Maaatubang Mo an Kawaray-Hustisya!

HIN-O an waray pa makaeksperyensya hin kawaray-hustisya ha iya bug-os nga kinabuhi? Samtang an iba nga kawaray-hustisya mahuhunahuna o mahahanduraw la, an iba tinuod nga nahitatabo.

Kon nakakaeksperyensya kita hin kawaray-hustisya, naabat kita hin kasakit ha emosyon ngan mahimo makaeksperyensya hin kadaot ha espirituwal. Bangin hingyap gud naton nga tadungon an mga butang. Kay ano? Usa nga rason amo nga an aton Maglalarang, hi Jehova nga Dios, nga “ha iya waray kawaray-hustisya” nagbutang ha katawohan hin duro nga hingyap hin hustisya. (Deuteronomio 32:4, NW; Genesis 1:26) Kondi, bangin umatubang kita hin mga sitwasyon diin diri natatagbaw an hustisya nga aton ginhihingyap. Usa nga makinaadmananon an makausa nga nagsiring: “Dida hito binmalik ako ngan kinmita han ngatanan nga magtalumpigos nga ginbuhat ha sirong han adlaw: ngan, kitaa, an mga luha hito nga gintatalumpigos, ngan hira waray maglilipay; ngan ha dapig han ira magtatalumpigos nakada an gahum: kondi waray ha ira maglilipay.” (Eklesiastes 4:1) Kon sugad, paonan-o naton maaatubang an kawaray-hustisya?

Ano Gud Ba an Kawaray-Hustisya?

An kawaray-hustisya amo an kahimtang o pagtalapas han mga suruklan han pagin waray dinadapigan. Ano an sadang magin suruklan han hustisya ha katawohan? Matin-aw nga an aton matadong ngan diri-nagbabag-o nga Maglalarang an may katungod ha paghimo hin suruklan kon ano an makatadunganon ngan diri. Ha iya punto-de-bista, an paglakat ha “kasugoanan han kinabuhi” nag-uupod hin diri pagbuhat han mga butang nga waray hustisya. (Esekiel 33:15) Salit, han ginlarang ni Jehova an siyahan nga tawo, Iya gintagan hiya hin konsensya—an tingog ha sulod nga makakabulig ha iya ha pagkilala han husto ngan sayop. (Roma 2:14, 15) Dugang pa, iya iginpakita ha iya Pulong, an Biblia, an mga kapahayagan kon ano an makatadunganon ngan diri.

Kumusta man kon naabat kita nga may-ada kawaray-hustisya nga ginbuhat ha aton? Maopay nga usisahon naton an kahimtang ha makatadunganon nga paagi basi hisabtan kon may-ada gud ba kawaray-hustisya nga nahimo. Tagda, pananglitan, an kahimtang han Hebreo nga propeta nga hi Jonas. Ginsugo hiya ni Jehova nga sumatan an mga taga-Ninibe mahitungod han tiarabot nga kabungkagan. Kondi, pinalagiw anay hiya nga waray tumana an iya toka. Pero, inabot an panahon, kinadto hiya ha Ninibe ngan ginpahamangnoan an mga umurukoy hito mahitungod han tiarabot nga kabungkagan. Tungod han ira pagkarawat, waray hira bungkaga ni Jehova. Ano an iya gin-abat? “Ini nakaburigo hinduro kan Jonas ngan hiya nasina.” (Jonas 4:1) Inabat niya nga waray magpakita hi Jehova hin hustisya may kalabotan hito.

Matin-aw, diri sayop hi Jehova, nga nakakabasa han kasingkasing ngan ‘nahigugma han  katadongan ngan hustisya.’ (Salmo 33:5) Kinahanglan la hibaroan ni Jonas nga uyon ha hingpit nga hustisya an paagi han pagdesisyon ni Jehova. Kon naabat kita nga may-ada kawaray-hustisya nga ginbuhat ha aton, bangin magpakiana kita ha aton kalugaringon, ‘Posible ba nga iba an panhunahuna ni Jehova ha panhitabo?’

Pag-atubang ha Kawaray-Hustisya

An Biblia nagsusumat hin mga higayon mahitungod hin mga tawo nga nag-antos hin kawaray-hustisya. Damu an aton mahibabaroan pinaagi ha pag-usisa kon paonan-o nira gin-atubang an ira kakurian. Tagda hi Jose nga iginbaligya ha pagkauripon ha Ehipto han iya naaawa nga kabugtoan. Ha Ehipto, gindani hiya han asawa han iya agaron, ngan han waray ito maglampos, buwa nga gin-akusahan hiya hin pakighilawas. Tungod hito, napriso hiya. Kondi, an iya pagtoo mas marig-on kay han puthaw nga kadena nga nakagapos ha iya. Waray niya tuguti an kawaray-hustisya nga magwara han iya espirituwalidad o magpaluya han iya pagsarig kan Jehova.—Genesis 37:18-28; 39:4-20; Salmo 105:17-19.

Hi Nabot an usa pa nga tawo nga inatubang hin kawaray-hustisya. Nagin biktima hiya han magraot nga plano ni Jesebel, an asawa ni Hadi Ahab han Israel. Karuyag han hadi an kan Nabot napanunod nga tuna nga hirani ha palasyo. Igindidiri ha mga Israelita an pagbaligya han ira mga napanunod, salit ginbaribaran niya an tanyag han hadi nga paliton an iya tuna. (Lebitiko 25:23) Tungod hito, an maraot nga asawa ni Ahab nagkuha hin buwaon nga mga testigo nga nag-akusar kan Nabot hin pagpasipara ha Dios ngan ha hadi. Sugad nga resulta, ginpatay hi Nabot ngan an iya mga anak. Handurawa an iya gin-abat han ginbabato hiya han mga tawo basi patayon!—1 Hadi 21:1-14; 2 Hadi 9:26.

Kondi, ito nga mga panhitabo minos la kon itanding ha kawaray-hustisya nga iginpadapat kan Kristo Jesus. Ginsirotan hiya hin kamatayon tungod han kabuwaan ngan ilegal nga pagbista. An naghukom nga gobernador han Roma waray magin marig-on ha iya nakita nga husto. (Juan 18:38-40) Oo, iginpadapat ni Satanas kan Kristo Jesus an diri matupngan nga kawaray-hustisya!

 Iginpapakita ba hini nga mga panhitabo nga ginbabalewaray ni Jehova an kawaray-hustisya? Diri! Waray ito tagda ni Jehova sugad han pagtagad han tawo. (Isaias 55:8, 9) Tungod kay iginbaligya hi Jose ha pagkauripon, naluwas niya an iya pamilya. Nagin administrador hiya han pagkaon ha Ehipto antes han duro nga kagutom nga nakaapekto han iya pamilya. Hunahunaa nga kon waray tuguti ni Jehova an kawaray-hustisya, diri unta hiya mapipriso. Diin didto iya gintagan hin kahulogan an inop han duha nga priso, nga an usa amo an nagsumat kan Paraon mahitungod ha iya, nga nagresulta han iya pagin administrador han pagkaon.—Genesis 40:1; 41:9-14; 45:4-8.

Kumusta man hi Nabot? Makausa pa, tagda an kahimtang sugad han pagtagad ni Jehova. Para kan Jehova, nga makakagbanhaw han mga patay, buhi hi Nabot, bisan kon patay na hiya. (1 Hadi 21:19; Lukas 20:37, 38) Kinahanglan maghulat hi Nabot tubtob nga banhawon hiya ni Jehova, kondi an nalabay nga panahon baga hin madaliay la, tungod kay an mga patay diri maaram han bisan ano. (Eklesiastes 9:5) Gawas pa, nanimalos hi Jehova para kan Nabot pinaagi ha pagsirot kan Ahab ngan ha iya pamilya.—2 Hadi 9:21, 24, 26, 35, 36; 10:1-11; Juan 5:28, 29.

Ha bahin ni Jesus, namatay hiya. Kondi, ginbanhaw hiya han Dios ngan iginbutang ha hitaas nga katungdanan nga “hitaas pa ha ngatanan nga pagmando, ngan pagburut-an, ngan kagamhanan, ngan pagkaginoo, ngan ha tagsa-tagsa nga ngaran nga ginhingaranan.” (Efeso 1:20, 21) An kawaray-hustisya nga iginpadapat ni Satanas kan Kristo Jesus waray makapugong kan Jehova ha pagbalos ha Iya anak. Nasarig hi Jesus nga masayon la ni Jehova ipadapat an hustisya ha ilegal nga pag-aresto kon kaburut-on niya ito. Kondi, maaram liwat hiya nga may-ada panahon hi Jehova ha pagtuman han Kasuratan ngan ha pagpahiuli han hustisya.

Oo, hi Satanas ngan an iya mga ahente nagpapadapat hin kawaray-hustisya ha magtadong, kondi maabot an panahon nga tatadungon ni Jehova an mga butang ngan permanente nga wawad-on an kawaray-hustisya. Salit, basi matadong an kawaray-hustisya, kinahanglan maghulat kita ha Dios.—Deuteronomio 25:16; Roma 12:17-19.

Kon Kay Ano nga Bangin Tugotan ni Jehova an Kawaray-Hustisya

May mga rason hi Jehova kon kay ano nga bangin diri niya gintatadong an usa nga kahimtang. Sugad nga bahin han aton Kristiano nga pagbansay, bangin tugotan niya nga makaeksperyensya kita hin kawaray-hustisya. Syempre, an Dios ‘diri nagsusulay hin bisan hin-o.’ (Jakobo 1:13) Kondi, mahimo niya tugotan an usa nga kahimtang nga mahitabo nga diri hiya nanhihilabot, pero mabubuligan niya an nakarawat han sugad nga pagbansay. An Biblia nagpapasarig: “An Dios ha ngatanan nga grasya, nga nagtawag ha iyo ngadto ha iya himaya . . . ha katapos niyo mag-antos hin gutiay, hiya maghihingpit, magpaparig-on, ngan magpapakusog ha iyo.”—1 Pedro 5:10.

Dugang pa, an pagtugot ni Jehova han kawaray-hustisya mahimo maghatag hin panahon ha nakasala nga magbasol. Mga pipira la ka semana katapos patayon hi Jesus, an pipira nga Judio nga namati ha sagdon ni Pedro ‘pinanurok ha kasingkasing.’ Kinasingkasing nga ginkarawat nira an pulong han Dios ngan nabawtismohan.—Buhat 2:36-42.

Oo, diri ngatanan nga nagbubuhat hin kawaray-hustisya magbabasol. An iba bangin maaghat pa ngani pagbuhat hin duro nga kawaray-hustisya. Kondi, an Proberbios 29:1 nasiring: “Hiya nga tungod han masukot nga saway nagpapatikig han iya liog paggugunawon ha hinanali, ngan hito waray na mahihimo ha pagbulig.” Oo, maabot an panahon nga magios ngan popoohon ni Jehova adton nagpapadayon ha sayop nga paggawi.—Eklesiastes 8:11-13.

Mationan-o man kahilawig nga panahon an aton pagkikinahanglanon basi malamposan an kawaray-hustisya, makakasiguro kita nga maaram hi Jehova kon paonan-o kita bubuligan basi maatubang ito. Ngan sigurado nga iya kukuhaon an kawaray-hustisya nga gin-aantos naton dinhi hinin maraot nga sistema. Dugang pa, ginsaaran kita niya han ultimo nga balos, an kinabuhi nga waray kataposan ha bag-o nga kalibotan “diin mag-uukoy an katadongan.”—2 Pedro 3:13.

[Retrato ha pahina 17]

Ano daw la an gin-aabat ni Nabot han naeksperyensyahan niya an duro nga kawaray hustisya?