Mga Pakiana Tikang ha mga Magbarasa
Mga Pakiana Tikang ha mga Magbarasa
Bisan kon iginpakuha na ni Hadi Saul hi David hadto basi magin iya surugoon, kay ano nga katapos patayon ni David hi Goliat, nagpakiana hiya kan David, “Kanay ka anak, ikaw batan-on nga lalaki?”—1 Samuel 16:22; 17:58.
An simple nga baton amo ini, nahingalimot hi Saul kon hin-o hi David tungod kay madaliay la an ira siyahan nga pagkita. Kondi, imposible ito tungod kay ipinapakita han 1 Samuel 16:18-23 nga espisipiko nga ginpakuha ni Hadi Saul hi David ngan ha urhi ginhigugma gud hiya ngan ginhimo hiya nga paradara han iya hinganiban. Sigurado nga nakilala gud hiya kan David.
Ginhuhunahuna han pipira nga eskolar han Biblia an 1 Samuel 17:12-31 ngan 17:55–18:5 nga urhi na nga igindugang tungod kay waray ini ha pipira nga kopya han Griego nga Septuagint, usa nga hubad han Hebreo nga Kasuratan nga natapos han ikaduha ka siglo A.K.P. Kondi, diri maaramon an paghimo hin sugad nga konklusyon nga basado la hini nga mga kopya han Septuagint, tungod kay ini nga mga teksto nakikita ha iba nga masasarigan nga manuskrito han Hebreo nga Kasuratan. a
Matin-aw nga ha pagpakiana ni Saul, siyahan kan Abner, ngan katapos kan David mismo, interesado hiya diri la ha paghibaro han ngaran han amay ni David. Katapos makita an usa pa nga bahin han personalidad ni David, sugad nga may-ada daku nga pagtoo ngan kaisog nga nakapirde kan Goliat, karuyag ni Saul hibaroan kon ano nga klase hin tawo an nagpadaku ha iya. Bangin nahunahuna ni Saul nga idugang an amay ni David, hi Jesse, o iba nga membro han iya pamilya ha kasundalohan tungod kay posible nga maisog liwat hira pariho kan David.
Bisan kon an 1 Samuel 17:58 nag-uupod la han halipot nga baton ni David nga “anak ako han imo surugoon nga hi Jesse nga taga-Betlehem,” an sunod nga teksto baga hin nagpapakita nga nagkaada hira hiruhilaba nga pag-istorya. Mahitungod hini, tigamni an ginsiring ni C. F. Keil ngan F. Delitzsch: “Matin-aw hinduro ha mga pulong ha [1 Samuel 18:1], ‘han katapos na niya pagyakan kan Saul,’ nga nakig-istorya pa hi Saul ha iya mahitungod han iya pamilya, tungod kay an mga pulong mismo nagpapasabot nga maiha an ira pag-istorya.”
Tungod hini, makakasiring kita nga pinaagi han iya pakiana, “Kan kanay ka anak, ikaw batan-on nga lalaki?” karuyag hibaroan ni Saul diri an pangirilal-an ni David nga hinbabaroan na niya, kondi an iya gintikangan.
[Footnote]
a Regarding the authenticity of the passages omitted in the Septuagint, see Insight on the Scriptures, Volume 2, page 855, published by Jehovah’s Witnesses.
[Retrato ha pahina 31]
Kay ano nga nagpakiana hi Saul kan David kon kan kanay hiya anak?