Katalwasan Tikang ha mga Lit-ag han Parapanakop hin Tamsi

‘Babawion ka ni Jehova tikang ha laang [“lit-ag,” NW] han parapanakop hin tamsi.’—SALMO 91:3.

1. Hin-o ‘an parapanakop hin tamsi,’ ngan kay ano nga peligroso hiya?

 AN NGATANAN nga tinuod nga Kristiano namimeligro ha kaaway nga tuso ngan labaw ha tawo an intelihensya. Ha Salmo 91:3 tinatawag hiya nga ‘parapanakop hin tamsi.’ Hin-o ini nga kaaway? Tikang pa han Hunyo 1, 1883 nga gowa hini nga magasin, iginpakilala na nga hiya amo hi Satanas nga Yawa. Inin gamhanan nga kaaway tuso nga nangangalimbasog ha paglimbong ngan paglit-ag ha katawohan ni Jehova sugad han ginbubuhat han parapanakop hin tamsi.

2. Kay ano nga hi Satanas iginpariho ha parapanakop hin tamsi?

² Ha kadaan nga panahon, an mga tamsi gindadakop tungod han ira makaruruyag nga huni, kolor han barahibo, ngan para ha pagkaon ngan paghalad. Kondi, kinaiya na han mga tamsi an pagin maikmat, mailayat, ngan makuri madakop. Salit ha kadaan nga panahon, gin-aadman anay hin maopay han parapanakop an mga kinaiya han mga tamsi nga karuyag niya madakop. Katapos, nagamit hiya hin tuso nga mga paagi basi madakop ito. Ha Biblia, an mga paagi ni Satanas iginpapariho ha paagi han parapanakop hin tamsi, ngan nabulig ito ha aton nga masabtan an iya mga paagi. Gin-aadman han Yawa an kada usa ha aton. Inoobserbahan niya an aton mga batasan ngan kinaiya ngan naghihimo hiya hin diri-nakikita nga mga lit-ag basi madakop kita nga buhi. (2 Timoteo 2:26) Kon madakop kita niya, mangangahulogan ito hin kadaot han aton relasyon ha Dios ngan mahimo magresulta ha bug-os nga kabungkagan naton. Salit, basi mapanalipdan kita, kinahanglan hibaroan naton an magkalain-lain nga paagi han ‘parapanakop hin tamsi.’

3, 4. Paonan-o an mga taktika ni Satanas pariho han mga taktika han leon? han kobra?

³ Pinaagi han matin-aw nga paghulagway, iginpariho liwat han salmista an mga paagi ni Satanas ha mga taktika han nati nga leon o han kobra. (Salmo 91:13) Pariho han leon, usahay ginagamit ni Satanas an direkta nga mga pag-atake ha katawohan ni Jehova pinaagi han pagtimaraot o mga balaud han gobyerno. (Salmo 94:20) An sugad kabangis nga mga pag-atake mahimo magin hinungdan nga bayaan han iba hi Jehova. Kondi, agsob gud nga inin direkta nga mga pag-atake nagriresulta lugod hin pagkaurosa han katawohan ni Jehova. Pero, paonan-o ginbubuhat ni Satanas an mas tuso, sugad-kobra nga mga pag-atake?

⁴ Ginagamit han Yawa an iya labaw ha tawo nga intelihensya ha paghimo hin malimbong ngan makamaratay nga mga pag-atake pariho hin malara nga halas ha gintatagoan hito. Hini nga paagi, naglalampos hiya ha paghilo ha hunahuna han iba han katawohan han Dios, ginlilimbongan hira nga buhaton an iya kaburut-on imbes nga an kaburut-on ni Jehova, ngan makamaratay gud an resulta. Makalilipay, diri kita ignorante ha mga paagi ni Satanas. (2 Korinto 2:11) Aton paghisgotan yana an upat han makamaratay nga lit-ag nga ginagamit han ‘parapanakop hin tamsi.’

Kahadlok ha Tawo

5. Kay ano nga epektibo gud an lit-ag nga “kahadlok ha tawo”?

⁵ Maaram an ‘parapanakop hin tamsi’ han natural nga hingyap han tawo nga karawaton ngan karuyagan han iba. An mga Kristiano nagtatagad han panhunahuna ngan inaabat han iba. Tungod kay maaram hini an Yawa, iya ginsasalingabot an ira kabaraka ha kon ano an huhunahunaon han mga tawo ha ira. Pananglitan, ginlilit-agan niya an iba han katawohan han Dios nga ‘mahadlok ha tawo.’ (Proberbios 29:25) Kon an mga  surugoon han Dios naupod ha iba ha pagbuhat han igindidiri ni Jehova o diri nagbubuhat han iginsusugo han Pulong han Dios tungod ha kahadlok ha tawo, nalilit-agan na hira han ‘parapanakop hin tamsi.’—Esekiel 33:8; Jakobo 4:17.

6. Ano nga ehemplo an nag-iilustrar nga mahimo malit-agan han ‘parapanakop hin tamsi’ an usa nga batan-on?

⁶ Pananglitan, an usa nga batan-on bangin magsigarilyo tungod kay ginpirit hiya han iya mga kaeskwela. Bangin waray gud niya mahunahuna an pagsigarilyo han tipakadto hiya ha eskwelahan hito nga adlaw. Kondi, waray pag-iha, ginbubuhat na niya an nakakadaot ha iya kahimsog ngan diri nakakalipay ha Dios. (2 Korinto 7:1) Paonan-o hiya nasulay? Posible nga nakig-upod hiya ha diri mag-opay nga kaupod ngan nahadlok nga diri hiya maruyagan nira. Mga batan-on, ayaw gud kamo pagpasulay ngan pagpalit-ag ha ‘parapanakop hin tamsi’! Basi diri madakop nga buhi, likayi gud bisan an gutiay la nga pagkompromiso. Sunda an pahamangno han Biblia nga likyan an magraot nga kaupod.—1 Korinto 15:33.

7. Ano an bangin buhaton ni Satanas basi diri magin timbang ha espirituwal an mga kag-anak?

⁷ An Kristiano nga mga kag-anak nagtutuman gud han ira Kasuratanhon nga responsabilidad ha pagtagana han materyal nga panginahanglan han ira pamilya. (1 Timoteo 5:8) Kondi, tumong ni Satanas nga magin diri-timbang an mga Kristiano may kalabotan hini. Bangin mahiara hira nga diri tumambong ha mga katirok tungod kay nauyon na la hira ha pagpirit han ira agaron nga mag-overtime. Bangin mahadlok hira ha paghangyo hin bakasyon basi makatambong ha ngatanan nga sesyon han distrito nga kombensyon basi magsingba kan Jehova upod an ira kabugtoan. An panalipod kontra hini nga lit-ag amo an ‘pagsarig kan Jehova.’ (Proberbios 3:5, 6) Dugang pa, an paghinumdom nga kita ngatanan membro han panimalay ni Jehova ngan karuyag gud niya nga mangnoan kita mabulig ha aton nga magpabilin nga timbang. Mga kag-anak, natoo ba kamo nga ha anoman nga paagi hi Jehova magmamangno ha iyo ngan ha iyo pamilya kon bubuhaton niyo an iya kaburut-on? O madadakop ba kamo nga buhi han Yawa ngan malilit-agan niya nga buhaton an iya kaburut-on tungod ha kahadlok ha tawo? Ginsasagda namon kamo nga pamalandungon ini nga mga pakiana.

An Lit-ag han Materyalismo

8. Ha ano nga paagi ginagamit ni Satanas an paon han materyalismo?

⁸ Ginagamit liwat ni Satanas an paon han materyalismo basi mahilit-ag kita. Agsob nga igin-aaghat han komersyo hini nga kalibotan an mga estratihiya han tigda nga pagriko nga bangin makalimbong pa ngani ha iba nga katawohan han Dios. Usahay an mga indibiduwal bangin sagdahon: “Pangalimbasog ha imo trabaho. Kon damu na an imo kwarta, puydi ka na magrelaks ngan magpahayahay. Mahimo ka pa ngani magpayunir.” Bangin ito an diri-timbang nga pangatadongan han iba nga nakakabentaha ha pinansyal ha ira kabugtoan ha kongregasyon. Hunahunaa hin maopay ito nga pagsagda. Diri ba iginpapahayag hito an panhunahuna han “kulang-kulang” nga riko ha parabola ni Jesus?—Lukas 12:16-21.

9. Kay ano nga an iba nga Kristiano bangin mahilit-ag tungod han paghingyap hin mga butang?

⁹ Ginpapagios ni Satanas an iya maraot nga sistema ha paagi nga nag-aaghat ha mga tawo nga maghingyap hin mga butang. Ito nga hingyap makakadaot ha kinabuhi han usa nga Kristiano ha kaurhian, malulumsan an pulong ngan diri  ito ‘magmamabungahon.’ (Markos 4:19) An Biblia nag-aaghat ha aton nga magin kontento na kon may-ada kita pagkaon ngan iginpapanapton. (1 Timoteo 6:8) Kondi, damu an nalit-agan han ‘parapanakop hin tamsi’ tungod kay diri nira ginsusunod ito nga sagdon. Posible ba nga tungod ha ira pagpahitaas naghuhunahuna hira nga kinahanglan maipadayon nira an ira estilo han pagkinabuhi? Kumusta man kita? Tungod ba han aton hingyap ha pagkaada hin mga butang nagigin ikaduha na la an tinuod nga pagsingba? (Hagay 1:2-8) Makasurubo nga ha panahon han kakurian iginsasakripisyo han iba an ira espirituwalidad basi maipadayon an ira nahiaraan na nga estilo han pagkinabuhi. An sugad nga pagin materyalistiko nakakalipay gud ha ‘parapanakop hin tamsi’!

An Lit-ag han Nakakadaot nga Kaliawan

10. Kay ano nga sadang usisahon han tagsa nga Kristiano an ira kalugaringon?

¹⁰ An usa pa nga paagi han ‘parapanakop hin tamsi’ amo an pagpaluya han natural nga pag-abat han mga tawo ha kon ano an maopay ngan maraot. Kadam-an han kaliawan yana naimpluwensyahan gud han panhunahuna nga pariho han ha Sodoma ngan Gomorra. Bisan an mga sumat ha telebisyon ngan peryodiko nagpapabug-at han kamadarahog ngan nagpapatagbaw han malaw-ay nga hilig ha pakighilawas. Kadam-an han kaliawan nga ipinapakita ha media nakakadaot ha abilidad han mga tawo ha “pagkilala han maopay ngan han maraot.” (Hebreo 5:14) Kondi, hinumdumi an ginsiring ni Jehova pinaagi kan propeta Isaias: “Kairo nira nga natawag han karaotan nga maopay, ngan han maopay nga maraot!” (Isaias 5:20) An iyo ba panhunahuna hinay-hinay nga nalilimbongan han ‘parapanakop hin tamsi’ pinaagi han nakakadaot nga kaliawan? Importante nga usisahon an kalugaringon.—2 Korinto 13:5.

11. Ano an iginpahamangno dinhi mahitungod han mga telenobela?

¹¹ Haros 25 ka tuig na an naglabay, an The Watchtower mahigugmaon nga nagpahamangno ha mga magsiringba han Dios mahitungod han mga teleserye. a Ini an ginsiring mahitungod han tuso nga epekto han popular nga telenobela: “An pamiling hin gugma ginagamit sugad nga husto nga rason han bisan ano nga paggawi. Pananglitan, usa nga diri-kasal nga burod nga batan-on an nagsiring ha iya sangkay: ‘Kondi hinigugma ko hi Victor. Waray ko labot. . . . Importante gud ha akon an magkaanak ha iya!’ Tungod han maopay nga musika haros diri na nahuhunahuna han mga nagkikita nga imoral an iya ginbuhat. Ikaw liwat nga nagkikita naruruyag na kan Victor. Napaid ka na ha babaye. ‘Nasasabtan’ mo an ira ginbuhat. ‘Diri katoohan nga ginpapakamatadong mo na an imo panhunahuna,’ siring han usa nga nagkikita nga nakapamurubuot ha urhi. ‘Maaram kita nga maraot an imoralidad. . . . Kondi ha akon hunahuna, baga hin hinsasabtan ko na an imoral nga mga tawo.’”

12. Ano nga mga impormasyon an nagpapakita nga husto an pahamangno mahitungod han pipira nga programa ha TV?

¹² Tikang nga naipublikar ito nga mga artikulo, mas nagtikadamu pa ini nga klase hin nakakadaot  nga mga programa. Ha damu nga lugar, an sugad hito nga mga programa iginpapasalida ha sulod hin 24 oras ha bug-os nga adlaw. Agsob nga ginpupuno han kalalakin-an, kababayin-an, ngan damu nga tinedyer an ira hunahuna ngan kasingkasing hin sugad nga kaliawan. Kondi, kinahanglan diri naton limbongan an aton kalugaringon han sayop nga pangatadongan. Sayop an pangatadongan nga diri gud nakakadaot an magraot nga kaliawan kay han aktuwal nga nakikita naton ha kalibotan. Mahimo gud ba mangatadongan an usa nga Kristiano nga husto an iya pagpili nga maliaw han mga tawo nga waray gud niya mahunahuna nga imbitaron ha iya balay?

13, 14. Ano an ginsiring han iba kon paonan-o nakabulig ha ira an mga pahamangno mahitungod han TV?

¹³ Damu an nabubuligan kon ira ginsusunod ito nga pahamangno han “matinumanon ngan maaramon nga uripon.” (Mateo 24:45-47, NW) Katapos basahon an prangka, basado-ha-Biblia nga sagdon, an iba nagsurat nga an mga artikulo nakabulig gud ha ira. b Usa an nagsiring: “Ha sulod hin 13 ka tuig nagiyan ako ha telenobela. Kahuna ko nga diri madadaot an akon espirituwalidad kon matambong la ako ha Kristiano nga mga katirok ngan panalagsa nga masangyaw. Kondi naimpluwensyahan na ako han kalibotanon nga disposisyon ha telenobela nga kon maraot an pagtratar ha imo han imo bana o kon inaabat mo nga diri ka hinigugma niya, husto la nga mag-adulteryo—hiya an angay basulon. Salit han inabat ko nga ‘husto’ ito, nag-adulteryo ako ngan nakasala kan Jehova ngan ha akon bana.” Ini nga babaye ginpaiwas ha kongregasyon. Inabot an panahon nga nakapamurubuot hiya, nagbasol, ngan nakabalik ha kongregasyon. An mga artikulo nga nagpapahamangno kontra ha mga telenobela nagparig-on ha iya nga diri na malipay ha kinangangalasan ni Jehova.—Amos 5:14, 15.

¹⁴ Usa pa nga magbarasa nga naapektohan an kinabuhi an nagsiring: “Nagtangis ako han ginbasa ko an mga artikulo, kay hinbaroan ko nga an akon kasingkasing diri na bug-os ngadto kan Jehova. Nagsaad ako ha Dios nga diri na ako magpapauripon hini nga mga telenobela.” Katapos magpasalamat para ha mga artikulo an usa nga Kristiano nga babaye, iya ginkarawat an iya pagkahilig ngan nagsurat: “Naghunahuna ako . . . kon maaapektohan ba an akon relasyon kan Jehova. Puydi ba nga magin sangkay ko an mga artista ha telenobela ngan magin sangkay ko liwat hi Jehova?” Kon an sugad nga mga salida ha TV nakadaot han mga kasingkasing 25 ka tuig na an naglabay, ano an epekto hito yana? (2 Timoteo 3:13) Kinahanglan maaram kita han ngatanan nga klase han nakakadaot nga kaliawan nga lit-ag ni Satanas, sugad han mga telenobela, madarahog nga mga video game, o imoral nga video nga musika.

An Lit-ag han Diri-Pagsinabtanay

15. Paonan-o an iba sugad hin nadadakop nga buhi han Yawa?

¹⁵ Ginagamit ni Satanas an diri-pagsinabtanay sugad nga lit-ag nga nakakagbahin-bahin han katawohan ni Jehova. Mahimo kita mahilit-ag hini anoman an aton mga pribilehiyo ha pag-alagad. An iba sugad hin nadadakop nga buhi han Yawa tungod kay gintugotan nira an diri-pagsinabtanay nga magwara han kamurayawan ngan pagkaurosa  ngan han makalilipay nga pag-uswag ha espirituwal nga ginpapahinabo ni Jehova.—Salmo 133:1-3.

16. Paonan-o tuso nga nangangalimbasog hi Satanas ha pagdaot han aton pagkaurosa?

¹⁶ Durante han Girra ha Kalibotan I, nangalimbasog hi Satanas nga bungkagon an organisasyon ni Jehova dinhi ha tuna pinaagi han direkta nga pag-atake, kondi napakyas hiya. (Pahayag 11:7-13) Tikang hito nga panahon, tuso nga nangangalimbasog hiya ha pagdaot han aton pagkaurosa. Kon tinutugotan naton an diri-pagsinabtanay nga magin hinungdan han pagkabahin-bahin, gintatagan naton hin higayon ‘an parapanakop hin tamsi’ nga maglampos. Tungod hito, mapupugngan naton an padayon nga paggios han baraan nga espiritu ha aton kinabuhi ngan ha kongregasyon. Kon ito an mahitabo, malilipay gud hi Satanas tungod kay an bisan ano nga kadaot ha kamurayawan ngan pagkaurosa han kongregasyon, makakaulang han pagsangyaw.—Efeso 4:27, 30-32.

17. Ano an makakabulig basi masulbad an diri- pagsinabtanay?

¹⁷ Ano an imo mahimo buhaton kon ikaw ngan an usa nga igkasi-Kristiano diri nagsisinabtanay? Syempre, iba-iba an kahimtang. Kondi, bisan kon damu an hinungdan kon kay ano nga nagkakaproblema, waray hinungdan nga diri masulbad an diri-pagsinabtanay. (Mateo 5:23, 24; 18:15-17) Giniyahan ngan hingpit an sagdon ha Pulong han Dios. Kon susundon an mga prinsipyo ha Biblia, diri ka gud mapapakyas. Maopay pirme an resulta hito!

18. Kay ano nga an pagsubad kan Jehova mabulig ha aton ha pagsulbad han diri-pagsinabtanay?

¹⁸ Hi Jehova “andam ha pagpasaylo,” ngan sinsero nga ‘nagpapasaylo.’ (Salmo 86:5; 130:4) Ipinapakita naton nga hinigugma kita nga mga anak ni Jehova kon ginsusubad naton hiya. (Efeso 5:1) Magpakasasala kita ngatanan ngan nagkikinahanglan gud han pagpasaylo ni Jehova. Salit, kinahanglan mag-ikmat kita kon nahihilig kita ha diri pagpasaylo ha iba. Mahimo kita magin pariho ha uripon ha parabola ni Jesus nga waray magpasaylo ha iya igkasi-uripon nga gutiay la an utang kon itanding ha iya daku nga utang nga ginkansela han iya agaron. Han hinbaroan ito han agaron, iya iginpapriso an diri mapinasayloon nga uripon. Gintapos ni Jesus an parabola ha pagsiring: “Amo man ito an bubuhaton han akon langitnon nga Amay ha iyo, kon diri an tagsa-tagsa ha iyo magpasaylo ha iyo bugto tikang ha iyo mga kasingkasing.” (Mateo 18:21-35) An pagpamalandong hito nga ilustrasyon ngan paghunahuna nga damu ka beses nagpapasaylo ha aton hi Jehova mabulig gud ha aton kon nangangalimbasog kita ha pagsulbad han diri-pagsinabtanay ha aton kabugtoan!—Salmo 19:14.

Talwas ha Tago nga “Pinapahuwayan han Gihitaasi”

19, 20. Paonan-o naton sadang tagdon an tago nga “pinapahuwayan” ngan an “lambong” ni Jehova durante hinin peligroso nga panahon?

¹⁹ Nagkikinabuhi kita ha peligroso nga panahon. Sigurado nga nabungkag na unta kita ngatanan ni Satanas kon waray kita han mahigugmaon nga panalipod ni Jehova. Salit, basi diri malit-agan han ‘parapanakop hin tamsi,’ kinahanglan magpabilin kita ha simboliko nga lugar han panalipod, “naukoy dida ha pinapahuwayan han Gihitaasi . . . ha ilarom han lambong han Makagarahum.”—Salmo 91:1.

²⁰ Hinaot tagdon naton pirme an mga pahinumdom ngan mga giya ni Jehova sugad nga pagpanalipod, diri gud pag-istrikto. Kita ngatanan namimeligro ha kaaway nga labaw ha tawo an intelihensya. Kon waray an mahigugmaon nga bulig ni Jehova, waray gud makakatalwas ha lit-ag. (Salmo 124:7, 8) Salit mag-ampo kita nga talwason kita ni Jehova tikang ha mga lit-ag han ‘parapanakop hin tamsi’!—Mateo 6:13.

[Mga footnote]

Nahinunumdoman Mo Ba?

• Kay ano nga an “kahadlok ha tawo” makamaratay nga lit-ag?

• Paonan-o ginagamit han Yawa an paon han materyalismo?

• Ha ano nga paagi ginlilit-agan ni Satanas an iba pinaagi han nakakadaot nga kaliawan?

• Ano nga lit-ag an ginagamit han Yawa ha pagdaot han aton pagkaurosa?

[Mga Pakiana]

[Retrato ha pahina 27]

Nahilit-ag an iba tungod ha “kahadlok ha tawo”

[Retrato ha pahina 28]

Nalilipay ka ba ha kinangangalasan ni Jehova?

[Retrato ha pahina 29]

Ano an mahimo buhaton han mga Kristiano kon diri hira nagsisinabtanay?