Istorya han Kinabuhi

Pag-alagad kan Jehova—Dungog Ngan Pribelihiyo nga Waray Katupong

Iginsumat ni Zerah Stigers

Han 1938, namatay an akon bana, nga akon maunungon nga kaupod ha bug-os panahon nga pagministeryo. Tungod hito, nag-usahan ako ha pag-ataman han amon minasus-an ngan dyes-anyos nga anak nga kalalakin-an. Bisan kon karuyag ko pa mag-alagad ha bug-os-panahon nga ministeryo, paonan-o ko mahihimo ito? Bueno, susumatan ko anay kamo han akon kinabuhi hadto antes ko isumat kon paonan-o ko nahimo ito.

WARAY pag-iha han natawo ako han Hulyo 27, 1907, ha Alabama, E.U.A., binalhin kami han akon mga kag-anak ngan han akon tulo nga kamanghoran ha Georgia. Waray pag-iha katapos hito, binalhin kami ha Tennessee ngan katapos ha hirani han Tampa, Florida. Samtang naukoy kami didto han 1916, nakita ko an pasalida nga “Photo-Drama of Creation.” Bag-o pa la an industriya han pelikula, salit naruyagan gud ito han ngatanan!

An akon mga kag-anak parabasa han An Barantayan ngan iba nga publikasyon ha Biblia. Bisan kon naruruyag hi tatay pagbasa han literatura, diri hiya aktibo nga nakikig-upod ha mga Estudyante han Biblia, an tawag ha mga Saksi ni Jehova hadto. Kondi, kami nga mga anak gin-uupod ni nanay ha katirok. Waray pag-iha katapos han amon pagbalhin ha Niles, Michigan, nagbibiyahe kami pirme hin sobra 16 kilometros pinaagi hin tren ngadto ha South Bend, Indiana, basi tumambong hin mga katirok.

Han Hulyo 22, 1924, nabawtismohan ako sugad  nga simbolo han akon dedikasyon kan Jehova. Waray pag-iha katapos hito, gin-organisa ni nanay an iya buruhaton basi magin colporteur, an tawag ha bug-os panahon nga ministro han mga Saksi ni Jehova. An iya maopay nga ehemplo ngan han iba nga colporteur nagpasilsil ha akon han hingyap nga sumulod hito nga buruhaton.

Pakabiling hin Kaupod

Han 1925, samtang natambong ha daku nga kombensyon ha Indianapolis, Indiana, nakilala ko hi James Stigers nga taga-Chicago. Naruyagan ko dayon hiya tungod ha pagin madasigon nga alagad ni Jehova. An amon balay mga 160 kilometros an kahirayo tikang ha Chicago, salit diri masayon ha amon nga mabisita an kada tagsa. Hito nga panahon, usa la an kongregasyon hiton daku nga syudad, ngan gindudumara an mga katirok ha ginpletehan nga kwarto ha ikaduha nga andana. Pirme nagsusurat hi James ha pagparig-on han akon espirituwalidad. Ginkasal kami han Disyembre 1926, ngan paglabay hin haros usa ka tuig, igin-anak ko an amon suhag nga hi Eddie.

Waray pag-iha katapos hito, nagtikang kami magpayunir ni James. Nag-alagad kami ha walo nga estado—Michigan, Louisiana, Mississippi, South Dakota, Iowa, Nebraska, California, ngan Illinois—diin naeksperyensyahan namon an pinakamakalilipay nga panahon han amon kinabuhi. Naundang la ito nga makalilipay nga mga adlaw sugad nga pamilya han nagkasakit hiya.

Han 1936, an kakurian ha pinansyal tungod han sakit ni James nag-aghat ha amon nga bumalik ha Chicago basi lumungon ha akon ugangan nga babaye nga usa liwat nga Saksi. Han nagtikagrabe na gud an sakit ni James ngan samtang iginbuburod ko an amon ikaduha nga anak, nagtrabaho ako ha restawran nga $1 an sweldo kada adlaw. Ginsiguro han akon mahigugmaon nga ugangan nga may-ada kami damu nga pagkaon, ngan diri hiya nagpapabayad. Waray na gud kami mahihingyap pa labaw han iya pagtratar ha amon.

Antes mamatay hi James, haros duha ka tuig nga nanhubag an iya utok tungod han iya sakit nga encephalitis. Nahitabo ito han Hulyo 1938. Durante han iya pagkasakit, diri hiya nakakagdrayb o nakakagsangyaw, kondi diri niya ginpapalabay an tagsa nga higayon nga diri makagsangyaw. Basi makabulig ako ha pamilya ha pinansyal, inundang ako ha bug-os panahon nga ministeryo. Nakabiling ako hin magkalain-lain nga trabaho, kondi diri la ito nag-iiha.

An amon anak nga hi Bobby natawo han Hulyo 30, 1938, walo la ka adlaw katapos mamatay an iya tatay. Kondi, waray tumugot an akon ugangan nga manganak la ako ha ospital ha amon bungto. Lugod, ginhikay niya nga manganak ako ha maoroopay nga ospital ngan maataman han iya doktor. Dugang pa, hiya an nagbayad han ngatanan nga kabaraydan, usa nga kapahayagan han Kristiano nga gugma nga inapresyar ko gud.

Pagbalik ha Bug-os Panahon nga Ministeryo

Nakilungon kami ha akon ugangan tubtob han sobra dos anyos na hi Bobby, nga hito nga panahon 12 anyos hi Eddie. Bisan kon kinahanglan magpahiuyon ako ha akon bag-o nga kahimtang, waray gud mawara an akon hingyap nga mag-alagad kan Jehova hin bug-os nga panahon. Han 1940, ha kombensyon ha Detroit, Michigan, nakilala ko an mag-asawa nga payunir nga nagdasig ha akon nga kumadto ha South Carolina basi magpayunir. Salit pinalit ako hin 1935 nga modelo nga Pontiac nga nagkakantidad hin $150 ngan nangandam ha pagbalhin. Han 1941, han inapi an Estados Unidos ha Girra ha Kalibotan II, kami ngan han akon duha nga anak nagbiyahe tipakadto ha sur han nasud, ngan nagpayunir na liwat ako.

 Han binalhin kami ha South Carolina, umukoy anay kami ha Camden, sunod ha Little River, ngan katapos ha Conway. Ha Conway, pumalit ako hin gutiay nga treyler. Gintugotan ako han buotan nga tag-iya hin gasolinahan nga pumarada hirani ha iya gasolinahan, kumunekta ha iya gas ngan koryente, ngan gumamit pa ngani han kasilyas. Durante han Girra ha Kalibotan II, iginrarasyon an gasolina salit diri ako nakakakarawat hito. Tungod hito pumalit ako hin segunda-mano nga bisikleta. Katapos, han 1943, han baga hin imposible na nga makagpadayon ako ha pagpayunir tungod kay waray na kami kwarta, gintawag ako nga magin espesyal payunir; hito nga paagi nabuligan ako ha binulan nga panggastos. Tubtob yana, ginbubuligan gud ako ni Jehova!

Waray iba nga Saksi ha Conway hito nga panahon, ngan makuri para ha akon ngan ha akon mga anak an pagsangyaw nga kami la. Salit nagsurat ako ngan naghangyo hin makakaupod nga espesyal payunir, ngan han 1944, ginbendisyonan ako hin maopay nga kaupod—hi Edith Walker! Magkaupod kami nga nagpayunir ha pipira nga teritoryo ha sulod hin 16 ka tuig. Kondi, makasurubo nga tungod ha problema ha kahimsog, kinahanglan niya bumalik ha Ohio.

Diri Mahingangalimtan nga mga Bendisyon

Ha damu nga makalilipay nga hinumdoman ko hito nga mga tuig, diri ko mahingangalimtan an 13-anyos nga hi Albertha nga nag-uukoy ha Conway ngan nag-aataman han iya baldado nga apoy ngan duha nga bugto. Naruyagan gud niya an kamatuoran ha Biblia nga akon ginsumat ha iya ngan karuyag niya ito isumat ha iba. Nakultibar liwat niya an hilarom nga apresasyon ha pagpayunir ngan nagtikang hiya magpayunir han naggradwar hiya ha hayskul han 1950. Paglabay hin sobra 57 ka tuig, payunir pa gihapon hiya!

Han 1951, igintoka kami ni Edith hin madaliay ha Rock Hill, South Carolina, diin pipira la an Saksi. Sunod, nag-ukoy kami ha Elberton, Georgia, hin tulo ka tuig. Katapos, binalik kami ha South Carolina, diin nagpabilin ako tikang han 1954 tubtob 1962. Ha Walhalla, nadumarahan ko hin pag-aram han Biblia hi Nettie, usa nga lagas nga bungol nga nag-uusahan la ha iya balay ha huron. Basi maipadayon an amon pag-aram, ginbabasa niya an parapo ha publikasyon nga amon gin-aadman, sunod gintutudlok ko an pakiana ha ubos han pahina, ngan katapos gintutudlok niya an baton ha parapo.

Kon may-ada niya diri hinsasabtan, iginsusurat niya an iya pakiana ha papel, ngan iginsusurat ko liwat an baton ha ubos hito. Inabot an panahon, nag-uswag gud an iya apresasyon ha kamatuoran salit nagtikang hiya tumambong ha mga katirok ngan pakigbahin ha ministeryo. Nag-uusahan la hiya ha pakiistorya, kondi diri ako napahirayo, kasagaran nga aada la ako ha tabok han kalsada ngan andam ha pagbulig ha iya kon iya ako pagkinahanglanon.

Han nakadto ako ha Walhalla, waray na umandar an akon daan nga awto. Nagkaada ako higayon nga mapalit unta an awto nga nagkakantidad hin $100, kondi waray ko kwarta. Nakiistorya ako ha usa nga Saksi nga may-ada negosyo, ngan ginpautang niya ako hin $100. Katapos gud hito, kinarawat ako hin diri linalaoman nga surat tikang ha akon kabugtoan nga nasiring nga han namatay hi tatay, hinbaroan nira nga may-ada hiya ginbilin nga kwarta ha bangko. Nag-uruistorya hira kon ano an ira bubuhaton hito, ngan nagkasarabot nga ipadara ito ha akon. An kantidad—$100!

Pagpayunir Kaupod han Akon mga Anak

Hira Eddie ngan Bobby kaupod ko pirme ha pagsangyaw han mga bata pa hira. Hito nga panahon, an mga tawo ha kabug-osan waray pa problema ha droga, ngan diri pa duro kamakusog an imoral nga impluwensya. An pagpabilin han  amon kinabuhi nga simple ngan pagsentro ha pagsangyaw nga buruhaton nakabulig ha akon nga malikyan an damu nga problema nga gin-aatubang han mga kag-anak yana ha pagpadaku ha ira mga anak nga mag-alagad kan Jehova.

Umiskwela hi Eddie ha Camden tubtob matapos niya an ikawalo nga grado, katapos nagpayunir hiya pariho ha akon. Malipayon nga magkaupod kami nga nagpayunir hin pipira ka tuig. Katapos naghingyap hiya nga magboluntaryo ha sentro nga opisina han mga Saksi ni Jehova ha Brooklyn, New York, diin nag-alagad hiya tikang han 1947 tubtob 1957. Han 1958 nag-asawa hira ni Albertha, an akon estudyante han Biblia hadto, ngan nagkaupod hira ha pagpayunir. Makalilipay gud nga han 2004, kami nga tulo durungan nga tinambong ha Eskwelahan han Payunir nga Pag-alagad!

Damu ka tuig na an naglabay han gutiay pa hi Bobby, nahinumdoman ko nga naghangyo hiya kan Jehova nga buligan ako nga makakuha hin igo nga gasolina basi makakadto ako ha akon mga gindudumarahan hin pag-aram. Nagpakita hiya hin gugma ha ministeryo, ngan nagpayunir hiya ha sulod hin pipira ka tuig. Makasurubo nga nakaeksperyensya liwat hiya hin trahedya ha pamilya. Han 1970 tungod han panganak, 22 ka bulan katapos han ira kasal, namatay an iya asawa pati an ira kambal nga anak. Tikang pa hadto, maghirani pirme an amon balay ni Bobby, ngan may-ada kami duok hinduro nga relasyon.

Nagpapayunir Pa Gihapon!

Han 1962, igintoka ako ha akon presente nga kongregasyon ha Lumberton, North Carolina, ngan aanhi pa gihapon ako paglabay hin 45 ka tuig. Nagdadrayb pa ako tubtob han sobra otsenta na an akon edad. Yana, gin-aagi ako han usa nga Saksi nga pamilya nga akon amyaw ha pagtambong ha mga katirok ngan ha pagsangyaw.

May-ada ako walker ngan wheelchair, kondi diri ko kinahanglan gamiton ito tungod kay nakakalakat ako bisan kon waray nabulig. Mapasalamaton ako kan Jehova han akon maopay nga kahimsog. Diri pa la maiha nga nagkaada ako problema ha akon mga mata. Diri gud ako naawan ha katirok gawas la kon masakit ako hinduro, ngan padayon nga nag-aalagad ako sugad nga infirm nga payunir.

Ha sobra 70 ka tuig han malipayon nga pag-alagad sugad nga payunir, masisiring ko gud nga binubuligan ako ni Jehova ha bug-os ko nga kinabuhi. a Nasantop ko nga diri ako baltok hinduro o malaksi nga magburuhat, kondi maaram hi Jehova han akon mahihimo ngan diri mahihimo. Nagpapasalamat gud ako nga maaram hiya nga nangangalimbasog ako ngan ginagamit niya ako.

Para ha akon, importante an pag-alagad kan Jehova ha aton bug-os nga mahihimo tungod kay utang naton an ngatanan ha iya. Samtang mahihimo ko pa, karuyag ko gud nga magpabilin nga payunir. Urusahon gud ini nga pribelihiyo! Nag-aampo ako nga magamit ni Jehova ha kadayonan.

[Footnote]

[Retrato ha pahina 13]

Ini nga awto an ginagamit namon nga mag-asawa han “colporteur” pa kami

[Retrato ha pahina 14]

Upod han akon mga anak han 1941

[Retrato ha pahina 15]

Upod hira Eddie ngan Bobby hinin bag-o la