Disenyo nga Waray Disenyador?

HAROS 150 ka tuig na an naglabay han ipresenta ni Charles Darwin an teoriya nga natural selection sugad nga an hinungdan han pagkakomplikado ngan pagkalain-lain han kinabuhi. Kondi, an iya teoriya han ebolusyon ngan an moderno nga mga bersyon hito, bag-o la nga ginkwestyon han mga natoo nga an urusahon ngan waray depekto nga pagkalarang han buhi nga mga organismo nagpapasabot nga gintuyo ito pagdisenyo. Bisan an pipira nga syentista nga higtaas an kredensyal diri nauyon han ideya nga an ebolusyon an makakasaysay mahitungod han magkalain-lain nga klase han linarang nga aton nakikita ha tuna.

An iba hito nga syentista may-ada kabaliktaran nga ideya nga tinatawag nga intelihente nga disenyo o ID, nga marig-on nga nasiring nga an disenyo ha paglarang sinusuportahan gud han biolohiya, matematika, ngan sentido komon. Gin-aaghat nira an mga eskwelahan nga igtutdo ini. Damu nga debate ha ebolusyon an nahitatabo ha Inglatera, Netherlands, Pakistan, Serbia, ngan Turkey, kondi labi na gud ha Estados Unidos.

Nakakawurok nga Kakulang hin Impormasyon

Kondi, kasagaran nga matin-aw nga may kulang ha depensa han intelihente nga disenyo. Ito an diri pag-unabi han disenyador. Natoo ka ba nga posible an pagkaada disenyo nga waray disenyador? An mga nasuporta hini nga ideya “waray espisipiko nga ginsisiring kon hin-o o ano ini nga disenyador,” siring han The New York Times Magazine. An parasurat nga hi Claudia Wallis nagsiring nga an nauyon hini “mabinantayon nga diri mahisgotan an Dios.” Ngan an magasin nga Newsweek nagsiring nga “an I.D. waray maghisgot nga may naeksister nga disenyador ngan kon hin-o hiya.”

Kondi, mahibabaroan mo nga diri malilikyan an isyu mahitungod han disenyador. Paonan-o maisasaysay hin bug-os an may kalabotan han mga disenyo ha uniberso ngan han kinabuhi kon igintatago o diri ngani ginhihisgotan an pag-eksister han nagdisenyo ngan kon hin-o hiya?

Ha usa ka bahin, an debate kon kikilal-on o diri an disenyador nakasentro hini nga mga pakiana: Magpupugong ba ha pag-uswag han syensya ngan intelektuwal nga panhunahuna an pagkarawat han pag-eksister han labaw-ha-tawo nga disenyador? Kakarawaton la ba naton nga may-ada intelihente nga disenyador kon waray na iba nga makatadunganon nga esplikasyon? Ngan makatadunganon gud ba an paghunahuna nga kon may-ada disenyo, may-ada disenyador? Paghihisgotan ini nga pakiana ngan an iba pa ha masunod nga artikulo.

[Mga Retrato ha pahina 3]

Natoo hi Charles Darwin nga an “natural selection” an hinungdan han pagkakomplikado han kinabuhi

[Ginkuhaan han Retrato]

Darwin: From a photograph by Mrs. J. M. Cameron/U.S. National Archives photo