‘O Ginoo, Proybahi Ako’

“HI Jehova an nag-uusisa han mga kasingkasing.” (Proberbios 17:3, NW) Sadang gud ini makadasig ha aton ngatanan. Kay ano? Tungod kay diri pariho ha tawo, nga naghuhukom ha pangawas nga hitsura la, an aton langitnon nga Amay “nagtatan-aw han kasingkasing.”—1 Samuel 16:7.

Ha pagkamatuod, bisan kita mismo, diri amo an gimaopayi nga parausisa han aton gihilarumi nga mga motibo ngan inklinasyon. Kay ano? Tungod kay an aton “kasingkasing malimbungon labaw han ngatanan nga butang, ngan labi hin kamahugaw: hin-o in mahibabaro hini?” Bueno, maaram hito an Dios, tungod kay hiya nagsiring: “Ako, hi Jehova, nagsususi han panumdoman [“kasingkasing,” NW], ako nagsasari han kasingkasing [“isol,” NW].” (Jeremias 17:9, 10) Oo, nasasabtan ni Jehova ‘an kasingkasing’—upod an aton mga motibo—sugad man ‘an isol,’ an aton gihilarumi nga pagbati ngan emosyon.

Kay Ano nga Ginpuproybahan?

Diri urusahon, kon sugad, nga hi Hadi David han kadaan nga panahon nagsiring ha Dios: “Usisaha, O Ginoo, ngan proybahi ako, paghukmi an akon mga ungara ngan panhunahuna.” (Salmo 26:2, Maopay nga Sumat nga Biblia) Limpyo gud ba hi David ha buhat ngan ha pulong, nga waray na niya kahahadlokan kon proybahan hiya ni Jehova? Syempre, diri! Hi David, pariho ha aton ngatanan, diri hingpit ngan diri bug-os nga nakakasunod han suruklan han Dios. Tungod han iya mga kaluyahan, seryoso nga nakasala hiya, kondi ‘naglakat hiya ha kabug-osan han kasingkasing.’ (1 Hadi 9:4) Paonan-o? Pinaagi ha pagkarawat hin pagsaway ngan pagtadong. Hito nga paagi, iginpakita niya nga hinigugma gud niya hi Jehova. Bug-os an iya pagkamaunungon ha Dios.

Kumusta man kita yana? Maaram hi Jehova nga diri kita hingpit ngan nakakasala ha pulong ngan ha buhat. Kondi, diri niya gin-uusisa an aton pagkinabuhi pinaagi ha paggamit han iya abilidad ha paghibaro nga daan han aton tidaraon. Ginlarang kita niya nga may kagawasan ha pagpili, ngan iya gintatahod an aton kagawasan ha pagbuot—usa nga regalo nga mahigugmaon niya nga ginhatag ha aton.

Kondi, usahay ginpuproybahan ni Jehova an aton hilarom nga pagkatawo, upod an aton mga motibo. Bangin niya buhaton ini pinaagi ha pagtugot hin mga higayon nga magbubuhayhag han kahimtang han aton kasingkasing. Mahimo liwat niya tugotan an magkalain-lain nga kahimtang o problema nga magpakita han aton gihilarumi nga inklinasyon. Naghahatag ini ha aton hin higayon nga maipakita ha iya kon mationan-o kita ka debotado ngan maunungon. An mga pagsari nga igintutugot ni Jehova mahimo magpakita han klase han aton pagtoo, kon kita ba ‘hingpit ngan bug-os, waray kulang hin bisan ano nga bagay.’—Jakobo 1:2-4.

Pagsari han Pagtoo ha Naglabay nga Panahon

Ginsarihan liwat an pagtoo ngan motibo han mga surugoon ni Jehova ha naglabay nga panahon. Tagda an patriarka nga hi Abraham. “Ginsarihan han Dios hi Abraham.” (Genesis 22:1, An Maopay nga Sumat nga Biblia) Han ginyakan ito, ginsarihan na han Dios an pagtoo ni Abraham. Mga dekada antes hito, ginpabalhin ni Jehova hi Abraham upod han iya pamilya tikang ha mainuswagon nga syudad han Ur ngadto ha tuna nga diri pa nira hinbabaroan. (Genesis 11:31; Buhat 7:2-4) Hi Abraham nga bangin may balay ha Ur waray pumalit hin balay ha Kanaan, diin nag-ukoy hira ha sulod hin mga dekada. (Hebreo 11:9) Tungod  kay waray hira permanente nga urukyan, hiya ngan an iya pamilya nagkaproblema ha kagutom, armado nga grupo, ngan pagano nga magmarando. Durante hini nga panahon, napamatud-an nga maopay gud nga klase an iya pagtoo.

Katapos, ginhatagan ni Jehova hi Abraham hin mas makuri nga pagsari. ‘Kuhaa niyan an imo anak nga lalaki, an imo bugtong nga anak, nga imo hinigugma, hi Isaak, ngan ihalad hiya nga halad nga sinunog.’ (Genesis 22:2) Para kan Abraham, diri ordinaryo nga anak hi Isaak. Hiya an bugtong nga anak nira ni Sara, an iya asawa. Iginpanganak hi Isaak tungod hin saad, an amo la nga paglaom ni Abraham nga an iya binhi makakapanunod han tuna han Kanaan ngan magigin bendisyon ha damu, uyon ha saad han Dios. Ha pagkamatuod, hi Isaak an anak nga ginlalaoman ni Abraham ngan natawo katapos hin milagro tikang ha Dios!—Genesis 15:2-4, 7.

Sigurado nga mahahanduraw mo nga makuri gud para kan Abraham nga hisabtan ini nga sugo. Nagkikinahanglan ba hi Jehova hin halad nga tawo? Kay ano nga gintugotan ni Jehova nga malipay hiya ha pagkaada anak ha iya lagas nga pangidaron, katapos hahangyoon man la ngani hiya nga ihalad ito? a

Bisan kon waray matin-aw nga baton hi Abraham hini nga mga pakiana, sinugot dayon hiya. Naggasto hiya hin tulo ka adlaw basi madangat an pinili nga bukid. Nagtukod hiya didto hin halaran ngan nagbutang hin sungo ha bawbaw hito. Katapos, inabot na an pinakamakuri nga bahin han pagsari. Ginkaptan ni Abraham an kutsilyo, kondi han papatayon na niya an iya anak, ginpugngan hiya ni Jehova pinaagi hin anghel, ngan nagsiring: “Yana ako nasabot nga ikaw nahadlok han Dios, kay waray mo igdumiri ha akon an imo anak, an imo anak nga bugtong.” (Genesis 22:3, 11, 12) Ha pakabati hito, inabat ni Abraham nga ginbendisyonan gud hiya! Husto an abanse nga pagbanabana ni Jehova han iya pagtoo. (Genesis 15:5, 6) Katapos, naghalad dayon hiya hin lalaki nga karnero sugad nga kasaliwan kan Isaak. Dida hito ginparig-on ni Jehova an iya mga saad ha binhi ni Abraham. Salit, makatadunganon la nga  nakilala hiya sugad nga sangkay ni Jehova.—Genesis 22:13-18; Jakobo 2:21-23.

Ginsasarihan Liwat an Aton Pagtoo

Maaram kita ngatanan nga diri malilikyan han surugoon han Dios yana an mga pagsari. Kondi, ha aton bahin, mas makuri nga pagsari an pag-ilob han iya igintutugot nga mahitabo kay han iya iginpapabuhat ha aton.

Hi apostol Pablo nagsurat: ‘An ngatanan nga nahigugma mabuhi nga may pagtahod ha Dios ngan kan Kristo Jesus mag-aantos hin pagtimaraot.’ (2 Timoteo 3:12) An sugad nga pagtimaraot mahimo magtikang ha mga kaeskwela, kasangkayan, paryente, amyaw, o awtoridad nga sayop an pagkilala ha aton. Mahimo ito mag-upod hin panginsulto, pag-abuso ha pisikal, ngan pag-ulang ha panginabuhi han usa nga Kristiano. Naieksperyensyahan liwat han tinuod nga mga Kristiano an mga problema nga komon ha tawo—sakit, kapakyasan, ngan kawaray-hustisya. Ito ngatanan nagsasari han pagtoo.

Ginhisgotan ni apostol Pedro an kapulsanan nga masarihan an pagtoo han usa: “Pagsub-on kamo ha magkadirodilain nga mga pagsulay, nga an proyba han iyo pagtoo, nga amo an labi pa ka hamili kay ha bulawan nga nawawara bisan kon ito ginproybahan ha kalayo, hiagian unta ha pagdayeg ngan kahimayaan ngan kadungganan kon magpahayag na hi Jesu-Kristo.” (1 Pedro 1:6, 7) Oo, an resulta han mga pagsari maipapariho ha proseso han pagpuraw hin bulawan ha kalayo. Iginpapakita hito nga proseso an putli nga produkto ngan ginkukuha hito an hugaw. Pariho hito an nahitatabo ha aton pagtoo kon ginsasarihan kita.

Pananglitan, an aksidente o natural nga kalamidad mahimo magresulta hin kakurian. Kondi, adton tinuod nga nagtotoo diri nagpapaapekto ha duro nga kabaraka. Naliliaw hira ha pasarig ni Jehova: “Diri ko gud ikaw bibilinan, ngan diri ko gud ikaw babayaan.” (Hebreo 13:5) Padayon nga gin-uuna nira an ira espirituwalidad, nasarig nga bibendisyonan ni Jehova nga Dios an ira mga pangalimbasog nga magkaada han ira ginkikinahanglan gud. An ira pagtoo nabulig ha ira nga maantos an kakurian ngan malikyan nga magin mas komplikado an sitwasyon pinaagi han waray hinungdan nga kabaraka.

Tungod kay naibubuhayhag han mga pagsari an kaluyahan han aton pagtoo, magigin mapulsanon liwat ito kon kakarawaton naton an pagsaway. Sadang pakianhan han usa an iya kalugaringon: ‘Paonan-o ko mapaparig-on an akon pagtoo? Kinahanglan ko ba maggahin hin dugang nga panahon ha seryoso nga pag-aram ngan pagpamalandong han Pulong han Dios? Bug-os ko ba nga ginpapahimulosan an pagtambong ha mga katirok upod han akon mga igkasi-tumuroo? Nasarig la ba ako ha akon kalugaringon bisan kon kinahanglan ko na ig-ampo an akon mga kabaraka kan Jehova nga Dios?’ Kondi, an sugad nga pag-usisa ha kalugaringon tinikangan pa la.

Basi maparig-on an pagtoo han usa, ginkikinahanglan an pagpauswag han iya espirituwal nga interes ngan pagpakita hin ‘tinguha ha espirituhanon nga gatas nga waray limbong.’ (1 Pedro 2:2; Hebreo 5:12-14) Sadang kita mangalimbasog nga magin pariho han iginhulagway han salmista: “Ha balaud ni Jehova aada an iya kalipay; ngan adlaw ug gab-i hiya namamalandong ha iya balaud.”—Salmo 1:2.

Labaw pa kay ha pagbasa la han Biblia an ginkikinahanglan hini. Importante nga hunahunaon naton an ginsisiring han Pulong han Dios ngan iaplikar an sagdon hito. (Jakobo 1:22-25) Sugad nga resulta, mag-uuswag an aton gugma ha Dios, magigin mas espisipiko ngan personal an aton pag-ampo, ngan magigin mas marig-on an aton pagtoo ha iya.

 An Bili han Ginsarihan nga Pagtoo

Tungod kay maaram kita nga an pagtoo importante gud basi makarawat an pag-uyon han Dios, nagigin determinado gud kita nga parig-onon ito. An Biblia nagpapahinumdom: “Kon waray pagtoo diri gud mahihimo nga makalipay ha Iya; kay kinahanglan nga an nadaop ha Dios tumoo nga amo hiya, ngan nga hiya magbabalos han ngatanan nga nagbibiling ha iya.” (Hebreo 11:6) Salit, kinahanglan naton subaron an tawo nga nanginyupo kan Jesus: “Tabangan mo an akon diri pagkamatinoohon.”—Markos 9:24.

An mga pagsari ha aton pagtoo makakabulig liwat ha iba. Pananglitan, kon namatayan hin hinigugma an usa nga Kristiano, an iya marig-on nga pagtoo ha saad han Dios nga pagkabanhaw nabulig ha iya. Hiya nagtataguminatay, kondi ‘diri nasusubo, sugad han iba nga waray paglaom.’ (1 Tesalonika 4:13, 14) An mga nakaobserba han nakakabulig nga gahum han pagtoo han usa nga Kristiano, makakasantop nga may-ada hiya gintatag-iya nga birilhon gud. Mahimo ini mag-aghat ha ira kasingkasing nga subaron an sugad nga pagtoo, nga magpapagios ha ira nga mag-aram han Pulong han Dios ngan magin sumurunod ni Jesu-Kristo.

Birilhon gud para kan Jehova an nasarihan nga pagtoo. Dugang pa, kon nasasarihan an aton pagtoo nahibabaroan naton kon may-ada ba ito tinuod nga nakakabulig nga gahum. Nabubuligan kita nga makita an mga kaluyahan ha aton pagtoo, nga nakakabulig ha aton ha pagtadong han aton kalugaringon. Ha kataposan, an aton paglampos ha mga pagsari mahimo makabulig ha iba nga magin sumurunod ni Jesus. Salit buhaton naton an aton bug-os nga mahihimo basi matipigan an marig-on nga pagtoo—pagtoo nga katapos masarihan hin damu ka beses “hiagian unta ha pagdayeg ngan kahimayaan ngan kadungganan kon magpahayag na hi Jesu-Kristo.”—1 Pedro 1:7.

[Footnote]

[Retrato ha pahina 13]

Tungod han mga buhat han pagtoo ni Abraham nagin sangkay hiya ni Jehova

[Mga Retrato ha pahina 15]

Mahimo mapamatud-an han mga pagsari kon an aton pagtoo may-ada tinuod nga nakakabulig nga gahum

[Ginkuhaan han Retrato ha pahina 12]

Tikang ha Illustrated Edition of the Holy Scriptures nira Cassell, Petter, & Galpin