Nahinunumdoman Mo Ba?

Nagpahimulos ka ba ha pagbasa han bag-o nga mga gowa han An Barantayan? Bueno, kitaa kon mababaton mo an masunod nga mga pakiana:

• Ano an upat nga paagi diin ginagamit han Kristiano Griego nga Kasuratan an pulong nga “kongregasyon”?

An siyahan nga paggamit hito amo an ha grupo han dinihogan-han-espiritu nga mga Kristiano (ha iba nga teksto kaupod hi Kristo). An ikaduha, an kongregasyon han Dios naaplikar ha ngatanan nga Kristiano nga nagkikinabuhi ha usa ka panahon. An ikatulo nga paggamit hito amo an ha ngatanan nga Kristiano ha usa nga espisipiko nga lugar. An kataposan, mahimo ito maaplikar ha mga nagkukompwesto han usa nga lokal nga kongregasyon.—4/15, pahina 21-3.

• San-o matatapos an pagtawag ha mga Kristiano para ha langitnon nga paglaom?

An Biblia waray maghatag hin espisipiko nga baton. Nagtikang ito han 33 K.P. ngan nagpadayon ha moderno nga panahon. Katapos han 1935 an nagin siyahan nga katuyoan han paghimo hin disipulo nga buruhaton amo an pagtirok han daku nga panon. An pipira nga nabawtismohan katapos han 1935 nakakarawat hin pamatuod han baraan nga espiritu nga may-ada hira langitnon nga paglaom, salit diri kita makakasiguro kon san-o gud matatapos ito nga pagtawag. An totoo nga mga dinihogan diri naghuhunahuna nga may-ada gud hira labaw nga espiritu han Dios kay ha ira kaupod nga iba nga mga karnero, diri liwat hira naglalaom hin espesyal nga pagtagad. Anoman an ira paglaom, an mga Kristiano kinahanglan magmatinumanon ngan padayon nga magbuhat han kaburut-on han Dios.—5/1, pahina 30-1.

• Han nagsaad hi Jepte, andam ba hiya ha paghalad han iya anak nga babaye sugad nga halad nga sinunog ha Dios?

Diri. An karuyag sidngon ni Jepte, iya ipapahinungod an usa nga matapo ha iya ha esklusibo nga pag-alagad ha Dios nga igintutugot han Mosaiko nga Balaud. (1 Samuel 2:22) Ha pagtuman han saad, an anak ni Jepte nag-alagad ha tabernakulo, daku ito nga pagsakripisyo tungod kay nangangahulogan ito nga diri hiya mag-aasawa.—5/15, pahina 9-10.

• Ano an bahin han codex ha siyahan nga Kristianidad?

An mga Kristiano baga hin ha kadak-an nga bahin naggamit han renulyo, o linukot nga basahon, tubtob ha kataposan han siyahan nga siglo K.P. Han sunod nga siglo, nagkaada diri pagkasinabot an mga nasuporta han codex ngan an nasuporta han linukot nga basahon. Natoo an mga eksperto nga an paggamit han mga Kristiano han codex daku an nahimo basi karawaton ito han damu nga tawo.—6/1, pahina 14-15.

• Ano an Kalendaryo ha Gezer?

Usa ito ka gutiay nga papan nga bato nga apog nga nadiskobrehan han 1908 ha syudad han Gezer. Damu an naghuhunahuna nga usa ito nga asaynment hin estudyante nga iginsurat ha papan. Iginhuhulagway han papan an pinasimple nga bersyon han tuig han pag-uma, o tsart nga nagtitikang ha pag-ani ha bulan nga katugbang han Septyembre/Oktubre, ngan gin-unabi hito an magkalain-lain nga tanom ngan buruhaton ha uma.—6/15, pahina 8.

• Ano an iginpapasabot han pakasala ha baraan nga espiritu?

Posible an pakasala ha baraan nga espiritu ni Jehova, an sala nga diri gud mapapasaylo. (Mateo 12:31) An Dios an nagdidesisyon kon nakabuhat ba kita hin diri-mapapasaylo nga sala, ngan mahimo niya kuhaon an iya espiritu ha aton. (Salmo 51:11) Kon nasusubo kita hinduro tungod han aton sala, posible gud nga tinuod kita nga nagbabasol ngan salit waray makasala ha baraan nga espiritu.—7/15, pahina 16-17.

• Kay ano nga nagpakiana hi Hadi Saul kon kan kanay anak hi David nga iya man nakaupod hiya hadto? (1 Samuel 16:22; 17:58)

Interesado hi Saul diri la ha paghibaro han ngaran han amay ni David. Katapos makita hi David sugad nga may-ada pagtoo ngan kaisog nga nakapirde kan Goliat, karuyag ni Saul hibaroan kon ano nga klase hin tawo an nagpadaku ha iya. Bangin nahunahuna ni Saul nga idugang hi Jesse, o an iba nga membro han iya pamilya ha kasundalohan.—8/1, pahina 31.