Praktikal Pa ba Yana an “Daan nga Testamento”?

HAN 1786, usa nga Franses nga doktor an nagpublikar hin libro nga may ulohan nga Traité d’anatomie et de physiologie (Usa nga Paghisgot han Anatomiya Ngan Pisyolohiya). Gintagad ito nga an pinakahusto nga libro ha neurolohiya ngan anatomiya hito nga panahon, ngan an pipira nga nabibilin pa nga kopya hito bag-o la nga naibaligya ha kantidad nga sobra 27 ka yukot ka dolyar! Kondi, diri damu nga pasyente an matapod ha usa nga paraopera nga nagamit hin impormasyon tikang ha libro nga damu na ka siglo nga iginsurat. An pagin birilhon hito ha kasaysayan ngan ha literatura diri makakabulig ha usa nga masakit yana nga panahon.

Ito liwat an impresyon han damu nga tawo ha tinatawag nga Daan nga Testamento. Naaapresyar nira an asoy hito mahitungod han kasaysayan han Israel ngan naruruyagan an mag-opay nga siday hito. Kondi, ginruruhaduhaan nira kon praktikal pa ba an pagsunod han giya nga sobra 2,400 ka tuig na nga iginsurat. An kahibaro yana ha syensya, komersyo, ngan bisan ha pagpamilya iba na gud kay ha panahon nga iginsurat an Biblia. Hi Philip Yancey, usa nga editor hadto han Christianity Today, nagsurat ha iya libro nga The Bible Jesus Read: “Diri ito pirme praktikal, ngan an bahin hito nga praktikal gud unta diri naruruyagan han mga tawo yana. Tungod hini ngan han iba pa nga hinungdan, an Daan nga Testamento—nga sobra ha katunga han Biblia—kasagaran nga diri ginbabasa.” Diri na bag-o ito nga opinyon.

Paglabay hin haros 50 ka tuig han namatay hi apostol Juan han mga 100 K.P., usa nga riko nga batan-on nga hi Marcion an nagsiring ha publiko nga diri sadang karawaton han mga Kristiano an Daan nga Testamento. Sumala ha historyador han Inglatera nga hi Robin Lane Fox, hi Marcion nagsiring nga an “‘Dios’ ha Daan nga Testamento ‘sobra ka madarahog’ nga nasuporta ha mga rebelde ngan mga terorista sugad kan Hadi David han Israel. Ha kabaliktaran, hi Kristo an bag-o ngan naiiba gud nga mas maopay nga Dios.” Hi Fox nagsurat nga ini nga gintotoohan “gintawag nga ‘Marcionismo’ ngan padayon nga nakadani ito hin mga sumurunod, labi na ha Este nga Syriac an pinulongan, ha kadak-an nga bahin han ikaupat ka siglo.” Gintotoohan pa gihapon ini. Sugad nga resulta, paglabay hin 1,600 ka tuig, hi Philip Yancey nagsurat, “an kahibaro ha Daan nga Testamento madagmit nga nagtitikawara ha mga Kristiano ngan haros nawara na ha moderno nga sosiedad.”

Ginsaliwnan na ba an Daan nga Testamento? Paonan-o naton maipapahiuyon an aton pagsabot ha “Jehova han mga kasundalohan” nga nakasurat ha Daan nga Testamento ha “Dios han paghigugma ngan paghidait” ha Bag-o nga Testamento? (Isaias 13:13; 2 Korinto 13:11) Mapapahimulosan mo pa ba an Daan nga Testamento yana?