Kon Paonan-o Makukultibar an Gugma ha Dios ha Kasingkasing han Imo Anak

MAKURI gud para ha usa ka tawo yana nga makakultibar hin duok nga relasyon kan Jehova nga Dios. (Salmo 16:8) Sugad han igintagna, nagkikinabuhi kita ha “magpakalilisang nga mga panahon.” Kadam-an han tawo an “mahigugmaon ha kalipayan labi kay ha paghigugma ha Dios.” (2 Timoteo 3:1-5) Oo, talagsa na gud mabilngan an tinuod nga gugma ha Dios ha kalibotan yana.

An pagtubo han gugma ha Dios ha kasingkasing han bata diri mahihimo kon diri pangalimbasogan. Kinahanglan kultibaron ha kasingkasing han aton anak an gugma kan Jehova. Paonan-o naton mahihimo ito?

Kinasingkasing nga Komunikasyon

Makukultibar naton an gugma ha Dios ha kasingkasing han aton anak kon an aton kalugaringon nga kasingkasing puno hin gugma ha iya. (Lukas 6:40) Ini an iginpapasabot han Biblia han ito siniring: “Higugmaon mo hi Jehova nga imo Dios ha imo bug-os mo nga kasingkasing, ngan ha bug-os mo nga kalag, ngan ha bug-os mo nga kusog. Ngan ini nga mga pulong nga akon iginsugo ha imo hini nga adlaw mahasulod ha imo kasingkasing; ngan igtutdo mo hira kamainuyatmon ha imo mga anak.”—Deuteronomio 6:4-7.

Paonan-o naton makukultibar an gugma ha Dios ha kasingkasing han aton anak? Siyahan, kinahanglan hibaroan naton an aada ha iya kasingkasing. Ikaduha, kinahanglan ipakita naton kon ano an aada ha aton kasingkasing.

Han hi Jesu-Kristo ngan an iya duha nga disipulo nakadto ha dalan tipakadto ha Emaus, iya anay gin-aghat hira nga ipahayag an ira mga ginlalaoman ngan ginkakabarak-an. Ginpamatian anay hira ni Jesus antes tadungon an ira panhunahuna pinaagi ha pagsaysay han Kasuratan. Ha urhi hira nagsiring: “Waray ba magpaso an aton mga kasingkasing ha aton, han nagyiyinakan hiya ha aton?” Ito nga pag-istorya usa nga ehemplo han kinasingkasing nga komunikasyon. (Lukas 24:15-32) Paonan-o naton mahibabaroan an inaabat han aton anak?

Hinin bag-o la, ginpakianhan an pipira nga kag-anak, nga an mga anak susbaranan nga adulto o nagtitikaadulto, mahitungod han kinasingkasing nga komunikasyon. Pananglitan ha Mexico, hi Glen may-ada upat nga dagku na nga anak. a Hiya nagsiring: “An abrido nga komunikasyon han kag-anak ngan anak diri awtomatiko nga nahitatabo. Gutiay la nga panahon an amon igingagahin nga mag-asawa ha diri importante nga buruhaton basi magkaada mas damu nga panahon ha amon mga anak. Han tinedyer pa hira, usahay ginagamit namon an bug-os nga gab-i kaupod ha ira, nakikig-inistorya mahitungod hin bisan ano nga ira nahuhunahunaan. Durante han pangaon, nasasantop namon an ira problema pinaagi ha pagpamati han ira uruistorya, ngan mahigugmaon nga gintatadong an ira sayop nga mga hilig. Ngan agsob nga diri nira hinbabaroan nga ginsasaway na ngay-an hira.”

An kinasingkasing nga komunikasyon nag-uupod liwat ha pagpahayag kon ano an aada ha aton kasingkasing. Hi Jesus nagsiring: “An maopay nga tawo [napagowa] han maopay nga manggad han iya kasingkasing, . . . kay an kahuraan han kasingkasing amo an iginyayakan han baba.” (Lukas 6:45) Hi Toshiki nga an tulo nga anak aada ha bug-os-panahon nga pag-alagad ha Japan, nasiring: “Damu ka beses nga ginsumatan ko hira kon kay ano nga nagkaada ako pagtoo kan Jehova—kon paonan-o ako tinoo gud nga naeksister hiya ngan kon paonan-o an akon eksperyensya nakakombinse ha akon nga tinuod an Biblia ngan ito an gimaopayi nga giya ha kinabuhi.” Ha Mexico, hi Cindy nasiring: “An akon bana pirme nag-aampo upod han amon mga anak. Kon hinbabatian nira an iya kinasingkasing nga pag-ampo, nasasantop nira nga hi Jehova diri imahinasyon la.”

An Marig-on nga Impluwensya han Aton Ehemplo

Mas nakakaimpluwensya an aton pagkinabuhi kay han aton ginyayakan, tungod kay ipinapakita hito ha aton anak kon mationan-o naton hinigugma  an Dios. Pinaagi ha pag-obserba han pagkamasinugtanon ni Jesu-Kristo kan Jehova, masasantop han mga tawo an kahilarom han iya gugma ha Dios. ‘Basi nga an kalibotan kumilala nga hinigugma ko an Amay,’ nagsiring hi Jesus, ‘sugad nga an Amay nagsugo ha akon, ito an akon ginbubuhat.’—Juan 14:31.

Hi Gareth nga usa nga Saksi ha Wales, nasiring: “Kinahanglan makita han amon mga anak nga hinigugma namon hi Jehova ngan nangangalimbasog kami ha pagsunod ha iya. Pananglitan, nakikita nira nga ha pagsunod ha Dios, ginkakarawat ko an akon mga sayop. Ito liwat an ira ginbubuhat yana.”

Hi Greg nga Australiano nasiring: “Karuyag namon makita han amon mga anak nga an kamatuoran amo an pinakaimportante ha amon kinabuhi. Kon nagpipili kami hin trabaho o mulay, ginhuhunahuna anay namon kon paonan-o maaapektohan hito an amon mga obligasyon sugad nga Kristiano. Nalilipay kami nga makita nga gin-aaplikar ini han amon 19 anyos nga anak ha iya pag-auxiliary payunir.”

Pagbulig ha Aton mga Anak nga Makasabot Mahitungod ha Dios

Diri kita mahibabaro ha paghigugma o pagsarig ha usa nga diri naton hinsasabtan. Han karuyag ni apostol Pablo nga an mga Kristiano ha Filipos mag-uswag ha ira gugma kan Jehova, hiya nagsurat: “Ini an akon igin-ampo, nga an iyo gugma magtubo gud kaopay ha kaaram ngan ha ngatanan nga sarabotan.” (Filipos 1:9) Ha Peru, hi Falconerio nga may upat nga anak nasiring: “An regular nga pagbasa ngan pag-aram han Biblia kaupod ha ira nagpaparig-on han ira pagtoo. Usahay napapasibay-an ko ito, ngan naoobserbahan ko nga nagluluya an ira gugma ha Dios.” Hi Gary nga taga-Australia nasiring: “Agsob ko ipakita ha akon mga anak an ebidensya nga natutuman an mga tagna ha Biblia. Iginsusumat ko liwat ha ira an kapulsanan ha pag-aplikar han mga prinsipyo ha Biblia. An amon regular nga panpamilya nga pag-aram amo an yawi han pagin marig-on han ira pagtoo.”

Mas madagmit maabot an kasingkasing han bata ha diri pormal kondi may pagtahod nga kahimtang diin makalilipay an paghibaro. (Jakobo 3:18) “Durante han amon panpamilya nga pag-aram han Biblia, nangangalimbasog kami nga diri isgan an amon mga anak, bisan kon baga hin maaringasa hira,” siring nira Shawn ngan Pauline  nga taga-Britanya nga may-ada upat nga anak. “Ginbuburubag-o namon an paagi han amon pagdumara hin pag-aram. Usahay gin-aaghat namon an amon mga anak nga pumili hin topiko. Ginagamit namon an mga video han organisasyon ni Jehova. Usahay ginbabalik namon an usa nga bahin o gin-uundang ito basi paghisgotan.” Usa nga iroy ha Britanya nga hi Kim nasiring: “Gin-aadman ko gud an amon panpamilya nga pag-aram basi makabangon ako hin pakiana nga makakaaghat ha akon mga anak nga maghunahuna. Nalilipay kami ha pag-aram. Nagkakaragtatawa pa ngani kami.”

Pagpili hin Kasangkayan

Mas masayon makultibar ha aton mga anak an gugma kan Jehova ngan an apresasyon ha husto nga pagsingba kon napapalibotan hira hin mga tawo nga sangkay han Dios. An paghimo hin plano basi an aton mga anak magkaada kaistorya ngan kamulay nga positibo nga makakaimpluwensya ha ira nagkikinahanglan hin pangalimbasog. Kondi may balos gud an pagbuhat hito! Dugang pa, mapulsanon an paghimo hin mga paagi nga makaistorya han aton anak an mga Saksi nga naghimo han bug-os-panahon nga pag-alagad nga ira karera. Damu an sinulod hito tungod han pakig-upod ha magdasigon nga surugoon han Dios. Usa nga bugto nga nagin misyonera an nasiring: “Damu ka beses nga nag-iimbitar an akon mga kag-anak hin mga payunir ha pangaon. Nakita ko nga malipayon gud hira ha ira ministeryo salit naruyag liwat ako mag-alagad ha Dios ha sugad hito nga paagi.”

Syempre, an disposisyon han aton mga anak mahimo maimpluwensyahan ha positibo o negatibo nga paagi. Kon sugad, an peligro nga magkaada maraot nga kaupod an aton anak nagsasari han aton abilidad sugad nga mga kag-anak. (1 Korinto 15:33) Ginkikinahanglan an maopay nga pamaagi ha pagtutdo ha aton anak kon paonan-o malilikyan an pakig-upod ha mga diri nahigugma o nakilala kan Jehova. (Proberbios 13:20) Hi Shawn nga ginkotar kanina, nasiring: “Amon gintututdoan an amon mga anak nga magin buotan ha ira kaeskwela kondi ito nga pakigsangkay kinahanglan magpabilin ha eskwelahan la. Hinsasabtan han amon mga anak kon kay ano nga diri hira sadang makigbahin ha ekstrakurikular o mga isport ha eskwelahan.”

An Kapulsanan han Pagbansay

Pinaagi ha pagbansay han aton mga anak nga isaysay an ira gintotoohan, binubuligan naton hira nga magkaada kalipay ha pagpahayag han ira gugma ha Dios. Hi Mark nga taga-Estados Unidos nasiring: “Karuyag namon abaton han amon mga anak nga mahimo hira makabiling hin kalipay ha pagsumat han ira gintotoohan ha iba ha anoman nga panahon, diri la kon nagsasangyaw hira ha pormal nga paagi. Salit kon namamasyada kami ha parke, baybayon, o kagurangan, nagdadara kami hin mga Biblia ngan literatura, ngan nakikiistorya mahitungod han amon gintotoohan. Nalilipay gud an amon mga anak hiton diri pormal nga pagsangyaw. Naapi hira ha pakiistorya ngan nagsusumat liwat mahitungod han ira pagtoo.”

Damu an ginbuligan han lagas nga hi apostol Juan nga mag-uswag ha ira gugma ha Dios. Mahitungod ha ira, hiya nagsurat: “Waray ko na kalipay nga labaw hini, ha pamati nga an akon [espirituwal nga] mga anak nanggagawi ha kamatuoran.” (3 Juan 4) Kon kukultibaron naton an gugma ha Dios ha kasingkasing han aton mga anak, sigurado nga maieksperyensyahan naton iton pariho nga kalipay.

[Footnote]

[Mga Retrato ha pahina 9]

An kinasingkasing nga pag-uroistorya mahitungod han aton pagtoo diri awtomatiko nga nahitatabo

[Retrato ha pahina 10]

Bansaya an imo mga anak ha pagpahayag han ira gugma ha Dios

[Ginkuhaan han Retrato]

Ha pagtugot han Green Chimneys Farm