Magpapahimulos Kita ha Pag-antos han Kasakitan
Magpapahimulos Kita ha Pag-antos han Kasakitan
“Gintawag ta nga mga baraan [“malipayon,” NW] an mga nag-antos.”—JAKOBO 5:11.
1, 2. Ano an nagpapakita nga diri katuyoan ni Jehova nga mag-antos hin kasakitan an tawo?
AN NORMAL nga tawo diri naruruyag nga magsakit; bisan an aton Maglalarang, hi Jehova nga Dios, diri naruruyag nga magsakit an mga tawo. Masasabtan naton ini kon aton usisahon an iya giniyahan nga Pulong ngan tigamnan kon ano an nahitabo katapos niya larangon an lalaki ngan babaye. Siyahan, ginhimo han Dios an lalaki. “Hi Jehova nga Dios naghimo han lalaki tikang ha tapotapo han tuna, ngan hinuyop ha iya irong hin gininhawa han kinabuhi; ngan an tawo nahimo nga buhi nga kalag.” (Genesis 2:7) Hingpit an lawas ngan hunahuna ni Adan, ngan diri hiya magkakasakit o mamamatay.
2 Kumusta man an pagkinabuhi ni Adan? “Hi Jehova nga Dios nagtanom hin tanaman gapil ha sinirangan, ha Eden; ngan didto iya ibinutang an lalaki nga iya ginhimo. Ngan tikang ha tuna naghimo hi Jehova nga Dios pagpaturok han tagsa nga kahoy nga matahom ha paniplatan, ngan mag-opay nga karan-on.” (Genesis 2:8, 9) Oo, hi Adan may-ada maopay gud nga urukyan. Waray kasakitan ha Eden.
3. Magkakaada hin ano an siyahan nga mag-asawa?
3 An Genesis 2:18 nagsusumat ha aton: “Hi Jehova nga Dios siniring: Diri maopay nga an lalaki mag-uusahan la; ako maghihimo hin iya kabulig.” Hi Jehova naghimo hin hingpit nga asawa para kan Adan, ngan nagin posible an pagkaada malipayon nga pagkinabuhi han pamilya. (Genesis 2:21-23) Dugang pa, an Biblia nagsusumat ha aton: ‘An Dios nagbendisyon ha ira ngan nagsiring ha ira: Magmabungahon kamo ngan magdamu ngan pun-on niyo an tuna, ngan pagtag-iyahon niyo ito.’ (Genesis 1:28) An siyahan nga mag-asawa magkakaada urusahon nga pribilehiyo nga pahaluagon an Paraiso han Eden tubtob nga pag-abot han panahon, magin paraiso na an bug-os nga tuna. Magkakaada hira maglipayon nga mga anak, nga diri mag-aantos hin kasakitan. Pagkamaopay nga tinikangan!—Genesis 1:31.
Nagtikang an Kasakitan
4. Sumala ha kasaysayan, ano an matin-aw nga nahitatabo ha katawohan?
4 Kondi, kon babalikon naton an bug-os nga kasaysayan han tawo, matin-aw nga may-ada nahitabo nga nagin hinungdan nga nagraot hinduro an kahimtang. Nahitatabo na an karaotan, ngan an katawohan nagsasakit hinduro. Ha paglabay han mga siglo, an ngatanan nga tulin nira Adan ngan Eva nagkakasakit, nalalagas, ngan ha kataposan namamatay. An kahimtang ha tuna hirayo gud ha paraiso nga puno hin maglipayon nga mga tawo. Husto gud an paghulagway hito ha Roma 8:22: ‘An bug-os nga binuhat naghaharoy ngan nasasakit ngada niyan.’
5. Paonan-o nagin hinungdan han kasakitan han katawohan an aton siyahan nga mga kag-anak?
5 Diri hi Jehova an angay basulon ha duro nga kasakitan nga maiha na nga nahitatabo. (2 Samuel 22:31) Usa han angay basulon amo an mga tawo. ‘Mangil-ad hira, naghimo hira han maghugaw nga buhat.’ (Salmo 14:1) Ha tinikangan, an aton siyahan nga mga kag-anak gintagan han ngatanan nga mag-opay nga butang. Kinahanglan la nga sumugot hira ha Dios basi magpadayon ito, kondi ginpili nira Adan ngan Eva nga bumulag kan Jehova. Tungod kay iginsalikway nira hi Jehova, diri na hira magigin hingpit. Magtitikaluya hira tubtob nga mamatay. Napanunod naton ito nga pagkadiri-hingpit.—Genesis 3:17-19; Roma 5:12.
6. Ano an ginbuhat ni Satanas nga nagin hinungdan han kasakitan?
6 Nagin hinungdan liwat han ngatanan nga kasakitan an usa nga anghel nga nagin hi Satanas nga Yawa. Tinagan hiya hin kagawasan ha pagbuot. Kondi, sayop nga gin-gamit niya ito ha pangalimbasog nga hiya an pagsingbahon. Pero, hi Jehova la an sadang pagsingbahon, diri an iya mga linarang. Hi Satanas an nag-aghat kan Adan ngan Eva nga diri sumugot kan Jehova, nga baga hin ha pagbuhat hito hira ‘mahinunugad ha Dios, nga maaramon na han kaopayan ngan han karaotan.’—Genesis 3:5.
Hi Jehova La an May Katungod ha Pagmando
7. An mga resulta han pagrebelde kan Jehova nagpapakita hin ano?
7 Ipinapakita han magraot nga resulta han pagrebelde nga hi Jehova la, an Soberano han Uniberso, an may katungod ha pagmando ngan an iya la pagmando an matadong. Nakita ha naglabay nga yinukot ka tuig nga hi Satanas, an nagin ‘punoan hini nga kalibotan,’ naghimo hin maraot, diri-matadong, ngan madarahog nga pagmando nga diri gud makapatagbaw. (Juan 12:31) An maiha na, makasurubo nga pagmando han mga tawo nga kontrolado ni Satanas nagpakita liwat nga kulang hira hin abilidad ha pagmando uyon ha katadongan. (Jeremias 10:23) Salit, an ngatanan nga klase hin pagmando nga bulag kan Jehova magriresulta gud hin kapakyasan. Matin-aw nga pinamamatud-an ini han kasaysayan.
8. Ano an katuyoan ni Jehova may kalabotan ha ngatanan nga klase hin pagmando han tawo, ngan paonan-o niya tutumanon ito?
8 Yana nga gintugotan ni Jehova an mga tawo hin yinukot ka tuig nga mag-eksperimento hin pagmando nga bulag ha iya, makatadunganon la kon wad-on niya ini ngatanan nga klase hin pagmando dinhi ha tuna ngan saliwnan ito han iya gobyerno. Mahitungod hini, an tagna nasiring: “Ha mga adlaw hito nga kahadian [mga magmarando nga tawo] an Dios ha langit magpapabangon hin usa nga ginhadian [iya langitnon nga gobyerno pinaagi kan Kristo], nga diri gud magugunaw. . . . Ini magpipinitpinit ngan mag-aanaw hini ngatanan nga ginhadian, ngan ini matindog ha kadayonan.” (Daniel 2:44) Mawawara na an yawan-on ngan tawhanon nga pagmando, ngan an langitnon la nga Ginhadian han Dios an magpapabilin ngan magmamando ha tuna. Hi Kristo an magigin Hadi, ngan magigin igkasi-magmarando niya an 144,000 nga magtinumanon tikang ha tuna.—Pahayag 14:1.
May Kapulsanan an Pag-antos han Kasakitan
9, 10. Paonan-o nakabulig kan Jesus an iya mga gin-antos?
9 Makapainteres an pag-usisa ha mga kwalipikasyon hadton magmamando ha langitnon nga Ginhadian. Siyahan, ipinakita ni Kristo Jesus nga kwalipikado gud hiya ha iya pagin Hadi. Maiha na hinduro nga kaupod hiya ni Jehova ha pagbuhat han Iya kaburut-on, sugad nga Iya “labaw nga magburuhat.” (Proberbios 8:22-31) Han ginpakanhi ni Jehova hi Jesus ha tuna, kinaburut-on nga sinugot hiya. Ha tuna iya gintagan hin prayoridad an pagsumat ha iba mahitungod han pagkasoberano ngan Ginhadian ni Jehova. Nagpakita hiya hin maopay gud nga susbaranan para ha aton ngatanan pinaagi han bug-os nga pagpasakop hito nga pagkasoberano.—Mateo 4:17; 6:9.
10 Hi Jesus nag-antos hin pagtimaraot, ngan ha kataposan ginpatay hiya. Durante han iya ministeryo, nakita niya ha bisan diin an makalolooy nga kahimtang han katawohan. Nakabulig ba ha iya an pakakita hito ngan an pag-antos niya mismo? Oo. An Hebreo 5:8 nasiring: “Bisan kon hiya Anak, nahibaro hiya ha pagkamasinugtanon tungod ha mga bagay nga iya gin-antos.” An naeksperyensyahan ni Jesus dinhi ha tuna nakabulig ha iya nga magin mas masinabuton ngan mapinairon. Naeksperyensyahan niya mismo an kahimtang han tawhanon nga pamilya. Mapaid hiya ha mga nagsasakit ngan mas masasabtan niya an iya bahin ha pagtalwas ha ira. Tigamni kon paonan-o ini pinabug-atan ni apostol Pablo ha libro nga Hebreohanon: “Kinahanglan gud ha iya nga ha ngatanan nga mga bagay mahimo hiya nga sugad ha iya mga kabugtoan, nga mahimo unta hiya nga malolooyon ngan matinumanon nga hitaas nga saserdote ha mga butang nga nahitutungod ha Dios, ha pagbuhat hin halad ha pagpara ha mga sala han mga tawo. Kay tungod nga hiya man nag-antos hin pagsulaya, hiya takos tumabang ha ira nga mga ginsusulay.” “Diri nga waray ta usa nga Hitaas nga Saserdote nga diri sadang makahimo hin pagbati ha aton mga kakurian; kondi hiya man ginsulay ha ngatanan nga paagi sugad ha aton, kondi waray sala. Busa manaraon kita nga nangahas ngadto ha hadianon nga lingkuranan han grasya, basi nga makakarawat kita hin pagkalooy, ngan makaagi hin grasya nga makakatambulig ha aton ha oras nga may kinahanglan.”—Hebreo 2:17, 18; 4:14-16; Mateo 9:36; 11:28-30.
11. Paonan-o an eksperyensya dinhi ha tuna han tidaraon nga mga hadi ngan saserdote makakabulig ha ira sugad nga magmarando?
11 Masisiring gud liwat ito ha 144,000 nga “mga tinubos” tikang ha tuna basi magin igkasi-magmarando ni Kristo Jesus ha langitnon nga Ginhadian. (Pahayag 14:4) Hira ngatanan natawo dinhi ha tuna, nagtubo ha kalibotan nga puno hin kasakitan, ngan nag-antos mismo. Damu an gintimaraot, ngan an iba ginpatay pa ngani tungod han ira pagpabilin nga maunungon kan Jehova ngan kinaburut-on nga pagsunod kan Jesus. Kondi waray nira ‘ikaawod an pagtestigo ha ira Ginoo, nag-antos han kakurian tungod han maopay nga sumat.’ (2 Timoteo 1:8) An ira eksperyensya dinhi ha tuna nakabulig ha ira nga magin labi nga kwalipikado ha paghukom ha katawohan tikang ha langit. Nahibaro hira nga magin mas mapinairon, buotan, ngan disidido bumulig ha mga tawo.—Pahayag 5:10; 14:2-5; 20:6.
Kalipay Hadton May-ada Tunan-on nga Paglaom
12, 13. Paonan-o makakabulig hadton may-ada tunan-on nga paglaom an pag-antos han kasakitan?
12 An kasakitan ba yana makakabulig hadton naglalaom nga mabuhi hin waray kataposan ha paraiso nga tuna nga waray sakit, kasubo, ngan kamatayon? An kakurian ngan duro nga kaguol nga resulta han kasakitan diri gud hiringyapon. Kondi kon gin-aantos naton an sugad nga kasakitan, mahimo mag-uswag an aton mag-opay nga kalidad ngan magriresulta ito hin kalipay.
13 Tagda an ginsisiring han giniyahan nga Pulong han Dios mahitungod hini: “Bisan pa kon mag-antos kamo tungod ha katadongan, mga bulahan [“malipayon,” NW] kamo.” “Kon mga ginpasipara kamo tungod ha ngaran ni Kristo, mga bulahan kamo.” (1 Pedro 3:14; 4:14) “Bulahan kamo, kon kamo pagdurugasan, ngan pagtitimarat-an ngan kon pagyayaknan ha ngatanan nga magraot hin buwa kontra ha iyo tungod ha akon. Magkalipay ngan maghimaya kamo, kay daku an iyo balos ha langit.” (Mateo 5:11, 12) “Bulahan an tawo nga makag-antos ha panulay; kay kon human na hiya pagproyba, kakarawaton niya an pudongpudong han kinabuhi.”—Jakobo 1:12.
14. Kay ano nga an pag-antos han kasakitan nakakapalipay ha mga magsiringba ni Jehova?
14 Sigurado nga an aktuwal nga pag-antos han kasakitan diri amo an nagpapalipay ha aton. An kalipay ngan katagbaw, nagtitikang ha paghibaro nga nag-aantos kita tungod kay ginbubuhat naton an kaburut-on ni Jehova ngan ginsusubad hi Jesus. Pananglitan, ha siyahan nga siglo, an iba han mga apostol ginpriso ngan katapos gindara ha hitaas nga hukmanan han mga Judio ngan gin-akusahan tungod ha pagsangyaw mahitungod kan Jesu-Kristo. Ginkastigo hira ngan katapos ginpagawas. Ano an ira disposisyon? An asoy han Biblia nasiring nga hira “nagkalakat tikang ha atubangan han Sanhedrin, nga malipayon; kay naihap ha ira nga hira takos mag-antos han kaalohan tungod han [iya] ngaran.” (Buhat 5:17-41) Nalilipay hira, diri ha pagkastigo ngan ha pisikal nga kaul-ol katapos hito, kondi tungod kay nasabtan nira nga nahitabo ini tungod kay nagpabilin hira nga maunungon kan Jehova ngan nagsunod han mga pitad ni Jesus.—Buhat 16:25; 2 Korinto 12:10; 1 Pedro 4:13.
15. Paonan-o an aton pag-ilob han kasakitan yana makakabulig ha aton ha tidaraon?
15 Kon may husto nga disposisyon nga gin-iilob naton an pagkontra ngan pagtimaraot, makakaparig-on ito han aton pagpailob. Mabulig ini ha aton nga makailob han tidaraon nga mga kasakitan. Aton mababasa: “Mga kabugtoan ko, isipon niyo sugad hin bug-os nga kalipay, kon mahulog kamo ha mga magkadirodilain nga panulay, kay hinbaroan niyo nga an pagproyba ha iyo pagtoo nabunga hin pag-ilob.” (Jakobo 1:2, 3) An Roma 5:3-5 nagsusumat liwat ha aton: “Naghihimaya man kita ha aton mga kasakitan: Kay hibaroan ta nga an kasakitan nabunga hin pagkamarig-on; ngan an pagkamarig-on, ha pagsulay, ngan an pagsulay, ha paglaom: Ngan an paglaom diri nahatag hin kaawod.” Salit kon mas naaantos naton yana an mga kakurian tungod han aton pagin Kristiano, mas maiilob naton an tidaraon nga mga kakurian dinhi hinin maraot nga sistema.
Hi Jehova Magbabalos
16. Ano an bubuhaton ni Jehova para hadton magigin mga hadi ngan saserdote sugad nga balos han ira pag-antos?
16 Bisan kon nawawad-an kita hin materyal nga mga butang tungod han pagkontra o pagtimaraot nga aton gin-aantos tungod han pagsunod ha Kristiano nga paggawi, matatagbaw kita tungod kay maaram kita nga babalosan gud kita ni Jehova. Pananglitan, para hadton may-ada paglaom nga mahingadto ha langit, hi apostol Pablo nagsurat: “Kinarawat niyo hin malipayon an mga pagtikasa han iyo mga bahandi, kay hinbaroan niyo nga may-ada niyo mga maoroopay ngan mapadayunon nga bahandi” sugad nga mga magmarando ha Ginhadian han Dios. (Hebreo 10:34) Handurawa la an ira kalipay ha pagbulig ha paghatag han urusahon nga mga bendisyon ha mga tawo ha tuna ha bag-o nga kalibotan ilarom han giya ni Jehova ngan ni Kristo. Tinuod gud an ginsiring ni apostol Pablo ha matinumanon nga mga Kristiano: “Akon gin-iisip nga an mga pag-antos hini nga panahon, diri takos nga itanding ha kahimayaan nga igpapahayag unina ngada ha aton.”—Roma 8:18.
17. Ano an bubuhaton ni Jehova para hadton may-ada tunan-on nga paglaom nga maunungon nga nag-aalagad ha iya yana?
17 Ha pariho nga paagi, anoman an mawara o kinaburut-on nga isakripisyo yana hadton may-ada tunan-on nga paglaom tungod ha pag-alagad kan Jehova, iya babalosan hira hin duro nga kahuraan pinaagi han iya bubuhaton ha tidaraon. Tatagan niya hira hin hingpit, waray kataposan nga kinabuhi ha paraiso nga tuna. Ha bag-o nga kalibotan, “pagpapahiron [ni Jehova] an ngatanan nga luha tikang ha ira mga mata; ngan mawawaray na kamatayon; ngan mawawaray na an kabidoan, bisan pagtangis, bisan kasakit pa gud.” (Pahayag 21:4) Makalilipay gud nga saad! Bisan ano dinhi hini nga kalibotan nga isakripisyo naton para kan Jehova diri gud makakatugbang ha makalilipay nga kinabuhi nga maabot, nga iya ihahatag ha iya magtinumanon nga surugoon nga nag-aantos han kasakitan.
18. Ano nga nakakaliaw nga saad ni Jehova ha aton an mababasa ha iya Pulong?
18 Bisan ano nga kasakitan nga bangin antuson pa naton, diri gud makakaulang han aton pagpahimulos han kinabuhi nga waray kataposan ha bag-o nga kalibotan han Dios. Ito ngatanan nga kasakitan sasaliwnan hin mag-opay gud nga kahimtang ha bag-o nga kalibotan. An Isaias 65:17, 18 nagsusumat ha aton: “An una nga mga butang diri na hinunumdoman, o diri na maabot ha panumdoman. Kondi magkalipay kamo ngan manrayhak ha gihapon dida hadton akon ginbuhat.” Salit, an bugto ha iroy ni Jesus nga hi Jakobo angayan nga nagpahayag: “Gintawag ta nga mga baraan [“malipayon,” NW] an mga nag-antos.” (Jakobo 5:11) Oo, kon matinumanon nga antuson naton an kasakitan yana, magpapahimulos kita yana ngan ha tidaraon.
Ano an Imo Baton?
• Paonan-o nagtikang makaeksperyensya an mga tawo hin kasakitan?
• Ano an mahimo maibulig han pag-antos han kasakitan ha magigin mga magmarando ngan umurukoy ha tuna?
• Kay ano nga mahimo kita magmalipayon yana bisan pa han kasakitan?
[Mga Pakiana]
[Retrato ha pahina 27]
An aton siyahan nga mga kag-anak may-ada urusahon nga tidaraon
[Retrato ha pahina 29]
An pakakita han kasakitan nakabulig kan Jesus nga magin maopay nga Hadi ngan Hitaas nga Saserdote
[Retrato ha pahina 31]
An mga apostol ‘nagmalipayon tungod kay naihap hira nga takos mag-antos han kaalohan’ tungod han ira pagtoo