aton panahon, kusog, ngan mga abilidad, diri para ha kalugaringon nga kauswagan, kondi ha pagsangyaw han Ginhadian ngan paghimo hin mga disipulo mahimo igpariho ha pangapital. Adton nagbuhat hito nakakarawat hin daku nga ganansya ha espirituwal, sugad han ipinapakita han masunod nga mga eksperyensya.—Proberbios 19:17.
16, 17. Ano nga mga eksperyensya an maisasaysay mo nga nagpapakita hin pagkinabuhi nga nakakahimo ha usa nga magin manggaranon ha mga mata han Dios?
16 Tagda an kahimtang han usa nga Kristiano nga lalaki ha usa nga nasud ha Asia. Daku an iya sweldo ha trabaho sugad nga teknisyan han kompyuter. Kondi, haros nakakaubos ito han iya panahon ngan salit inaabat niya nga pobre hiya ha espirituwal. Ha kataposan, imbes nga manalinguha hin promosyon ha trabaho, inundang hiya ngan nagtikang paghimo hin ice cream ngan nagbaligya hito ha kalye basi magkaada hiya dugang nga panahon para ha iya espirituwal nga mga panginahanglan ngan responsabilidad. Gintamay hiya han iya mga katrabaho hadto, kondi ano an resulta? “Ha pagkamatuod, nagin mas maopay an akon pinansyal nga kahimtang kay han nagtatrabaho ako ha mga kompyuter,” siring niya. “Nagin mas malipayon ako tungod kay waray na ako kaguol ngan kabaraka sugad han inabat ko ha akon trabaho hadto. Ngan labaw ha ngatanan, inaabat ko yana nga mas duok ako kan Jehova.” An pagbag-o nakabulig ha iya nga sumulod ha bug-os-panahon nga ministeryo, ngan nag-aalagad na hiya yana ha sanga nga opisina han mga Saksi ni Jehova ha iya nasud. An bendisyon ni Jehova tinuod nga “nakakahimo nga bahandianon.”
17 Usa pa nga ehemplo amo an usa nga babaye nga nagdaku ha pamilya diin pinabibilhan gud an edukasyon. Nag-eskwela hiya ha unibersidad ha Fransia, Mexico, ngan Switzerland ngan naglaom nga magkaada hin maopay nga propesyon nga maghahatag ha iya hin daku nga sweldo. “Malampuson ako; gintahod ako ngan gintagan hin espesyal nga mga oportunidad,” siring niya, “kondi ha akon kasingkasing, inabat ko nga may-ada kulang ngan waray gud ako matagbaw.” Katapos, hinbaroan niya an mahitungod kan Jehova. Hiya nagsiring: “Samtang nag-uuswag ako ha espirituwal, an akon hingyap nga lipayon hi Jehova ngan makabayad bisan la gutiay han iginhatag niya ha akon nakabulig ha akon nga makita hin matin-aw an dalan nga sadang paglaktan—mag-alagad ha iya ha bug-os nga panahon.” Binaya hiya ha iya sekular nga trabaho ngan waray pag-iha nabawtismohan. Ha naglabay nga 20 ka tuig, malipayon nga nag-aalagad hiya ha bug-os-panahon nga ministeryo. “An iba naghuhunahuna nga ginkaragan ko an akon mga abilidad,” siring niya, “kondi nakikita nira nga malipayon ako, ngan gindadayaw nira an mga prinsipyo nga akon ginsusunod. Kada adlaw nag-aampo ako kan Jehova nga buligan ako nga magin mapainubsanon basi makarawat ko an iya pag-uyon.”
18. Pariho kan Pablo, paonan-o kita magigin manggaranon ha paniplatan han Dios?
18 Hi Saulo, nga nagin hi apostol Pablo, may-ada unta maopay nga propesyon ha tidaraon. Kondi ha urhi hiya nagsurat: “Ha pagkamatuod, gin-isip ko nga karag an ngatanan nga mga bagay tungod ha minahal gud nga pagkilala kan Kristo Jesus nga akon Ginoo.” (Filipos 3:7, 8) Para kan Pablo, an mga bahandi nga nakarawat niya pinaagi kan Kristo nalabaw gud ha bisan ano nga butang nga igintatanyag han kalibotan. Sugad man, pinaagi han pagsalikway han bisan ano nga hakugnon nga ambisyon ngan pagkinabuhi nga may diosnon nga debosyon, kita liwat makakapahimulos hin kinabuhi nga manggaranon ha mga mata han Dios. An Pulong han Dios nagpapasarig ha aton: “An balos han kamapainubsanon ngan an kahadlok kan Jehova amo an bahandi, ngan an dungog, ngan an kinabuhi.”—Proberbios 22:4.
Maisasaysay Mo Ba?
• Ano an problema han tawo ha ilustrasyon ni Jesus?
• Kay ano nga an tawo ha parabola gintawag nga kulang-kulang?
• Ano an kahulogan han pagin manggaranon ha paniplatan han Dios?
• Paonan-o kita magigin manggaranon ha paniplatan han Dios?
[Mga Pakiana]
[Retrato ha pahina 26]
Kay ano nga an manggaranon gintawag nga kulang-kulang?
[Retrato ha pahina 27]
Paonan-o an mga oportunidad nga mag-uswag mahimo magin tinuod nga pagsari?
[Retrato ha pahina 28]
“An bendisyon ni Jehova, ini nakakahimo nga bahandianon”