Mga Pakiana Tikang ha mga Magbarasa

Ano an iginpapasabot ni Jesus han siniring hiya nga an iya matinumanon nga uripon magigin “maaramon”?

Hi Jesus nagpakiana: “Hin-o gud an matinumanon ngan maaramon nga uripon nga gintaporan han iya agaron ha iya mga surugoon han panimalay, ha paghatag ha ira han ira pagkaon ha husto nga panahon?” (Mateo 24:45, NW) An “uripon” nga nagtatagana hin espirituwal nga “pagkaon” amo an kongregasyon han dinihogan han espiritu nga mga Kristiano. Kay ano nga gintawag hira ni Jesus nga maaramon? a

Mas masasabtan naton tikang ha katutdoan ni Jesus kon ano an iya posible ipasabot ha pulong nga “maaramon.” Pananglitan, han naghisgot hiya mahitungod han “matinumanon ngan maaramon nga uripon,” iginsumat niya an parabola han napulo nga uray nga naghuhulat ha pag-abot han karaslon. An mga uray nagpapahinumdom ha aton mahitungod han dinihogan nga mga Kristiano antes han 1914 nga naiikag ha paghulat han pag-abot han harangdon nga Karaslon, hi Jesu-Kristo. Ha napulo nga uray, lima an waray igo nga lana han inabot an karaslon, ngan waray hira makatambong ha panagtawo han kasal. Kondi, maaramon an iba nga lima. May-ada hira igo nga lana salit nakagpadayon ha pagpasanag hin kahayag ha pag-abot han karaslon ngan nakatambong ha panagtawo.—Mateo 25:10-12.

Han nagtikang pagmando hi Jesus ha iya Ginhadian han 1914, damu han dinihogan nga Kristiano an naglalaom nga makaupod dayon hiya ha langit. Kondi, damu pa an ira buruhaton ha tuna, ngan an iba diri andam para hito. Pariho han diri-maaramon nga mga uray, waray nira parig-ona hin abanse an ira kalugaringon ha espirituwal, salit diri hira andam ha pagpadayon sugad nga paradara hin kahayag. Kondi, kadam-an an ginios nga maaramon—nga may kinaadman ngan abanse nga pagsabot—ngan naparig-on ha espirituwal. Han hinbaroan nira nga damu pa an buruhaton, malipayon nga nangandam hira ha pagbuhat hito. Hito nga paagi, ira napamatud-an nga hira an “matinumanon ngan maaramon nga uripon.”

Tagda liwat an paggamit ni Jesus han pulong nga “maaramon” ha Mateo 7:24. Hiya nagsiring: “An tagsa-tagsa nga nakabati hini nga mga pulong nakon, ngan ira pagbuhaton, adto igsusugad ko han makinaadmananon [“maaramon,” NW] nga tawo, nga nagtindog han iya balay ha bawbaw han bato.” An maaramon nga tawo nagtutukod ha marig-on nga bato tungod han posibilidad han pagbagyo. Ha kabaliktaran, an lurong nagtutukod ha baras salit naguguba an iya balay. Tungod hito, an maaramon nga sumurunod ni Jesus amo an usa nga abanse nga nakakasabot han magraot nga resulta ha pagsunod han tawhanon nga kinaadman. An iya husto nga pagturutimbang ngan maopay nga pagdesisyon nabulig ha iya nga maibasar gud an iya pagtoo, buhat, ngan katutdoan ha ginsiring ni Jesus. “An matinumanon ngan maaramon nga uripon” naggios ha pariho nga paagi.

Tigamni liwat an paggamit han pulong nga “maaramon” ha damu nga bersyon han Hebreo nga Kasuratan. Pananglitan, ginpili ni Paraon hi Jose ha pagdumara ha suplay han pagkaon ha Ehipto. Bahin ini han kahikayan ni Jehova ha pagtagana hin pagkaon ha iya katawohan. Kay ano nga ginpili hi Jose? Hi Paraon nagsiring ha iya: “Waray usa nga barobatid [“maaramon,” NW] ngan labi kamakinaadmananon sugad ha imo.” (Genesis 41:33-39; 45:5) Ha pariho nga paagi, masisiring nga hi Abigail maaramon. Nagtagana hiya hin pagkaon ha usa nga dinihogan ni Jehova, hi David, ngan ha iya katawohan. (1 Samuel 25:3, 11, 18, NW) Hira Jose ngan Abigail mahimo hunahunaon nga maaramon tungod kay nasantop nira an kaburut-on han Dios ngan ginios nga may abanse nga pagsabot ngan maopay nga pagdesisyon.

Salit, han ginhulagway ni Jesus an matinumanon nga uripon sugad nga maaramon, iya iginpapasabot nga an mga ginrirepresentaran hito nga uripon may-ada husto nga pagturutimbang, abanse nga pagsabot, ngan maopay nga pagdesisyon tungod kay iginbasar nira an ira pagtoo, buhat, ngan katutdoan ha kamatuoran nga Pulong han Dios.

[Footnote]