Mga Pakiana Tikang ha mga Magbarasa

Tungod kay ginsugo an mga Judio nga diri gumamit hin ‘ipaturubo’ durante han Paskua, kay ano nga ginamit hi Jesus hin alaksiw nga produkto han permentasyon, han iya gintikangan an Memoryal han iya kamatayon?—Eksodo 12:20; Lukas 22:7, 8, 14-20.

An pagsaurog han Paskua nga tigaman han pagbaya han mga anak ni Israel ha Ehipto gintikangan han 1513 A.K.P. Han naghatag hi Jehova hin instruksyon kon paonan-o ito sasaurugon, hiya nagsiring: ‘Diri kamo kumaon hin may-ada iparatubo; ha ngatanan nga iyo urukyan makaon kamo hin tinapay nga waray iparatubo.’ (Eksodo 12:11, 20) Ini nga surundon nga tikang ha Dios aplikado la ha klase hin tinapay nga ira kakaunon durante han Paskua. Waray ito mag-unabi hin alaksiw.

Nagkaada hini nga surundon tungod kay inapura an pagbaya han mga Israelita ha Ehipto. “An mga tawo kinuha han ira minasa nga waray pa pagbubutangi hin iparatubo,” siring han Eksodo 12:34, ngan “an ira mga marasahan nga pinutos han ira mga panapton ha bawbaw han ira mga abaga.” An diri paggamit hin ipaturubo durante han sunod nga mga pagsaurog han Paskua magpapahinumdom han masunod nga mga henerasyon hinin importante nga panhitabo.

Inabot an panahon, agsob tagdon han mga tawo an ipaturubo sugad nga simbolo han sala o kahugaw. Pananglitan, ha paghisgot mahitungod hin maraot nga tawo ha sulod han Kristiano nga kongregasyon, hi apostol Pablo nagpakiana: “Diri ba kamo maaram nga an gutiay nga ipaturubo nakakapatubo ha bug-os nga minasa?” Katapos hiya nagsiring: “Kuhaa niyo an daan nga ipaturubo, basi kamo mahimo nga bag-o nga minasa, sugad nga waray kamo pagpatuboa. Kay an aton pesach iginhalad na nga amo hi Kristo: Busa pagtumanon ta an pesach, diri ha daan nga ipaturubo, bisan ha ipaturubo nga kasal-anan ngan karaotan, kondi ha diri pinatubo nga tinapay han minatuod gud ngan han kamatuoran.” (1 Korinto 5:6-8) An tinapay nga waray ipaturubo la an mahimo gamiton sugad nga simbolo han waray sala nga tawhanon nga lawas ni Jesus.—Hebreo 7:26.

An paggamit han alaksiw ha pagsaurog han Paskua igindugang na la ha urhi han mga Judio. Posible nga igindugang ito han binalik hira tikang ha ira pagkadistyero ha Babilonya. Waray rekord ha Biblia nga nagdidiri hini nga pagdugang, ngan tungod hito husto nga magagamit ni Jesus an alaksiw ha pangaon ha Paskua. Syempre, naiiba an natural nga proseso han permentasyon ha alaksiw ha kadaan nga panahon ha permentasyon ha tinapay. May kalabotan ha minasa, kinahanglan butangan ito hin beking o ipaturubo. An alaksiw nga tikang ha ubas diri na nagkikinahanglan hito tungod kay an ubas may-ada na mga sangkap para ha proseso han permentasyon. Waray puro nga duga hin ubas durante han Paskua tungod kay mag-aaslom na ito tikang ha pagpamuro han katrakdag tubtob ha Paskua han katsaringsing.

Kon sugad, an paggamit ni Jesus han alaksiw nga emblema ha Memoryal diri natalapas ha anoman nga paagi ha mga surundon han Paskua may kalabotan ha ipaturubo. Bisan ano nga mapula nga alaksiw nga waray butangi hin pampatam-is, pampapintas, o sangkap angayan nga simbolo han “hamili nga dugo” ni Kristo.—1 Pedro 1:19.