Namumunga Bisan ha Pagkatigurang

DAMU nga tawo ha katunaan ha Mediteranyo an nagtatanom hin mga datiles nga palma ha palibot han ira balay. Kilala ini nga mga kahoy tungod han kaanyag ngan marasa nga bunga hito. Dugang pa, padayon nga namumunga ito ha sulod hin sobra usa ka gatos ka tuig.

Pinaagi hin siday, iginhulagway ni Hadi Salomon han kadaan nga Israel nga an hitsura han mahusay nga Sulamita pariho han kahoy nga palma. (Kanta ni Salomon 7:7) An libro nga Plants of the Bible nasiring: “An Hebreo nga pulong para ha datiles nga palma amo an ‘tàmâr.’ . . . Ha mga Judio nagin simbolo ito han kahusay ngan pagkaelegante ngan agsob nga ginagamit nira ito sugad nga ngaran han kababayin-an.” Pananglitan, an mahusay nga bugto-ha-amay ni Salomon ginngaranan hin Tamar. (2 Samuel 13:1) Iginngangaran pa gihapon ito yana han iba nga kag-anak ha ira mga anak nga kababayin-an.

Diri la maghusay nga kababayin-an an iginpapariho ha palma nga kahoy. An salmista nagkanta: “An tawo nga matadong maburak sugad han buri nga kahoy; maturok hiya sugad hin sedro han Lebanon. Gintanom hira dida ha balay ni Jehova; maburak hira dida ha mga bungsaran han aton Dios. Mamumunga la gihapon hira bisan ha ira pagkatigurang; ngan hira magigin tagukon ngan hilaw.”—Salmo 92:12-14.

Ha simboliko nga pagkayakan, adton matinumanon nga nag-aalagad kan Jehova bisan ha ira kalagas pariho gud ha elegante nga palma nga kahoy. “An ubanon nga ulo amo an pudongpudong han himaya; [kon] ini hiaagian dida ha dalan han pagkamatadong,” siring han Biblia. (Proberbios 16:31) Bisan kon nagtitikaluya hira ha pisikal tungod han ira pagtikalagas, makakapabilin hira nga makusog ha espirituwal pinaagi han regular nga pag-aram ha Pulong han Dios, an Biblia. (Salmo 1:1-3; Jeremias 17:7, 8) Tungod han makaruruyag nga mga pulong ngan mag-opay nga susbaranan han magtinumanon nga kalagasan, nadadasig gud nira an iba ngan padayon nga namumunga kada tuig. (Tito 2:2-5; Hebreo 13:15, 16) Pariho han datiles nga palma, makakapamunga hira bisan kon lagas na.