“Ano an Kamatuoran?”

ITO an iginpakiana kan Jesus han maruhaduhaon nga Romano nga gobernador nga hi Ponsio Pilato. Diri hiya interesado hin baton, ngan waray bumaton hi Jesus. Bangin naghunahuna hi Pilato nga an kamatuoran makuri gud masabtan.—Juan 18:38.

Pariho kan Pilato, damu yana an nagruruhaduha ha kamatuoran, upod na an mga lider han relihiyon, mga magturutdo, ngan mga politiko. Natoo hira nga an kamatuoran nadepende la ha tawo ngan pirme nagbabag-o—labi na an kamatuoran mahitungod ha moral ngan ha espirituwal. Syempre, nagpapasabot ini nga makakagbuot an mga tawo kon ano an husto ngan an sayop para ha ira. (Isaias 5:20, 21) Ipinapakita liwat hito nga sadang nira isalikway an daan na nga mga prinsipyo ngan mga suruklan ha moral han naglabay nga mga henerasyon.

Makatirigamnan an pahayag nga nakaaghat kan Pilato nga magpakiana. Hi Jesus nagsiring: “Tungod hini nagpakatawo ako ngan tungod hini ako kinanhi ha kalibotan, basi ako magtestigo han kamatuoran.” (Juan 18:37) Para kan Jesus, an kamatuoran klaro, nasasabtan. Nagsaad hiya ha iya mga disipulo: “Kamo mahibabaro han kamatuoran, ngan an kamatuoran magluluwas ha iyo.”—Juan 8:32.

Diin mabibilngan an sugad nga kamatuoran? Ha usa nga higayon, hi Jesus nagsiring ha pag-ampo ha Dios: “An imo pulong amo an kamatuoran.” (Juan 17:17) An Biblia nga iginsurat pinaagi han giya han Dios, nagsusumat han kamatuoran nga naghahatag hin masasarigan nga giya ngan sigurado nga paglaom ha tidaraon—kinabuhi nga waray kataposan.—2 Timoteo 3:15-17.

Waray pagtagad nga iginsalikway ni Pilato an higayon nga mahibaro han sugad nga kamatuoran. Kumusta ka man? Kay ano nga diri ka magpakiana ha mga Saksi ni Jehova kon ano “an kamatuoran” nga igintutdo ni Jesus? Malilipay hira ha pagsumat ha imo hito nga kamatuoran.