Mga Desisyon nga Nagriresulta ha Kalipay

“GINBUHAT ko unta ini ha iba nga paagi!” Pira ka beses nga ginsiring mo na ito ha imo kalugaringon? Ngatanan kita naruruyag paghimo hin desisyon nga diri naton pagbabasulan, labi na kon nakakaapekto ito ha aton kinabuhi. Kondi, ha ano nga paagi makakahimo kita hin mga desisyon nga magriresulta ha kalipay?

Siyahan, kinahanglan kita magkaada mga suruklan nga masasarigan gud. May-ada ba sugad hito nga mga suruklan? Damu an naghuhunahuna nga waray. Sumala ha usa nga surbey ha Estados Unidos, 75 porsyento han magradwar nga estudyante ha kolehiyo an natoo nga waray suruklan hin husto ngan sayop, ngan nadepende an konsepto han maopay ngan maraot ha “pagkaiba-iba han prinsipyo ngan kultura han kada indibiduwal.”

Makatadunganon gud ba an paghunahuna nga an mga suruklan ha moral nadepende la ha personal nga opinyon o panhunahuna han kadam-an? Diri. Kon an mga tawo may kagawasan ha pagbuhat han bisan ano nga ira karuyag, magriresulta ito hin kasamok. Hin-o an maruruyag pag-ukoy ha lugar nga waray mga balaud, korte, ngan kapulisan? Dugang pa, diri pirme masasarigan an personal nga opinyon. Bangin pilion naton nga buhaton an aton gintotoohan nga husto, kondi hinbaroan naton ha urhi nga sayop ngay-an kita. Oo, ginpapamatud-an han bug-os nga kasaysayan han tawo ini nga punto ha Biblia: “Diri aada ha tawo nga naglalakat an pagmando han iya mga pitad.” (Jeremias 10:23) Kon sugad, diin kita mamimiling hin mga giya kon naghihimo kita hin desisyon may kalabotan ha importante nga mga isyu ha kinabuhi?

An batan-on nga magmarando nga gin-unabi ha nauna nga artikulo maaramon nga kinadto kan Jesus. Sugad han aton hinbaroan, han ginbaton ni Jesus an pakiana han batan-on, iya gin-unabi an Balaud han Dios. Ginkikilala ni Jesus nga hi  Jehova nga Dios amo gud an Surok han kahibaro ngan kinaadman ngan maaram Hiya kon ano an gimaopayi para ha Iya mga linarang. Katapos, hi Jesus nagsiring: “An akon pagtutdo, diri akon, kondi kanan han nagpakanhi ha akon.” (Juan 7:16) Ha pagkatinuod, an Pulong han Dios masasarigan nga surok han giya nga mabulig ha aton nga makahimo hin maaramon nga mga desisyon. Paghisgotan naton an pipira nga prinsipyo ha Pulong han Dios nga kon iaplikar, mabulig ha aton nga magin mas malipayon.

An Bulawanon nga Surundon

Ha bantogan nga Sermon ni Jesus ha Bukid, nagtutdo hiya hin basihan nga prinsipyo nga mabulig ha aton ha paghimo hin maaramon nga desisyon may kalabotan ha aton pagtagad ha iba. Ini an iya ginsiring: “Busa, an ngatanan nga mga butang, nga buot niyo ipapagbuhat han mga tawo ha iyo, buhata man niyo ha ira.” (Mateo 7:12) Ini nga prinsipyo agsob tawagon nga Bulawanon nga Surundon.

Ginagamit han iba ini nga surundon ha negatibo nga paagi: “An diri mo karuyag buhaton ha imo, ayaw pagbuhata ha iba.” Basi ipakita an kaibahan han Bulawanon nga Surundon ngan han negatibo nga paagi han pagkasaysay hito, tagda an parabola ni Jesus mahitungod han buotan nga Samaritano. Usa nga Judio an ginkastigo ngan ginbayaan nga haros patay na ha ligid han kalsada. May saserdote ngan Lebita nga kinita ha iya kondi linabay la. Tungod kay waray nira dugangi an kasakitan han tawo, bangin masisiring nga gumios hira uyon ha negatibo nga paagi hini nga prinsipyo. Ha kabaliktaran, usa nga Samaritano an inundang basi bumulig. Iya gintambal an mga samad ngan gindara an tawo ha papletehan nga balay. Ginhimo niya an karuyag niya buhaton ha iya kon aada hiya hito nga sitwasyon. Iya gin-aplikar an Bulawanon nga Surundon—ngan naghimo hin husto nga desisyon.—Lukas 10:30-37.

Damu an paagi nga maiaaplikar naton ini nga prinsipyo han panggawi nga maghahatag ha aton hin makalilipay nga mga resulta. Pananglitan, usa nga pamilya an binalhin ha iyo lugar. Kay ano nga diri mag-una ha pakigkilala ngan pag-abiabi ha ira? Bangin buligan mo hira ha mga lugar ngan mga butang nga diri nira hinbabaroan, ngan ha ira mga ginkikinahanglan. Pinaagi ha pag-una ha pagtagad ha ira, igin-aaghat mo an maopay nga relasyon. Matatagbaw ka liwat ha paghibaro nga an imo ginbuhat nalilipayan han Dios. Diri ba ito maaramon nga desisyon?

Mga Desisyon nga Iginbasar ha Gugma ha Iba

Dugang pa ha Bulawanon nga Surundon, hi Jesus naghatag hin giya nga makakabulig ha imo ha paghimo hin maaramon nga desisyon. Han ginpakianhan hi Jesus kon ano an pinakaimportante nga sugo ha balaud nga iginhatag kan Moises, hiya nagsiring: “Higugmaon mo an Ginoo nga imo Dios ha bug-os mo nga kasingkasing ngan ha bug-os mo nga kalag, ngan ha bug-os mo nga hunahuna. Ini amo an daku ngan siyahan nga sugo. Ngan an ikaduha, sugad hini: Higugmaon mo an imo igkasitawo sugad ha imo ngahaw. An bug-os nga kasugoanan ngan an mga Manaragna natikang hini nga duha nga Sugo.”—Mateo 22:36-40.

Ha gab-i antes mamatay hi Jesus, iya gintagan an iya mga disipulo hin “bag-o nga sugo” nga maghigugmaay ha usa kag usa. (Juan 13:34) Kay ano nga gintawag niya nga bag-o ito nga sugo? Diri ba iginsaysay na niya nga an paghigugma ha ira igkasi-tawo usa han duha nga sugo nga gintikangan han bug-os nga Balaud? Ha balaud nga iginhatag kan Moises, an mga Israelita ginsugo: “Higugmaon mo an imo igkasi-tawo sugad ha imo ngahaw.” (Lebitiko 19:18) Kondi, labaw pa hito an iginpapabuhat yana ni Jesus ha iya mga disipulo. Hito mismo nga gab-i, iya ginsidngan an iya mga disipulo nga hirani na niya ihatag an iya kinabuhi para ha ira. Katapos, hiya siniring: “Ini amo an akon sugo, nga maghigugmaanay kamo an usa kag usa, sugad gud han akon paghigugma ha iyo. Waray darodaku nga gugma han tawo kay hini nga gugma nga an usa ka tawo, nga makakaghatag han iya kinabuhi tungod han iya mga kasangkayan.” (Juan 15:12, 13) Oo, bag-o ini nga sugo tungod kay nagkikinahanglan ito ha pag-una han kaopayan han iba kay han personal nga kaopayan.

Damu an paagi nga maipapakita naton an diri-hakugnon nga gugma—an pagbuhat diri la han  makakaopay ha aton. Pananglitan, naukoy ka ha apartment ngan karuyag mo mamati hin musika ha kakusog nga imo naruruyagan kondi nakakadisturbo ha imo amyaw. Andam ka ba nga pugngan an imo kalipay basi diri hira madisturbo? Ha iba nga pagkayakan, mahimo mo ba tagdon an kaopayan han iba imbes han imo karuyag?

Tagda an usa pa nga sitwasyon. Usa ka adlaw ha panahon han katugnaw ha Canada, ginbisita han duha nga Saksi ni Jehova an usa nga lagas. Durante han ira pag-istorya, naisumat han lagas nga may-ada hiya sakit ha kasingkasing salit diri niya nahahawan an niebe ha prente nga aragian han iya balay. Paglabay hin por lo minos usa ka oras, hinbatian niya nga may-ada nagpapala. Binalik an duha nga Saksi basi hawanan an aragian tipakadto ha iya prente nga purtahan. “Yana naeksperyensyahan ko an tinuod nga Kristiano nga gugma,” hiya nagsiring ha iya surat ha sanga nga opisina han mga Saksi ni Jehova ha Canada. “Tungod gud hito, napauswag ngan nagin mas positibo an akon pagtagad ha kalibotan yana. Dugang pa, mas naparig-on hito an akon daku na nga pagtahod han iyo bug-os kalibotan nga mga pangalimbasog.” Oo, an pagdesisyon ha pagbulig, anoman kaguti ito, mahimo makaapekto ha iba ha positibo nga paagi. Daku gud an kalipay ha paghimo hin desisyon nga nagpapakita hin pagsakripisyo ha kalugaringon!

Mga Desisyon nga Iginbasar ha Gugma ha Dios

Usa pa nga kinahanglan naton tagdon kon kita naghihimo hin mga desisyon amo an gintawag ni Jesus nga an pinakaimportante nga sugo—nga higugmaon naton an Dios. An mga pulong ni Jesus para ha mga Judio nga iginpahinungod na kan Jehova sugad nga nasud. Bisan pa hito, an tagsa nga Israelita kinahanglan magdesisyon kon bug-os-kalag ngan bug-os-kasingkasing ba hira nga mag-aalagad ha ira Dios.—Deuteronomio 30:15, 16.

Ha pariho nga paagi, an imo mga desisyon nagpapakita han imo inaabat kan Jehova. Pananglitan, samtang nag-uuswag ka ha kahibaro ha praktikal nga bili han Biblia, ikaw liwat naatubang hin pagdesisyon. Andam ka ba ha pag-aram han Biblia ha sistematiko nga paagi nga an tumong amo an pagin sumurunod ni Jesus? An pagbuhat hito sigurado nga maghahatag ha imo hin kalipay, kay hi Jesus nagsiring: “Malipayon adton mahunahunaon han ira espirituwal nga panginahanglan.”—Mateo 5:3, NW.

Diri kita maaram kon ginbasulan han batan-on nga magmarando an iya desisyon. Kondi, maaram gud kita kon ano an gin-abat ni apostol Pedro katapos sumunod kan Jesu-Kristo ha sulod hin damu ka tuig. Han mga 64 K.P., han hirani na hi Pedro mamatay, gindasig niya an iya mga igkasi-tumuroo: “Magtalinguha gud kamo nga hiagian kamo [han Dios] ha paghidait, nga waray buring ngan kasaypanan.” (2 Pedro 1:14; 3:14) Matin-aw nga waray pagbasuli ni Pedro an desisyon nga iya ginhimo sobra 30 ka tuig na an naglabay, ngan gindasig niya an iba nga magpabilin liwat ha ira nagin desisyon.

An pagsunod han sagdon ni Pedro nangangahulogan hin pagdesisyon ha pagkarawat han mga responsabilidad han pagin disipulo ni Jesus ngan ha pagtuman han mga sugo han Dios. (Lukas 9:23; 1 Juan 5:3) Baga hin makuri ini, kondi ginpapasarig kita ni Jesus pinaagi han iya saad: “Kadi ngatanan kamo ha akon, nga nagbubuhat  ngan binubug-atan, ngan akon kamo tatagan hin pagpahuway. Pas-ana niyo an akon yugo, ngan magtoon kamo ha akon, kay ako maaghop ngan mapainubsanon ha kasingkasing, ngan kamo makakaagi hin pagpahuway ha iyo mga kalag. Kay an akon yugo masayon, ngan an akon pinas-an magaan.”—Mateo 11:28-30.

Tagda an eksperyensya ni Arthur. Han dyes anyos hiya, nag-aram hiya hin biyolin basi ito an iya magin propesyon. Han 14 anyos hiya, nagin paratokar na hiya ha konsyerto. Bisan pa hito, diri hiya malipayon. Pirme may-ada pakiana an iya amay mahitungod han kahulogan han kinabuhi ngan nag-iimbitar hin mga magturutdo hin relihiyon ha ira balay; kondi, waray gud hiya matagbaw ha ira baton. Sugad nga pamilya, ira gin-iiristoryahan kon naeksister gud ba an Dios ngan kon kay ano nga gintutugotan niya an karaotan. Katapos, nakaistorya han iya amay an mga Saksi ni Jehova. Nagkainteres an iya amay nga nagresulta han pag-aram han Biblia han bug-os nga pamilya.

Inabot an panahon, hinsabtan ni Arthur tikang ha Biblia kon kay ano nga gintutugotan han Dios an pag-antos, ngan matin-aw nga hinbaroan niya an katuyoan han kinabuhi. Hi Arthur, upod han tulo nga iya kapamilya, naghimo hin desisyon nga waray niya pagbasuli. Iya gindedikar an iya kinabuhi kan Jehova. “Malipayon ako hinduro nga gintagan ako ni Jehova hin kahibaro mahitungod han kamatuoran ngan ginluwas ako tikang ha pagkurompetensyahay nga komon ha mga musikero. Basi maglampos, bubuhaton han mga tawo an bisan ano.”

Nalilipay pa gihapon hi Arthur ha pagtokar hin biyolin para ha iya kasangkayan. Kondi an iya kinabuhi diri nakasentro hito, lugod ha iya pag-alagad ha Dios. Nag-aalagad hiya ha usa nga sanga nga opisina han mga Saksi ni Jehova. Pariho kan Arthur ngan han minilyon nga iba pa, kondi diri pariho ha riko nga batan-on nga magmarando, ikaw liwat makakahimo hin maaramon nga desisyon nga maghahatag ha imo hin daku gud nga kalipay—an pagkarawat han imbitasyon ni Jesus nga magin iya sumurunod.

[Retrato ha pahina 6]

An imo desisyon makakaapekto ha kinabuhi han iba

[Retrato ha pahina 7]

Mag-aaram ka ba han Biblia ngan magin sumurunod ni Jesus?