Hi Jehova Nahigugma han Hustisya

“Ako, hi Jehova, nahigugma han kasubayan [“hustisya,” NW].”—ISAIAS 61:8.

1, 2. (a) Ano an kahulogan han hustisya ngan kawaray-hustisya? (b) Ano an ginsisiring han Biblia mahitungod kan Jehova ngan han iya kalidad nga hustisya?

 AN HUSTISYA amo an kalidad han pagin waray ginpapasulabi, makatadunganon nga nagios uyon ha matadong ngan maopay. An kawaray-hustisya nangangahulogan hin pagin diri-makatadunganon, nagpapasulabi, maraot, ngan waray hinungdan nga nagpapasakit ha iba.

² Haros 3,500 ka tuig na an naglabay, hi Moises nagsurat mahitungod han Soberano han Uniberso, hi Jehova: “An ngatanan niya nga mga dalan amo an katadongan [“hustisya,” NW]. Usa nga Dios ha pagkamatinumanon ngan waray karat-an [“kawaray-hustisya,” NW].” (Deuteronomio 32:4) Paglabay hin sobra pito ka siglo, giniyahan han Dios hi Isaias nga isurat ini: ‘Ako, hi Jehova, nahigugma han hustisya.’ (Isaias 61:8) Ngan ha siyahan nga siglo, hi Pablo nagsinggit: “May-ada [ba] diri pagkamatadong [“kawaray-hustisya,” NW] ha Dios? Ipahirayo ini!” (Roma 9:14) Hito gihapon nga panahon, hi Pedro nagsiring: “An Dios waray ginpasulabi han mga tawo; kondi tikang ha ngatanan nga mga nasud hiya nga nahadlok ha iya, ngan nagbubuhat hin matadong, naruruyagan niya.” (Buhat 10:34, 35) Oo, hi Jehova “nahigugma han hustisya.”—Salmo 37:28, NW; Malakias 3:6.

Kalyap an Kawaray-hustisya

3. Paonan-o nagtikang an kawaray-hustisya?

³ An hustisya diri kalyap nga kalidad yana. Mahimo kita mabiktima han kawaray-hustisya ha ngatanan nga bahin han sosiedad—ha aton trabaho, ha eskwelahan, ha pagtratar ha aton han mga opisyal, ngan ha iba pa nga paagi—bisan ha sulod han pamilya. Syempre, diri bag-o an sugad nga kawaray-hustisya. Nahitabo ito han nagrebelde ngan nagin matinalapasnon an aton siyahan nga mga kag-anak tungod ha pag-aghat han rebelyoso nga anghel nga nagin hi Satanas nga Yawa. Kawaray-hustisya gud an sayop nga paggamit nira Adan, Eva, ngan Satanas han urusahon nga regalo ha ira ni Jehova nga kagawasan ha pagbuot. An ira kasaypanan nagresulta hin duro nga pag-antos ngan kamatayon han ngatanan nga tawo.—Genesis 3:1-6; Roma 5:12; Hebreo 2:14.

4. Kakan-o pa nagin bahin han kasaysayan an kawaray-hustisya?

⁴ Mga 6,000 ka tuig na an naglabay tikang pa ha pagrebelde ha Eden, an kawaray-hustisya nagin bahin na han sosiedad. Malalaoman gud ini tungod kay hi Satanas amo an dios hini nga kalibotan. (2 Korinto 4:4) Buwaon hiya ngan amay han buwa, parapakaraot ngan parakontra kan Jehova. (Juan 8:44) Pirme hiya nagbubuhat hin duro nga kawaray-hustisya. Pananglitan, tungod han iya maraot nga impluwensya antes han Delubyo ha panahon ni Noe, nakita han Dios nga “an karaotan han tawo daku ha tuna, ngan an ngatanan nga panhunahuna han pamurubuot han iya kasingkasing amo gud la maraot ha kadayonan.” (Genesis 6:5) Ito nga sitwasyon kalyap pa gihapon ha panahon ni Jesus. Hiya nagsiring: “Igo na han adlaw an iya kamaraot,” karuyag sidngon an nakakaguol nga mga problema, sugad han kawaray-hustisya. (Mateo 6:34) An Biblia husto nga nasiring: ‘An bug-os nga binuhat naghaharoy ngan nasasakit tubtob niyan.’—Roma 8:22.

5. Kay ano nga mas duro an kawaray-hustisya yana kay ha naglabay?

⁵ Salit, an karaotan nga resulta han duro nga kawaray-hustisya nahitatabo ha bug-os nga kasaysayan. Yana an sitwasyon mas maraot pa gud. Kay ano? Tungod kay inin maraot nga sistema yana aada ha “kataposan nga mga adlaw” ha  sulod hin damu ka tuig na, ngan nakakaeksperyensya han “magpakalilisang nga mga panahon” samtang nagtitikahirani ha kataposan. An Biblia nagtagna nga durante hini nga peryodo han kasaysayan, an mga tawo “magmamahigugmaon ha ira kalugaringon, magmamahigugmaon ha salapi, mga hambog, palabilabihon, maglibakon, . . . diri magbaluson, diri mga baraan, waray gugma nga kinaiya, diri sadang malukmay, [magpakarauton], diri mag-ilubon, magpintas, waray gugma ha kaopayan, mga maglingo, batinguran, pagdadayaw.” (2 Timoteo 3:1-5) Inin magraot nga kinaiya nagriresulta ha ngatanan nga klase han kawaray-hustisya.

6, 7. Ano nga duro nga kawaray-hustisya an nagpapakuri ha katawohan yana?

⁶ Ha naglabay nga ginatos ka tuig naeksperyensyahan an duro nga kawaray-hustisya nga waray pa gud mahitabo hadto. An usa nga hinungdan, tungod kay nahitatabo yana nga panahon an damu nga girra. Pananglitan, ginbabanabana han iba nga historyador nga ha Girra ha Kalibotan II la, mga 50 tubtob 60 ka milyon an nagkamatay, an kadam-an hito mga sibilyan—inosente nga kalalakin-an, kababayin-an, ngan kabataan. Tikang nga natapos ito nga girra, minilyon pa an pinanmatay ha magkalain-lain nga away, an kadam-an nga biktima mga sibilyan liwat. Igin-aaghat ni Satanas an sugad nga kawaray-hustisya tungod kay nasisina gud hiya, maaram nga hirani na hiya bungkagon ni Jehova. An tagna han Biblia nasiring: “An Yawa linusad ha iyo, nga may daku nga kasina, kay hinbaroan niya nga halipot na la nga oras iton iya pag-ukoy.”—Pahayag 12:12.

⁷ An ginagasto yana ha militar ha bug-os nga kalibotan, mga tulo ka trilyon dolyar kada tuig. Ginatos ka milyon nga tawo an waray han ira mga kinahanglanon, salit hunahunaa la an kaopayan nga mahihimo hito nga kwarta kon gastuhon ito ha mamurayawon nga mga tinguha. Mga usa ka bilyon an waray igo nga makakaon, samtang an iba may-ada kahuraan. Sumala ha rekord han Nagkakaurosa nga mga Nasud, mga lima ka milyon nga kabataan an namamatay kada tuig tungod ha mga epekto han gutom.  Waray gud hustisya! Katapos, tagda liwat an inosente nga nagkakamatay pinaagi han aborsyon. Mga 40 tubtob 60 ka milyon an ginbabanabana nga namamatay hito kada tuig! Makangingirhat gud nga kawaray-hustisya!

8. Paonan-o la mahitatabo an tinuod nga hustisya para ha katawohan?

⁸ An mga magmarando diri nakakabiling hin solusyon ha damu nga problema nga nagpapakuri ha katawohan yana; diri liwat mag-oopay an sitwasyon tungod ha mga pangalimbasog han tawo. Nagtagna an Pulong han Dios nga ha aton panahon “an mga magraot ngan maglimbong nga mga tawo matubo ha maraot ngan labi pa gud nga maraot, ngan manlilimbong hira ngan panlilimbongan man hira.” (2 Timoteo 3:13) Nagin bahin na gud han adlaw-adlaw nga pagkinabuhi an kawaray-hustisya salit makuri na ito wad-on han mga tawo. An Dios la han hustisya an makakakuha hito. Hiya gud la an makakabungkag kan Satanas, ha mga demonyo, ngan magraot nga tawo.—Jeremias 10:23, 24.

Husto La nga Mabaraka

9, 10. Kay ano nga nanluya hi Asap?

⁹ Ha naglabay, bisan an iba nga mga parasurat han Biblia nahipapausa kon kay ano nga an Dios diri pa naghihilabot ha mga buruhaton han tawo ngan nagpapadapat han tinuod nga hustisya ngan katadongan. Tagda pananglitan, an usa nga tawo ha kadaan nga panahon. Ha sinurat ha igbaw han Salmo 73 gin-unabi hi Asap, nga bangin an prominente nga Lebihanon nga musikero durante han pagmando ni Hadi David o an ulo han pamilya han mga musikero. Hi Asap ngan an iya mga tulin nagsurat hin damu nga kanta nga gin-gamit ha pagsingba han katawohan. Kondi, inabot an panahon nga nagluya an iya espirituwalidad. Nakita niya an kauswagan ha materyal han magraot nga tawo, ngan naobserbahan niya nga agsob nga baga hin kontento na hira, ngan diri nakakaeksperyensya hin anoman nga karaotan.

¹⁰ Aton mababasa: “Aawaon ako hadton mga palabilabihon, han pakakita ko han kauswagan  han mga magraot. Kay waray mga undag ha ira kamatayon, kondi an ira mga kusog marig-on. Diri hira nasasamok sugad han iba nga mga tawo; bisan ngani waray hira pagbunali sugad han iba nga mga tawo.” (Salmo 73:2-8) Kondi inabot an panahon nga nasantop ni Asap nga sayop an sugad nga negatibo nga panhunahuna. (Salmo 73:15, 16) Nangalimbasog hiya ha pagtadong han iya panhunahuna, kondi waray hiya makasabot hin bug-os kon kay ano nga an magraot baga hin nakakalikay ha sirot han pakasayop samtang an magtinumanon agsob nga nag-aantos.

11. Ano an nasabtan han salmista nga hi Asap?

¹¹ Inabot an panahon, an matinumanon nga hi Asap ha kadaan nga panahon nakasabot kon ano an mahitatabo ha magraot—nga ha kataposan tatadungon ni Jehova an mga butang. (Salmo 73:17-19) Hi David nagsurat: “Paghulat kan Jehova, ngan pagbantayi iton iya dalan, ngan igpapahitaas ka niya basi ka makapanunod han tuna: Makikita nimo kon an magraot mahibulag na.”—Salmo 37:9, 11, 34.

12. (a) Ano an katuyoan ni Jehova ha karaotan ngan kawaray-hustisya? (b) Ano an inaabat mo mahitungod hito nga solusyon ha problema han kawaray-hustisya?

¹² Sigurado, katuyoan ni Jehova nga wad-on an karaotan ngan an kawaray-hustisya dinhi ha tuna ha iya itinanda nga panahon. Ito an sadang hinumdoman pirme bisan han maunungon nga mga Kristiano. Pagwawad-on ni Jehova adton nakontra ha iya kaburut-on, ngan babalosan niya adton nagkikinabuhi uyon hito. “An iya mga mata nagtatan-aw, an iya mga lukaplukap [nag-uusisa] ha mga anak han mga tawo. Hi Jehova nagsusuray ha magtadong; kondi an magraot ngan an naghihigugma ha paglugos nangalasan han iya kalag. Ha bawbaw han mga magraot pauranan niya [han] mga lit-ag; kalayo ngan asupre ngan naglalaga nga hangin . . . Kay hi Jehova matadong; nahigugma hiya ha katadongan.”—Salmo 11:4-7.

Bag-o nga Kalibotan nga May Hustisya

13, 14. Kay ano nga an katadongan ngan hustisya magmamando ha bag-o nga kalibotan?

¹³ Kon bungkagon na ni Jehova inin waray-hustisya nga sistema nga kontrolado ni Satanas, titikangan Niya an mahimayaon nga bag-o nga kalibotan. Mamandoan ito han langitnon nga Ginhadian han Dios, nga igintutdo ni Jesus ha iya mga sumurunod nga ig-ampo. An karaotan ngan kawaray-hustisya sasaliwnan han katadongan ngan hustisya, hito nga panahon babatunon gud hin bug-os an pag-ampo: “Kumanhi an imo ginhadian. Matuman an imo pagburut-an, sugad ha langit, amo man ha tuna.”—Mateo 6:10.

¹⁴ An Biblia nagsusumat ha aton kon ano nga klase hin pagmando an malalaoman naton, pagmando nga maiha na nga ginhahandom han ngatanan nga magtadong yana. Hito nga panahon, bug-os gud nga matutuman an Salmo 145:16: “Imo [Jehova nga Dios] binubuklad an imo kamot, ngan ginbubusog an tinguha han tagsa nga buhi.” Dugang pa, an Isaias 32:1 nasiring: “Kitaa, an usa nga hadi [hi Jesu-Kristo ha langit] maghahadi ha pagkamatadong, ngan an mga prinsipe [mga representante ni Kristo ha tuna] maglalarang ha kasubayan [“hustisya,” NW].” Mahitungod han Hadi nga hi Jesu-Kristo, an Isaias 9:7 nagtagna: “Mawawaray kataposan an pagtubo han iya kagamhanan ngan han pagdait, dida ha trono ni David, ngan dida ha iya ginhadian, ha pagtukod hini, ngan pag-alam-agam hini ha kasubayan ngan ha pagkamatadong tikang hadto ngada niyan bisan ha kadayonan. An kainit ni Jehova han mga kasundalohan magbubuhat hini.” Nahahanduraw mo ba an pagkinabuhi ilarom hiton matadong nga pagmando?

15. Ano an bubuhaton ni Jehova para ha katawohan ha bag-o nga kalibotan?

¹⁵ Ha bag-o nga kalibotan han Dios, waray na rason nga ipahayag naton an mga pulong ha  Eklesiastes 4:1: “Binalik ako ngan kinita han ngatanan nga magtalumpigos nga ginbuhat ha sirong han adlaw: ngan, kitaa, an mga luha hito nga gintatalumpigos, ngan hira waray maglilipay; ngan ha dapig han ira mga magtatalumpigos nakada an gahum: kondi waray ha ira maglilipay.” Oo, tungod han aton diri-hingpit nga hunahuna, makuri handurawon kon mationan-o kaurusahon iton bag-o nga matadong nga kalibotan. Mawawara na an karaotan; lugod, an kada adlaw mapupuno hin kaopayan. Oo, tatadungon ni Jehova an ngatanan nga sayop, ha paagi nga diri naton ginlalaoman. Angayan gud nga giniyahan ni Jehova nga Dios hi apostol Pedro nga magsurat: “Sumala ha iya saad, naghuhulat kita hin mga bag-o nga langit ngan bag-o nga tuna, diin mag-uukoy an katadongan”!—2 Pedro 3:13.

16. Ha ano nga paagi naestablisar na yana an “bag-o nga langit” ngan paonan-o igin-aandam an “bag-o nga tuna”?

¹⁶ Oo, naestablisar na an “bag-o nga langit,” an langitnon nga gobyerno han Dios pinaagi kan Kristo. An “bag-o nga tuna,” nga amo an bag-o nga tunan-on nga sosiedad han magtadong nga tawo gintitirok na durante hinin kataposan nga mga adlaw. Hirani pito ka milyon na hira, ha mga 235 nga nasud ngan ha 100,000 nga kongregasyon. Inin minilyon nga tawo nahibabaro han magtadong ngan may hustisya nga paagi ni Jehova, ngan sugad nga resulta, nagpapahimulos hira han pagkaurosa nga ginpaparig-on han Kristiano nga gugma. An ira pagkaurosa amo an pinakabantogan ngan pinakamarig-on ha kasaysayan han kalibotan, pagkaurosa nga nalabaw ha bisan ano nga naieksperyensyahan han mga sakop ni Satanas. An sugad nga gugma ngan pagkaurosa amo an abanse nga pagpakita han mahitatabo ha maabot nga urusahon nga panahon ha bag-o nga kalibotan han Dios, nga pagmamandoan uyon ha katadongan ngan hustisya.—Isaias 2:2-4; Juan 13:34, 35; Kolosas 3:14.

Mapapakyas an Pag-atake ni Satanas

17. Kay ano nga an ultimo nga pag-atake ni Satanas ha katawohan ni Jehova sigurado nga mapapakyas?

¹⁷ Hi Satanas ngan an iya mga sumurunod hirani na umatake ha mga magsiringba ni Jehova ha pagsari nga bungkagon hira. (Esekiel 38:14-23) Magigin bahin ito han tinawag ni Jesus nga “daku nga kagol-anan, sugad nga waray pa mahinabo tikang ha tinikangan han kalibotan tubtob yana, ngan diri [na] gud mahinanabo.” (Mateo 24:21) Maglalampos ba an pag-atake ni Satanas? Diri. An Pulong han Dios nagpapasarig ha aton: “Hi Jehova nahigugma hiton katadongan [“hustisya,” NW], ngan diri nagpapasibaya ha iya mga baraan; hira ginbabantayan hin waray kataposan: Kondi an katulinan han mga magraot ibubulag. An mga magtadong makakapanunod han tuna, ngan maukoy hira dida hin waray kataposan.”—Salmo 37:28, 29.

18. (a) Paonan-o magios an Dios ha tiarabot nga pag-atake ni Satanas ha Iya katawohan? (b) Kay ano nga mapulsanon an pagrepaso hinin basado-ha-Biblia nga impormasyon mahitungod han pagdaog han hustisya?

¹⁸ An pag-atake ni Satanas ngan han iya mga sakop magigin ultimo nga insulto ha mga surugoon ni Jehova. Hi Jehova nagtagna pinaagi kan Sakarias: ‘Hiya nga nakamkam ha iyo, nakamkam han nawotawo han akon mata.’ (Sakarias 2:8) Baga hin gintutusok hin tudlo an nawotawo ni Jehova. Magios dayon hiya ngan bubungkagon an mga persigidor. An mga surugoon ni Jehova amo an pinakamahigugmaon, nagkakaurosa, mamurayawon, masinugtanon-ha-balaud ha bug-os nga tuna. Salit ito nga pag-atake ha ira waray gud basihan ngan waray-hustisya. Diri ito igbabalewaray han harangdon nga mahigugmaon han hustisya. An iya bubuhaton para ha ira magriresulta hin kabungkagan han mga kaaway han iya katawohan, hin kadaogan han hustisya, ngan hin kaluwasan hadton nagsisingba ha amo la nga matuod nga Dios. Urusahon gud ngan makalilipay nga mga hitabo an hirani na maeksperyensyahan naton!—Proberbios 2:21, 22.

Ano an Imo Baton?

• Kay ano nga kalyap an kawaray-hustisya?

• Paonan-o susulbaron ni Jehova an problema han kawaray-hustisya ha tuna?

• Ano an nakapadasig ha imo hini nga pag-aram mahitungod han pagdaog han hustisya?

[Mga Pakiana]

[Retrato ha pahina 23]

Kalyap an karaotan antes han Delubyo, ngan durante hinin “kataposan nga mga adlaw”

[Retrato ha pahina 24]

Ha bag-o nga kalibotan han Dios, an hustisya ngan katadongan masaliwan ha karaotan