Kay Ano nga Gintutugotan han Dios an Karaotan?

BISAN diin ka sumiplat makakakita ka hin karaotan ngan pag-antos. An mga sibilyan ngan sundalo namamatay ha girra. An krimen ngan kamadarahog ordinaryo na la. Bangin bag-o la nga nabiktima ka hin pagpasulabi o kawaray hustisya. Tungod han imo nakita ngan naeksperyensyahan, bangin nakagpakiana ka, ‘Kay ano nga gintutugotan han Dios an karaotan?’

Ito nga pakiana diri bag-o. Mga 3,600 ka tuig an naglabay, an maunungon nga surugoon han Dios nga hi Job nagpakiana: “Kay ano nga an magraot [padayon nga] nabubuhi?” (Job 21:7) Tungod kay nasubo an propeta nga hi Jeremias han ikapito ka siglo A.K.P. han magraot nga buhat han iya kahimungto, hiya nagpakiana: “Kay ano nga an paagi han maghugaw nauswag? Kay ano nga aada ha kahimugaway hira ngatanan nga nanunulos ha malimbungon?” (Jeremias 12:1) Hira Job ngan Jeremias maaram nga an Dios matadong. Kondi, nahipausa hira kon kay ano nga kalyap an karaotan. Bangin nahipausa ka liwat hini.

Ginbabasol han pipira nga tawo an Dios tungod han karaotan ngan pag-antos. An iba napakiana: ‘Kon an Dios makagarahum-ha-ngatanan, matadong, ngan mahigugmaon, kay ano nga diri niya gintatapos an karaotan ngan pag-antos? Kay ano nga gintutugotan niya an karaotan nga magpadayon tubtob ha aton panahon?’ Paghihisgotan han masunod nga artikulo an mga baton hini ngan an iba nga importante nga mga isyu.

[Ginkuhaan han Retrato ha pahina 3]

AP Photo/Adam Butler