Nakikita Ka ba han Dios?

NAKAKAKITA ba hi Jehova, an Maabtik nga Maglalarang? Syempre! An Biblia matin-aw nga nasiring: “Hiya nga naghimo han mata diri ba hiya makakakita?” (Salmo 94:9) An abilidad ni Jehova ha pagkita nalabaw gud kay ha mga tawo. Nakikita niya diri la an aton hitsura kondi hiya liwat “nagsasari [“nag-uusisa,” NW] han mga kasingkasing,” ngan “nagtitimbang han mga kasingkasing.” (Proberbios 17:3; 21:2) Oo, may-ada hiya abilidad ha pagturutimbang han aton panhunahuna, motibo, ngan tago nga mga hingyap.

Maaram hi Jehova han mga problema nga bangin maeksperyensyahan naton ha kinabuhi, ngan binabaton niya an aton mga pangamuyo. An salmista nagsurat: “An mga mata ni Jehova ngadto ha mga magtadong, ngan binubuka niya iton iya talinga ngadto ha ira singgit. Hi Jehova hirani hadton may masinakitnon nga kasingkasing, ngan nagluluwas hiya hadton mga mabinasulon an espiritu.” (Salmo 34:15, 18) Nakakaliaw gud hibaroan nga nasasabtan ni Jehova an aton mga kahimtang ngan binabaton niya an aton kinasingkasing nga pangamuyo!

Maaram hi Jehova nga Dios bisan han mga ginbubuhat ha tago. Oo, “an ngatanan nga mga butang mga hubo ngan pinamuksan ha atubangan ha iya mga mata, nga tungod ha iya kita may buruhaton [“baratunon,” NW].” (Hebreo 4:13) Salit maopay man o maraot an aton mga buhat, nakikita ito ngatanan han Dios. (Proberbios 15:3) Pananglitan, an Genesis 6:8, 9 nasiring nga “hi Noe nakaagi hin grasya ha mga mata ni Jehova” ngan hiya ‘naglakat upod han Dios.’ Oo, nakarawat ni Noe an pag-uyon ngan bendisyon ni Jehova tungod kay hiya masinugtanon ngan nagbuhat uyon ha magtadong nga prinsipyo han Dios. (Genesis 6:22) Ha kabaliktaran, an katawohan ha panahon ni Noe madarahog ngan magraot an moral. Maaram hini an Dios. “Hi Jehova kinita nga an karaotan han tawo daku ha tuna. Ngan an ngatanan nga panhunahuna han pamurubuot han iya kasingkasing amo gud la [an] maraot ha kadayonan.” Pag-abot han panahon, ginbungkag ni Jehova an magraot kondi gintipigan nga buhi hi Noe ngan an iya pamilya.—Genesis 6:5; 7:23.

Malilipay ba hi Jehova ha pagkita ha imo? Ha pagkamatuod, an iya mga mata “nadalagan ngadto nganhi sahid an bug-os nga kalibotan, ha pagpakita ha iya ngahaw nga makusog ha ngaran nira kan kanay kasingkasing hingpit tipakadto ha iya.” (2 Kronikas 16:9) Diri na mag-iiha, kukuhaon utro niya ha tuna an ngatanan nga magraot ngan luluwason an mag-aghop an kasingkasing.—Salmo 37:10, 11.