Tinuod nga Katagbaw ha Espirituwal—Paonan-o Mo Ito Mabibilngan?

‘AN NAGHUHUNAHUNA han mga butang nga lawasnon, an ira sangpotanan kamatayon; kondi adton naghuhunahuna han mga butang nga espirituhanon, an ira sangpotanan kinabuhi ngan kamurayawan,’ nagsurat hi apostol Pablo. (Roma 8:6, Maopay nga Sumat nga Biblia) Hito nga mga pulong, ipinakita han apostol nga an pagin espirituwal nga tawo diri la kay personal nga desisyon o karuyag. Ha pagkamatuod, may kalabotan ito ha aton kinabuhi ngan kamatayon. Kondi, ha ano nga paagi nakarawat hin ‘kinabuhi ngan kamurayawan’ an espirituwal nga tawo? Sumala ha Biblia, an sugad nga tawo nagpapahimulos hin kamurayawan yana—ha iya kalugaringon ngan ha Dios—ngan babalosan hin kinabuhi nga waray kataposan ha tidaraon. (Roma 6:23; Filipos 4:7) Diri urusahon nga hi Jesus nagsiring: “Malipayon adton mahunahunaon han ira espirituwal nga panginahanglan”!—Mateo 5:3, NW.

An imo pagbasa hini nga magasin nagpapakita nga interesado ka ha pagtagbaw han imo espirituwalidad—ngan maaramon ito. Kondi, an mga ideya mahitungod hini nagkakaiba-iba gud, salit bangin ka magpakiana: ‘Ano an tinuod nga katagbaw ha espirituwal? Paonan-o matatagbaw ito han usa?’

‘An Panhunahuna ni Kristo’

Dugang pa ha pagpatin-aw han bili ngan kapulsanan han pagin mahunahunaon ha pagtagbaw han espirituwalidad, damu an masisiring ni apostol Pablo mahitungod ha kon ano an tinuod nga espirituwalidad. Iya iginsaysay ha mga Kristiano ha kadaan nga syudad han Korinto an kaibahan han pisikal nga tawo, nga nagbubuhat han hingyap han unod, ngan han espirituwal nga tawo, nga nagpapabili han espirituwal nga mga butang. Hi Pablo nagsurat: “An tawo nga kinaiya [“pisikal,” NW] diri nakarawat han mga bagay han espiritu han Dios; kay ini nga mga butang waray hinungdan [“kalurongan,” NW] ha iya.” Ha luyo nga bahin, hi Pablo nagsiring nga an espirituwal nga tawo nakikilal-an sugad mga may-ada han ‘panhunahuna ni Kristo.’—1 Korinto 2:14-16.

An pagkaada han ‘panhunahuna ni Kristo’ nangangahulogan hin pagkaada ‘panhunahuna nga uyon kan Kristo Jesus.’ (Roma 15:5; Filipos 2:5) Ha iba nga pagkayakan, an espirituwal nga tawo amo an naghuhunahuna pariho han panhunahuna ni Jesus ngan nagsusunod han Iya mga pitad. (1 Pedro 2:21; 4:1) Kon mas pariho an panhunahuna han usa kan Kristo, mas marig-on an iya espirituwalidad ngan mas posible nga magkaada hiya ‘kinabuhi ngan kamurayawan.’—Roma 13:14.

Kon Paonan-o Mahibabaroan an ‘Panhunahuna ni Kristo’

Kondi, basi magkaada han panhunahuna ni Kristo, kinahanglan hibaroan anay naton an iya paagi han paghunahuna. Salit, an siyahan nga pitad ha pagpatubo hin espirituwalidad amo an paghibaro han paagi han paghunahuna ni Jesus. Pero paonan-o mo mahibabaroan an panhunahuna han usa nga nabuhi ha tuna 2,000 ka tuig na an naglabay? Pananglitan, paonan-o ka nahibaro mahitungod han mga tawo ha kasaysayan han imo nasud? Posible nga pinaagi han pagbasa mahitungod ha ira. Ha pariho nga paagi, importante an pagbasa han sinurat nga kasaysayan mahitungod kan Jesus ha paghibaro han iya panhunahuna.—Juan 17:3.

Ha kahimtang ni Jesus, may-ada upat nga matin-aw nga asoy han kasaysayan—an mga Ebanghelyo nga iginsurat nira Mateo, Markos, Lukas, ngan Juan. An pagbasa hin maopay hini mabulig ha imo nga masabtan an panhunahuna ni Jesus, an iya gihilarumi nga pagbati, ngan an hinungdan han iya mga buhat. Kon naggagahin ka hin panahon ha pagpamalandong han imo binabasa mahitungod ha iya, iginhuhulagway mo ha imo hunahuna an klase han iya pagkatawo. Bisan kon gintatagad mo na an imo kalugaringon nga sumurunod ni Kristo, an sugad nga pagbasa  ngan pagpamalandong mabulig ha imo nga ‘magtubo ha grasya ngan kinaadman han aton Ginoo ngan Manluluwas nga hi Jesu-Kristo.’—2 Pedro 3:18.

Samtang ginhuhunahuna ito, aton usisahon an pipira nga bahin han mga Ebanghelyo basi makita kon ano an nakabulig kan Jesus nga magin espirituwal nga tawo. Katapos, pakianhi an imo kalugaringon kon paonan-o mo hiya masusubad.—Juan 13:15.

Espirituwalidad Ngan “Bunga han Espiritu”

An parasurat han Ebanghelyo nga hi Lukas nagsiring nga iginbubo kan Jesus an baraan nga espiritu han Dios han ginbawtismohan hiya ngan ‘napuno hiya han espiritu santo.’ (Lukas 3:21, 22; 4:1) Iginpasilsil liwat ni Jesus ha iya mga sumurunod an bili han pagin giniyahan han baraan nga espiritu han Dios, o “gahum han Dios.” (Genesis 1:2, Maopay nga Sumat nga Biblia; Lukas 11:9-13) Kay ano nga importante gud ito? Tungod kay an espiritu han Dios may-ada gahum nga bag-ohon an panhunahuna han tawo basi magin pariho ha panhunahuna ni Kristo. (Roma 12:1, 2) Tungod hito, an tawo nagkakaada han mga kalidad sugad han “gugma, kalipay, pakigdait, pagkamailob, pagkamalolooyon, pagkamaopay, pagtoo, pagkamaaghop, paggahum ha kalugaringon.” Ini nga mga kalidad—nga tinatawag han Biblia nga “bunga han espiritu”—pangirilal-an han tinuod nga espirituwal nga tawo. (Galasia 5:22, 23) Ha simple nga pagkayakan, an tawo nga mahunahunaon ha espirituwal amo an usa nga ginigiyahan han espiritu han Dios.

Ipinakita ni Jesus an mga bunga han espiritu ha bug-os niya nga ministeryo. An mga kalidad sugad han gugma, pagkabuotan, ngan pagkamaopay labi nga nakita ha iya pagtratar hadton gintatagad nga minos nga membro han sosiedad. (Mateo 9:36) Tagda, pananglitan, an usa nga panhitabo nga iginhulagway ni apostol Juan. Aton mababasa: “Han [kan Jesus] pag-agi, hiya nakakita hin usa nga tawo nga buta tikang han iya kabata.” Nakita liwat han mga disipulo ni Jesus an tawo, kondi an ira hinkit-an ha iya an iya pagin makasasala. “Hin-o ba an nakasala,” hira nagpakiana, “ini nga tawo, o an iya mga kag-anak?” An mga amyaw han tawo kinita liwat ha iya, kondi an ira la nakita amo an iya pagin makililimos. Hira nagsiring: “Diri ba amo ini hiya an naglingkod ngan nakilimos?” Kondi, an hinkit-an ni Jesus ha buta amo an iya pagin usa nga indibiduwal nga nagkikinahanglan hin bulig. Nakiistorya hiya ha iya ngan gintambal hiya.—Juan 9:1-8.

Ano an iginsusumat ha imo hini nga panhitabo mahitungod han panhunahuna ni Kristo? Siyahan, waray balewaraya ni Jesus an mga minos kondi gintratar hira ha mapinairon nga paagi. Ikaduha, nag-una hiya ha pagbulig ha iba. Ha imo hunahuna, ginsusunod mo ba an iya susbaranan? Gintatagad mo ba an mga tawo sugad han iya pagtagad ha ira, gintatagan hira han bulig nga ira ginkikinahanglan basi mapauswag an ira kinabuhi ngan magin mas maopay an ira tidaraon? O may tendensya ka ba nga paboran an mga prominente ngan balewarayon adton diri kilalá? Kon gintatagad mo an mga tawo sugad han pagtagad ni Jesus, ginsusubad mo gud hiya.—Salmo 72:12-14.

 Espirituwalidad Ngan Pag-ampo

An mga asoy ha Ebanghelyo nagpapakita nga agsob hi Jesus mag-ampo ha Dios. (Markos 1:35; Lukas 5:16; 22:41) Durante han iya ministeryo ha tuna, naggagahin gud hiya hin panahon ha pag-ampo. Hi apostol Mateo nagsurat: ‘Katapos [ni Jesus] papanguli-a an kadam-an, hiya sinaka hin antaw nga bukid ha pag-ampo.’ (Mateo 14:23) Tungod hiton mga takna han hilom nga pakigkomunikar ha iya langitnon nga Amay, naparig-on hi Jesus. (Mateo 26:36-44) Yana, an mga tawo nga mahunahunaon ha pagtagbaw han ira espirituwalidad namimiling liwat hin higayon ha pakigkomunikar ha Dios, tungod kay maaram hira nga magpaparig-on ini han ira relasyon ha Maglalarang ngan mabulig ha ira panhunahuna nga magin mas pariho han kan Kristo.

Hi Jesus agsob mag-ampo hin maiha. (Juan 17:1-26) Pananglitan, antes niya pilion an 12 nga kalalakin-an nga magin iya apostol, kinadto hiya “ha bukid ha pag-ampo. Ngan iya ginamit an bug-os nga gab-i ha pag-ampo ha Dios.” (Lukas 6:12) Bisan kon adton mahunahunaon ha espirituwal nga mga butang bangin diri nag-aampo ha bug-os nga gab-i, ira nasusubad hi Jesus. Antes maghimo hin dagku nga desisyon, nagasto hira hin hilawig nga panahon ha pag-ampo ha Dios ha pangaro han giya han baraan nga espiritu ha pagdesisyon nga magpapauswag han ira espirituwalidad.

Nagpakita liwat hi Jesus hin sinseridad ha iya mga pag-ampo nga kinahanglan naton subaron kon mag-ampo kita. Tagda an iginsurat ni Lukas mahitungod han pag-ampo ni Jesus han gab-i antes hiya mamatay. “Han nakada hiya nasasakit hinduro, nag-ampo hiya hin paniguro, ngan an iya balhas nagin sugad hin dagku nga mga turo han dugo, nga nanunuro ha tuna.” (Lukas 22:44) ‘Naniguro’ na hadto pag-ampo hi Jesus, kondi hini nga takna nga naatubang hiya han pinakamakuri nga pagsari han iya kinabuhi ha tuna, nag-ampo hiya hin mas “paniguro”—ngan ginbaton ito . (Hebreo 5:7) Ginsusubad han mga mahunahunaon ha espirituwal nga mga butang an ehemplo ni Jesus. Kon naatubang hin magkuri gud nga pagsari, nag-aampo hira ha Dios hin mas “paniguro” para han baraan nga espiritu, giya, ngan bulig.

Tungod kay matin-aw nga pirme nag-aampo hi Jesus, diri urusahon nga karuyag hiya subaron han iya mga disipulo hini nga bahin. Salit, naghangyo hira: “Ginoo, tutdui kami pangamuyo.” (Lukas 11:1) Sugad man yana, ginsusubad hadton nagpapabili han espirituwal nga mga butang ngan naruruyag pagpagiya han baraan nga espiritu han Dios an susbaranan ni Jesus ha paagi han ira pag-ampo. An usa nga tinuod nga nagtatagbaw han iya espirituwalidad mainampoon liwat.

Espirituwalidad Ngan an Pagsangyaw han Maopay nga Sumat

Ha Ebanghelyo ni Markos, mababasa naton an asoy diin nagtambal hi Jesus hin damu nga magsakit bisan kon hilarom na an kagab-ihon. Temprano han kinabuwasan han nag-uusahan hiya nga nag-aampo, dinaop an iya mga apostol ngan nagsiring nga damu an namimiling ha iya nga bangin karuyag magpatambal. Kondi, ginsidngan hira ni Jesus: “Kadto kita ha mga bungto nga hirani, basi magwali man ako didto.” Katapos, iginsaysay ni Jesus an hinungdan: “Tungod hini kinanhi ako.” (Markos 1:32-38; Lukas 4:43) Bisan kon importante ha iya an pagtambal, mas importante ha iya an pagsangyaw han maopay nga sumat han Ginhadian han Dios.—Markos 1:14, 15.

Yana, pangirilal-an pa gihapon han mga tawo nga may-ada panhunahuna ni Kristo an pagsumat ha iba mahitungod han Ginhadian han Dios. Ha ngatanan nga karuyag magin iya sumurunod, hiya nagsugo: “Busa, lakat kamo, ngan manhimo  kamo hin mga tinon-an ha ngatanan nga mga nasud. . . . Pagtutdui hira han pagbantay han ngatanan nga mga bagay, nga akon iginsugo ha iyo.” (Mateo 28:19, 20) Dugang pa, hi Jesus nagtagna: “Ini nga maopay nga sumat han ginhadian igwawali ha bug-os nga kalibotan ha pagpamatuod ha ngatanan nga mga nasud; ngan niyan an kataposan maabot.” (Mateo 24:14) Tungod kay ipinapakita han Pulong han Dios nga an pagsangyaw nahihimo pinaagi han gahum han baraan nga espiritu, an madasigon nga pakigbahin hito tigaman han tinuod nga espirituwalidad.—Buhat 1:8.

An pagsangyaw han mensahe han Ginhadian ha bug-os nga kalibotan nagkikinahanglan hin nagkakaurosa nga pangalimbasog han minilyon nga tawo. (Juan 17:20, 21) Adton nakikigbahin hini diri la kay kinahanglan magin mahunahunaon ha espirituwal nga mga butang kondi organisado liwat ha bug-os nga kalibotan. Makikilala mo ba an mga tawo nga nagsusubad kan Kristo ngan nagsasangyaw han maopay nga sumat han Ginhadian ha bug-os nga kalibotan?

Nakakab-ot Mo ba an Kwalipikasyon?

Syempre may-ada iba pa nga pangirilal-an han tinuod nga espirituwal nga tawo, kondi nakakab-ot mo ba ito nga mga kwalipikasyon? Basi hibaroan, pakianhi an imo kalugaringon: ‘Ginbabasa ko ba pirme an Pulong han Dios, an Biblia, ngan ginpapamalandong ito? Iginpapakita ko ba an mga bunga han espiritu ha akon kinabuhi? Nag-aampo ba ako pirme? Karuyag ko ba makig-upod ha mga nagsasangyaw han maopay nga sumat han Ginhadian han Dios ha bug-os nga kalibotan?’

An tangkod nga pag-usisa ha kalugaringon mabulig ha imo nga hibaroan an kahilarom han imo espirituwalidad. Gin-aaghat ka namon nga buhaton na yana an mga ginkikinahanglan basi makarawat mo an ‘kinabuhi ngan kamurayawan.’—Roma 8:6; Mateo 7:13, 14; 2 Pedro 1:5-11.

[Kahon/Mga Retrato ha pahina 7]

PANGIRILAL-AN HAN ESPIRITUWAL NGA TAWO

◆ Pagkaada gugma ha Pulong han Dios

◆ Pagpakita han bunga han espiritu

◆ Pag-ampo pirme ha Dios ha sinsero nga paagi

◆ Pagsangyaw han maopay nga sumat han Ginhadian ha iba

[Retrato ha pahina 5]

An Biblia mabulig ha imo nga mahibaroan an ‘panhunahuna ni Kristo’