Magin Andam ha Paghatag hin Kumendasyon ha Iba

NAKABATI ka na ba hin nagreklamo nga an iya agaron gutiay la an ginhahatag ha iya nga kumendasyon? May-ada ka ba liwat pariho hito nga eksperyensya? O kon usa ka nga batan-on, may-ada ka ba sugad nga reklamo ha imo mga kag-anak o magturutdo?

Bangin husto an pipira hini nga reklamo. Kondi sumala ha usa nga Aleman nga parasaliksik, kon may-ada hini nga reklamo an mga empleyado, an ira iginrireklamo diri an kakulang hin kumendasyon kondi an kawaray personal nga interes han ira agaron. Anoman an kahimtang, matin-aw nga may-ada kulang. An kumendasyon ngan an pag-abat nga interesado an iba ha imo, importante hinduro basi magkaada kita makapatagbaw nga relasyon.

Ini liwat an kahimtang may kalabotan ha aton pagsingba. An Kristiano nga kongregasyon kinahanglan hura ha pagpahayag hin kumendasyon, gugma, ngan personal nga interes. Naieksperyensyahan ngan natitipigan han mga membro han kongregasyon inin maopay nga kahimtang pinaagi ha pagsunod han giya han Biblia. Kondi, bisan kon hura na ha gugma an aton kongregasyon, posible pa gihapon nga mag-uswag ito. Samtang ginhuhunahuna ini, paghisgotan naton an tulo nga susbaranan ha paghatag hin kumendasyon: Hi Elihu nga surugoon han Dios ngan nabuhi antes kan Kristo, hi apostol Pablo, ngan hi Jesu-Kristo mismo.

Sagdon nga Nagpapakita hin Pagtahod

Hi Elihu, nga hirayo nga paryente ni Abraham, nagin instrumento ha pagbulig kan Job nga magin timbang ha iya relasyon ha Dios. Nagpakita hi Elihu hin pagtahod. Pasensyoso hiya nga naghulat han iya turno ha pagyakan. Ngan diri pariho han kasangkayan kuno ni Job nga namimiling la hin sayop, hi Elihu, labot la ha pagsagdon, andam ha paghatag hin kumendasyon kan Job tungod han iya matadong nga pagkinabuhi. Ginbuhat niya ito nga may-ada pagbati ngan personal nga interes sugad nga sangkay, ngan iya ginagamit an personal nga ngaran ni Job, diri pariho han iba. Matinalahuron hiya nga naghangyo: “Job, ako nanginginyupo ha imo, pamati han akon pakigpulong, ngan pamati han ngatanan ko nga pulong.” Matinalahuron nga nagpakita hiya hin empatiya, hiya nagsiring: “Kitaa, ako para han Dios bisan sugad man ha imo: ako man ginhitsura tikang ha kalot.” Ngan katapos naghatag hiya hin kumendasyon: ‘Kon may-ada ka isisiring, batona ako: pagyakan, kay nahuhunahuna ko an imo pagkamatadong.’—Job 33:1, 6, 32.

Ha usa nga bahin, an pagtratar ha iba ha matinalahuron nga paagi, sugad hin paghatag na hin kumendasyon ha ira. Baga hin ginsisidngan naton an aton mamarati, ‘Takos ka han akon atensyon ngan maopay nga pagtagad.’ Hito nga paagi, aton ipinapakita an aton gugma ngan personal nga interes ha iya.

 An pagin matinalahuron diri la nangangahulogan hin pagsunod han mga surundon han maopay nga pamatasan. Basi maabot an kasingkasing han iba, kinahanglan sinsero ngan kinasingkasing an aton pagin matinalahuron. Kinahanglan magin kapahayagan ito han tinuod nga interes ngan gugma.

Mataktika nga Paghatag hin Kumendasyon

Ipinakita ni apostol Pablo kon mationan-o kaepektibo an pagin mataktika ha paghatag hin kumendasyon. Pananglitan, samtang nagsasangyaw ha Atenas ha iya ikaduha nga pagbiyahe sugad nga misyonero, gindepensahan niya an Kristianidad ha pipira nga Griego nga makinaadmananon. Tigamni kon paonan-o niya gintuman inin makuri nga toka ha mataktika nga paagi. “An iba han mga makinaadmanon nga mga Epikureo, ngan mga Estoiko nakikiglaris ha iya. Ngan an iba nasiring: Ano ba an karuyag igyakan hini nga turaban? Ngan an iba: Daw hiya parasumat han mga dumuruong nga mga dios.” (Buhat 17:18) Bisan pa han sugad nga mga pulong, nagpabilin hiya nga kalmado ngan binaton: “Mga taga-Atenas, nakikita [ko] nga makidios kamo.” Imbes nga kondenahon an ira pagin idolatroso, iya ginkumendasyonan hira tungod han ira pagin relihiyoso.—Buhat 17:22, Maopay nga Sumat nga Biblia.

Salingkapaw ba hi Pablo? Diri gud. Maaram hiya nga diri niya buruhaton an paghukom ha iya mamarati; diri niya hinngangalimtan nga ignorante liwat hiya han kamatuoran hadto. An sugo ha iya amo an pagsangyaw, diri an paghukom. Tikang ha iya personal nga eksperyensya, iya hinbaroan an kamatuoran nga gin-uuyonan liwat han mga Saksi ni Jehova yana: An iba nga sinsero nga paradepensa han palso nga relihiyon, ha urhi nagin marig-on gud nga paradepensa han matuod nga pagsingba.

Epektibo an paagi han pakiistorya ni Pablo, ngan maopay an resulta hito. “An iba nga mga tawo, han pagtig-ob ha iya, nanoo; nga upod ha ira amo hi Dionisio nga Areopagohanon, ngan usa nga babaye, nga an ngaran Damaris, ngan an iba upod ha ira.” (Buhat 17:34) Maaramon gud para kan Pablo nga kumendasyonan an mga taga-Atenas tungod han ira sinsero nga pagtoo—bisan kon palso ito—imbes nga kondenahon hira tungod han ira kawaray husto nga kahibaro! Bisan an mga nagbubuhat hin sayop tungod han diri husto nga impormasyon agsob nga may-ada maopay nga kasingkasing.

Han ipatawag hi Pablo ni Herodes Agripa II basi magdepensa, mataktika nga ginbuhat niya ito. Kilala hi Herodes nga may imoral nga relasyon ha iya bugto nga hi Bernice, relasyon nga ginkukondenar gud han Pulong han Dios. Kondi, waray hiya kondenara ni Pablo. Lugod, nakabiling hi Pablo hin makatadunganon nga basihan basi kumendasyonan hiya. “Iginmamalipay ko, hadi Agripa, kay ako tipaghirimo hin depensa nakon ha imo atubangan niyan nga adlaw, han nahitutungod ha ngatanan nga mga bagay, nga iginsumbong ha akon han mga Judio. Labi pa gud, nga maaram ka ha ngatanan nga mga batasan ngan mga ginlalarisan han mga Judio.”—Buhat 26:1-3.

Maaramon gud para ha aton nga subaron hi Pablo ha pagin mataktika ha pagtratar ha iba! An paghatag hin kumendasyon ha igkasi-tawo, igkasi-estudyante, o katrabaho mahimo makaaghat hin maopay nga relasyon ngan panggawi. Pinaagi ha paghatag hin tinuod nga kumendasyon ha pag-abot han kasingkasing han iba, bangin maaghat naton an sinsero nga mga tawo nga bayaan an sayop nga pangatadongan ngan panggawi ngan karawaton an husto nga kahibaro.

An Hingpit nga Susbaranan ni Jesus ha Paghatag hin Kumendasyon

Hi Jesus naghatag hin kumendasyon. Pananglitan, han ginbanhaw ngan sinaka na hiya ha langit, ha paggiya han Dios, nakiistorya hiya ha pito nga kongregasyon ha Asia Minor pinaagi kan apostol Juan. Naghahatag hiya pirme hin kumendasyon ha mga takos hito. Ha mga kongregasyon ha Efeso, Pergamo, ngan Tiatira, gin-gamit niya an mga pulong sugad han: “Maaram ako han imo mga buhat, ngan kabudlayan, ngan pag-ilob, ngan diri ka makakaantos ha mga magraot nga mga tawo”; “ginbabantayan mo an akon ngaran, ngan waray mo iglirong an pagtoo ha akon”; ngan “maaram ako ha imo mga buhat, ngan an imo gugma, ngan an imo pagtoo, ngan an imo pagkaministro, ngan an imo pagpailob,  ngan, nga an imo urhi nga mga buhat labi pa kay han siyahan.” Bisan ha Sardis, diin nagkikinahanglan hin marig-on nga sagdon an kongregasyon, iya gintigamnan an mga takos hin kumendasyon, nasiring: “Kondi may-ada mo pira nga mga ngaran ha Sardis nga waray maghugaw han ira mga panapton: ngan maglalakat hira upod ha akon nga mga pinanaptonan hin busag; kay hira mga takos.” (Pahayag 2:2, 13, 19; 3:4) Maopay gud an susbaranan nga iginpakita ni Jesus!

Ha pagsubad kan Jesus, diri gud naton sadang kondenahon an bug-os nga grupo tungod la han kapakyasan han pipira, o maghatag hin ginkikinahanglan nga sagdon nga diri naghahatag hin angayan nga kumendasyon. Kondi, kinahanglan naton hinumdoman nga kon naghahatag la kita hin kumendasyon kon nagpaplano kita pagsagdon, bangin diri ito pamatian. Salit pirme paghatag hin kumendasyon ha ngatanan nga posible nga panahon! Hito nga paagi, kon pagkikinahanglanon an sagdon ha iba nga kahimtang, magigin mas masayon an pagkarawat hito.

Mga Tigurang nga Naghahatag hin Husto nga Kumendasyon

Hi Cornelia, nga nag-aalagad na yana ha usa nga sanga nga opisina han mga Saksi ni Jehova ha Europa, nahinunumdom nga temprano han dekada han 1970, ginkumusta han nagbibiyahe nga paramangno an iya personal nga pag-aram ngan pagbasa han magasin. “Baga hin naawod ako,” hiya nagsiring. Kondi nagsumat hiya nga diri niya nababasa an ngatanan nga artikulo han magasin. “Imbes nga sawayon ako tungod hito,” nahinumdom hiya, “iya ginkumendasyonan an akon nahimo. Nadasig gud ako hito ngan tikang hadto, nagin determinado ako ha pagbasa han ngatanan nga artikulo.”

 Hi Ray, nga nag-aalagad ha usa nga sanga nga opisina ha Europa, nahinunumdom han iya siyahan nga adlaw ha pagpayunir. An nangunguna nga paramangno han kongregasyon—nga may-ada trabaho, pamilya, ngan damu nga responsabilidad ha kongregasyon—sinulod ha Kingdom Hall hito nga gab-i ngan diretso nga dinaop ha iya ngan nagpakiana, “Kumusta an siyahan nga adlaw han imo pagpayunir?” Haros 60 ka tuig na an naglabay, kondi nahinunumdoman pa gihapon ni Ray an pagkamahunahunaon hito nga tigurang.

Sugad han iginpapakita han duha nga eksperyensya, epektibo gud an sinsero ngan mahigugmaon nga kapahayagan hin apresasyon ha nabuhat han iba—diri kay an basta la nga diri-kinasingkasing nga mga pulong ngan waray-hunahunaa nga pag-ulog-ulog. Ha Kristiano nga kongregasyon, damu an aton rason ha paghatag hin kumendasyon ha mga igkasi-tumuroo. Pananglitan, an ira hingyap ha pag-alagad kan Jehova, an ira inandam hin maopay nga mga komento, an ira pag-uswag nga malamposan an kaawod ha pagyakan ha kadaygan basi maipahayag an ira toka o makigbahin ha mga katirok, an ira kadasig ha pagsangyaw ngan pagtutdo, ngan an ira pangalimbasog ha pag-una han intereses han Ginhadian ngan espirituwal nga mga tumong. Kon naghahatag kita hin kumendasyon, hura nga bibendisyonan kita. Nalilipay kita ngan nabubuligan nga magin positibo.—Buhat 20:35.

Maopay gud para ha mga tigurang nga kumendasyonan an mga membro han kongregasyon tungod han mag-opay nga buhat hito. Ngan kon ginkikinahanglan an sagdon, ginhahatag nira ito ha mahigugmaon nga paagi. Ha luyo nga bahin, ginlilikyan nira an pagpinamiling hin kahingpitan, nga ira na gintatagad nga seryoso nga kaluyahan an diri pakakab-ot hito.

An mga tigurang nga nagsusubad han ehemplo han pagin matinalahuron ni Elihu, han mataktika nga pakiistorya ni Pablo, ngan han mahigugmaon nga pagtagad ni Jesus magigin surok han tinuod nga pagdasig ha ira kabugtoan. An kumendasyon makakaaghat ha iba nga mangalimbasog ngan makakabulig ito basi magkaada kita makalilipay ngan mamurayawon nga mga relasyon. Durante han bawtismo ni Jesus, sigurado nga nalipay hiya ha pakabati ha iya langitnon nga Amay nga naghatag hin kumendasyon ha iya nga nasiring: “Ikaw amo an akon Anak nga hinigugma; ha imo nalilipay gud ako”! (Markos 1:11) Hinaot makahatag kita hin kalipay ha aton kabugtoan pinaagi han aton sinsero ngan angayan nga mga kumendasyon.

[Mga Retrato ha pahina 15]

Naeksperyensyahan ni Pablo an mag-opay nga resulta tungod han mataktika nga pakiistorya, maieksperyensyahan liwat naton ito

[Retrato ha pahina 16]

Epektibo an may-ada gugma ngan sinsero nga kumendasyon