Mga Pakiana Tikang ha mga Magbarasa

Diri ba sayop para kan Jakob nga magpakuno-kuno nga hiya hi Esaw, sugad han nakarekord ha Genesis 27:18, 19?

Bangin pamilyar ka hini nga asoy. Han lagas na hi Isaak nagsugo hiya kan Esaw nga mamiling hin karne hin bugsok ngan hiya nagsiring: “Basi ako kumaon; basi an akon kalag magbendisyon ha imo nga diri pa ako mapatay.” Han hinbatian ito han iya asawa nga hi Rebeka, nag-andam hi Rebeka hin marasa nga pagkaon ngan ginsugo hi Jakob: “Imo [an pagkaon] dad-on ha imo amay, basi hiya kumaon, basi hiya magbendisyon ha imo nga diri pa hiya mapatay.” Katapos kinadto ha iya amay hi Jakob, nga dara an marasa nga pagkaon, nga nakasul-ot hin bado ni Esaw ngan nagbutang hin barahibo hin nati nga mga kanding ha iya liog ngan mga kamot. Han hi Isaak nagpakiana ha iya, “Hin-o ka ba, anak ko?” hi Jakob binaton: “Ako hi Esaw an imo suhag.” Tinuod ha iya hi Isaak ngan ginbendisyonan hiya.—Genesis 27:1-29.

Waray isumat ha aton han Biblia kon kay ano nga ginbuhat ito nira Rebeka ngan Jakob, kondi iginpapakita gud hito nga tigda ito nga panhitabo. Sadang naton tigamnan nga waray uyuni o kondenara han Pulong han Dios an ira ginbuhat, salit diri ito basihan para ha pagbuwa ngan paglimbong. Kondi, an Biblia naghahatag hin impormasyon mahitungod hito nga sitwasyon.

Siyahan, matin-aw nga ipinapakita han asoy nga hi Jakob may katungod nga bendisyonan han iya amay kondi waray katungod hi Esaw. Antes pa hito, legal nga ginpalit ni Jakob an katungod ha pagkamagurang tikang ha iya waray pag-apresyar nga karuha nga nagbaligya hito para la hin pagkaon basi matagbaw an iya kagutom. Hi Esaw ‘nagtamay han iya pagkamagurang.’ (Genesis 25:29-34) Salit ha pagdaop ni Jakob ha iya amay, inaaro la niya an bendisyon nga legal nga para ha iya.

Ikaduha, han hinbaroan ni Isaak nga hi Jakob an iya ginbendisyonan, waray na niya bag-oha an iya ginbuhat. Bangin nahinumdoman niya an ginsiring ni Jehova kan Rebeka antes matawo an magkaruha: “An magurang mag-aalagad han manghod.” (Genesis 25:23) Makatirigamnan liwat nga han tikadto na hi Jakob ha Haran, gindugangan ni Isaak an bendisyon nga iya na ginsiring.—Genesis 28:1-4.

Ha kataposan, sadang hinumdoman nga hi Jehova maaram ngan interesado ha ngatanan nga nahitatabo. An bendisyon nga iginhatag ni Isaak may kalabotan ha saad han Dios kan Abraham. (Genesis 12:2, 3) Kon diri karuyag han Dios nga an bendisyon mahingadto kan Jakob, iya unta ginpugngan ito. Lugod, ginparig-on ito ni Jehova kan Jakob ha pagsiring: ‘Pinaagi han imo [binhi] pagpapakaupayon an ngatanan nga kanasuran.’—Genesis 28:10-15, Maopay nga Sumat nga Biblia.