An Pulong ni Jehova Buhi

Importante nga mga Punto Tikang ha Libro han Esekiel—II

DISYEMBRE adto han 609 A.K.P. An hadi han Babilonya nagtikang han iya kataposan nga paglikos ha Jerusalem. Tubtob hito nga panahon, an mensahe ni Esekiel ha mga nadistyero ha Babilonya nakasentro ha usa la nga tema: an kapukan ngan kabungkagan han ira hinigugma nga syudad, an Jerusalem. Kondi, hini nga takna, an tema han mga tagna ni Esekiel nabalhin ngadto ha kabungkagan han pagano nga mga nasud nga magrarayhak ha kalamidad ha katawohan han Dios. Han napukan an Jerusalem paglabay hin 18 ka bulan, an mensahe ni Esekiel nagkaada na liwat bag-o nga tema: an mahimayaon nga pagpahiuli han tinuod nga pagsingba.

An Esekiel 25:1–48:35 nagsusulod hin mga tagna mahitungod han mga nasud nga nakapalibot ha Israel ngan han katalwasan han katawohan han Dios. a An mga asoy iginsaysay uyon ha pagkasunod-sunod han mga hitabo ngan uyon ha tagna kontra ha Ehipto, labot la han upat nga bersikulo han Esekiel 29:17-20. Sugad nga bahin han giniyahan nga Kasuratan, an libro han Esekiel may-ada mensahe nga “buhi, ngan maabtik.”—Hebreo 4:12.

‘INI NGA TUNA MAGIGIN SUGAD HAN TANAMAN HAN EDEN’

(Esekiel 25:1–39:29)

Tungod kay abanse nga hinbabaroan ni Jehova an magigin reaksyon han mga nasud ha kapukan han Jerusalem, ginsugo niya hi Esekiel nga magtagna kontra ha Amon, Moab, Edom, Pilistia, Tiro, ngan Sidon. Pagtitikasan an Ehipto. Hi ‘Paraon an hadi han Ehipto ngan an iya kadam-an’ iginpariho ha sedro nga uutdon pinaagi han “kampilan han Hadi ha Babilonya.”—Esekiel 31:2, 3, 12; 32:11, 12.

Paglabay hin mga unom ka bulan katapos mabungkag an Jerusalem han 607 A.K.P., may inabot nga nakapalagiw ngan nagsiring kan Esekiel: “An bungto hinampak!” An propeta sugad hin ‘diri na ngula’ ha mga nadistyero. (Esekiel 33:21, 22) May-ada hiya mga tagna mahitungod han pagpahiuli nga ipapasamwak. Hi Jehova “magbubutang mausa nga magbarantay ha ira, an [iya] surugoon nga hi David.” (Esekiel 34:23) Magigin binayaan an Edom, kondi an tuna nga lahos pa hito, an Juda, magigin “sugad han tanaman ha Eden.” (Esekiel 36:35) Nagsaad hi Jehova nga pananalipdan an iya iginpahiuli nga katawohan tikang ha pag-atake ni “Gog.”—Esekiel 38:2.

Mga Baton ha mga Pakiana Mahitungod ha Kasuratan:

29:8-12—Kakan-o nagin binayaan an Ehipto ha sulod hin 40 ka tuig? Katapos mabungkag an Jerusalem han 607 A.K.P., an nanhibilin ha Juda pinalagiw ngadto ha Ehipto bisan pa han pahamangno ni Jeremias. (Jeremias 24:1, 8-10; 42:7-22) Kondi, diri ito maaramon nga paagi ha pagpalagiw ha mga Babilonyahanon tungod kay diri-linalaoman nga nakig-away hi Nabukodonosor kontra ha Ehipto ngan ginsakop ito. Bangin katapos hito, nahitabo an 40-ka tuig nga pagin binayaan han Ehipto. Bisan kon waray ebidensya nga ipinapakita an kasaysayan mahitungod hini nga pagin binayaan, makakasarig kita nga nahitabo ito tungod kay hi Jehova an paratuman han tagna.—Isaias 55:11.

29:18 (“Maopay nga Sumat nga Biblia”)—Paonan-o “nagkapapahak an ira mga ulo ngan nagkapapaklasan an ira mga sugbong”? Makuri hinduro an paglikos ha syudad han Tiro,  salit nagkapapahak an kasundalohan ni Nabukodonosor tungod han pagbarobag-id han helmet ha ira ulo ngan nagkapapaklasan an ira sugbong tungod ha pagdinara han materyales ha pagtukod hin mga torre ngan kuta.—Esekiel 26:7-12.

Mga Leksyon Para ha Aton:

29:19, 20. Tungod kay an mga taga-Tiro nakapalagiw ngadto ha ira isla nga syudad dara an damu nga bahandi, gutiay gud la an natikas ni Nabukodonosor ha Tiro. Kondi, bisan kon mapahitas-on hiya ngan makikalugaringon nga pagano nga magmarando, ginbalosan hiya ni Jehova tungod han iya serbisyo pinaagi ha paghatag ha iya han Ehipto sugad nga “suhol para han iya kasundalohan.” Diri ba angayan la nga subaron naton an matuod nga Dios pinaagi ha pagbayad hin buhis ha gobyerno tungod han ira mga serbisyo? An ginbubuhat han mga opisyal han gobyerno ngan an paagi han ira paggasto han mga buhis diri nagwawara hini nga obligasyon.—Roma 13:4-7.

33:7-9. Diri gud angay mag-alang yana nga panahon an parabantay nga klase—an nanhibilin nga dinihogan—ngan an ira mga kaupod ha pagsangyaw han maopay nga sumat han Ginhadian ngan ha pagpahamangno ha katawohan mahitungod han tiarabot nga “daku nga kagol-anan.”—Mateo 24:21.

33:10-20. An aton kaluwasan nadepende ha aton pagsalikway han magraot nga buhat ngan ha pagsunod han mga ginkikinahanglan han Dios. Oo, matadong an paagi ni Jehova.

36:20, 21. Tungod kay waray magkinabuhi an mga Israelita uyon ha pagtawag ha ira sugad nga “katawohan ni Jehova,” ginpasiparahan nira an ngaran ni Jehova ha mga nasud. Diri gud kita sadang magin magsiringba ni Jehova ha ngaran la.

38:1-23. Makapadasig gud an paghibaro nga luluwason ni Jehova an iya katawohan tikang ha pag-atake han Gog han tuna ha Magog! Gog an iginngaran ha “magmarando hini nga kalibotan,” hi Satanas nga Yawa, katapos hiya paiwason ha langit. An tuna han Magog nagtutudlok ha tuna ngan ha palibot hito diin ginlabog hi Satanas ngan an iya mga demonyo.—Juan 12:31, NW; Pahayag 12: 7-12.

“IPAHAMTANG AN IMO KASINGKASING DIDA HA NGATANAN NGA AKON IGPAPAKITA HA IMO”

(Esekiel 40:1–48:35)

Ikakatorse ka tuig na adto katapos hampakon an syudad han Jerusalem. (Esekiel 40:1) May-ada pa 56 ka tuig nga ira aantuson. (Jeremias 29:10) Hini nga panahon, haros 50 anyos na hi Esekiel. Ha usa nga bisyon, gindara hiya ha Israel. Hiya ginsidngan: “Anak han tawo, kitaa pinaagi han imo mga mata, ngan pamatii pinaagi han imo mga talinga, ngan ipahamtang an imo kasingkasing dida ha ngatanan nga akon igpapakita ha imo.” (Esekiel 40:2-4) Sigurado nga nalipay hiya han iya nakarawat an usa nga bisyon mahitungod han bag-o nga templo!

An makatarag-ob nga templo nga nakita ni Esekiel may-ada 6 nga ganghaan, 30 nga karaonan, an Baraan, an Gibabaraani, usa nga halaran nga kahoy, ngan usa nga halaran para ha sinunog nga mga halad. ‘Nabugwak’ tikang hito an  usa nga sapa nga nagigin usa nga masulog nga salog. (Esekiel 47:1) Kinarawat liwat hiya hin bisyon mahitungod han pagbahin-bahin han tuna uyon ha tribo—an tagsa nga bahin nagtitikang ha este ngadto ha weste nga may-ada bahin hin tuna ha butnga han bahin han Juda ngan han Benjamin ha paggamit han gobyerno. “An santuaryo ni Jehova” ngan an “bungto” nahimumutang dida hito.—Esekiel 48:9, 10, 15, 35.

Mga Baton ha mga Pakiana Mahitungod ha Kasuratan:

40:3–47:12—Ano an ginrirepresentaran han templo ha bisyon? Ha pagkamatuod, inin daku hinduro nga templo nga nakita ni Esekiel ha bisyon waray gud matukod. Ginpapadagawan hito an espirituwal nga templo han Dios—an iya sugad-templo nga kahikayan para ha putli nga pagsingba ha aton panahon. (Esekiel 40:2; Mika 4:1; Hebreo 8:2; 9:23, 24) An templo ha bisyon natutuman durante han “kataposan nga mga adlaw,” han ‘gin-uray’ an mga saserdote. (2 Timoteo 3:1; Esekiel 44:10-16; Malakias 3:1-3) Kondi, may-ada ito ultimo nga katumanan ha Paraiso. Nagpasarig ito ha mga nadistyero nga Judio nga ipapahiuli an putli nga pagsingba ngan an tagsa nga Judio nga pamilya magkakaada panurundon ha tuna.

40:3–43:17—Ano an iginpapasabot han pagsukol han templo? An pagsukol han templo usa nga tigaman nga sigurado nga matutuman an katuyoan ni Jehova may kalabotan ha putli nga pagsingba.

43:2-4, 7, 9—Ano an “patay nga mga lawas han ira kahadian” nga kinahanglan kuhaon tikang ha templo? An patay nga mga lawas matin-aw nga nagtutudlok ha mga imahen. Ginhugawan han mga magmarando han Jerusalem ngan han katawohan didto an templo han Dios pinaagi hin mga imahen—ginhimo ito nga ira mga hadi.

43:13-20—Ano an ginsisimbolohan han halaran nga nakita ni Esekiel ha bisyon? An simboliko nga halaran nagrirepresentar han kaburut-on han Dios may kalabotan ha halad lukat ni Jesu-Kristo. Tungod hini nga tagana, iginpahayag nga matadong an mga dinihogan ngan an “daku nga panon” sugad nga limpyo ngan putli ha paniplatan han Dios. (Pahayag 7:9-14, NW; Roma 5:1, 2) Bangin ito an hinungdan nga waray ha bisyon an “hinurma nga dagat” han templo ni Salomon—an daku hinduro nga planggana hin tubig nga ginhuhunawan han mga saserdote.—1 Hadi 7:23-26.

44:10-16—Hin-o an ginrirepresentaran han saserdotanhon nga klase? An saserdotanhon nga klase nagpapadagaw ha grupo han dinihogan nga mga Kristiano ha aton panahon. An pagputli ha ira nahitabo han 1918 han liningkod hi Jehova sugad nga “magpupurog ngan mag-uuray” ha iya espirituwal nga templo. (Malakias 3:1-5) Adton limpyo o nagbasol mahimo magpadayon ha ira pribilehiyo han pag-alagad. Katapos gud hito, kinahanglan mangalimbasog hira ha pagpabilin nga “waray buring hini nga kalibotan,” salit nagigin ehemplo ha “daku nga panon” nga ginrirepresentaran han diri-saserdotanhon nga mga tribo.—Jakobo 1:27; Pahayag 7:9, 10.

45:1; 47:13–48:29—Ano an ginrirepresentaran han “tuna” ngan han pagbahin-bahin hito? An tuna nagrirepresentar han nasasakopan nga buruhaton han katawohan han Dios. Bisan hain an usa nga magsiringba ni Jehova, kon iya ginsusunod an matuod nga pagsingba, aada hiya ha naipahiuli nga tuna. An pagbahin-bahin han tuna magkakaada ultimo nga katumanan ha bag-o nga  kalibotan diin an kada matinumanon may-ada mapapanunod.—Isaias 65:17, 21.

45:7, 16—Ano an ginpapadagawan han kontribusyon han katawohan para ha mga saserdote ngan prinsipe? Ha espirituwal nga templo, nagtutudlok ini siyahan ha pagsuporta ha espirituwal nga mga butang—pagbulig ngan pagpakita hin mabinuligon nga disposisyon.

47:1-5—Ano an ginpapadagawan han tubig ha salog han bisyon ni Esekiel? An tubig nagpapadagaw han espirituwal nga tagana ni Jehova para ha kinabuhi nga nag-uupod han halad lukat ni Kristo-Jesus ngan han kahibaro mahitungod ha Dios nga mababasa ha Biblia. (Jeremias 2:13; Juan 4:7-26; Efeso 5:25-27) An salog nagtitikahilarom basi makagtagana han pagsulod han mga bag-ohan nga nakarawat han matuod nga pagsingba. (Isaias 60:22) Maagos dida hito an pinakagamhanan nga tubig han kinabuhi durante han Milenyo, ngan an tubig hito nag-uupod han dugang nga pagsabot nga makukuha tikang ha “basahon” nga aabrihan hito nga panahon.—Pahayag 20:12; 22:1, 2.

47:12—Ano an ginrirepresentaran han mga kahoy nga makaraon an bunga? An simboliko nga mga kahoy nagpapadagaw han espirituwal nga mga tagana han Dios ha pagpahiuli han katawohan ha kahingpitan.

48:15-19, 30-35, (“Maopay nga Sumat nga Biblia”)—Ano an ginrirepresentaran han syudad ha bisyon ni Esekiel? “An syudad” nahimumutang ha “diri-baraan” nga tuna, nagpapasabot nga nagrirepresentar ito hin tunan-on nga butang. Baga hin nagrirepresentar ito han kabug-osan nga pagdumara ha tuna nga mapapahimulosan han nagkukompwesto han matadong nga “bag-o nga tuna.” (2 Pedro 3:13) An pagkaada duha nga ganghaan ha kada bahin nag-iilustrar nga masayon ito masulod. Ha pariho nga paagi, an mga paramangno ha katawohan han Dios kinahanglan masayon madaop.

Mga Leksyon Para ha Aton:

40:14, 16, 22, 26. An mga inukit nga palwa nga kahoy ha pader han aragian tipasulod ha templo, nagpapasabot nga magtadong la an makakasulod hito. (Salmo 92:12) Nagtututdo ito ha aton nga kakarawaton la ni Jehova an aton pagsingba kon matadong kita.

44:23. Mapasalamaton gud kita ha mga buruhaton nga ginbubuhat han saserdotanhon nga klase yana nga panahon! An “matinumanon ngan maaramon nga uripon” nangunguna ha pagtagana hin napapanahon nga espirituwal nga pagkaon nga nabulig ha aton nga masabtan kon ano an mahugaw ngan malimpyo ha paniplatan ni Jehova.—Mateo 24:45, NW.

47:9,11. An kahibaro—usa nga importante nga bahin han simboliko nga tubig—nagtatagana na hin urusahon nga pagtambal ha aton panahon. Kon ginkakarawat ito, an tawo nagigin buhi ha espirituwal nga paagi. (Juan 17:3) Ha luyo nga bahin, adton diri nakarawat han naghahatag hin kinabuhi nga tubig “ighahatag ha pagkaasin”—bungkag ha kadayonan. Importante gud nga ‘talinguhaon naton nga gamiton hin maopay an pulong han kamatuoran’!—2 Timoteo 2:15.

“Akon Pagbabaraanon an Akon Daku nga Ngaran”

Katapos kuhaon an kataposan nga hadi ha linya ni David, gintugotan han matuod nga Dios nga lumabay an maiha nga panahon antes umabot an Usa nga “may legal nga katungod” ha pagkahadi. Kondi, waray balewaraya han Dios an iya kauyonan kan David. (Esekiel 21:27, NW; 2 Samuel 7:11-16) An tagna ni Esekiel nagsiring mahitungod han “akon surugoon nga hi David,” nga magigin “magbarantay” ngan “hadi.” (Esekiel 34:23, 24; 37:22, 24, 25) Amo ini hi Jesu-Kristo kon maghadi na hiya ha Ginhadian. (Pahayag 11:15) Pagbabaraanon ni Jehova an iya “daku nga ngaran” pinaagi han Mesianiko nga Ginhadian.—Esekiel 36:23.

Diri na gud mag-iiha, bubungkagon an ngatanan nga nagpapasipara han baraan nga ngaran han Dios. Kondi adton nagbabaraan hito nga ngaran pinaagi han pagsingba ha iya ha paagi nga iya naruruyagan, makakakarawat hin kinabuhi nga waray kataposan. Kon sugad, aton gud pahimulosan an tubig han kinabuhi nga abunda nga naagos ha aton panahon, ngan isentro an aton kinabuhi ha matuod nga pagsingba.

[Footnote]

[Retrato ha pahina 9]

An makatarag-ob nga templo ha bisyon ni Esekiel

[Retrato ha pahina 10]

Ano an ginrirepresentaran han salog han kinabuhi ha bisyon ni Esekiel?

[Ginkuhaan han Retrato]

Pictorial Archive (Near Eastern History) Est.